“Murena, Ri Funze U Rabela”
“Murena, Ri Funze U Rabela”
“Muṅwe wa vhafunziwa vhawe a amba nae’ a ri: Murena, ri funze u rabela.”—LUKA 11:1.
1. Ndi ngani muṅwe wa vhafunziwa vha Yesu o humbela u ri Yesu a vha funze nḓila ya u rabela?
NGA muṅwe musi nga 32 C.E, mufunziwa wa Yesu o mu lavhelesa musi A tshi khou rabela. O vha a sa koni u pfa zwe Yesu a vha a tshi khou zwi amba na Khotsi awe, ngauri khamusi o vha a tshi khou rabela nga ipfi ḽi re fhasi. Naho zwo ralo, musi Yesu a tshi fhedza, onoyo mufunziwa a ri khae: “Murena, ri funze u rabela.” (Luka 11:1) Ndi mini tsho itaho uri a ite yeneyo khumbelo? Thabelo yo vha i tshipiḓa tsha tshifhinga tshoṱhe tsha vhutshilo na vhurereli zwa Tshiyuda. Maṅwalo a Luheberu a na thabelo nnzhi kha bugu ya Dzipsalme na kha dziṅwe bugu. Ngauralo onoyo mufunziwa o vha a si khou humbela u funzwa tshiṅwe tshithu tshe a vha a sa tshi ḓivhi kana tshe a vha a sa athu tshi ita. Zwi khagala uri o vha a tshi ḓivha thabelo dza mukhuvha dza vharangaphanḓa vha vhurereli ha Tshiyuda. Fhedzi zwino o vhona Yesu a tshi khou rabela, nahone khamusi o vhona phambano khulwane vhukati ha thabelo dza vharangaphanḓa vha vhurereli dza u ḓiita vho lugaho na nḓila ye Yesu a rabela ngayo.—Mateo 6:5-8.
2. (a) Ndi mini tshi sumbedzaho uri Yesu o vha a sa khou ṱoḓa uri ri dovholole thabelo ya tsumbo ipfi nga ipfi? (b) Ndi ngani ri tshi ṱoḓa u ḓivha nḓila ine ra fanela u rabela ngayo?
2 Nga murahu ha miṅwedzi i ṱoḓaho u vha ya 18, Pfunzoni yawe ya Thavhani, Yesu o ṋea vhafunziwa vhawe tsumbo ya zwithu zwine vha nga zwi rabelela. (Mateo 6:9-13) Zwi vhonala uri onoyu mufunziwa o vha a siho nga tshenetsho tshifhinga, ngauralo Yesu o dovholola nga vhulenda mbuno dza ndeme dza yeneyo thabelo ya tsumbo. Tshi swayeaho ndi uri ho ngo dovholola yeneyo thabelo ipfi nga ipfi, zwine zwa sumbedza uri o vha si khou vha ṋea thabelo ine vha tea u i rwela ngomani ngeno vha sa ḓivhi zwine ya amba zwone. (Luka 11:1-4) U fana na onoyo mufunziwa a songo bulwaho nga dzina, na riṋe ri ṱoḓa u funzwa nḓila ya u rabela u itela uri thabelo dzashu dzi ri sendedze tsini na Yehova. Nga zwenezwo kha ri ṱolisise nga vhuḓalo thabelo ya tsumbo, samusi yo ṅwaliwa nga muapostola Mateo. Ina zwithu zwa sumbe zwine ra nga zwi humbela, zwine zwiraru zwa kwama ndivho dza Mudzimu nahone zwiṋa zwa kwama ṱhoḓea dzashu dza ṋama na dza muya. Kha ino thero ri ḓo haseledza khumbelo tharu dza u thoma.
Khotsi Wa Lufuno
3, 4. Zwi amba mini u vhidza Yehova “Khotsi-ashu”?
3 U bva mathomoni, Yesu o sumbedza uri thabelo dzashu dzi fanela u sumbedza vhukonani ha tsini na Yehova, fhedzi nga nḓila i sumbedzaho ṱhonifho. A tshi amba zwihuluhulu u itela u vhuyedza vhafunziwa vhawe vhe vha vha vho kuvhangana tsini hawe henefho thavhani, Yesu o ri vha vhidze Yehova nga uri “Khotsi-ashu wa ṱaḓulu!” (Mateo 6:9) U ya nga muṅwe mugudi, naho Yesu o amba nga luambo lwo ḓoweleaho lwa Luheberu kana Luaramiki, ipfi ḽe a ḽi shumisa ḽine ḽa amba “Khotsi” ḽi fana vhukuma na ḽine ṅwana muṱuku a ḽi shumisa a tshi vhidza khotsi awe. U vhidza Yehova uri ndi “Khotsi-ashu” zwi sumbedza uri ri na vhushaka havhuḓi na vhu fulufhedzeaho nae.
4 Nga u amba uri “Khotsi-ashu” zwi dovha zwa sumbedza uri ri a ṱhogomela uri ri tshipiḓa tsha muṱa muhulwane wa vhanna na vhasadzi vhane vha ṱhogomela uri Yehova ndi Muṋei wa Vhutshilo. (Yesaya 64:8; Mishumo 17:24, 28) Vhakriste vho ḓodzwaho nga muya ndi “vhana vha Mudzimu,” nahone vha a mu ‘vhidzelela vha ri: Aba, Khotsi!’ (Vha-Roma 8:14, 15) Vha dzimilioni vho vha khonani dzavho dzi fulufhedzaho. Vhenevho vho ṋekedza vhutshilo havho kha Yehova nahone vha zwi sumbedza nga u lovhedzwa. Vhenevha vha “dziṅwe nngu” na vhone vha a kona u amba na Yehova nga dzina ḽa Yesu nahone vha Mu vhidza “Khotsi-ashu.” (Yohane 10:16; 14:6) Ri nga rabela Khotsi ashu wa ṱaḓulu tshifhinga tshoṱhe u itela u mu renda, u mu livhuha zwithu zwivhuya zwoṱhe zwe a ri itela zwone, na u mu vhudza mbilaelo dzashu, ri na fulufhelo ḽa uri u a ri ṱhogomela.—Vha-Filipi 4:6, 7; 1 Petro 5:6, 7.
U Funa Dzina Ḽa Yehova
5. Khumbelo ya u thoma ya thabelo ya tsumbo ndi ifhio nahone ndi ngani yo tea?
5 Khumbelo ya u thoma yo rangisa nga u ṱavhanya zwithu zwo teaho u vhewa phanḓa. I ri: “Dzina ḽau ḽi khethwe.” (Mateo 6:9) Ee, u khetha dzina ḽa Yehova zwi fanela u vha zwithu zwa ndeme kha riṋe ngauri ri a mu funa nahone ri vhenga zwithu zwinzhi zwine zwa nyadzisa dzina ḽawe. U vutshela ha Sathane na u kunga hawe vhavhingani vha u thoma uri vha si thetshelese Yehova Mudzimu zwo solisa dzina Ḽawe nga u ita uri hu vhe na u timatima nḓila ye Mudzimu a vha a tshi khou shumisa ngayo vhuvhusahoṱhe hawe. (Genesi 3:1-6) Zwiṅwe hafhu, u bva u vutshelani ha u thoma, dzina ḽa Yehova ḽo nyadziwa nga mishumo na pfunzo zwi shonisaho dza vhane vha ḓiamba uri vha a mu imelela.
6. Arali ri tshi rabelela uri dzina ḽa Yehova ḽi khethwe, ri ḓo iledza mini?
6 U rabelela hashu uri dzina ḽa Yehova ḽi khethwe zwi sumbedza uri ro ima ngafhi kha khaedu ya vhuvhusahoṱhe—uri ri a tikedza ro khwaṱha ndugelo ya Yehova ya u vhusa fhethu hoṱhe. Yehova u ṱoḓa fhethu hoṱhe hu tshi dzulwa nga zwivhumbiwa zwo ṱalifhaho zwine zwa ḓiṱukufhadzela nga u ḓifunela na nga dakalo vhuvhusahoṱhe hawe ho lugaho nga ṅwambo wa uri vha a mu funa na u funa vhoṱhe vhane vha imelela dzina ḽawe. (1 Koronika 29:10-13; Psalme ya 8:1; 148:13) U funa hashu dzina ḽa Yehova zwi ḓo ri thusa u iledza u ita naho tshi tshini tshine tsha nga solisa ḽeneḽo dzina ḽikhethwa. (Hesekiele 36:20, 21; Vha-Roma 2:21-24) Samusi mulalo wa fhethu hoṱhe na wa vhathu vhoṱhe u tshi ḓitika nga u khetha dzina ḽa Yehova na u ḓivhea nga fhasi ha vhuvhusi hawe nga lufuno, u rabela hashu uri “dzina ḽau ḽi khethwe” zwi sumbedza u vha hashu na fulufhelo ḽa uri ndivho ya Yehova ine ya ḓo mu ḓisela thendo i ḓo ḓadzea.—Hesekiele 38:23.
Muvhuso Une Ra U Rabelela
7, 8. (a) Muvhuso we Yesu a ri funza uri ri u rabelele ndi ufhio? (b) Ri guda mini nga ha wonoyu Muvhuso kha bugu ya Daniele na ya Nzumbululo?
7 Khumbelo ya vhuvhili ya thabelo ya tsumbo ndi ya uri: “Muvhuso wau u ḓe.” (Mateo 6:10) Heyi khumbelo i tshimbilelana vhukuma na ya u thoma. Tshishumiswa tsha Yehova tsha u ita uri dzina ḽawe ḽikhethwa ḽi khethwe ndi Muvhuso wa Vhumessia, hulumeni yawe ya ṱaḓulu, une Murwa wawe, Yesu Kristo, a vha Khosi yawo yo vhewaho. (Psalme ya 2:1-9) Vhuporofita ha Daniele vhu ṱalusa Muvhuso wa Vhumessia sa “tombo” ḽe ḽa phiguluswa u bva “thavhani.” (Daniele 2:34, 35, 44, 45) Thavha i imela vhuvhusahoṱhe ha Yehova, ngauralo muvhuso u imelwaho nga tombo u sumbedza vhuvhusahoṱhe ha Yehova. Kha vhuporofita, tombo “ḽa mbo vha thavha khulu ye ya ḓadza shango ḽoṱhe,” zwine zwa sumbedza uri Muvhuso wa Vhumessia u ḓo imela vhuvhusi ha Mudzimu kha u vhusa shango ḽoṱhe.
8 Vhane vha ḓo vhusa na Kristo kha wonoyu Muvhuso ndi vhathu vha 144 000, “vho rengululwaho kha vhathu.” (Ndzumbululo 5:9, 10; 14:1-4; 20:6) Daniele o vhidza vhenevha uri ndi “vhakhethwa vha Wa-Ṱaḓulu,” vhane, u katela na Kristo ane avha Ṱhoho yavho, vha wana ‘vhuhosi na muvhuso na maanḓa a u vhusa mivhuso yoṱhe i re nga ḓasi ha ḽiṱaḓulu. Muvhuso wavho u ḓo vha wa lini na lini, nahone mivhuso yoṱhe i ḓo vha luvha na u vha vhalanda vhavho.’ (Daniele 7:13, 14, 18, 27) Yeneyi ndi ṱhaluso yo teaho ya muvhuso wa ṱaḓulu we Kristo a funza vhatevheli vhawe uri vha u rabelele.
Ndi Ngani Ri Kha Ḓi Rabelela U Ri Muvhuso Wau U Ḓe?
9. Ndi ngani zwo tea uri ri rabelele uri Muvhuso wa Mudzimu u ḓe?
9 Thabeloni yawe ya tsumbo, Kristo o ri funza uri ri rabelele uri Muvhuso wa Mudzimu u ḓe. U ḓadzea ha vhuporofita ha Bivhili hu sumbedza uri Muvhuso wa Vhumessia wo tikwa ṱaḓulu nga 1914. * Nga zwenezwo, naa zwi kha ḓi vha zwo tea uri ri rabelele uri wonoyo Muvhuso u “ḓe”? Vhukuma. Ngauri kha vhuporofita ha Daniele, Muvhuso wa Vhumessia, wo imelwaho nga tombo, u khou lwisana na mivhuso ya vhathu ya politiki, i imelwaho nga tshifanyiso tshihulu vhukuma. Tombo ḽi ḓo rwa tshenetsho tshifanyiso tsha phusukana. Vhuporofita ha Daniele vhu ri: ‘Vhuhosi hawo a vhu nga ḓo wetshela kha luṅwe lushaka. U ḓo pwashekanya mivhuso yoṱhe wa i lozwa; wone uṋe wa ima lini na lini.’—Daniele 2:44.
10. Ndi ngani ro ṱulutshelwa u ḓa ha Muvhuso wa Mudzimu?
10 Ro ṱulutshelwa u vhona Muvhuso wa Mudzimu u tshi fhelisa maitele mavhi a zwithu a Sathane ngauri hezwi zwi ḓo ita uri dzina ḽikhethwa ḽa Yehova ḽi khethwe na u fheliswa ha vhapikisi vhoṱhe vha vhuvhusahoṱhe ha Mudzimu. Ri rabela zwi tshi bva mbiluni uri “muvhuso wau u ḓe,” nahone khathihi na muapostola Yohane ri ri: “Amen! Iḓá, Murena Yesu!” (Ndzumbululo 22:20) Ee, u nga ri Yesu a nga ḓa u hulisa dzina ḽa Yehova na u lwela vhuvhusahoṱhe Hawe, u itela u ri maipfi a mupsalme a ḓadzee, ane a ri “u vha ḓivhise zwauri dzina ḽau ḽi pfi Yehova, Wa-Ṱaḓulu-ṱaḓulu. Mashangoni oṱhe ndi Iwe u woṱhe.”—Psalme ya 83:18.
“Zwiné Wa Funa Nga Zwi Itwe”
11, 12. (a) Ri vha ri tshi khou humbela mini musi ri tshi rabela uri zwine Mudzimu a zwi funa “zwi itwe fhano fhasi vhunga zwi tshi itwa ngei ṱaḓulu”? (b) U rabela hashu uri zwine Yehova a funa zwi itwe zwi dovha zwa amba mini?
11 Lutevhelaho Yesu o funza vhafunziwa vhawe u rabela uri: “Zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:10) Fhethu hoṱhe ho vha hone nga ṅwambo wa uri Yehova o vha a tshi khou funa nga u ralo. Zwivhumbiwa zwa maanḓa zwa ṱaḓulu zwi a huwelela zwa ri: “Murena Mudzimu washu, ndi’we wo fanelwaho nga thendo na zwikhoḓo na maanḓa, ngauri ndi’we wo sikaho zwoṱhe; zwo bvelela, zwo sikiwa nge wa zwi funa.” (Ndzumbululo 4:11) Yehova u na ndivho na “zwoṱhe zwa ṱaḓulu na zwa fhasi.” (Vha-Efesa 1:8-10) Musi ri tshi rabela uri zwine Mudzimu a funa zwi bvelele ri vha ri tshi khou humbela Yehova uri a ḓadzise ndivho yawe. Zwiṅwe hafhu, zwi sumbedza uri ro ṱulutshelwa u vhona zwine Mudzimu a zwi funa zwi tshi ḓadzea fhethu hoṱhe.
12 Nga yeneyo thabelo ri dovha ra sumbedza u funa hashu u tshila u tendelana na zwine Yehova a zwi funa. Yesu o ri: “Zwanga zwiḽiwa ndi uri nda ita zwi funwaho nga o nthumaho, nda vuledza mushumo wawe.” (Yohane 4:34) U fana na Yesu, samusi ri Vhakriste vho ḓiṋekedzaho, ri takalela u ita zwine Mudzimu a zwi funa. U funa hashu Yehova na Murwa wawe zwi ri sudzulusela u sa ‘tshila nga dzinyemulo dza vhathu, fhedzi nga u ita zwiné Mudzimu a zwi funa.’ (1 Petro 4:1, 2; 2 Vha-Korinta 5:14, 15) Ri lingedza u iledza u ita zwithu zwine ra ḓivha uri zwi lwisana na zwine Yehova a zwi funa. (1 Vha-Thesalonika 4:3-5) Nga u lwela u wana tshifhinga tsha u vhala na u guda Bivhili, ri ‘a ṱalukanya uri zwiné Murena a funa zwone ndi zwifhio,’ zwine zwa katela u ṱanganela nga vhuḓalo kha u huwelela “mafhungo-maḓifha aya a muvhuso wa ṱaḓulu.”—Vha-Efesa 5:15-17; Mateo 24:14.
Zwine Yehova A Zwi Funa Ṱaḓulu
13. Zwine Mudzimu a zwi funa zwo ḓadzea hani nga phanḓa ha u vutshela ha Sathane?
13 Zwine Yehova a zwi funa zwo ḓadzea kale ngei ṱaḓulu musi muṅwe wa vharwa vhawe vha muya a sa athu vutshela na u vha Sathane. Bugu ya Mirero i ṱalusa Murwa wa Mudzimu wa tanzhe sa a re na vhuṱali. Zwi sumbedza uri miṅwaha minzhi i sa vhalei, Murwa mubebwa e eṱhe wa Mudzimu o vha a tshi “takalela u vha phanḓa hawe misi yoṱhe,” u takalela u ita zwine Khotsi awe vha zwi funa. O fheleledza o vha “muḓinḓa” wa Yehova kha u sika zwithu zwoṱhe “zwa ṱaḓulu na zwa kha ḽifhasi, zwi vhonalaho na zwi sá vhonali.” (Mirero 8:22-31; Vha-Kolosa 1:15-17) Yehova o shumisa Yesu u vha Ipfi ḽawe, kana Muambeli.—Yohane 1:1-3.
14. Ri nga guda mini kha Psalme ya 103 nga ha nḓila ine vharuṅwa vha ḓadzisa ngayo zwine Yehova a zwi funa ngei ṱuḓulu?
14 Mupsalme o sumbedza uri vhuvhusahoṱhe ha Yehova ndi ha nṱha u fhira zwivhumbiwa zwoṱhe na uri vhunzhi ha vharuṅwa vha thetshelesa zwine a amba na ndaela dzawe. Ri a vhala: “Yehova o tea khuluṋoni yawe kha ḽiṱaḓulu, vhuhosi hawe vhu laya hoṱhe-hoṱhe. Rendani Yehova, Inwi Vharuṅwa vhawe, Inwi vhahali vha maanḓa ni shumisaho fhungo ḽawe, hu u ri ni vhe vha pfaho zwiné a amba. Rendani Yehova, Inwi mavhuthu awe oṱhe, Inwi vhaḓinḓa vhawe ni itaho zwiné a zwi funa. Rendani Yehova, Inwi zwivhumbwa zwawe thungo dzoṱhe dza muvhuso wawe.”—Psalme ya 103:19-22.
15. U vha ha Yesu khosi ya Muvhuso zwo kwama hani u itwa ha zwine Mudzimu a zwi funa ngei ṱaḓulu?
15 Nga murahu ha u vutshela hawe, Sathane o vha a kha ḓi vha hone ṱaḓulu, samusi zwi tshi sumbedzwa nga bugu ya Yobo. (Yobo 1:6-12; 2:1-7) Naho zwo ralo, bugu ya Ndzumbululo yo porofita uri hu ḓo ḓa tshifhinga tshine Sathane na madimoni awe vha ḓo pandelwa ṱaḓulu. Tshenetsho tshifhinga tsho swika nga u ṱavhanya nga murahu ha musi Yesu Kristo a tshi vha khosi ya Muvhuso nga 1914. U bva tsheetsho, eneo maravhele ho ngo tsha dovha a vha na vhudzulo ngei ṱaḓulu. Vha fhano kha ḽifhasi. (Ndzumbululo 12:7-12) A hu tsha pfala ipfi ḽa ane a lwa na Yehova ngei ṱaḓulu, fhedzi hu pfala maipfi ane a renda “Ngwana,” Yesu Kristo, na thendo dza u ḓiṱukufhadza kha Yehova. (Ndzumbululo 4:9-11) Vhukuma zwine Yehova a zwi funa zwo ḓadzea ṱaḓulu.
Zwine Mudzimu A Zwi Funa Nga Ḽifhasi
16. Thabelo ya tsumbo i lwisana hani na pfunzo ya Vhudzhagane malugana na fulufhelo ḽa vhathu?
16 Kereke dza ḽa Vhudzhagane dzi dzhia ḽifhasi ḽi si ndivho ya Mudzimu, vha tshi amba uri vhathu vhavhuya vhoṱhe vha ya ṱaḓulu. Fhedzi Yesu o ri funza u rabela a ri: “Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:10) Arali ra nga tou humbula zwavhuḓi, naa ri nga amba uri zwine Yehova a zwi funa zwi khou ḓadzea ṋamusi ḽifhasini ḽo ḓalaho khakhathi, tshiṱalula, malwadze, na mpfu? Na khathihi! Nga zwenezwo ri fanela u rabela zwi tshi bva mbiluni uri zwine Mudzimu a zwi funa zwi itwe kha ḽifhasi, u tendelana na fulufhedziso ḽo ṅwaliwaho nga muapostola Petro ḽine ḽa ri: “Hone ro lindela maṱaḓulu maswa [Muvhuso wa Vhumessia u vhuswaho nga Kristo] na ḽifhasi ḽiswa [tshigwada tsha vhathu vho lugaho], zwo ambiwaho nga dzimbavhalelo dzawe, zwine u luga ha fhaṱa khazwo’.”—2 Petro 3:13.
17. Ndivho ya Yehova nga ḽifhasi ndi ifhio?
17 Yehova o vha e na ndivho musi a tshi sika ḽifhasi. O hevhedza muporofita Yesaya u ṅwala u ri: “Ngauri Yehova Mu-sika-ḽiṱaḓulu, Ene Mudzimu vhukuma Muvhumbi wa ḽifhasi, a ḽi tika, ha ngo sika mahandana, o ḽi vhumba uri ḽi dzulwe nga vhathu, u ri: Ndi Nṋe Yehova, a huna muṅwe.” (Yesaya 45:18) Mudzimu o vhea vhavhingani vha u thoma tsimuni ya paradiso, nahone a vha laya a ri: “Bebani ni ande ni ḓadze shango, ni ḽi kunde.” (Genesi 1:27, 28; 2:15) Zwi khagala uri ndivho ya Musiki ndi ya uri ḽifhasi ḽi dzulwe nga murafho wa vhathu vho fhelelaho vhane vha ḓiṱukufhadzela vhuvhusahoṱhe ha Yehova nga dakalo na u tshila tshoṱhe Paradisoni yo fulufhedziswaho nga Kristo.—Psalme ya 37:11, 29; Luka 23:43.
18, 19. (a) Hu fanela u itwa mini musi zwine Mudzimu a zwi funa zwi sa athu ḓadzea nga vhuḓalo kha ḽifhasi? (b) Ndi afhio maṅwe masia a thabelo ya tsumbo ya Yesu ane a ḓo haseledzwa theroni i tevhelaho?
18 Zwine Yehova a zwi funa nga ḽifhasi zwi nga si ḓo vhuya zwa khunyelela arali ḽifhasi ḽi kha ḓi vha ḽo dzulwa nga vhanna na vhasadzi vhane vha nyadza vhuvhusahoṱhe hawe. A tshi shumisa mmbi yo rangwa phanḓa nga Kristo, Mudzimu u ḓo “tshinyadza vha tshinyadzaho shango.” Maitele oṱhe a zwithu a Sathane, u katela na vhurereli ha mazwifhi, politiki dzo tshinyalaho, mabindu a vhupangwa na a sa fulufhedzei, na mmbi dzi tshinyadzaho, zwi ḓo fheliswa nga hu sa fheli. (Ndzumbululo 11:18; 18:21; 19:1, 2, 11-18) Vhuvhusahoṱhe ha Yehova vhu ḓo vha ho kunda nahone dzina ḽawe ḽo khethwa. Zwoṱhe hezwi ri a zwi rabelela musi ri tshi ri: “Khotsi-ashu wa ṱaḓulu! dzina ḽau ḽi khethwe; Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.”—Mateo 6:9, 10.
19 Naho zwo ralo, kha thabelo yawe ya tsumbo, Yesu o sumbedza uri ri nga dovha ra rabelela na ṱhoḓea dza muthu nga eṱhe. Enea masia a ndaela yawe kha thabelo a ḓo haseledzwa theroni i tevhelaho.
[Ṱhaluso dzi re magumoni a siaṱari]
^ phar. 9 Sedzana ndima ya 6 ya bugu ine ya pfi Thetshelesani Vhuporofita ha Daniele!, yo gandiswaho nga Ṱhanzi dza Yehova.
Nḓila Ya U Vusulusa
• Ndi ngani zwo tea u vhidza Yehova “Khotsi-ashu”?
• Ndi ngani zwi zwa ndeme vhukuma uri ri rabelele u khethwa ha dzina ḽa Yehova?
• Ndi ngani ri tshi rabela uri Muvhuso wa Mudzimu u ḓe?
• Zwi amba mini u rabelela uri zwine Mudzimu a zwi funa zwi itwe kha ḽifhasi vhunga zwi tshi itwa ngei ṱaḓulu?
[Mbudziso Dza Pfunzo]
[Tshifanyiso kha siaṱari 9]
Thabelo dza Yesu dzo vha dzo fhambana vhukuma na thabelo dza muhoyo dza Vhafarisei
[Tshifanyiso kha siaṱari 10]
Vhakriste vha rabelela uri Muvhuso wa Mudzimu u ḓe, dzina ḽawe ḽi khethwe, na uri zwine a funa zwi itwe