Mbudziso Dzi Bvaho Ha Vhavhali

Ho bvelela mini kha tshiwo tsho ṅwaliwaho kha Ekisodo 4:24-26, nahone ndi vhutshilo ha nnyi he ha vha vhu khomboni?

Mushe o vha a tshi khou ya Egipita na musadzi wawe, Tsipora, na vharwa vhawe, Gerisoni na Eliesere, musi hu tshi itea zwi tevhelaho: “Ha ri vhé nḓilani vhé tshiaweloni Yehova a ṱangana na Mushe a ṱoḓa u mu vhulaha. Tsipora a dzhia tshiare a rubisa murwa wawe ngatsho’, zwe a tumula a zwi kudza fhasi phanḓa ha milenzhe yawe, a amba a ri: U munna wanga wa malofha. Ha mbo vha u mu litsha. Zwiḽa a tshi ri: Munna wa malofha o vha a tshi amba u ruba.” (Ekisodo 4:20, 24-26) Naho enea mafhungo a sa tou vha khagala zwavhuḓi nahone zwi tshi konḓa u ḓivha zwavhuḓi zwine a amba zwone, Maṅwalo a ṋea iṅwe ṱhalutshedzo malugana na dzenedzi ndimana.

Enea mafhungo ha ambi nga ho livhaho uri ndi vhutshilo ha nnyi he ha vha vhu khomboni. Naho zwo ralo, ri nga phetha nga hu pfalaho uri ho vha hu si vhutshilo ha Mushe, ngauri o vha a tshi kha ḓi tou bva u ṋewa mushumo wa u ranga phanḓa Vhaisiraele musi vha tshi bva Egipita. (Ekisodo 3:10) Muruṅwa wa Mudzimu o vha a nga si vhulahe Mushe samusi o vha e nḓilani yawe ya u ya u ita wonoyo mushumo. Nga zwenezwo zwi vhonala uri hu nga vha ho vha hu vhutshilo ha muṅwe wa vharwa vhawe. Mulayo we wa ṋewa Abrahamu malugana na u rubiswa wo vha u tshi ri: “Munna wa ḽishuvhuru we a si rubiswe kha ṋama yawe, onoyo nga a bviswe kha lushaka lwa haṋu; o tshinya mulanga wanga.” (Genesi 17:14) Zwi vhonala uri Mushe o litshelela wonoyo mulayo a sa rubise murwa wawe, nahone nga ṅwambo wa zwenezwo, vhutshilo ha murwa wawe ho vha vhu khomboni kha muruṅwa wa Yehova.

Ndi milenzhe ya nnyi ye ya kwamiwa musi Tsipora a tshi tshea lukanda lwa murwa wawe u itela u lugisa eneo mafhungo? Ho vha hu muruṅwa wa Yehova we a vha e na maanḓa a u vhulaha onoyo murwa a songo rubiswaho. Ngauralo, zwi a pfala uri Tsipora a nga vha o ita uri lwonolo lukanda lu kwame milenzhe ya muruṅwa, u itela u sumbedza vhuṱanzi ha uri o ita zwine zwa tendelana na wonoyo mulanga.

Mubulo wa Tsipora musi a tshi ri “u munna wanga wa malofha” wo vha u songo ḓowelea. Wo vha u tshi sumbedza mini nga hae? Nga u tendelana na yeneyo ṱhoḓea ya u rubisa, Tsipora o sumbedza u dzhiela nṱha mulanga wa u vha na vhushaka na Yehova. Mulanga wa Mulayo we wa fheleledza wo itwa na Vhaisiraele wo sumbedza uri kha wonoyo mulanga wa vhushaka, Yehova a nga dzhiiwa sa munna nahone tshiṅwe tshipiḓa tsha dzhiiwa sa musadzi. (Yeremia 31:32) Ngauralo, musi a tshi amba na Yehova (a tshi shumisa muambeleli wawe ane a vha muruṅwa) a tshi ri “u munna wanga wa malofha,” Tsipora o vha a tshi khou sumbedza u ḓivhea hawe nga fhasi ha wonoyo mulanga. Zwo vha zwi tshi nga u khou ṱanganedza vhuimo ha u vha musadzi kha mulanga wa u rubisa, na u dzhia Yehova Mudzimu e munna wawe. Nga nnḓa ha zwenezwo, nga ṅwambo wa u thetshelesa hawe ṱhoḓea dza Mudzimu, o tshidza murwa wawe.