Vhukriste Ha Ngoho Vhu Khou Bvelela

VHUḒINḒA ha Yesu Kristo ho vha na mvelelo khulwane shangoni kha ḓana ḽa u thoma ḽa miṅwaha. Mulaedza wawe wo vha u tshi ṋea maanḓa, u na pfunzo, nahone u tshi ṱuṱuwedza nga nḓila ye ya mangadza vhathu. Vhanzhi vhe vha mu pfa a tshi amba vho kwamiwa vhukuma nga maipfi awe.—Mateo 7:28, 29.

Yesu o landula nga tshivhindi u ḓidzhenisa kha maitele a vhufunzi na a politiki a tsikeledzaho a misini yawe nahone a ita uri vhathu zwavho vha kone u amba nae. (Mateo 11:25-30) O ṱhogomela zwavhuḓi u ḓala ha mimuya mivhi shangoni nahone a sumbedza maanḓa e a ṋewa nga Mudzimu khayo. (Mateo 4:2-11, 24; Yohane 14:30) Yesu o sumbedza nga vhutsila u tshimbidzana huhulwane vhukati ha tshengelo na tshivhi, nahone a livhisa ṱhogomelo kha Muvhuso wa Mudzimu une wa vha dzilafho ḽa tshoṱhe. (Marko 2:1-12; Luka 11:2, 17-23) Nahone o fhelisa swiswi ḽe u bva kale ḽa vha ḽo tsira vhumuthu ha vhukuma ha Khotsi awe, a tshi ita uri dzina ḽa Mudzimu ḽi ḓivhiwe nga vhoṱhe vhe vha vha vhe na dzangalelo ḽa u vha na vhushaka Nae.—Yohane 17:6, 26.

Nga zwenezwo, a zwi mangadzi uri hu sa londwi u tovholwa huhulwane nga vhurereli na nga politiki, vhafunziwa vha Yesu vho phaḓaladza nga u ṱavhanya mulaedza wawe. Miṅwahani i ṱoḓaho u vha 30, zwivhidzo zwa Vhukriste zwo khwaṱhaho zwo vha zwo no vhumbwa ngei Afurika, Asia, na Yuropa. (Vha-Kolosa 1:23) Mafhungo-ngoho e Yesu a a funza o thusa vhathu vha ḓiṱukufhadzaho na vha re na mbilu dzavhuḓi Muvhusoni woṱhe wa Roma.—Vha-Efesa 1:17, 18.

Naho zwo ralo, vhenevha vhafunziwa vhaswa vha vhubvo ho fhambanaho ha ekonomi, sialala, nyambo, na vhurereli vha nga vha hani na vhuthihi ha ngoho kha “lutendo luthihi,” samusi muapostola Paulo o zwi amba nga u ralo? (Vha-Efesa 4:5) Ndi mini zwine zwa ḓo ita uri vha dzule vha tshi ‘amba tshithihi’ u itela uri vha si fhandekane? (1 Vha-Korinta 1:10) Nga ṅwambo wa phambano yo kalulaho vhukati ha vhane vha ḓiamba uri vha Vhakriste ṋamusi, ndi zwa ndeme u ṱolisisa zwe Yesu a zwi funza.

Mutheo Wa Vhuthihi Ha Vhukriste

Musi a tshi khou sengiswa phanḓa ha Pontio Pilato, Yesu o amba mutheo wa vhuthihi ha Vhukriste. O ri: “Ndi zwe nda bebelwa zwone, ndo ḓela zwone fhano shangoni uri ndi vhe ṱhanzi ya mafhungo-ngoho. A re wa mafhungo-ngoho u pfa ipfi ḽanga.” (Yohane 18:37) Nga zwenezwo, u ṱanganedza pfunzo dza Yesu u katela na Ipfi ḽa Mudzimu ḽo hevhedzwaho, Bivhili, zwi na ṱhuṱhuwedzo i re na maanḓa ine ya ita uri hu vhe na vhuthihi kha vhafunziwa vha Kristo vha ngoho.—1 Vha-Korinta 4:6; 2 Timotheo 3:16, 17.

 Vhukuma, vhafunziwa vha Yesu vho vha vha tshi ḓo vha na dzimbudziso dzi bvaho mbiluni kana dziphambano vhukati havho nga zwiṅwe zwifhinga. Nga zwenezwo, ndi mini zwe zwa vha zwi tshi ḓo vha thusa? Yesu o ṱalutshedza: “Musi hu tshi ḓo ḓa onoyo[,] Muya wa mafhungo-ngoho, u ḓo ni funzedza nḓila dza kha mafhungo-ngoho oṱhe. Ngauri ha nga ambi zwi bvaho kha ene muṋe; u ḓo amba zwiné a zwi pfa, a ni hanelela zwí tsha ḓi ḓa.” (Yohane 16:12, 13) Nga zwenezwo, muyamukhethwa wa Mudzimu wo vha u tshi ḓo thusa vhafunziwa vha Yesu vha ngoho u pfesesa mafhungo-ngoho samusi o vha a tshi khou dzumbululwa nga zwiṱuku nga zwiṱuku nga Mudzimu. Hafhu, wonoyo muya wo vha u tshi ḓo aṋwa mitshelo, i ngaho lufuno, dakalo, na mulalo, ine ya tikedza vhuthihi vhukati havho.—Mishumo 15:28; Vha-Galata 5:22, 23.

Yesu ho ngo tendela phambano kana khuḓano vhukati ha vhafunziwa vhawe; kana u vha tendela vha tshi dovholola u ṱalutshedzela mafhungo-ngoho a re Bivhilini u itela u katela mvelele kana masialala a vhurereli a vhe vha vha vha tshi ḓo ṱangana navho. Nṱhani hazwo, vhusikuni hawe ha u fhedza musi e navho, o rabela zwi tshi bva mbiluni a ri: “A thi humbeleli vhone fhedzi, ndi humbelela na vha u ḓo ntenda vhó pfa vhone, Uri vhoṱhe vha vhe vhathihi, vhunga iwe Khotsi Ú kha nṋe, nṋe nda vha kha iwe; uri na vhone vha vhe vhathihi kha riṋe, uri shango ḽi tende zwauri ndi iwe wo nthumaho.” (Yohane 17:20, 21) Nga zwenezwo, vhuthihi ha vhukuma vhune ha vha hone nga ṅwambo wa muya na nga mafhungo-ngoho ho vha hu tshi ḓo vha luswayo lu ṱalulaho vhafunziwa vha Kristo u bva mathomoni u vhuya u swika tshifhingani tshashu. (Yohane 4:23, 24) Naho zwo ralo, ṋamusi kereke a dzi na vhuthihi, dzo fhandekana. Ndi ngani zwo ralo?

Zwo Itaho Uri Kereke Dzi Fhandekane

Ṱhalutshedzelo yo livhaho ya phambano khulwane ya thendo na mishumo vhukati ha vhane vha ḓiamba uri vha Vhakriste ṋamusi ndi ya uri a vho ngo farelela kha pfunzo dza Yesu. Muṅwe muṅwali o ri: “U fana na tshifhingani tsho fhiraho, Vhakriste vhaswa ṋamusi vha vhonala vha tshi ṱanganedza zwiṅwe na zwiṅwe zwi re Bivhilini zwine zwa tea ṱhoḓea dzavho—nahone vha litsha zwoṱhe zwine zwa si tendelane na masialala avho a vhurereli.” Zwenezwi ndi zwe Yesu na vhaapostola vhawe vha dzula vho zwi amba uri zwi ḓo itea.

Sa tsumbo, muapostola Paulo o hevhedzwaho o ṅwalela mulavhelesi ngae Timotheo a ri: “Hu ḓo ḓa tshifhinga, tshiné dzipfunzo dzo takalaho dzi sá lwaliho vha sa ḓo dzi tendela, tshavho ha ḓo vha u tevhedza dzinyemulo dza vhone vhaṋe, vha ḓi-kakatela vhafunzi nga u pfa nḓevheni hu tshi ṱhoṱhona. Vha ḓo litsha u ṋekedza dzinḓevhe kha mafhungo-ngoho, vha pambuselwa kha dzingano.” Naa Vhakriste vhoṱhe vho vha vha tshi ḓo xedzwa? Hai. Paulo o bvela phanḓa a ri: “Iwe-ha, dzula wó dzivhuluwa kha zwoṱhe, konḓelela zwi vhavhaho, shuma mushumo wa mudzia-mafhungo-maḓifha; vhushumeli hau U vhu ḓadzise.” (2 Timotheo 4:3-5; Luka 21:8; Mishumo 20:29, 30; 2 Petro 2:1-3) Timotheo na vhaṅwe Vhakriste vha fulufhedzeaho vho tevhedza yeneyo nyeletshedzo yo hevhedzwaho.

Vhakriste Vha Ngoho Vha Kha Ḓi Vha Na Vhuthihi

U fana na Timotheo, Vhakriste vha ngoho ṋamusi vha dzula vho dzivhuluwa nga u landula mahumbulele a vhathu na u ṱanganedza fhedzi zwi re Maṅwaloni u itela thendo dza pfunzothendwa. (Vha-Kolosa 2:8; 1 Yohane 4:1) Dzi tshi edzisela Vhakriste vha ḓana ḽa u thoma ḽa miṅwaha, Ṱhanzi dza Yehova dzi khou ḓadzisa vhuḓinḓa hadzo mashangoni a fhiraho 230, dzi tshi vhudza vhathu huṅwe na huṅwe mulaedza wa Yesu wa vhukuma, mafhungo maḓifha a Muvhuso. Ṱhogomelani nḓila nṋa dza ndeme dzine ngadzo dza edzisela Yesu nga u vha na vhuthihi na u tevhedza Vhukriste ha ngoho hu sa londwi hune dza dzula hone.

Thendo dzavho dzo thewa Ipfini ḽa Mudzimu. (Yohane 17:17) Muṅwe mufunzi wa ngei Belgium o ṅwala nga hadzo a ri: “Tshithu tshine ra nga tshi guda khadzo [Ṱhanzi dza Yehova] ndi u ḓiimisela hadzo u thetshelesa Ipfi ḽa Mudzimu na u vha hadzo na tshivhindi tsha u ṱanziela nga haḽo.”

 Dzi ṱoḓa Muvhuso wa Mudzimu u itela u vhofhololwa kha vhuleme vhu re hone shangoni. (Luka 8:1) Ngei Barranquilla, Colombia, iṅwe Ṱhanzi yo amba na Antonio, mutikedzi o khwaṱhaho wa dzangano ḽa politiki. Yeneyo Ṱhanzi yo vha i sa tikedzi dzangano, kana u tikedza maṅwe maitele a politiki. Nṱhani hazwo, a humbela u guda Bivhili na Antonio na khaladzi dzawe nga mahala. Nga u ṱavhanya Antonio a zwi ṱhogomela uri Muvhuso wa Mudzimu ndi wone fulufhelo ḽi ḽoṱhe kha vha shayaho ngei Colombia na shangoni ḽoṱhe.

Dzi hulisa dzina ḽa Mudzimu. (Mateo 6:9) Musi Ṱhanzi dza Yehova dzi tshi ṱangana lwa u thoma na Maria, ane a vha Mukatolika a fulufhedzeaho a dzulaho ngei Australia, o tendela Ṱhanzi dzi tshi mu sumbedza dzina ḽa Mudzimu Bivhilini. O aravha hani? “Musi ndi tshi vhona dzina ḽa Mudzimu Bivhilini lwa u thoma, ndo tsengisa miṱodzi. Ndo sudzuluswa nga nḓivho ya uri vhukuma ndi vho ḓivha na u shumisa dzina ḽa Mudzimu.” Maria o bvela phanḓa a tshi guda Bivhili, nahone lwa u thoma vhutshiloni hawe, a thoma u ḓivha Yehova sa muthu nahone a kona u fhaṱa vhushaka ho khwaṱhaho nae.

Dzi na Vhuthihi nga ṅwambo wa lufuno. (Yohane 13:34, 35) Gurannḓa ya The Ladysmith-Chemainus Chronicle, yo ri: “Hu sa londwi uri ni na thendo dzaṋu dza vhurereli kana a ni na, ni fanela u khoḓa Ṱhanzi dza Yehova dza 4 500 dze dza shuma vhusiku na masiari vhege na hafu yo fhiraho u itela u fhaṱa Holo ya Guvhangano ya mithara dza 2 300 ngei Cassidy . . . Zwe zwa ita uri vha ite zwenezwo vho takala hu si na u ṱaṱisana khani, phambano kana u ṱoḓa uri vha rendiwe, ndi luswayo lwa Vhukriste ha ngoho.”

Nga zwenezwo ṱhogomelani honoho vhuṱanzi. Musi vhagudi vha zwa vhurereli vha ḽa Vhudzhagane, vharumiwa, na vhane vha ya kerekeni vha tshi khou bvela phanḓa vha tshi lwisana na khakhathi ya u hanedzana kerekeni dza havho, Vhukriste ha ngoho vhu khou bvelela shangoni ḽoṱhe. I ngoho, Vhakriste vha ngoho vha khou ḓadzisa vhuḓinḓa havho he vha ṋewa hone ha u huwelela na u funza Ipfi ḽa Mudzimu. (Mateo 24:14; 28:19, 20) Arali ni vhukati ha vhane vha khou “lila vha tshi ṱungufhalela” vhuṱudzi vhune ha khou bvelela na u vhaiswa nga u sa vha na vhuthihi vhukati ha vhurereli ha ḽa Vhudzhagane, ri ni ramba uri ni ṱanganele na Ṱhanzi dza Yehova kha vhurabeli ha Vhukriste vhu re na vhuthihi ha Mudzimu wa ngoho fhedzi, Yehova.—Hesekiele 9:4; Yesaya 2:2-4.