Vhuṱambo Vhune Ha Ni Kwama

MUSI e kha ḽifhasi, Yesu Kristo o thoma vhuṱambo vhune ha hulisa Mudzimu. Ndi honovhu vhuṱambo fhedzi ha vhurereli he a vhudza vhatevheli vhawe uri vha vhu pembelele. Ndi Tshilalelo tsha Murena, tshine tsha dovha tsha vhidzwa Tshilalelo tsha u Fhedza.

Zwi dzhieni uri no vha ni hone nahone no ṱalela zwenezwo zwiitea u vhuya u swika hu tshi vha na honoho vhuṱambo. Yesu na vhaapostola vhawe vho kuvhangana nḓuni ya nṱha ngei Yerusalema u itela u pembelela Paseka ya Vhayuda. Vho vha vho no fhedza u ḽa Paseka ya sialala, i katelaho ṋama ya nngu yo kadzingiwaho, miroho i vhavhaho, tshinnkwa tshi si na dini, na veini tswuku. Muapostola a sa fulufhedzei ane a pfi Yudasi Iskariote o bviselwa nnḓa nahone hu si kale u ḓo fheṱa Muṋe wawe. (Mateo 26:17-25; Yohane 13:21, 26-30) Yesu u sala na vhaapostola vhawe vha fulufhedzeaho vha 11. Mateo ndi muṅwe wavho.

U ya nga mafhungo a Mateo we a vhona tshenetsho tshiitea nga maṱo, Yesu o thoma Tshilalelo tsha Murena nga heyi nḓila: “Yesu a dzhia tshinnkwa [tshi si na dini], a livhuha, a tshi ṅwatakanya, a ṋea vhafunziwa vhawe a ri: Ṱanganedzani, ni ḽe, ndi muvhili wanga. A dzhia na tshinwelo [tsha veini], a livhuha, a vha ṋea a ri: Inwani ngatsho’ noṱhe; Ndi malofha anga aya a mulanga muswa, a shululelwaho vhanzhi uri vha hangwelwe zwivhi.”—Mateo 26:26-28.

Ndi ngani Yesu o thoma Tshilalelo tsha Murena? Musi a tshi khou ita zwenezwo, ndi ngani o shumisa tshinnkwa tshi si na dini na veini tswuku? Naa vhatevheli vha Kristo vhoṱhe vho vha vha tshi fanela u ṱanganela kha u ḽa zwenezwo zwiga? Tshenetshi Tshilalelo tsho vha tshi tshi fanela u pembelelwa lungana? Nahone naa tshi na zwine tsha amba zwone kha inwi?