‘Mukoma A Fulufhedzeaho’ O Kunda Mulingo!
‘Mukoma A Fulufhedzeaho’ O Kunda Mulingo!
“Tshifhinga tsha nnḓu ya Mudzimu i tshi thoma u haṱulwa, tsho swika.”—1 Petro 4:17.
1. Ndi mini zwe Yesu a zwi wana musi a tshi ṱolisisa “mukoma”?
NGA Pentekoste ya 33 C.E., Yesu o ṋea “mukoma” mushumo wa u ṋea “vhalanda” vhawe zwiḽiwa nga tshifhinga tshazwo. Nga 1914, Yesu o itwa Khosi, nahone hu si kale ha thoma tshifhinga tsha uri a ṱolisise onoyo “mukoma.” O wana “mukoma” a tshi khou ‘fulufhedzea nahone e na vhuṱali.’ Nga zwenezwo, a mu kumedza “thakha yawe yoṱhe.” (Mateo 24:45-47) Naho zwo ralo, ho vha hu tshi dovha ha vha na mukoma muvhi, we a vha a sa fulufhedzei nahone a si na vhuṱali.
‘Mukoma Uyo Muvhi’
2, 3. “Mukoma muvhi” u bva ngafhi, nahone o thoma hani u vha mukoma muvhi?
2 Yesu o amba nga ha mukoma muvhi nga murahunyana ha u haseledza nga ha “mukoma a fulufhedzeaho na wa vhuṱali.” O ri: “Arali mukoma uyo é muvhi, a amba mbiluni yawe a ri: Muṋe wanga ha nga ṱavhanyi ó vhuya! A thoma u rwa vha re vhalanda ngae’, a ḽa a nwa na vhadzia-u-kambiwa, Mukoma uyo u ḓo tshenuwa muṋe wawe ó swika, a tshi ḓa nga tshikhathi tshiné a si tshi ḓivhe. Huno u ḓo mu pwashakanya, a mu ṋea zwo fanelaho vhadzia-muhoyo, a mu isa hu re na zwililo na u shenganya maṋo.” (Mateo 24:48-51) Mubulo une wa ri ‘uyo mukoma muvhi’ u ita uri ri vhe na dzangalelo kha maipfi o ambiwaho nga Yesu malugana na mukoma a fulufhedzeaho na wa vhuṱali. Ee, ‘mukoma muvhi’ u bva kha mukoma a fulufhedzeaho. * Nga nḓila-ḓe?
3 Nga phanḓa ha 1914, miraḓo minzhi ya tshigwada tsha mukoma a fulufhedzeaho na wa vhuṱali yo vha i na zwilavhelelwa zwa nṱha zwa u ya u ṱangana na Muhwe ṱaḓulu nga wonoyo ṅwaha, fhedzi mafulufhelo avho a sa ḓaḓzee. Nga ṅwambo wa zwenezwo na zwiṅwe zwiitisi, vhanzhi vho mbo ḓi kulea nungo nahone vha si gathi vha sinyuwa. Vhaṅwe vha vhenevha vha thoma u sasaladza vhahavho na u ḓiṱanganya na “vhadzia-u kambiwa,” zwigwada zwa vhurereli ha ḽa Vhudzhagane.—Yesaya 28:1-3; 32:6.
4. Yesu o ita mini nga ‘mukoma muvhi’ na vhoṱhe vhe vha sumbedza muya u fanaho na wawe?
4 Vhenevha vhathu vhe vha vha vhe Vhakriste vho mbo ḓi vha ‘mukoma muvhi,’ nahone Yesu a vha “pwashakanya.” Nga nḓila-ḓe? O vha landula, nahone vha xelelwa nga fulufhelo ḽavho ḽa u tshila ṱaḓulu. Naho zwo ralo, a vho ngo fheliswa nga tshenetsho tshifhinga. Vho vha vho tea u thoma vha konḓelela tshifhinga tsha zwililo na u shenganya maṋo “swiswini ḽa nnḓa-nnḓa” ha tshivhidzo tsha Vhukriste. (Mateo 8:12) U bva misini yeneiḽa, vhaṅwe vhaḓodzwa vha si gathi vho sumbedza muya muvhi u fanaho, vha ḓiita ‘mukoma muvhi.’ Vhaṅwe vha “vha dziṅwe nngu” vho edzisa u sa fulufhedzea havho. (Yohane 10:16) Oṱhe eneo maswina a Kristo o mbo ḓi fhedzisela e “swiswini ḽa nnḓa-nnḓa” ḽa muya.
5. Mukoma a fulufhedzeaho na wa vhuṱali o aravha nga nḓila-ḓe, u fhambana na nḓila ye ‘mukoma muvhi’ a aravha ngayo?
5 Naho zwo ralo, mukoma a fulufhedzeaho na wa vhuṱali o lingwa nga nḓila i fanaho na ya ‘mukoma muvhi.’ Nṱhani ha uri vha sinyuwe, vho mbo ḓi shandula mahumbulele avho. (2 Vha-Korinta 13:11) Lufuno lwavho lwa u funa Yehova na vhahashu lwo mbo ḓi khwaṱhiswa. Nga ṅwambo wa zwenezwo, vho mbo ḓi vha “phuphu, yone thikho ya mafhungo-ngoho nga tshenetshi tshifhinga tsha “maḓuvha a vhufhelo.”—1 Timotheo 3:15; 2 Timotheo 3:1.
Vhasidzana Vha Vhuṱali Na Vha Matsilu
6. (a) Yesu o sumbedza hani vhuṱali ha tshigwada tshawe tshi fulufhedzeaho tsha mukoma? (b) Nga phanḓa ha 1914, ndi ufhio mulaedza we wa ḓivhadzwa nga Vhakriste vho ḓodzwaho?
6 Nga murahu ha musi o no amba nga ha ‘mukoma uyo muvhi,’ Yesu o ṋea zwifanyiso zwivhili u itela u sumbedza uri ndi ngani vhaṅwe Vhakriste vho ḓodzwaho vho vha vha tshi ḓo sumbedza u fulufhedzea na u vha na vhuṱali hu uri vhaṅwe vha si nga si kone u ita nga u ralo. * U itela u sumbedza pfaneleo ya vhuṱali, o ri: “Muvhuso wa ṱaḓulu u fana na vhasidzana vha fumi, vhe vha dzhia maḓenzhe avho, vha bva u yo ṱanganedza muhwe. Vhaṱanu vhavho o vha é matsilu, vhaṱanu vhó thanya. Ngauri vha matsilu vha tshi dzhia maḓenzhe, a vho ngo ṱuwa na mapfura. Vho thanyaho vha fara mapfura nga midzio na maḓenzhe avho.” (Mateo 25:1-4) Vhasidzana vha fumi vha ri humbudza Vhakriste vho ḓodzwaho nga phanḓa ha 1914. Vho vhalela tshifhinga tshee muhwe, Yesu Kristo a vha a tshi ḓo ḓa ngatsho. Nga zwenezwo, “vha bva” u itela u yo mu ṱanganedza, vha tshi huwelela nga tshivhindi uri “tshifhinga tsha vhannḓa” tshi ḓo fhela nga 1914.—Luka 21:24.
7. Vhakriste vho ḓodzwaho vho ‘eḓela’ lini nga lwa muya?
7 Vho vha vha tshi khou amba zwone. Tshifhinga tsha vhannḓa tsho mbo ḓi fhela nga 1914, nahone Muvhuso wa Mudzimu nga fhasi ha vhulivhisi ha Yesu Kristo wa thoma u vhusa. Fhedzi wo vha u sa vhonali, wo vha u ṱaḓulu. Kha ḽifhasi, vhathu vho mbo ḓi thoma u tambula nga “Yawee” ye ya dzula yo ambiwa. (Ndzumbululo 12:10, 12) Ha tevhela tshifhinga tsha u lingwa. Nga ṅwambo wa u sa pfesesa zwithu nga nḓila yavhuḓi, Vhakriste vho ḓodzwaho vho mbo ḓi vhona u nga ‘muhwe u khou lenga.’ Nga u hanganea na u sedzana na u vhengwa nga shango, vho mbo ḓi thoma u sa tsha fhisea nahone vha litsha u ita mushumo wo dzudzanywaho wa u huwelela khagala. U fana na vhasidzana vha re kha tshifanyiso, ‘vhoṱhe vho kumedza nahone vha eḓela’ nga lwa muya, na vhane vha ḓiita Vhakriste vha sa fulufhedzei vho ita nga u ralo musi vhaapostola vha Yesu vho no fa.—Mateo 25:5; Ndzumbululo 11:7, 8; 12:17.
8. Ndi mini zwo itaho uri hu huwelelwe maipfi a tevhelaho: “Muhwe a suyu!” nahone tsho vha tshi tshifhinga tsha uri Vhakriste vho ḓodzwaho vha ite mini?
8 Nga zwenezwo, nga 1919 ha itea zwiṅwe zwe zwa vha zwi songo lavhelelwa. Ri a vhala: “Vhukati ha vhusiku ha ṱavhiwa mukosi wa u ri: Muhwe a suyu! Ibvani ni yo mu ṱanganedza! Ndi hone hu tshi vuwa vhaḽa vhasidzana vhoṱhe, vha penyisa maḓenzhe avho.” (Mateo 25:6, 7) Musi hu tshi vhonala hu si tsheena fulufhelo, vhathu vho vhudzwa uri vha fhaṱuwe! Nga 1918, Yesu ane a vha “muruṅwa wa mulanga,” o ya thembeleni ya muya ya Yehova u itela u ṱolisisa na u kunakisa tshivhidzo tsha Mudzimu. (Maleaxi 3:1) Zwa zwino, Vhakriste vho ḓodzwaho vho vha vha tshi khou ṱoḓa u ya u mu ṱanganedza muṱani wa thembele ya kha ḽifhasi. Tsho vha tshi tshifhinga tsha u ri vha ‘vhonetshele.’—Yesaya 60:1; Vha-Filipi 2:14, 15.
9, 10. Nga 1919, ndi ngani ri tshi nga amba uri vhaṅwe Vhakriste vho vha vho “thanya” nahone vhaṅwe vhe “matsilu”?
9 Ṱhogomelani! Kha tshifanyiso, vhaṅwe vhasidzana vho vha vhe na vhuleme. Yesu o bvela phanḓa a ri: “Vha matsilu vha amba na vho thanyaho vha ri: Ri fhunguleleni mapfura aṋu, ngauri maḓenzhe ashu a a dzima.” (Mateo 25:8) Maḓenzhe o vha a sa nga si funge arali ho vha hu si na mapfura. Ngauralo, mapfura a maḓenzhe a ri humbudza nga ha mafhungo-ngoho a Ipfi ḽa Mudzimu na muya wawe mukhethwa, zwine zwa ṋea maanḓa vharabeli vha ngoho uri vha vhe vha vhonetsheli. (Psalme ya 119:130; Daniele 5:14) Nga phanḓa ha 1919, Vhakriste vho ḓodzwaho vha re na vhuṱali vho ṱoḓa u ḓivha zwine Mudzimu a zwi funa, hu sa londwi u sa vha havho na maanḓa ha tshifhinganyana. Nga zwenezwo, musi vha tshi vhudzwa uri vha vhonetshele, vho vha vho dzula vho luga.—2 Timotheo 4:2; Vha-Heberu 10:24, 25.
10 Naho zwo ralo, vhaṅwe vhaḓodzwa vho vha vha songo ḓilugisela u ḓiṋekedzela tshoṱhe—naho vho vha vha tshi tama u vha na Muhwe. Ngauralo musi tshifhinga tsha u huwelela mafhungo maḓifha tshi tshi swika, vho vha vha songo ḓilugisela. (Mateo 24:14) Vha lingedza na u fhedza maanḓa khonani dzavho dzi fhiseaho, vha tshi ita na u vha humbela mapfura. Vhasidzana vha vhuṱali vho fhindula hani kha tshifanyiso tsha Yesu? Vho ri: “Aiwa! Ri nga ḓo ṱahelelwa roṱhe, riṋe na vho-inwi. Khwine iyani ha vharengisi, ni yo ḓi-rengela.” (Mateo 25:9) Nga hu fanaho, Vhakriste vho ḓodzwaho vhane vha fulufhedzea nga 1919 vho hana u ita naho tshi tshini tshe tsha vha tshi tshi nga ita uri vha sa kone u vhonetshela. Ngauralo, vho kunda mulingo.
11. Ho itea mini nga vhasidzana vha matsilu?
11 Yesu o phetha nga u ri: “Musi [vhasidzana vha matsilu] vhó ṱuwa, vhó ya u renga, muhwe a ḓa. Vho dzulaho vhó ḓi-lugisa vha dzhena nae’ dzipfamoni, vothi ḽa hoṋiwa. Ngavhuya ha ḓa na vhasidzana vho salaho, vha ri: Murena, Murena, ri vulele! Ene a vha fhindula a ri: Ngoho, ndi a ni vhudza: a thi ni ḓivhi!” (Mateo 25:10-12) Ee, vhaṅwe vho vha vha songo ḓilugiselela u ḓa ha Muhwe. Ngauralo, vha kundwa nga mulingo nahone vha xelelwa nga tshibuli tsha u ṱanganela kha tshimima tsha mbingano! Zwo vha zwi tshi pfisa vhuṱungu lungafhani!
Tshifanyiso Tsha Mali
12. (a) Yesu o shumisa mini u itela sumbedza pfaneleo ya u fulufhedzea? (b) Munna we a “fara lwendo” ndi nnyi?
12 Nga murahu ha u sumbedza pfaneleo ya vhuṱali, Yesu o bvela phanḓa u sumbedza pfaneleo ya u fulufhedzea. O ri: “Zwi nga munna we a ri ndi fara lwendo, a vhidza vhalanda vhawe, a vha kumedza thundu yawe. Muṅwe a mu fha maḓana maṱanu, muṅwe mavhili, muṅwe ḽithihi. A vha fha a tshi eḓanya nungo dzavho; a kona u ṱuwa.” (Mateo 25:14, 15) Munna a re kha tshifanyiso ndi Yesu, we a “fara lwendo” musi a tshi gonya ṱaḓulu nga ṅwaha wa 33 C.E. Musi a sa athu gonya ṱaḓulu, Yesu o kumedza vhafunziwa vhawe vha fulufhedzeaho “thakha yawe yoṱhe.” Nga nḓila-ḓe?
13. Yesu o lugiselela tsimu khulwane na u tendela “mukoma” wawe a tshi ita mushumo wa u bindula nga nḓila-ḓe?
13 Musi a tshi thoma vhuḓinḓa hawe ha kha ḽifhasi, Yesu o thoma u lugisela tsimu khulwane nga u huwelela mafhungo maḓifha a Muvhuso shangoni ḽoṱhe ḽa Isiraele. (Mateo 9:35-38) Musi a sa athu “fara lwendo,” o ṋea yeneyo tsimu vhafunziwa vhawe vha fulufhedzeaho, a ri: “Iyani-ha ni ite vhathu vhoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa. Ni vha funze u ita zwoṱhe zwe nda ni laya.” (Mateo 28:18-20) Nga enea maipfi, Yesu o tendela “mukoma” a tshi ita mushumo wa u bindula ‘u ya nga nungo dzawe’ u vhuya u swika a tshi vhuya.
14. Ndi ngani ho vha hu sa lavhelelwi uri vhoṱhe vha ite mushumo u fanaho wa u bindula?
14 Wonoyo mubulo u sumbedza uri Vhakriste vha ḓana ḽa u thoma ḽa miṅwaha vho vha vhe si ho kha zwiimo zwi fanaho kana u vha na vhukoni vhu fanaho. Vhaṅwe u fana na Paulo na Timotheo, vho vha vha tshi kona u ṱanganela tshifhinga tshoṱhe kha mushumo wa u huwelela na u funza zwi tshi ya nga zwiimo zwavho. Zwiimo zwa vhaṅwe zwi nga vha zwo ita uri vha sa kone u ita zwoṱhe zwe vha vha vha tshi ṱoḓa u zwi ita. Sa tsumbo, vhaṅwe Vhakriste vho vha vhe dziphuli, vhaṅwe vho vha vhe na malwadze, vhaaluwa, kana u vha na vhuḓifhinduleli ha muṱa. Vhukuma, ndugelo dza tshivhidzo dzo vha dzi si dza vhafunziwa vhoṱhe. Vhasadzi vho ḓodzwaho na vhaṅwe vhanna vho ḓodzwaho vho vha vha sa funzi tshivhidzoni. (1 Vha-Korinta 14:34; 1 Timotheo 3:1; Yakobo 3:1) Naho zwo ralo, hu sa londwi vhuimo he vha vha vhe khaho, vhafunziwa vhoṱhe vha Kristo—vhanna na vhasadzi—vho vha vhe na mushumo wa u bindulisa, nga u shumisa zwavhuḓi zwibuli zwavho na zwiimo zwavho vhuḓinḓani ha Vhukriste. Na vhafunziwa vha ṋamusi vha ita nga hu fanaho.
Tshifhinga Tsha U Ṱolisisa Tshi A Thoma!
15, 16. (a) Tshifhinga tsha u vhalelana mali tsho vha lini? (b) Ndi tshifhio tshibuli tshiswa tsha u “bindula” tshe tsha ṋewa vha fulufhedzeaho?
15 Tshifanyiso tshi a bvela phanḓa: “Hó no vha kale muṋe wa vhaḽa vhalanda a vhuya, a thoma u vhalelana navho’.” (Mateo 25:19) Nga 1914—tshifhinga tshilapfu vhukuma u bva nga 33 C.E.—Yesu Kristo o thoma u vhusa. Nga murahu ha miṅwaha miraru na hafu, nga 1918, o ya thembeleni ya Mudzimu ya muya nahone a ḓadzisa maipfi a Petro ane a ri: “Tshifhinga tsha nnḓu ya Mudzimu i tshi thoma u haṱulwa, tsho swika.” (1 Petro 4:17; Maleaxi 3:1) Tsho vha tshi tshifhinga tsha u vhalelana mali.
16 Mukoma ane a vha vharathu vha Yesu vho ḓodzwaho o ita mini nga “mali” ya Khosi? U bva nga 33 C.E. u ya phanḓa u vhuya u swika nga 1914, vhanzhi vho vha vha tshi khou shuma vhukuma kha mushumo wa Yesu wa u “bindula.” (Mateo 25:16) Na tshifhingani tsha nndwa ya u thoma ya shango vho sumbedza lutamo lwavho lwo khwaṱhaho lwa u shumela Muṋe. Zwino zwo vha zwo tea u ṋea vha fulufhedzeaho tshibuli tshiswa tsha u “bindula.” Tshifhinga tsha vhufhelo ha ano maitele a zwithu tsho swika. Mafhungo maḓifha a fanela u huwelelwa kha mashango oṱhe. “Khaṋo ya shangoni” i fanela u kaṋiwa. (Ndzumbululo 14:6, 7, 14-16) Miraḓo ya u fhedzisa ya tshigwada tsha mavhele i fanela u ṱoḓiwa nahone vha “gogo ḽihulu” ḽa vha dziṅwe nngu vha fanela u kuvhanganywa.—Ndzumbululo 7:9; Mateo 13:24-30.
17. Vhaḓodzwa vha fulufhedzeaho vho ‘dzhena hani dakaloni ḽa muṋe wavho’?
17 Tshifhinga tsha khaṋo ndi tshifhinga tsha dakalo. (Psalme ya 126:6) Nga zwenezwo, zwo vha zwo tea uri nga 1919 musi Yesu a tshi ṋea vhaḓodzwa vha fulufhedzeaho vhuḓifhinduleli ho engedzeaho a vha vhudze u ri: “U fulufhedzea kha zwiṱuku; iḓá U vhuse zwihulwane. Dzhena dakaloni ḽa muṋe wau.” (Mateo 25:21, 23, maḽeḓeretsendama ndi ashu.) Zwiṅwe-hafhu, dakalo ḽa Muṋe sa Khosi ntswa yo vhewaho Muvhusoni wa Mudzimu ḽi fhira nḓila ine ra humbula ngayo. (Psalme ya 45:1, 2, 6, 7) Tshigwada tsha mukoma tshi fulufhedzeaho tshi a ṱanganela kha ḽeneḽo dakalo na u imela Khosi na u engedza nzwalelo dzawe kha ḽifhasi. (2 Vha-Korinta 5:20) Dakalo ḽawe ḽi vhonala kha maipfi a vhuporofita a re kha Yesaya 61:10: “Ndi takalela Yehova lwa u takala; mbilu yanga i pembelela Mudzimu wanga; ngauri o nyambadza nguvho dza ndamulelo.”
18. Ndi ngani vhaṅwe vha songo kunda mulingo wa u ṱolisiswa, nahone ha vha na mvelelo dzifhio?
18 Zwi pfisaho vhuṱungu ndi uri vhaṅwe a vho ngo kunda mulingo. Ri a vhala: “Ha mbo sendela na uḽa wa ḓana ḽithihi a ri: Muṋe wanga, ndo vha ndi tshi U ḓivha zwauri U muthu wa tshiṱuhu; U kaṋa he U si zwale, U kumbela he U si fhefhere; Ndo ofha, nda dzumba ḓana ḽau mavuni. Mali yau ngeyi.” (Mateo 25:24, 25) Nga hu fanaho, vhaṅwe Vhakriste vho ḓodzwaho a vho ngo “bindula.” Nga phanḓa ha 1914 a vho ngo ṱanganela nga u fhisea kha fulufhelo ḽavho na vhaṅwe, a vho ngo ṱoḓa u thoma nga 1919. Yesu o fhindula hani musi vha tshi hana u ita wonoyo mushumo? O vha dzhiela ndugelo dzavho dzoṱhe. Vho mbo ḓi “khurumedzelwa swiswini ḽa nnḓa-nnḓa, hune ha vha na zwililo na u shenganya maṋo.”—Mateo 25:28, 30.
U Ṱolisisa Hu A Bvela Phanḓa
19. Maitele a u ṱolisisa a bvela phanḓa nga nḓila-ḓe, nahone Vhakriste vhoṱhe vho ḓodzwaho vho vha vho ḓiimisela u ita mini?
19 Vhukuma, vhunzhi ha vhe vha vha vha tshi ḓo vha vhaḓodzwa vha Kristo tshifhingani tsha vhufhelo vho vha vha sa athu thoma u shumela Yehova musi Yesu a tshi thoma u ita mushumo wawe wa u ṱolisisa nga 1918. Naa ho ngo vha ṱolisisa? O vha ṱolisisa. Maitele a u ṱolisisa o thoma fhedzi nga 1918/1919, musi tshigwada tsha mukoma a fulufhedzeaho na wa vhuṱali tshi tshi kunda mulingo. Vhakriste vho ḓodzwaho vho bvela phanḓa u ṱolisiswa nga muthihi nga muthihi u vhuya u swika vha tshi fhelela. (Ndzumbululo 7:1-3) Musi vha tshi ṱhogomela zwenezwi, vharathu vha Kristo vho ḓodzwaho vho ḓiimisela u dzula vha tshi fulufhedzea kha mushumo wa u “bindula.” Vha ḓiimisela u vha na vhuṱali, u dzula vhe na mapfura manzhi u itela uri tshedza tshavho tshi dzule tshi tshi khou penya. Vha a zwi ḓivha uri musi muṅwe na muṅwe wavho a tshi fa a tshi khou fulufhedzea, Yesu u ḓo mu ṱanganedza ṱaḓulu.—Mateo 24:13; Yohane 14:2-4; 1 Vha-Korinta 15:50, 51.
20. (a) Vha dziṅwe nngu vho ḓiimisela u ita mini ṋamusi? (b) Ndi zwifhio zwine Vhakriste vho ḓodzwaho vha zwi ḓivha?
20 Vha gogo ḽihulu ḽa vha dziṅwe nngu vha edzisa vhahavho vho ḓodzwaho. Vha a zwi ḓivha uri nḓivho yavho nga ha ndivho dza Mudzimu i ita uri vha vhe na vhuḓifhinduleli vhuhulwane. (Hesekiele 3:17-21) Ngauralo, nga thuso ya Ipfi ḽa Yehova na muyamukhethwa, na vhone vha dzula vhe na mapfura avho nga u guda na nga u ṱanganela miṱanganoni. Nahone vha ita uri tshedza tshavho tshi dzule tshi tshi vhonetshela, nga u ṱanganela kha mushumo wa u huwelela na u funza na u “bindula” vhe na vhahavho vho ḓodzwaho. Naho zwo ralo, Vhakriste vho ḓodzwaho vha a ḓivha zwavhuḓi uri mali yo vhewa zwanḓani zwavho. Vha na vhuḓifhinduleli kha nḓila ine thakha ya Murena ya kha ḽifhasi ya farwa ngayo. Naho vhe vha si gathi, vha nga si kumedze vhuḓifhinduleli havho kha vha gogo ḽihulu. E na zwenezwi muhumbuloni, “mukoma a fulufhedzeaho na wa vhuṱali” u bvela phanḓa u ranga phanḓa nga u ṱhogomela bindu ḽa Khosi, a tshi dzhiela nṱha thikhedzo ine a i wana kha miraḓo ya gogo ḽihulu yo ḓikumedzaho. Vhenevha vha gogo ḽihulu vha a ṱhogomela vhuḓifhinduleli ha vhahavho vho ḓodzwaho nahone vha pfa zwi ndugelo u shuma nga fhasi ha vhulivhisi havho.
21. Ndi khuthadzo ifhio ine ya shuma kha Vhakriste vhoṱhe u bva nga 1919 u swika misini yashu?
21 Ngauralo, naho zwenezwi zwifanyiso zwivhili zwi tshi vhonetshela tshedza kha zwiṅwe zwiitea na zwe zwa itea nga 1919, zwi a dovha zwa vhuyedza Vhakriste vhoṱhe kha enea maḓuvha a vhufhelo. Nga yeneyi nḓila, naho khuthadzo ye Yesu a i ṋea mafheloni a tshifanyiso tsha vhasidzana vha fumi i tshi ambela nga maanḓa kha Vhakriste vho ḓodzwaho nga phanḓa ha 1919, tshi a dovha tsha shuma na kha Mukriste muṅwe na muṅwe. Nga zwenezwo, u nga ri roṱhe ri nga thetshelesa maipfi a Yesu ane a ri: “Fhaṱuwani-ha, ngauri a ni ḓivhi ḓuvha na tshikhathi.”—Mateo 25:13.
[Ṱhaluso dzi re magumoni a siaṱari]
^ phar. 2 Nga hu fanaho, nga murahu ha lufu lwa vhaapostola, ho mbo ḓi vha na “phele mmbi” dzine dza bva kha vhahulwane vha Vhakriste vho ḓodzwaho.—Mishumo 20:29, 30.
^ phar. 6 U itela mafhungo o engedzeaho malugana na tshifanyiso tsha Yesu, sedzani bugu ine ya pfi Worldwide Security Under the “Prince of Peace,” ndima dza 5 na 6, yo gandiswaho nga Ṱhanzi dza Yehova.
Ni Nga Ṱalutshedza?
• Yesu o ṱolisisa vhatevheli vhawe lini, nahone o wana mini?
• Ndi ngani vhaṅwe Vhakriste vho ḓodzwaho vho vha na muya wa ‘uyo mukoma muvhi’?
• Ri nga sumbedza hani u vha vho ṱalifhaho muyani?
• Ri tshi edzisa vharathu vha Yesu vho ḓodzwaho na vha fulufhedzeaho, ndi nga nḓila-ḓe hune ra nga dzula ri tshi khou ‘bindula’?
[Mbudziso Dza Pfunzo]
[Bogisi kha siaṱari 16]
YESU O ḒA LINI?
Kha Mateo ndima 24 na 25, ho ambiwa nga ha u “ḓa” ha Yesu nga nḓila mbili dzo fhambanaho. O vha a sa faneli u tou “ḓa” nga ṋama fhano kha ḽifhasi. Nṱhani hazwo, o “ḓa” nga muhumbulo wa uri o livhisa ṱhogomelo yawe kha vhathu kana vhatevheli vhawe, kanzhi u itela u haṱula. Ngauralo, nga 1914 o “ḓa” e Khosi yo vhewaho. (Mateo 16:28; 17:1; Mishumo 1:11) Nga 1918 o “ḓa” sa muruṅwa wa mulanga nahone a thoma u haṱula vhane vha ḓiamba uri vha shumela Yehova. (Maleaxi 3:1-3; 1 Petro 4:17) Nga Haramagedo, u ḓo “ḓa” u itela u haṱula maswina a Yehova.—Ndzumbululo 19:11-16.
U ḓa ho ambiwaho lwo vhalaho kha Mateo 24:29-44 na kha 25:31-46 ho vha hu tshi ambela kha “maṱungu mahulu.” (Ndzumbululo 7:14) Kha ḽiṅwe sia, u ḓa ho ambiwaho lwo vhalaho kha Mateo 24:45 u swika kha 25:30 ho vha hu tshi tshimbidzana na u haṱula vhane vha ḓiita vhafunziwa u bva nga 1918 u ya phanḓa. Sa tsumbo, zwo vha zwi si nga si pfale u amba uri u ṋewa ha malamba mukoma a fulufhedzeaho, u haṱula vhasidzana vha matsilu, na u haṱula mukoma muvhi, we a dzumba mali ya Muṋe, hu ḓo itea musi Yesu a tshi “ḓa” tshifhingani tsha maṱungu mahulu. Hezwo zwo vha zwi tshi ḓo amba uri vhunzhi ha vhaḓodzwa vha ḓo wanala vha sa fulufhedzei nga tshenetsho tshifhinga nahone vha dzhielwa ndugelo dzavho. Naho zwo ralo, Ndzumbululo 7:3 i sumbedza uri vhaḓodzwa vhoṱhe vha Kristo vha ḓo vha vho ‘swaiwa’ vhoṱhe nga tshenetsho tshifhinga.
[Tshifanyiso kha siaṱari 14]
‘Mukoma muvhi’ ho ngo wana phaṱhutshedzo nga 1919
[Tshifanyiso kha siaṱari 15]
Vhasidzana vho thanyaho vho vha vho ḓilugisela u ḓa ha muhwe
[Tshifanyiso kha siaṱari 17]
Mukoma a fulufhedzeaho o ita mushumo wa u “bindula”
Mulanda muvhi ho ngo ita wonoyo mushumo
[Tshifanyiso kha siaṱari 18]
Vhaḓodzwa na vha “gogo ḽihulu” vha bvela phanḓa u ita uri tshedza tshavho tshi vhonetshele