Ndi Ngani Ṱhanzi dza Yehova Dzi Tshi Ni Dalela Tshifhinga Tshoṱhe?

U FHISETSHELA ha Ṱhanzi dza Yehova u ya vhuḓinḓani ha nnḓu nga nnḓu hu a ḓivhea shangoni ḽoṱhe. Vhaṅwe vhathu vha a mangala uri ndi ngani Ṱhanzi dzi tshi dzulela u vha dalela, zwihuluhulu arali u thomani vha songo sumbedza dzangalelo kha mulaedza wa Dziṱhanzi. Maṅwalo mavhili a bvaho Russia a a ṱalutshedza tshiitisi.

Masha, musidzana wa miṅwaha ya 19 wa ngei Khabarovsk, uri: “Vhukuma, mathomoni ndo vha ndi tshi iledza Ṱhanzi dza Yehova nga nḓila dzoṱhe.” Naho zwo ralo, o shandula mavhonele awe nga murahu ha u vhala kopi dzi si gathi dza magazini wo gandiswaho nga Dziṱhanzi. Masha u a ṅwala: “Zwe nda vhala zwo vha zwi tshi takadza na u funza, fhedzi tsha ndeme vhukuma ndi uri zwi ita uri muthu a vhone shango nga nḓila yo fhambanaho. Nga zwiṱuku nga zwiṱuku nda thoma u pfesesa uri ndi ngani vhathu vho ṋewa ndivho ya vhutshilo.”

U bva ḓoroboni ya Ussuriysk, hune ha vha khilomithara dza 80 u bva devhula ha Vladivostok, Svetlana o ṅwala a ri: “Ndi kha ḓi tou bva u thoma u vhala magazini dza Tshiingamo na Awake! Hedzi magazini dzi a ṱoḓea vhukuma misini yashu. Ndi takalela thero dzoṱhe. Dzi a takadza na u funza vhukuma. Ndi a ni livhuha! Ndi a livhuha u vha haṋu kha ḽino shango na u ita wonoyu mushumo wa ndeme.”

Ṱhanzi dza Yehova shangoni ḽoṱhe vha dzhiela nṱha heyi mbudziso i nyanyulaho ya muapostola Paulo ine ya ri: “Awe vha nga a pfa hani vhá songó hanelelwa?” (Vha-Roma 10:14) Ndi ngani ni sa ḓifhi tshifhinganyana tsha u thetshelesa musi Ṱhanzi dzi tshi ni dalela tshifhingani tshi ḓaho. Na inwi ni nga ḓiphina nga mulaedza u khuthadzaho u wanalaho Ipfini ḽa Mudzimu, Bivhili.