Vhashumeli Vha Mudzimu Vha Nga Miri​—Nga Nḓila Dzifhio?

A TSHI amba nga ha muthu ane a takalela na u shumisa maitele a Bivhili vhutshiloni hawe, mupsalme u ri: “U ḓo nga muri wo simiwaho milongani ya maḓi, u aṋwaho mitshelo nga tshifhinga tsha hone, u sa omiho maṱari. Zwiné a ita zwoṱhe zwi a vulea.” (Psalme ya 1:1-3) Ndi ngani honohu u vhambedza ho tea?

Miri i nga tshila tshifhinga tshilapfu. Sa tsumbo, miṅwe miṱwari ngei dzinguni ḽa Mediterranean hu ambiwa uri i na miṅwaha ya tshigidi tshithihi u ya kha zwivhili. Nga hu fanaho, mivhuyu i re ngei Afurika kati i a kona u tshila tshifhinga tshilapfu, nahone hu tendiwa uri mipaini ya ngei California yo no fhedza miṅwaha i ṱoḓaho u vha 4600. Miri mihulwane i re maḓakani i anzela u vhuyedza henefho fhethu. Sa tsumbo, miri milapfu i ita uri hu vhe na murunzi une wa tsireledza miri ine ya kha ḓivha miṱuku, nahone maṱari ane a wa khayo a ita uri mavu a none.

Miri yo lapfesaho shangoni i anzela u waniwa yo mela fhethu huthihi maḓakani, hune yeneyo miri ya tikedzana. Samusi midzi yayo i tshi nga sombekana, miri minzhi i re tsini na tsini i nga kona u ima yo khwaṱha musi hu tshi vha na ḓumbu u fhira muri wo imaho u woṱhe mudavhini. Midzi milapfu i dovha ya thusa muri uri u wane maḓi manzhi na pfushi i bvaho mavuni. Nga zwiṅwe zwifhinga, midzi i nga tsa vhukuma mavuni u fhira vhulapfu ha muri, kana ya adza ya fhira u lapfa ha matavhi a muri.

Muapostola Paulo a nga vha o vha a sa khou amba nga muri nga ho livhaho musi a tshi amba uri Vhakriste vha fanela u ‘tshimbilela khae [Kristo], u vha vho simaho midzi, vho fhaṱelaho khae’, vho khwaṱhaho u tendani.’ (Vha-Kolosa 2:6, 7) Vhukuma, Vhakriste vha nga ima vho khwaṱha kha lutendo lwavho arali vha farelela vho khwaṱha kha Kristo.—1 Petro 2:21.

Ndi dzifhio dziṅwe nḓila dzine vhashumeli vha Mudzimu vha nga fanyiswa na miri? Vhukuma, samusi miri yo pinzanaho i tshi wana thikhedzo kha miri i re tsini, na vhane vha dzula tsini na tshivhidzo tsha Vhukriste vha a wana thikhedzo kha vhatendi ngavho. (Vha-Galata 6:2) Vhakriste vho vhibvaho vha fulufhedzeaho, na vho khwaṱhaho muyani vha thusa vhatendi vha kha ḓi vhaho vhaswa ngohoni uri vha dzule vho khwaṱha kha lutendo, naho vha tshi khou ṱangana na u pikiswa hu ngaho maḓumbu. (Vha-Roma 1:11, 12) Vhakriste vha kha ḓi vhaho vhaswa ngohoni vha nga bvelela vhe “murunzini” wa tsireledzo wa vhashumeli vha Mudzimu vha re na tshenzhelo vhukuma. (Vha-Roma 15:1) Nahone miraḓo yoṱhe ya tshivhidzo tsha Vhukriste tsha shango ḽoṱhe i a vhuyelwa nga zwiḽiwa zwo dziaho zwa muya zwi ṋekedzwaho nga “Mirimivhuya,” vha masalela a vho ḓodzwaho.—Yesaya 61:3.

Zwi nyanyula lungafhani uri vhashumeli vhoṱhe vha Mudzimu vha na tshilavhelelwa tsha u vhona u ḓadzea ha fulufhedziso ḽi wanalaho kha Yesaya 65:22, ḽine ḽa ri: “Maḓuvha a vhathu vhanga a ḓo nga maḓuvha a muri.”

[Ṱhaluso ya Vhubvo ha Tshifanyiso kha siaṱari 28]

Godo-Foto