“Vhuḓinḓa Hau U Vhu Ḓadzise Nga Ho Fhelelaho”
“Vhuḓinḓa Hau U Vhu Ḓadzise Nga Ho Fhelelaho”
“Ni ite tshumelo yaṋu nga vhuḓalo.”— 2 TIMOTHEO 4:5, Byington.
1, 2. Naho Vhakriste vhoṱhe vhe vhahuweleli, ndi ifhio ṱhoḓea ya Maṅwalo kha vhahulwane vha tshivhidzo?
NAA ni muhuweleli wa Muvhuso? Arali zwo ralo, livhuhani Yehova nga yeneyi ndugelo yavhuḓi. Naa ni muhulwane wa tshivhidzo? Yeneyo ndi ndugelo yo engedzeaho i bvaho ha Yehova. Fhedzi ri songo vhuya ra hangwa uri tshikolo kana u vha na vhukoni ha u amba zwi nga si vhuye zwa ita uri ri fanelee u vha vhaḓinḓa kana u vha vhalavhelesi tshivhidzoni. Yehova u ita uri ri fanelee u vha vhaḓinḓa, na uri vhaṅwe vhanna vhukati hashu vha vhe na ndugelo ya u vha vhalavhelesi nga ṅwambo wa uri vha a swikelela ṱhoḓea dza maṅwalo.—2 Vha-Korinta 3:5, 6; 1 Timotheo 3:1-7.
2 Vhakriste vhoṱhe vho ḓiṋekedzaho vha ita mushumo wa u huwelela, fhedzi zwihuluhulu vhalavhelesi, vha tea u vhea tsumbo dzavhuḓi vhuḓinḓani. Vhahulwane “vha ḓi-netisaho nga fhungo na nga u funza” vha a ṱhogomelwa nga Mudzimu na nga Kristo, na nga dziṅwe Ṱhanzi dza Yehova. (1 Timotheo 5:17; Vha-Efesa 5:23; Vha-Heberu 6:10-12) Nga fhasi ha zwiimo zwoṱhe, zwine muhulwane wa tshivhidzo a funza zwi fanela u vha zwa muya, samusi muapostola Paulo o vhudza mulavhelesi Timotheo a ri: “Hu ḓo ḓa tshifhinga, tshiné dzipfunzo dzo takalaho dzi sá lwaliho vha sa ḓo dzi tendela, tshavho ha ḓo vha u tevhedza dzinyemulo dza vhone vhaṋe, vha ḓi-kakatela vhafunzi nga u pfa nḓevheni hu tshi ṱhoṱhona. Vha ḓo litsha u ṋekedza dzinḓevhe kha mafhungo-ngoho, vha pambuselwa kha dzingano. Iwe-ha, dzula wó dzivhuluwa kha zwoṱhe, konḓelela zwi vhavhaho, shuma mushumo wa mudzia-mafhungo-maḓifha; vhuḓinḓa hau U vhu ḓadzise nga ho fhelelaho.”—2 Timotheo 4:3-5, vhambedzani NW.
3. Hu fanela u itwa mini u itela uri pfunzo dza mazwifhi dzi sa vhee khomboni vhumuya ha tshivhidzo?
3 U itela u vha na vhungoho ha uri pfunzo dza mazwifhi a dzi vhei khomboni vhumuya ha tshivhidzo, mulavhelesi u fanela u tendelana na nyeletshedzo ya Paulo ine ya ri: “Dzivhuluwani kha zwoṱhe, . . . ni ite tshumelo yaṋu nga vhuḓalo.” (2 Timotheo 4:5, Byington) Vhukuma, muhulwane u fanela ‘u ḓadzisa vhuḓinḓa hawe nga ho fhelelaho.’ U fanela u vhu ḓadzisa nga ho fhelelaho kana nga vhuḓalo. Muhulwane ane a ṱanganela nga vhuḓalo vhuḓinḓani hawe u ṋea ṱhogomelo yo teaho kha vhuḓifhinduleli hawe hoṱhe, zwoṱhe a tshi zwi ita nga ho fhelelaho. Munna o raloho u dovha a fulufhedzea na kha zwithu zwiṱuku.—Luka 12:48; 16:10.
4. Ndi mini zwine zwa nga ri thusa u ḓadzisa vhuḓinḓa hashu nga ho fhelelaho?
4 U ḓadzisa vhuḓinḓa hashu nga ho fhelelaho a zwi ṱoḓi tshifhinga tshinzhi misi yoṱhe, fhedzi zwi ṱoḓa uri muthu a shumise tshifhinga zwavhuḓi. U ita zwithu nga u linganyisela zwi nga thusa Vhakriste u khunyeledza zwiṅwe zwithu vhuḓinḓani. U itela uri a kone u fhedza tshifhinga tshinzhi e tshumeloni ya tsimu, muhulwane u fanela u vha muthu o dzudzanyeaho zwavhuḓi u itela u linganyisela mbekanyamushumo yawe na u ḓivha mushumo une a nga u ṋea vhaṅwe na nḓila ya u ita nga u ralo. (Vha-Heberu 13:17) Nga ho ḓoweleaho, muhulwane a ṱhonifheaho u dovha a ita tshipiḓa tshawe, u fana na Nehemia, we a ṱanganela kha u fhaṱululwa ha mbodo dza Yerusalema. (Nehemia 5:16) Vhashumeli vhoṱhe vha Yehova vha fanela u ṱanganela nga vhuḓalo mushumoni wa u huwelela Muvhuso.—1 Vha-Korinta 9:16-18.
5. Ri fanela u ḓipfa hani nga ha vhuḓinḓa?
5 Ri na mushumo u takadzaho lungafhani samusi ri vhahuweleli vha Muvhuso wo tikwaho ṱaḓulu! Vhukuma ri a dzhiela nṱha ndugelo ya u ṱanganela kha u huwelela mafhungo maḓifha kha vhadzulapo vhoṱhe vha kha ḽifhasi musi vhufhelo vhu sa athu swika. (Mateo 24:14) Naho ri songo fhelela, ri nga ṱuṱuwedzwa nga maipfi a Paulo ane a ri: “Dzánga ḽeneḽo ro ḽi fara nga midzio ya vumba, uri u hulesa ha maanḓa hu vhe ha Mudzimu, hu si vhe hu tshi bva kha riṋe.” (2 Vha-Korinta 4:7) Ee, ri nga ita tshumelo i ṱanganedzwaho—fhedzi zwenezwo ri nga zwi kona nga maanḓa na nga vhuṱali zwe ra fhiwa nga Mudzimu.—1 Vha-Korinta 1:26-31.
U Sumbedza Vhugala Ha Mudzimu
6. Ndi phambano ifhio ye ya vha hone vhukati ha Vhaisiraele vha ṋama na Isiraele wa muya?
6 A tshi ambela kha Vhakriste vho ḓodzwaho, Paulo o amba uri Mudzimu ndi “ene we nangoho ra kona u fanelea nga ho teaho u vha vhaḓinḓa vha mulanga muswa.” Muapostola o sumbedza phambano vhukati ha mulanga muswa wo itwaho na Isiraele wa muya nga Yesu Kristo na mulanga wa Mulayo wa kale we wa itwa nga Vhaisiraele vha ṋama nga Mushe. Paulo o dovha a engedza nga uri musi Mushe a tshi tsa Thavhani ya Sinai e na mbaba dze dza vha dzo ṅwalwa Milayo ya Fumi, tshifhaṱuwo tshawe tsho vha tshi tshi khou penya vhukuma lwe Vhaisiraele vha kundelwa u tshi sedza nga ho livhaho. Naho zwo ralo, nga u ya ha tshifhinga ho bvelela tshiṅwe tshithu tsha ndeme nga ṅwambo wa uri “mihumbulo yavho yo omelela” na nga uri lupila lwo vha lwo fukedza mbilu dzavho. Fhedzi lwonolwo lupila lwo vha lu tshi tsiruwa khavho musi vha tshi humela kha Yehova nga mbilu yoṱhe. Musi a tshi dovha u ambela kha vhuḓinḓa he ha ṋewa vha re kha mulanga muswa, Paulo o ri: “Riṋe roṱhe, ri ré vha vhonetshelwaho nga lupenyo lwa Murena, rí so ngó fúkedza zwifhaṱuwo.” (2 Vha-Korinta 3:6-8, 14-18, vhambedzani NW; Ekisodo 34:29-35) Na vha “dziṅwe nngu” dza Yesu ṋamusi vha na ndugelo ya u vhonetshela vhugala ha Yehova.—Yohane 10:16.
7. Vhathu vha nga sumbedza hani vhugala ha Mudzimu?
7 Vhathu vha re na tshivhi vha nga sumbedza hani vhugala ha Mudzimu, ngeno hu si na muthu ane a nga kona u vhona tshifhaṱuwo tshawe nahone a tshila? (Ekisodo 33:20) Ri fanela u humbula uri nga nnḓa ha uri Yehova ndi wa vhugala, u dovha a vha na ndivho yawe ya vhugala ya u lwela vhuvhusahoṱhe hawe a tshi shumisa Muvhuso. Mafhungo-ngoho ane a tshimbidzana na Muvhuso a vhumba tshipiḓa tsha “mishumo mihulu ya Mudzimu” ye ya thoma u ḓivhadzwa nga vhe vha shelwa muyamukhethwa nga Pentekoste ya 33 C.E. (Mishumo 2:11) Vha tshi livhiswa nga muya, vho kona u ḓadzisa nga ho fhelelaho vhuḓinḓa he vha ṋewa hone.—Mishumo 1:8.
8. Malugana na vhuḓinḓa, Paulo o vha o ḓiimisela u ita mini?
8 Paulo o vha o ḓiimisela u sa tendela naho tshi tshini tshi tshi mu thivhela u ḓadzisa vhuḓinḓa hawe nga ho fhelelaho. O ṅwala a ri: “Vhunga ró ṋewa [honohu vhuḓinḓa, NW] nga he ra khathutshelwa ngaho’, a ri dinalei. Ro khaukana na tshidzumbe tshi bvaho kha ṱhoni, a ri tshimbili nga maano manzhi na nga u fhureledza nga mafhungo a Mudzimu. Ri tshi bveledza khagala mafhungo-ngoho, phanḓa ha Mudzimu ndi u ḓi-ita vha tamisaho kha dzimvalo dzoṱhe dza vhathu.” (2 Vha-Korinta 4:1, 2) Nga zwe Paulo a zwi vhidza “honohu vhuḓinḓa,” mafhungo-ngoho o dzumbululwa nahone tshedza tsha muya tsha phaḓalala u swika kule.
9, 10. Zwi konadzea hani u vhonetshela vhugala ha Yehova?
9 Malugana na tshisima tsha tshedza tsha vhukuma na tsha muya, Paulo o ṅwala a ri: “Mudzimu we a ri: Swiswini nga hu vhonetshele tshedza! Ndi ene we a vhonetshela dzimbiluni dzashu uri hu vhe na tshedza tsha u ṱalukanya lupenyo lwa Mudzimu kha tshifhaṱuwo tsha Kristo.” (2 Vha-Korinta 4:6; Genesi 1:2-5) Samusi ro ṋewa ndugelo khulwane vhukuma ya u vha vhaḓinḓa vha Mudzimu, kha ri dzule ro kuna u itela uri ri vhonetshele vhugala ha Yehova sa lupenyo.
10 Vhathu vha re swiswini a vha koni u vhona vhugala ha Yehova kana tsumbo yaho i bvaho kha Yesu Kristo, Mushe Muhulwane. Fhedzi samusi ri vhashumeli vha Yehova, ri ṱanganedza tshedza tsha vhugala tshi bvaho Maṅwaloni nahone ra vhonetshela vhaṅwe ngatsho. U itela uri vhathu vha re swiswini ḽa muya vha ponyoke u fheliswa, vha ṱoḓa tshedza tshi bvaho ha Mudzimu. Nga zwenezwo, nga dakalo na nga u fhisea zwihulu, ri thetshelesa ndaela ya Mudzimu ya u ita uri tshedza tsha vhugala ha Yehova tshi penye.
Itani Uri Tshedza Tshaṋu Tshi Penye Pfunzoni Dza Bivhili Dza Hayani
11. Yesu o ri mini nga ha u ita uri tshedza tshashu tshi vhonetshele, nahone ndi ifhio iṅwe nḓila ya u ita zwenezwi vhuḓinḓani hashu?
11 Yesu o vhudza vhatevheli vhawe a ri: “Inwi ni tshedza tsha shango. Muḓi u re kha thavha a u koni u dzumbama. Na hone, muthu ha fungi ḓenzhe a ḽi tiba nga tshirundu; muthu u ḽi ṱoma vhudzuloni haḽo, uri ḽi vhonetshele vhoṱhe vha re nḓuni. Na tshaṋu tshedza kha tshi vhonetshele vhathu ngauralo; kha vha vhone zwivhuya kha inwi, vha rende khotsi-aṋu wa ṱaḓulu.” (Mateo 5:14-16) Vhuḓifari hashu havhuḓi vhu nga ita uri vhaṅwe vha ṋee Mudzimu vhugala. (1 Petro 2:12) Nahone masia manzhi a mushumo washu wa u huwelela a ri ṋea zwibuli zwinzhi zwa u vhonetshela tshedza tshashu. Tshiṅwe tsha zwipikwa zwashu zwihulwane ndi u vhonetshela tshedza tsha muya tshi bvaho Ipfini ḽa Mudzimu nga u fara pfunzo dza Bivhili dza hayani. Hezwi ndi zwa ndeme vhukuma u itela u ḓadzisa vhuḓinḓa hashu nga vhuḓalo. Ndi nyeletshedzo dzifhio dzine dza nga ri thusa u fara pfunzo dza Bivhili dzine dza kwama mbilu dza vhane vha ṱoḓa mafhungo-ngoho?
12. Thabelo i tshimbidzana hani na mushumo wa u fara pfunzo dza Bivhili dza hayani?
12 U rabela Yehova nga ha enea mafhungo zwi sumbedza lutamo lwashu luhulwane lwa u fara pfunzo dza Bivhili. Zwi dovha zwa sumbedza uri ri a vhona ṱhoḓea ya u thusa vhaṅwe u wana nḓivho ya Mudzimu. (Hesekiele 33:7-9) Yehova u ḓo fhindula thabelo dzashu zwa vhukuma na u fhaṱutshedza vhuḓidini hashu vhuhulwane vhuḓinḓani. (1 Yohane 5:14, 15) A ri rabeleli fhedzi u wana muthu ane ra nga fara nae pfunzo ya Bivhili ya hayani. Musi ro no thoma pfunzo, thabelo na u elekanya nga ha ṱhoḓea dzo livhaho dza mugudiswa wa Bivhili zwi ḓo ri thusa u fara pfunzo iṅwe na iṅwe nga nḓila i bvelelaho.—Vha-Roma 12:12.
13. Ndi mini zwine zwa nga ri thusa u fara pfunzo dza Bivhili dza hayani dzi bvelelaho?
13 U itela u fara pfunzo dza Bivhili dza hayani, ri fanela u lugiselela pfunzo iṅwe na iṅwe zwavhuḓi. Arali ri tshi ḓipfa ri sa fanelei, zwi nga thusa vhukuma u sedza nḓila ine mulavhelesi wa Pfunzo ya Bugu ya Tshivhidzo a fara ngayo ngudo ya vhege iṅwe na iṅwe. Nga zwiṅwe zwifhinga, ri nga ṱuwa na vhahuweleli vha Muvhuso vho no vhaho na mvelelo dzavhuḓi kha u fara pfunzo dza Bivhili dza hayani. Vhukuma, ri fanela u ṱhogomela mavhonele na maitele a u funza zwa Yesu Kristo.
14. Ri nga swikelela hani mbilu ya ane ra guda nae Bivhili?
14 Yesu o vha a tshi takalela u ita zwi funwaho nga Khotsi awe wa ṱaḓulu na u amba na vhaṅwe nga ha Mudzimu. (Psalme ya 40:8) O vha o vuḓa nahone a tshi kona u swikelela mbilu dza vhane vha mu thetshelesa. (Mateo 11:28-30) Nga zwenezwo kha ri lingedze u swikelela mbilu dza vhane ra guda navho Bivhili. Arali ri tshi ṱoḓa u ita nga u ralo, ri fanela u lugiselela ngudo iṅwe na iṅwe ri na zwiimo zwa onoyo mugudiswa muhumbuloni. Sa tsumbo, arali mvelele yawe i sa tendi kha Bivhili, ri nga kha ḓi tea u ita uri a tende zwa uri Bivhili ndi ya vhukuma. Nga zwenezwo, zwi khagala uri ri ḓo vhala maṅwalo manzhi na u a ṱalutshedza.
Thusani Vhagudiswa U Pfesesa Zwifanyiso
15, 16. (a) Ri nga thusa hani mugudiswa ane a si pfesese tshifanyiso tsho shumiswaho Bivhilini? (b) Ri nga ita mini arali iṅwe ya khandiso dzashu ya shumisa tshifanyiso tshine tsha konḓela muṅwe mugudiswa wa Bivhili u tshi pfesesa?
15 Muthu ane ra guda nae Bivhili a nga vha a songo ḓowelana na tshiṅwe tshifanyiso tsho shumiswaho Maṅwaloni. Sa tsumbo, a nga kha ḓi sa pfesesa zwe Yesu a vha a tshi khou amba zwone musi a tshi ri luvhone lu ṱomiwa vhudzuloni halwo. (Marko 4:21, 22) Yesu o vha a tshi khou ambela kha luvhone lwa kale lu shumisaho mapfura lu re na thambo i nyengaho. Lwonolo luvhone lwo vha lu tshi ṱomiwa fhethu ho teaho nahone zwenezwo lwa vhonetshela nḓuni. Hu nga ṱoḓea u ita ṱhoḓisiso nga ha thero dzine dza ri “Lamp” na “Lampstand” khandisoni dzi ngaho Insight on the Scriptures u itela u pfesesa zwavhuḓi nga ha tshifanyiso tsha Yesu. * Zwi vhuyedza lungafhani u ya u fara pfunzo ya Bivhili ri na ṱhaluso ine ya pfeseswa na u takalelwa nga mugudiswa!
16 Khandiso dzi thusaho u guda Bivhili dzi nga shumisa tshifanyiso tshine mugudiswa a konḓelwa u tshi pfesesa. Ḓiṋeeni tshifhinga tsha u tshi ṱalutshedza, kana ni shumise tshiṅwe tshifanyiso tshine tsha amba mbuno i fanaho natsho. Khamusi khandiso i khou ombedzela uri mufarisi wavhuḓi na vhuḓidini ha vhathu vhavhili ndi zwa ndeme mbinganoni. U fanyisa zwenezwi, ni nga ambela kha tshifanyiso tsha vhomatsige musi vha tshi thoma u lidza mirumba yavho nahone ṋambi dza sima nga vhutsila lune nga murahu ha pfala luimbo lu takadzaho mbilu. Nga hu fanaho, ṱhoḓea ya mufarisi wavhuḓi na vhuḓidini ha vhathu vhavhili zwi nga fanyiswa na nḓila ine vhashumi vha shumisana ngayo musi vha tshi posana mabogisi ane vha khou a laisulula kha gungwa.
17. Ri nga guda mini kha Yesu nga ha zwifanyiso?
17 U shumisa tshiṅwe tshifanyiso tshi fanaho zwi ṱoḓa u lugiselela hu tshee nga phanḓa. Naho zwo ralo, ndi yone nḓila ya u sumbedza u dzhiela hashu nṱha mugudiswa wa Bivhili. Yesu o shumisa zwifanyiso zwi leluwaho u itela u ri thero dzi konḓaho dzi pfale. Pfunzoni yawe ya Thavhani o ṋea tsumbo ya zwenezwi, nahone Bivhili i sumbedza uri pfunzo yawe yo vha na mvelelo dzavhuḓi kha vhathetshelesi vhawe. (Mateo 5:1–7:29) Yesu o ṱalutshedza zwithu a sa fheli mbilu nga ṅwambo wa uri o vha e na dzangalelo ḽihulwane kha vhaṅwe.—Mateo 16:5-12.
18. Hu themendelwa mini malugana na maṅwalo a songo ṱalutshedzwaho khandisoni dzashu?
18 U vha hashu na dzangalelo kha vhaṅwe zwi ḓo ri ṱuṱuwedzela ‘u ambedzana na vhathu nga maṅwalo.’ (Mishumo 17:2, 3) Hezwi zwi ṱoḓa u guda zwi tshi bva mbiluni na u rabela u katela na u shumisa khandiso dzo bveledzwaho nga “mukoma a fulufhedzeaho.” (Luka 12:42-44) Sa tsumbo, bugu ine ya pfi Nḓivho Ine Ya Isa Vhutshiloni Vhu Sa Fheli yo redza maṅwalo manzhi. * Nga ṅwambo wa uri bugu ndi ṱhuku, a si maṅwalo oṱhe o ṱalutshedzwaho. Musi ni tshi khou guda Bivhili, ndi zwa ndeme u vhala na u ṱalutshedza maṅwe a enea maṅwalo o ṅwaliho nahone a si ṱalutshedzwe. Tshihulwane vhukuma ndi uri pfunzo dzashu dzo thewa Ipfini ḽa Mudzimu, nahone ḽi na maanḓa vhukuma. (Vha-Heberu 4:12) Vhalani Bivhili kha ngudo iṅwe na iṅwe, ni tshi shumisa misi yoṱhe maṅwalo a re kha dziphara. Thusani mugudiswa u vhona zwine Bivhili ya zwi amba nga ha iṅwe thero kana vhuṅwe vhukando. Lwelani u mu sumbedza nḓila ine a nga vhuyelwa ngayo nga u thetshelesa Mudzimu.—Yesaya 48:17, 18.
Vhudzisani Mbudziso Dzi Nyanyulaho
19, 20. (a) Ndi ngani ri tshi fanela u shumisa mbudziso musi ro fara pfunzo ya Bivhili ya hayani? (b) Ri nga ita mini arali iṅwe thero i tshi ṱoḓa khaseledzo yo engedzeaho?
19 U shumisa ha Yesu nga vhuṱali mbudziso zwo thusa vhathu uri vha humbule. (Mateo 17:24-27) Arali ra vhudzisa mbudziso dzine dza sa shonise mugudiswa wa Bivhili, phindulo dzawe dzi nga sumbedza zwine a humbula nga ha iṅwe thero. Ri nga kha ḓi wana uri u kha ḓi vha o farelela kha maṅwe mavhonele a si a maṅwalo. Sa tsumbo, a nga kha ḓi vha a tshi tenda kha Vhuraruthihi. Kha ndima 3, bugu ya Nḓivho yo amba uri ipfi “Vhuraruthihi” a ḽi wanali Bivhilini. Yeneyi bugu yo redza na u ṅwala maṅwalo a sumbedzaho uri Yehova a si muthu muthihi na Yesu na uri muyamukhethwa ndi maanḓa a Mudzimu a shumaho, hu si muthu. U vhala na u haseledza enea maṅwalo a Bivhili zwi nga mu thusa. Hu pfi mini arali hu tshi ṱoḓea zwo engedzeaho? Khamusi kha ngudo i tevhelaho, tshiṅwe tshifhinga ri nga tshi fhedza ri tshi khou ita khaseledzo i vhuyedzaho nga ha yeneyo thero samusi yo haseledzwa kha dziṅwe thero dza Ṱhanzi dza Yehova, u fana na bugwana ine ya pfi Naa Ni Fanela U Tenda kha Vhuraruthihi? Nga murahu, ri nga dovha ra vhuyelela u guda nae kha bugu Nḓivho.
20 Khamusi phindulo ya mbudziso i nga mangadza kana u kula nungo. Arali ho katelwa u daha fola kana dziṅwe thero dza ndeme, ri nga kha ḓi phetha u bvela phanḓa na ngudo nahone ra haseledza eneo mafhungo nga murahu. U ḓivha uri mugudiswa washu u kha ḓi daha zwi ḓo ri thusa u wana mafhungo avhuḓi o gandiswaho ane a nga mu thusa u ita mvelaphanḓa ya muya. Musi ri tshi khou lwela u swikelela mbilu ya mugudiswa, ri nga rabela uri Yehova a mu thuse u aluwa muyani.
21. Hu nga itea mini arali maitele ashu a u funza a tendelana na ṱhoḓea dzo livhaho dza mugudiswa wa Bivhili?
21 Nga u lugisela zwavhuḓi na nga thuso ya Yehova, ri ḓo kona u ita uri nḓila ine ra funza ngayo i tendelane na ṱhoḓea dzo livhaho dza mugudi wa Bivhili. Musi tshifhinga tshi khou ḓi ya, ri nga kha ḓi mu thusa uri a fune Mudzimu zwi tshi bva mbiluni. Ri nga dovha ra bvelela kha u mu thusa u guda u ṱhonifha na u livhuha ndangulo ya Yehova. Nahone zwi takadza lungafhani musi vhagudiswa vha Bivhili vha tshi ṱhogomela uri ‘Mudzimu u vhukati hashu.’ (1 Vha-Korinta 14:24, 25) Nga zwenezwo u nga ri ri nga fara pfunzo dza Bivhili dzi bvelelaho na u ita zwine ra nga kona u itela u thusa vhaṅwe u vha vhafunziwa vha Yesu.
Dzanga Ḽine Ḽa Fanela U Dzhielwa Nṱha
22, 23. Hu ṱoḓea mini arali ri tshi ṱoḓa u ḓadzisa vhuḓinḓa hashu nga ho fhelelaho?
22 U itela u ḓadzisa vhuḓinḓa hashu nga vhuḓalo, ri fanela u ḓitika nga maanḓa e ra fhiwa nga Mudzimu. A tshi ambela kha vhuḓinḓa, Paulo o ṅwalela Vhakriste vho ḓodzwaho a ri: “Dzánga ḽeneḽo ro ḽi fara nga midzio ya vumba, uri u hulesa ha maanḓa hu vhe ha Mudzimu, hu si vhe hu tshi bva kha riṋe.”—2 Vha-Korinta 4:7.
23 Naho ri vho ḓodzwaho kana vha “dziṅwe nngu,” ri nga midzio ya vumba. (Yohane 10:16) Fhedzi Yehova a nga ri ṋea maanḓa ane ra a ṱoḓa u itela u ḓadzisa mishumo yashu hu sa londwi mitsiko ine ra ḓiselwa yone. (Yohane 16:13; Vha-Filipi 4:13) Nga zwenezwo kha ri fulufhele kha Yehova nga mbilu yoṱhe, ri dzhiele nṱha dzanga ḽashu ḽa tshumelo, na u ḓadzisa vhuḓinḓa hashu nga ho fhelelaho.
[Ṱhaluso dzi re magumoni a siaṱari]
^ phar. 15 Yo gandiswa nga Ṱhanzi dza Yehova.
^ phar. 18 Yo gandiswa nga Ṱhanzi dza Yehova.
Ni Nga Fhindula Hani?
• Vhahulwane vha tshivhidzo vha nga ita mini u itela u ḓadzisa vhuḓinḓa havho nga ho fhelelaho?
• Ri nga khwinisa hani u bvelela hashu kha pfunzo dza Bivhili dza hayani?
• Ni ḓo ita mini arali mugudiswa wa Bivhili a sa pfesesi tshifanyiso kana a tshi ṱoḓa mafhungo o engedzeaho kha iṅwe thero?
[Mbudziso Dza Pfunzo]
[Tshifanyiso kha siaṱari 16]
Vhahulwane vha Vhakriste vha funza tshivhidzoni na u thusa u gudisa vhatendi ngavho vhuḓinḓani
[Tshifanyiso kha siaṱari 18]
U fara pfunzo dza Bivhili dzi bvelelaho ndi iṅwe nḓila ya u ita uri tshedza tshi penye