666​—A I Sokou Vha Mbalo I Sa Pfesesei

“Uri hu si vhe na ane a renga na ane a rengisa á si na lufayo, lwa dzina ḽa ḽivhanda, namusi dzi dzimbalo dza dzina ḽaḽo. Henefha ndi hone kha vhuṱali. A re na maano nga a vhalulule mbalo dza ḽivhanda. Ngauri ndi mbalo dza muthu. Hone mbalo dzaḽo ndi maḓana maṱanu-na-ḽithihi na mahumi maṱanu-na-ḽithihi na ṱhanu-na-nthihi.”—Ndzumbululo 13:17, 18.

NYAMBEDZANO dzi si gathi dza Bivhili dzo vusa dzangalelo na mbilaelo vhukuma u fana na vhuporofita ha luswayo kana dzina ḽi mangadzaho ḽa “ḽivhanda”—mbalo ya 666. Kha thelevishini na kha Internet, u katela na kha dzifilimu, dzibugu, na magazini, luswayo lwa ḽivhanda lu dzula lu tshi khou sumbedzwa misi yoṱhe nga nḓila ya u tou humbulelwa.

Vhaṅwe vha tenda uri mbalo ya 666 ndi luswayo lwa vhalwi na Kristo vha re Bivhilini. Vhaṅwe vha amba uri lu imela luṅwe luswayo lwa khombe-khombe, u fana na muṅwalo wa kha lukanda une wa swaya muthu sa mushumeli wa ḽivhanda. Vhaṅwe vha kha ḓi tenda uri luswayo lwa 666 lu sumbedza u vha mupapa wa Katolika. Arali vhudzuloni ha maḽeḓere a dzina ḽa mupapa, Vicarius Filii Dei (Vicar wa Murwa wa Mudzimu), ra dzhenisa nomboro dza Tshiroma, nahone ra dzudzanya zwiṱuku dzenedzo mbalo, dzi ḓo ri ṋea mbalo ya 666. Vhaṅwe vhathu vha amba uri mbalo i fanaho i nga waniwa kha dzina ḽa Lulathini ḽa Muvhusi wa Muroma ane a pfi Diocletian na kha dzina ḽa Nero Caesar kha nzudzanyo ya Luheberu. *

Naho zwo ralo, dzenedzo ṱhalutshedzelo dzine dza khou tou humbulelwa dzo fhambana vhukuma na zwine Bivhili ya zwi amba nga ha luswayo lwa ḽivhanda, samusi ri tshi ḓo zwi vhona theroni i tevhelaho. Bivhili i dzumbulula uri vha re na luswayo lwa ḽivhanda vha ḓo ṱangana na mbiti dza Mudzimu musi a tshi fhelisa ano maitele a zwithu. (Ndzumbululo 14:9-11; 19:20) Nga zwenezwo, u pfesesa zwine mbalo ya 666 ya amba zwone zwi fhira u sokou tandulula vhuleme vhu konḓaho. Zwi takadzaho ndi uri Yehova Mudzimu, ane a vha lufuno na Tshisima tsha tshedza tsha muya, ho ngo litsha vhashumeli vhawe vhe swiswini kha enea mafhungo a ndeme.—2 Timotheo 3:16; 1 Yohane 1:5; 4:8.

[Ṱhaluso dzi re magumoni a siaṱari]