Nḓila Ine Ra Sumbedza Ngayo Uri Ri Funa Mudzimu

U ṰAHULELA u funa Mudzimu a si u sokou Mu ḓivha. Samusi vhashumeli vha Mudzimu shangoni ḽoṱhe vha tshi nga zwi sumbedza, u funa zwa vhukuma Mudzimu zwi a engedzea musi muthu a tshi vho ḓivha vhumuthu hawe, nahone lufuno lu a khwaṱha vhukuma musi muthu a tshi vho ḓivha zwine a zwi funa, zwine a zwi vhenga, na zwine a zwi takalela na ṱhoḓea dzawe.

Yehova o ri ṋea nga lufuno Ipfi ḽawe, Bivhili, hune a ḓidzumbulula khaḽo. Kha ḽeneḽo Ipfi, ri guda nḓila ye Yehova a dzudzanya ngayo zwiimo zwo fhambanaho. U fana na vhurifhi vhu bvaho kha muthu ane ra mu funa vhune ha ri takadza vhukuma, ngauralo Bivhili i ri ḓisela dakalo musi ri tshi vhona maṅwe masia a vhumuthu ha Yehova a tshi khou dzumbululwa.

Naho zwo ralo, samusi ro no zwi ṱhogomela nga zwiṅwe zwifhinga vhuḓinḓani hashu ha khagala, u guda nga ha Mudzimu a zwi iti uri tshifhinga tshoṱhe muthu a mu fune. Yesu o vhudza vhaṅwe Vhayuda vha sa livhuhi vha misini yawe a ri: “Londani maṅwaloni, ngauri inwi ni ri: kha one ndi huné na wana vhutshilo vhu sa fheli; . . . ndo ni ḓivha zwauri lufuno lwa Mudzimu a ni nalwo’ kha inwi.” (Yohane 5:39, 42) Vhaṅwe vha fhedza miṅwaha minzhi vha tshi khou guda nga ha mishumo ya Yehova ya lufuno nahone vha sa mu fune nga maanḓa. Ndi ngani? Vha a kundwa u elekanya nga ha u tshimbidzana ha zwithu zwine vha khou zwi guda. Zwo fhambanaho na zwenezwo, vhathu vha dzimilioni vha fulufhedzeaho vhane ra guda navho Bivhili vha a vhona uri u funa havho Mudzimu hu a bvela phanḓa hu tshi engedzea. Ndi ngani? Samusi na riṋe ro ita nga u ralo, vha tevhela tsumbo ya Asafu. Nga nḓila-ḓe?

U Elekanya Nga U Livhuha

Asafu o vha o ḓiimisela u ṱahulela u funa Yehova mbiluni yawe. O ṅwala a ri: “Ndi ri ndi  fhembeledze mbilu yanga, . . . ndi tshi elelwa mishumo ya vhuṱolo ya kale. Ndi ḓi-eletshedza mishumo yau yoṱhe, nda humbula zwe wa zwi kona.” (Psalme ya 77:6, 11, 12) U funa Mudzimu zwi ḓo engedzea mbiluni ya muthu ane a elekanya nga ha nḓila dza Yehova samusi na mupsalme o ita nga u ralo.

Zwiṅwe hafhu, u humbula nga zwe ra ṱangana nazwo zwe zwa ri takadza musi ri tshi khou shumela Yehova zwi khwaṱhisa vhushaka hashu nae. Muapostola Paulo o amba uri ri “vhashumisani” na Mudzimu, nahone vhukonani vhune ha nga vha hone vhukati ha vhashumisani vhu vha ho khethea vhukuma. (1 Vha-Korinta 3:9) Musi ri tshi sumbedza uri ri funa Yehova, u a zwi takalela, nahone zwi ita uri mbilu yawe i takale. (Mirero 27:11) Nga zwenezwo, musi ri tshi humbela thuso ya Yehova nahone a ri thusa u piringulula vhuṅwe vhuleme, ri a zwi ḓivha uri u na riṋe, nahone u mu funa hashu hu a engedzea.

Vhukonani vhukati ha vhathu vhavhili vhu a khwaṱha musi vha tshi sumbedzana u pfelana vhuṱungu. Nga hu fanaho, musi ri tshi vhudza Yehova uri ndi ngani ro ḓiṋekedza khae, u mu funa hashu hu a khwaṱha. Ri ḓo ḓiwana ri tshi khou elekanya nga maipfi a Yesu ane a ri: “U fune Murena Mudzimu wau nga mbilu yau yoṱhe, na nga [“muya-tshivhili woṱhe,” NW], na nga u ṱalukanya hau hoṱhe, na nga maanḓa au oṱhe. Ndi wone mulayo muhulu kha yoṱhe.” (Marko 12:30) Ri nga ita mini uri ri bvele phanḓa ri tshi funa Yehova nga mbilu dzashu dzoṱhe, muya-tshivhili washu woṱhe, u ṱalukanya hashu hoṱhe, na nga maanḓa ashu oṱhe?

U Funa Yehova Nga Mbilu Yashu Yoṱhe

Maṅwalo a amba nga mbilu ya pfanyisedzo, ine ya vha muthu wa nga ngomu—nyemulo, mavhonele na maḓipfele zwashu. Ngauralo, u funa Yehova nga mbilu yashu yoṱhe zwi amba uri ri a dzhiela nṱha u ṱoḓa u takadza Mudzimu. (Psalme ya 86:11) Ri sumbedza uri ri na lwonolo lufuno nga u ita uri vhumuthu hashu a vhu ṱanganedze. Ri lwela u edzisa Mudzimu nga u ‘nengwa vhuvhi na u nambatela zwivhuya.’—Vha-Roma 12:9.

U funa hashu Mudzimu zwi kwama maḓipfele ashu nga ha tshiṅwe na tshiṅwe. Sa tsumbo, ri nga wana mushumo washu u tshi ri takadza kana u tshi ita uri ri farakanee vhukuma, fhedzi naa ndi henefho hune mbilu yashu ya vha hone? Hai. Samusi ri tshi funa Yehova nga mbilu yashu yoṱhe, zwa ndeme vhukuma ndi zwa uri ri vhaḓinḓa vha Mudzimu. Nga hu fanaho, ri ṱoḓa u takadza vhabebi vhashu, vhafarisi vhashu vha mbingano, na vhatholi vhashu, fhedzi zwa ndeme vhukuma ri funa Yehova nga u ṱoḓa u mu takadza. Tshihulwane ndi uri o fanelwa nga vhuimo ha u thoma mbiluni dzashu.—Mateo 6:24; 10:37.

U Funa Yehova Nga Muya-tshivhili Washu Woṱhe

Maṅwaloni ipfi ḽine ḽa ri “muya-tshivhili” zwihuluhulu ḽi ambela kha muthu nga dzawe u katela na vhutshilo vhune a vha  naho. Ngauralo u funa Yehova nga muya-tshivhili woṱhe zwi amba uri ri shumisa vhutshilo hashu u itela u mu renda na u sumbedza uri ri a mu funa.

Vhukuma, ri nga vha na maṅwe madzangalelo vhutshiloni, u fana na u gudela mushumo, u langa bindu, kana u alusa muṱa. Fhedzi naho zwo ralo, ri sumbedza u funa Yehova nga muya-tshivhili washu woṱhe nga u ita zwithu nga nḓila yawe na u vhea zwiṅwe zwithu vhuimoni ho teaho vhutshiloni hashu, musi ri tshi khou ‘ṱoḓa muvhuso wa Mudzimu u thoma na u luga hawe.’ (Mateo 6:33) U rabela nga muya-tshivhili washu woṱhe zwi dovha zwa amba u vha na mafulufulu. Ri sumbedza Yehova uri ri a mu funa nga u huwelela nga mafulufulu mulaedza wa Muvhuso, na nga u ṋea phindulo dzi fhaṱaho miṱanganoni, kana u thusa vhahashu vha tshinnani na vha tshisadzini vha Vhakriste. Kha tshiṅwe na tshiṅwe, ri bvela phanḓa ri tshi “ita zwine Mudzimu a zwi funa nga muya-tshivhili.”—Vha-Efesa 6:6.

Yesu o sumbedza uri u a funa Mudzimu nga muya-tshivhili woṱhe nga u ḓiṋekedza. O vhea phanḓa zwine Mudzimu a zwi funa nahone a vhea ṱhoḓea dzawe vhuimoni ha vhuvhili. Yesu o ri ramba uri ri tevhele tsumbo yawe. O ri: “A funaho u ntsala murahu nga a ḓi-hangwe, a hwale [danda ḽawe ḽawe ḽa tshengedzo, NW ] a ntevhele.” (Mateo 16:24, 25) U ḓihangwa zwi amba u ḓiṋekedza. Zwi amba uri ri funa Mudzimu nga maanḓa lune ra ḓiṋekedza khae, u fana na Muisiraele wa tshifhingani tsha Bivhili we a vha a tshi funa nga maanḓa muṋe wawe lune a ḓikumedza tshoṱhe khae uri a vhe mulanda. (Doiteronomio 15:16, 17) U ṋekedza Yehova vhutshilo hashu ndi vhuṱanzi vhu fushaho vhu sumbedzaho uri ri a mu funa

U Funa Yehova Nga Ṱhalukanyo Yashu Yoṱhe

U funa Yehova nga ṱhalukanyo yashu yoṱhe zwi amba uri ri ḓo ita vhuḓidini hoṱhe u itela u pfesesa vhumuthu ha Yehova, ndivho, na ṱhoḓea dzawe. (Yohane 17:3; Mishumo 17:11) Ri sumbedza u funa Yehova nga u shumisa vhukoni hashu hoṱhe u itela u thusa vhaṅwe uri vha fune Yehova nga u khwinisa vhutsila hashu ha u funza. Muapostola Petro o ri ṱuṱuwedza a ri: “Ḓi-shamuleni dzikhundu dza u ḓi-pfa haṋu.” (1 Petro 1:13) Zwiṅwe hafhu, ri ita vhuḓidini ha u sumbedza vhaṅwe dzangalelo, zwihuluhulu vhashumeli vha Mudzimu nga riṋe. Ri a ḓivha zwiimo zwavho nahone ri a vha khoḓa zwo tea kana u vha khuthadza.

Ri sumbedza Yehova uri ri a mu funa nga ṱhalukanyo yashu yoṱhe nga u ḓiṱukufhadza khae nga zwine ra zwi humbula. Ri lingedza u vha na mavhonele awe kha zwithu, na u ṱoḓa thuso yawe musi ri tshi ita dziphetho, na u fulufhela uri nḓila yawe ndi ya khwine. (Mirero 3:5, 6; Yesaya 55:9; Vha-Filipi 2:3-7) Fhedzi musi ri tshi khou bvela phanḓa ri tshi sumbedza u funa hashu Mudzimu, ri nga shumisa hani maanḓa ashu?

U Funa Yehova Nga Maanḓa Ashu Oṱhe

Vhaswa vhanzhi tshivhidzoni tsha Vhukriste vha shumisa maanḓa avho u itela u renda Yehova. (Mirero 20:29; Muhuweleli 12:1) Iṅwe nḓila ine vhaswa vhanzhi vha Vhakriste vha sumbedza u funa ngayo Yehova nga maanḓa avho oṱhe ndi nga u dzhenela tshumelo ya vhuvulanḓila, vhuḓinḓa ha tshifhinga tshoṱhe. Vhomme vhanzhi vha a ṱanganela kha honovhu vhuḓinḓa musi vhana vhavho vhe tshikoloni. Vhahulwane vha fulufhedzeaho vhane vha ita nyendo dza vhulisa nga nnḓa ha u ṱhogomela mutakalo wa miṱa yavho, vha sumbedza uri vha funa Yehova nga maanḓa avho oṱhe. (2 Vha-Korinta 12:15) Yehova u ṋea maanḓa vhane vha mu fulufhela, u itela uri vha kone u sumbedza lufuno lwavho nga u mu renda, vha tshi shumisa maanḓa naho e afhio.—Yesaya 40:29; Vha-Heberu 6:11, 12.

Lufuno lu ḓo engedzea arali lwa ṱahulelwa zwavhuḓi. Nga zwenezwo, ri bvela phanḓa ri tshi ḓiṋea tshifhinga tsha u elekanya. Ri humbula zwe Yehova a ri itela zwone na uri ndi ngani o fanelwa nga u ḓikumedza hashu. Samusi ri vhaḓuhulu vha Adamu vha songo fhelelaho, ri nga si ḓo vhuya ra fanelwa nga “zwe Mudzimu a lugisela vha mu funaho,” fhedzi ri nga sumbedza uri ri funa Yehova nga muya-tshivhili washu woṱhe. Kha ri bvele phanḓa u ita nga u ralo!—1 Vha-Korinta 2:9.

[Tshifanyiso kha siaṱari 20]

Ri sumbedza uri ri funa Mudzimu nga zwiito