Khuthadzo Kha Vho Tsikeledzwaho

MUSI vhanna na vhafumakadzi vha fulufhedzeaho vha tshifhingani tsho fhiraho vha tshi tsikeledzwa, vho rabela Mudzimu nga mafulufulu u itela vhulivhisi. Naho zwo ralo, vho dovha vha dzhia vhukando u itela u fhungudza wonoyo mutsiko, vhu fanaho na u shumisa vhuṱali u itela u shavha vhatsikeledzi. Sa tsumbo, u ḓitika nga Yehova na u ita vhuḓidini zwo thusa Davida u konḓelela mutsiko we a vha a tshi khou ṱangana nawo. Hu pfi mini nga riṋe ṋamusi?

Musi ni mutsikoni, zwi vhonala uri ni a dzhia vhukando u itela u piringulula vhuleme haṋu. Sa tsumbo, arali ni sa shumi, naa a ni iti vhuḓidini u itela u wana mushumo wo teaho une wa ḓo ni tikedza na muṱa waṋu? (1 Timotheo 5:8) Kana arali ni tshi khou lwala, naa a ni ṱoḓi thuso ya ngalafho yo teaho? Zwi a takadza uri Yesu, we a vha e na maanḓa a bvaho ha Mudzimu a u fhodza mifuda yoṱhe ya malwadze, o ṱhogomela uri ‘vhalwadze vha ṱoḓa ṅanga.’ (Mateo 9:12, vhambedzani NW.) Naho zwo ralo, mitsiko yaṋu i nga si ḓo fheliswa tshifhinga tshoṱhe, ni nga fanela u bvela phanḓa ni tshi i konḓelela u swika kha vhuṅwe vhuimo.

Ndi ngani ni sa vhudzi mafhungo aṋu Yehova Mudzimu nga thabelo? Sa tsumbo, musi ni tshi khou ṱoḓa mushumo, u ḓitika nga Mudzimu khathihi na u rabela zwi ḓo ni thusa u lwisana na mulingo naho u ufhio wa u ṱanganedza mushumo une wa lwisana na maitele a Bivhili. Ri ḓo iledza u “xela-xelana na lutendo” nga u vha na vhupangwa kana u funa tshelede. (1 Timotheo 6:10) I ngoho, musi ri tshi ita phetho dza ndeme malugana na mushumo kana muṱa kana nga ha mbilaelo dza mutakalo, ri nga tevhela nyeletshedzo ya Davida ine ya ri: “Kumedzela Yehova zwi U lemelaho, u ḓo U ṱhaḓula; ha nga litshi muvhuya a tshi dzula ó khakhelwa.”—Psalme ya 55:22.

Thabelo i bvaho mbiluni i ḓo ri thusa uri ri dzule ri tshi linganyisela kha mahumbulele ashu u itela uri ri si tsikeledzee. Mukriste wa ngoho, ane a vha muapostola Paulo o ṅwala a ri: “Zwoṱhe zwiné na zwi tama ni ḓivhadze Mudzimuni nga thabelo na nga u humbela hu re na u livhuha.” Thabelo i bvaho mbiluni i nga ri khuthadza nga nḓila-ḓe? “Huno mulalo wa Mudzimu, a fhiraho u ṱalukanya hoṱhe, u vhulungele dzimbilu dzaṋu na mihumbulo yaṋu  kha Kristo Yesu.” (Vha-Filipi 4:6, 7) Mulalo wa Mudzimu ‘u fhira u ṱalukanya hoṱhe.’ Ngauralo, zwi nga ri khwaṱhisa musi ri tshi khou lemedzwa nga maḓipfele a tsikeledzaho. Zwi ḓo ‘vhulunga dzimbilu dzashu na mihumbulo yashu,’ nga zwenezwo zwa ri thusa u iledza u ita zwithu nga maṱaṱa na nga vhutsilu, zwine zwa nga engedza u tsikeledzea hashu.

Thabelo i nga shandula zwiimo nga nḓila khulwane. Musi Paulo e tshivhotshwa ngei Roma, o humbela Vhakriste ngae nga u ḓiṱukufhadza uri vha mu rabelele. Ndi ngani Paulo o ita yeneyo khumbelo? O vha ṅwalela a ri: “Ndi simesa u ni fhembeledza uri ni ralo, uri ndi ṱavhanye u vhuyelela ha inwi.” (Vha-Heberu 13:19) Nga maṅwe maipfi, Paulo o vha a tshi zwi ḓivha uri u pfa ha Yehova thabelo dza vhuḓidini dza vhatendi ngae zwi nga shandula zwiimo musi zwi tshi ḓa kha uri u ḓo vhofhololwa lini.—Filemoni 22.

Naa thabelo i ḓo shandula mvelelo dza u tsikeledzea hashu? Ee, i nga shandula. Fhedzi ri fanela u humbula uri Yehova Mudzimu a nga si fhindule thabelo dzashu nga nḓila ine ra ṱoḓa ngayo. Paulo o rabela lunzhi-lunzhi nga ha ‘phaṋa ṋamani,’ khamusi vhuleme ha muvhilini. Naho zwo ralo, nṱhani ha u fhelisa honoho vhuleme, Mudzimu o vhudza Paulo a ri: “Tshilidzi tshanga tsho U eḓana. Maanḓa anga a khunyelela hu shaiwaho nungo.”—2 Vha-Korinta 12:7-9.

Ngauralo, u tsikeledzea hashu hu nga si fhele nga u ṱavhanya. Naho zwo ralo, ri ḓo vha na tshibuli tsha u sumbedza u ḓitika hashu nga Khotsi ashu wa ṱaḓulu. (Yakobo 1:2-4) Ivhani na vhungoho ha uri arali Yehova Mudzimu a nga si fhelise wonoyo mutsiko, a nga “vhea na tshivhana tshiné [ra nga] kona u sera ngatsho’.” (1 Vha-Korinta 10:13) Ndi zwa ndeme uri Yehova u vhidzwa “Mudzimu wa u kwengweledza hoṱhe. Ané a ri kwengweledza maṱhuphoni ashu oṱhe.” (2 Vha-Korinta 1:3, 4) Mudzimu a nga ri ṋea zwine ra zwi ṱoḓa u itela u konḓelela, nahone ri na fulufhelo ḽa vhutshilo vhu sa fheli.

Ipfi ḽa Mudzimu, Bivhili, ḽi fulufhedzisa uri Yehova “u ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone.” (Ndzumbululo 21:3, 4) Naa zwi a konḓa u tenda uri hu ḓo vha na shango ḽi si na mitsiko? Zwi nga vhonala zwi tshi konḓa arali no no ḓowela u tshila no tsikeledzea. Naho zwo ralo, u vhofhololwa kha u vha na nyofho na kha u tsikeledzea ndi zwine Mudzimu a zwi fulufhedzisa, nahone ndivho yawe i ḓo ḓadzea zwa vhukuma.—Yesaya 55:10, 11.

[Tshifanyiso kha siaṱari 9]

U vhofhololwa kha u fulufhuwa