Tshilalelo Tsha Murena​—Tshi Fanela U Pembelelwa Nga Nḓila-ḓe?

A TSHI ṱalutshedza nḓila ine Tshilalelo tsha Murena tsha fanela u pembelelwa ngayo, muapostola Paulo wa Mukriste o ṅwala a ri: “Á vha nṋe, ndo ṋekedzwa nga Murena zwenezwo zwe nda ni kumedza, zwauri: Murena Yesu vhusiku he a ṅaledzwa, o dzhia tshinnkwa. Ó livhuha a tshi ṅwata, a ri: Ndi muvhili wanga, wé nda kumedza; ní ralo, ni tshi itela u ṋyelelwa ngazwo’. A ralo-vho na tshinwelo, musi hó no lalelwa a ri: Tshinwelo itshi ndi mulanga muswa wa malofhani anga, ní ḓi ralo misi yoṱhe, ni tshi tshi nwa, ni tshi itela u ṋyelelwa ngazwo’. Ngauri misi yoṱhe arali ni tshi ḽa itshi tshinnkwa, ni tshi nwa itshi tshinwelo, ni ṱanziela lufu lwa Murena; a tshi ḓa a wane ní tsha ḓi ralo.”—1 Vha-Korinta 11:23-26.

Samusi Paulo o amba, Yesu o thoma Tshilalelo tsha Murena ‘vhusiku he a vha a tshi ḓo kumedzwa ngaho’ nga Yudasi Iskariote kha vharangaphanḓa vha vhurereli vha Vhayuda vhe vha kombetshedza Vharoma uri vha fhahee Kristo kha danda. Tshenetsho tshilalelo tsho itea nga Ḽavhuṋa nga madekwana a ḽa 31 March, 33 C.E. Yesu o fela kha danda ḽa tshengedzo nga Ḽavhuṱanu ḽa 1 April. Nga ṅwambo wa uri maḓuvha a khalenda ya Tshiyuda a thoma vhusiku u swika nga madekwana a ḓuvha ḽi tevhelaho, Tshilalelo tsha Murena na lufu lwa Yesu Kristo zwo itea nga ḓuvha ḽithihi—14 Nisan, 33 C.E.

Vhe vha ṱanganela kha tshinnkwa na veini vho vha vha tshi fanela ‘u ita ngauralo misi yoṱhe’ u itela u elelwa Yesu. U ya nga iṅwe ṱhalutshedzelo, Yesu o ri: “Ni ite zwenezwi u itela u nkhumbula.” (1 Vha-Korinta 11:24, The Jerusalem Bible) Tshilalelo tsha Murena tshi dovha tsha vhidzwa Tshihumbudzo tsha lufu lwa Kristo.

Ndi Ngani Ri Tshi Fanela U Humbula Lufu Lwa Yesu?

Phindulo i nga wanala nga u pfesesa ndeme ya lwonolo lufu. Yesu o fa e mutikedzi muhulwane vhukuma wa vhuvhusahoṱhe ha Yehova. Nga zwenezwo o sumbedza uri Sathane ndi muzwifhi nge a amba uri vhathu vha shumela Mudzimu nga ṅwambo wa zwiitisi zwavho zwa tseḓa. (Yobo 2:1-5; Mirero 27:11) Nga ṅwambo wa u fa hawe e muthu o fhelelaho, Yesu o ‘kumedza vhutshilo hawe uri a phuluse vhanzhi.’ (Mateo 20:28) Musi Adamu a tshi ita tshivhi phanḓa ha Mudzimu, o xelelwa nga vhutshilo hawe sa muthu o fhelelaho na nga tshilavhelelwa tsha u tshila tshoṱhe. Fhedzi, “Mudzimu o funa shango zwingafha-ngafha, a vhuya a ṋekedza Murwa wawe mu-bebwa-eṱhe, uri vhoṱhe vha mu tendaho, vha si  lovhe, tshavho hu vhe u tshila tshoṱhe.” (Yohane 3:16) Vhukuma, “mulifho wa zwivhi ndi lufu, tshifhiwa tshine ra ṋewa nga tshilidzi tsha Mudzimu ndi u tshila-tshoṱhe kha Kristo Yesu Murena washu.”—Vha-Roma 6:23.

Nga zwenezwo, lufu lwa Yesu Kristo lu tshimbidzana na misumbedzo mivhili mihulwane ya lufuno—lufuno luhulwane lwe Yehova a lu sumbedza a tshi itela vhathu nga u ṋekedza Murwa wawe na lufuno lwa u ḓiṋekedza lwe Yesu a lu sumbedza a tshi itela vhathu nga u ri fela. Tshihumbudzo tsha lufu lwa Yesu tshi sumbedza ndeme ya yeneyi misumbedzo mivhili ya lufuno. Samusi ri vhaṅwe vha vhe vha sumbedzwa lwonolu lufuno, naa a ro ngo fanela u sumbedza u lu dzhiela nṱha? Nḓila ya u ita zwenezwi ndi nga u vha hone vhuṱamboni ha Tshilalelo tsha Murena.

Zwine Tshinnkwa Na Veini Zwa Amba Zwone

Musi a tshi thoma Tshilalelo tsha Murena, Yesu o shumisa tshinnkwa na tshinwelo tsha veini sa zwiga. Yesu o dzhia tshinnkwa, nahone ‘musi o no livhuha a tshi ṅwata, a ri: ‘Ndi muvhili wanga [tshinnkwa], we nda kumedza ndi tshi itela vho inwi.’ (1 Vha-Korinta 11:24) Tshenetsho tshinnkwa tsho vha tshi tshi fanela u ṅwatiwa u itela uri tshi kone u ṋekedzwa vhaṅwe na u ḽiwa ngauri tsho vha tshi tshi ṅwatea zwavhuḓi samusi tsho itwa nga vhukhopfu vhu si na dini na maḓi. U ya nga Maṅwalo dini ḽi imela tshivhi. (Mateo 16:11, 12; 1 Vha-Korinta 5:6, 7) Yesu o vha a si na tshivhi. Ngauralo muvhili wawe wo fhelelaho wo vha tshiṱhavhelo tshi rengululaho tsha vhathu. (1 Yohane 2:1, 2) Zwo vha zwo tea lungafhani uri tshenetsho tshinnkwa tshi imelaho muvhili wa Kristo u si na tshivhi tshi sa vhe na dini!

Yesu o dovha a livhutshela tshinwelo tsha veini tswuku a ri: “Tshinwelo itshi ndi mulanga muswa wa malofhani anga.” (1 Vha-Korinta 11:25) Veini tswuku ye ya vha i kha tshinwelo yo vha i tshi imela malofha a Yesu. Samusi malofha a mboho na a mbudzi a tshiṱhavhelo o khwaṱhisa mulanga wa Mulayo vhukati ha Mudzimu na lushaka lwa Isiraele nga 1513 B.C.E., na malofha a Yesu o shululwaho o khwaṱhisedza mulanga muswa.

Ndi Vhafhio Vhane Vha Fanela U Ṱanganela?

U itela u pfesesa uri ndi vhafhio vhane vha fanela u ṱanganela kha zwiga zwa Tshihumbudzo, ri fanela u pfesesa uri mulanga muswa ndi mini na uri ndi vhafhio vhane vha vha tshipiḓa tshawo. Bivhili i ri: “Ni ḓivhe zwauri hu ḓa maḓuvha—Yehova u ralo—ane ngao’ nda ḓo vhofha mulanga muswa na vha lushaka lwa Isiraele na vha lushaka lwa Yuda. . . . Ndi ḓo vhea mulayo wanga mvaloni dzavho, nda u ṅwala dzimbiluni dzavho; ndi ḓo vha Mudzimu wavho; vhone vha ḓo vha vhathu vhanga. . . . ndi ḓo vha hangwela mulandu wavho, na zwivhi zwavho a thi tsha ḓo zwi elelwa.”—Yeremia 31:31-34.

Mulanga muswa u ita uri zwi konadzee u vha na vhushaka ho khetheaho na Yehova Mudzimu. Nga ṅwambo wa wonoyu mulanga, tshiṅwe tshigwada tsha vhaṅwe vhathu tsho mbo ḓivha vhathu vhawe ene a vha Mudzimu wavho. Mulayo wa Yehova wo ṅwalwa mbiluni dzavho, na vhane vha si vhe Vhayuda vho mbo ḓi vha kha wonoyo mulanga muswa nahone vha vha na vhushaka havhuḓi na Mudzimu. (Vha-Roma 2:29) Luka muṅwali wa Bivhili o ṅwala nga ha ndivho ya Mudzimu ‘ya u endela vhathu vha vha nnḓa vha u ranga, A vha ṱanganeza vha vha vha dzina ḽawe.’ (Mishumo 15:14) U ya nga 1 Petro 2:10, ‘kale vho vha vhe si vhathu, fhedzi zwino ndi vhathu vha Mudzimu.’ Maṅwalo a vha vhidza “Isiraele wa Mudzimu,” zwine zwa amba Isiraele wa muya. (Vha-Galata 6:16; 2 Vha-Korinta 1:21) Nga zwenezwo, mulanga muswa, ndi mulanga vhukati ha Yehova Mudzimu na Isiraele wa muya.

 Vhusikuni hawe ha u fhedza e na vhafunziwa, Yesu o vhofha muṅwe mulanga navho. O vha vhudza a ri: “Huno nṋe ndi ḓo ni kumedza muvhuso vhunga Khotsi-anga ó u kumedza nṋe.” (Luka 22:29) Wonoyu ndi mulanga wa Muvhuso. Tshivhalo tsha vhathu vha songo fhelelaho vhane vha ḓo vha kha mulanga wa Muvhuso ndi 144 000. Musi vho no vuselwa ṱaḓulu, vha ḓo vhusa na Kristo sa mahosi na vho-tshifhe. (Ndzumbululo 5:9, 10; 14:1-4) Ngauralo, vhane vha vha kha mulanga muswa na Yehova Mudzimu vha dovha vha vha kha mulanga wa Muvhuso na Yesu Kristo. Ndi vhone fhedzi vhane vha fanela u ṱanganela kha zwiga zwa Tshilalelo tsha Murena.

Vhane vha fanela u ṱanganela kha zwiga zwa Tshihumbudzo vha zwi ḓivha hani uri vha na vhushaka ho khetheaho na Mudzimu na uri vha ma-ḽa-ifa na Kristo? Paulo o ṱalutshedza a ri: “Muya-mukhethwa Ene muṋe u a ṱanziela-vho, a tshi vhudza muya washu zwauri ri vhana vha Mudzimu. Arali rí vhana, na hone ri ma-ḽa-ifa a Mudzimu, vhané ifa ra ḽa roṱhe na Kristo; arali nangoho ró ṱhuphea roṱhe nae’, hu u pfi ri ḓo kona u ya vhugalani nae’.”—Vha-Roma 8:16, 17.

A tshi shumisa muya wawe mukhethwa, kana maanḓa awe a shumaho, Mudzimu u ḓodza ma-ḽa-ifa a Kristo. Zwenezwi zwi ita uri vha vhe na vhungoho ho khwaṱhaho ha uri ndi ma-ḽa-ifa a Muvhuso. Wonoyo muya u ita uri Vhakriste vho ḓodzwaho vha vhe na fulufhelo ḽa u tshila ṱaḓulu. Vha dzhia zwoṱhe zwine Bivhili ya zwi amba nga ha vhutshilo ha ṱaḓulu sa zwine zwa khou ambelwa khavho. Hafhu, vho ḓiimisela u ṱutshela zwithu zwoṱhe zwi tshimbidzanaho na vhushaka havho na vhathu kha ḽifhasi, u katela u vha kha ḽifhasi na vhukonani hoṱhe na vhathu. Naho Vhakriste vho ḓodzwaho nga muya vha tshi zwi ḓivha uri vhutshilo vhu ḓo vha vhu havhuḓi kha ḽifhasi ḽa Paradiso, a vha na fulufhelo ḽa u tshila kha ḽifhasi. (Luka 23:43) Nga ṅwambo wa u thuswa nga muya wa Mudzimu hu si mavhonele a zwa vhurereli, vha na fulufhelo ḽi sa shanduki ḽa u tshila ṱaḓulu nahone zwo tea, vha a ṱanganela kha zwiga zwa Tshihumbudzo.

Kha ri ri muthu ha na vhuṱanzi ho fhelelaho ha uri u kha mulanga muswa na mulanga wa Muvhuso. Hu pfi mini arali a si na vhuṱanzi ha muya wa Mudzimu malugana na uri u muḽaifa na Kristo kana hai? Ngauralo zwi ḓo vha zwo khakhea uri a ṱanganele kha u ḽa zwiga zwa Tshihumbudzo. Vhukuma, Mudzimu u ḓo sinyuwa vhukuma arali muthu a ḓidzhia sa muṅwe wa vha re na fulufhelo ḽa u vhusa ṱaḓulu na u vha tshifhe ngeno a tshi zwi ḓivha zwavhuḓi uri hana yeneyo mbidzo.—Vha-Roma 9:16; Ndzumbululo 22:5.

Tsho Vha Tsho Fanela U Pembelelwa Lungana?

Naa lufu lwa Yesu lu fanela u pembelelwa vhege iṅwe na iṅwe kana khamusi ḓuvha ḽiṅwe na ḽiṅwe? Kristo o thoma Tshilalelo tsha Murena nahone a vhulahwa zwi songo tea nga Ḓuvha ḽa Paseka. Paseka, ye ya vha i tshi vha hone luthihi nga ṅwaha, nga ḽa 14 Nisan, yo vha i ya u pembelela u vhofhololwa ha Vhaisiraele vhupulini ha Egipita. (Ekisodo 12:6, 14; Levitiko 23:5) Ngauralo lufu lwa ‘Kristo lune lwa vha paseka yashu’ lu fanela u pembelelwa luthihi fhedzi nga ṅwaha, hu si vhege iṅwe na iṅwe kana ḓuvha ḽiṅwe na ḽiṅwe. (1 Vha-Korinta 5:7) Musi vha tshi pembelela Tshilalelo tsha Murena, Vhakriste vha tevhela maitele a fanaho na e Yesu a a shumisa musi a tshi thoma honoho vhuṱambo.

Nga zwenezwo, Paulo o vha a tshi khou amba mini musi a tshi ri: “Misi yoṱhe arali ni tshi ḽa itshi tshinnkwa, ni tshi nwa itshi tshinwelo, ni ṱanziela lufu lwa Murena; a tshi ḓa a wane ní tsha ḓi ralo”? (1 Vha-Korinta 11:26) Kha enea mafhungo, Paulo o shumisa ipfi ḽine ḽa amba uri “tshifhinga tshoṱhe musi ni tshi.” Ngauralo, o vha tshi khou amba uri tshifhinga tshoṱhe musi Vhakriste vho ḓodzwaho vha tshi ṱanganela kha zwiga, vha ḓo vha vha tshi khou sumbedza lutendo  lwavho kha tshiṱhavhelo tshi rengululaho tsha Yesu.

Vhakriste vho ḓodzwaho vho vha vha tshi ḓo pembelela lufu lwa Kristo u vhuya u swika “a tshi ḓa.” Honoho vhuṱambo ho vha vhu tshi ḓo bvela phanḓa u swika Yesu a tshi ḓa u ṱanganedza vhatevheli vhawe vho ḓodzwaho ṱaḓulu nga u vha vusela vhutshiloni ha muya ‘tshifhingani tsha u vha hone’ hawe. (1 Vha-Thesalonika 4:14-17) Hezwi zwi tshimbidzana na maipfi a Kristo e a a vhudza vhaapostola vha fulufhedzeaho vha 11 ane a ri: “Huno ndi tshi ya u ni lugisela vhudzulo, ndi ḓo vhuya nda ni dzhia uri ni ḓe huné nṋe nda vha hone.”—Yohane 14:3.

Tshihumbudzo Tshi Amba Mini Kha Inwi?

Naa zwo tea u ṱanganela kha u ḽa zwiga zwa Tshihumbudzo u itela u vhuyelwa nga tshiṱhavhelo tsha Yesu na u wana vhutshilo vhu sa fheli kha ḽifhasi? Hai. Bivhili a i sumbedzi na luthihi uri nga murahu ha musi vho no vuselwa kha ḽifhasi vhathu vho faho vha tshi ofha Mudzimu u fana na Noaxe, Abrahamu, Sara, Isaka, Rebeka, Yosefa, Mushe, na Davida vha ḓo ṱanganela kha u ḽa zwenezwi zwiga. Naho zwo ralo, vhone na vhoṱhe vhane vha ṱoḓa vhutshilo vhu sa fheli kha ḽifhasi vha ḓo tea u sumbedza u vha na lutendo kha Mudzimu na Kristo na kha ndugiselelo ya Yehova ya tshiṱhavhelo tshi rengululaho tsha Yesu. (Yohane 3:36; 14:1) U itela u wana vhutshilo vhu sa fheli na inwi ni fanela u sumbedza u vha na lutendo lu fanaho. U vha hone haṋu kha vhuṱambo ha lufu lwa Kristo zwi ḓo ni humbudza nga ha ndeme ya tshenetsho tshiṱhavhelo na u ita uri ni tshi dzhiele nṱha.

Muapostola Yohane o khwaṱhisedza ndeme ya tshiṱhavhelo tsha Yesu musi a tshi ri: “Ndi tshi ni [vhaḓodzwa ngae] ṅwalela aya, ndi uri ni sa ḓo tshinya. Hone muthu a tshi tshinya, ri na muimeleli ha Khotsi, Yesu Kristo o lugaho, ndi Ene tshipfumelo tsha zwivhi zwashu, Hone a si tshipfumelo tsha zwashu fhedzi, ndi tsha zwa shango ḽoṱhe.” (1 Yohane 2:1, 2) Zwo tea uri vhaḓodzwa vha ambe uri tshiṱhavhelo tsha Yesu ndi tshipfumelelo tsha zwivhi zwavho. Fhedzi tshenetsho tshiṱhavhelo tshi dovha tsha vha tsha shango ḽoṱhe, tshi dovha tsha ita uri vhathu vhoṱhe vha thetshelesaho vha wane vhutshilo vhu sa fheli!

Naa ni ḓo vha ni hone nga ḽa 4 April, 2004 u itela u pembelela lufu lwa Yesu? Honovhu vhuṱambo vhu ḓo vha hone fhethu hune Ṱhanzi dza Yehova dza farela hone miṱangano yadzo shangoni ḽoṱhe. Arali na vha hone, ni ḓo vhuyelwa vhukuma nga u thetshelesa nyambo ya ndeme vhukuma yo thewaho Bivhilini. Ni ḓo humbudzwa nga vhunzhi ha zwithu zwe Yehova Mudzimu na Yesu Kristo vha ri itela zwone. Zwi ḓo dovha zwa vhuyedza muyani u vha vhukati ha vhane vha dzhiela nṱha Mudzimu na Kristo na tshiṱhavhelo tshi rengululaho tsha Yesu. Honoho vhuṱambo vhu nga khwaṱhisa lutamo lwaṋu lwa u ṱanganedza vhuthu ha Mudzimu, vhune ha ḓo ita uri ni wane vhutshilo vhu sa fheli. Ilwani nga nungo dzoṱhe uri hu sa vhe na tshine tsha ni thivhela. Ivhani hone kha honovhu vhuṱambo vhu takadzaho vhu hulisaho na u takadza Khotsi ashu wa ṱaḓulu, Yehova Mudzimu.

[Tshifanyiso kha siaṱari 5]

Lufu lwa Yesu lu tshimbidzana na misumbedzo mivhili mihulwane ya lufuno

[Tshifanyiso kha siaṱari 6]

Tshinnkwa tshi si na dini na veini ndi zwiga zwo teaho u imela muvhili wa Yesu u si na tshivhi na malofha awe o shululwaho