Ḓitikeni Nga Muya Wa Mudzimu Musi No Sedzana Na Zwiimo Zwi Shandukaho Vhutshiloni
Ḓitikeni Nga Muya Wa Mudzimu Musi No Sedzana Na Zwiimo Zwi Shandukaho Vhutshiloni
“Lusa uri Mudzimu a vhone U tshi fulufhedzea.”—2 TIMOTHEO 2:15.
1. Ndi tshanduko dzifhio dzine dza ḓisela mutakalo washu wa muya vhuleme?
SHANGO ḽi shanduka tshifhinga tshoṱhe. Ri vhona mvelaphanḓa i swayeaho kha zwa saintsi na thekinolodzhi u katela na u tshinyala huhulwane ha vhuḓifari. Samusi ro zwi ṱhogomela kha thero yo fhiraho, Vhakriste vha fanela u lwa na muya wa shango u lwisanaho na Mudzimu. Naho zwo ralo, samusi shango ḽi tshi khou shanduka, na riṋe ri shanduka nga nḓila nnzhi. Ri bva kha vhuhana ra vha vhaaluwa. Ri nga wana kana u xelelwa nga lupfumo, mutakalo, na vhane ra vha funa. Vhunzhi ha dzenedzo tshanduko a ri koni u dzi langa, nahone dzi nga ḓisela mutakalo washu wa muya vhuṅwe vhuleme vhuhulwane.
2. Vhutshilo ha Davida ho vha hani na tshanduko?
2 Vhathu vha si gathi vha ṱangana na dzenedzo tshanduko khulwane vhutshiloni havho samusi na Davida, murwa wa Isai o vha nadzo. Ho itea tshanduko nga u ṱavhanya kha Davida we a vha e mutukana zwawe wa mulisa nahone a vha na bvumo samusi o vha e muhali wa lushaka. Nga murahu a mbo ḓi vha mushavhapfumo, a zwimiwa vhunga phukha nga khosi i re na vivho. Nga murahu ha zwenezwo, Davida a mbo ḓi vha khosi na u vha mukundi. O konḓelela mvelelo dzi vhavhaho vhukuma dza tshivhi tshihulwane. Ho vha na makhaulambilu na u fhandekana muṱani wawe. O wana lupfumo, o vha mulala, nahone a ṱangana na malwadze a ḓiswaho nga vhulala. Naho zwo ralo, hu sa londwi tshanduko nnzhi dze dza vha hone vhutshiloni hawe, Davida o fulufhela na u ḓitika tshoṱhe nga Yehova na muya Wawe. O ita zwoṱhe uri ‘Mudzimu a vhone a tshi fulufhedzea,’ nahone Mudzimu a mu fhaṱutshedza. (2 Timotheo 2:15) Naho zwiimo zwashu zwo fhambana na zwa Davida, ri nga guda kha nḓila ye a dzudzanya ngayo mafhungo vhutshiloni hawe. Tsumbo yawe i nga ri thusa u pfesesa nḓila ine ra nga bvela ngayo phanḓa ri tshi wana thuso ya muya wa Mudzimu samusi ri tshi sedzana na tshanduko vhutshiloni hashu.
U Ḓiṱukufhadza Ha Davida Ndi Tsumbo Yavhuḓi
3, 4. Zwo ḓa hani uri Davida we a vha e mutukana zwawe wa mulisa a vhe na bvumo kha lushaka?
3 Musi a tshi kha ḓi vha mutukana, Davida o vha a sa dzhielwi nṱha na muṱani wahawe. Musi muporofita Samuele e Betlehema, khotsi a Davida vho mu sumbedza vharwa vhavho vha sumbe kha vha malo. Davida we a vha e murwa wa lupedzi, o vha o siwa a tshi khou lisa nngu. Naho zwo ralo, Yehova o vha o khetha Davida uri a vhe khosi ya Isiraele ya tshifhingani tshi ḓaho. Davida o vhidzwa e malisoni. Hafhu, mafhungo a Bivhili a ri: “Samuele a fara luṋanga lwa tshiḓolo a mu ḓodza é vhukati ha vhakomana vhawe. Nga ḽeneḽo ḓuvha muya wa Yehova wo ḓa kha Davida wa dzula khae’.” (1 Samuele 16:12, 13) Davida o ḓitika nga wonoyo muya vhutshiloni hawe hoṱhe.
4 Nga u ṱavhanya onoyo mutukana wa mulisa o vha a tshi ḓo vha na bvumo shangoni ḽa hawe. O vhidziwa uri a shumele khosi na u i lidzela muzika. O vhulaha mudziammbi Goliata, muswonḓa we a vha o halifha lwe na maswole a Isiraele a re na tshenzhelo o vha a tshi khou ofha u lwa nae. Musi o itwa nduna ya vhadzia-mmbi, Davida o lwa na Vhafilisita a vha kunda. Vhathu vha mu funa. Vha imba nyimbo dza u mu renda. Mathomoni, muṅwe mueletshedzi wa Khosi Saulo ho ngo ṱalusa muṱhannga Davida sa ane a “kona u lidza” tshihwana fhedzi, fhedzi o dovha a mu ṱalusa sa ‘muhali, munna wa u ḓivha pfumo, wa u thanyela mafhungo.’—1 Samuele 16:18; 17:23, 24, 45-51; 18:5-7.
5. Ndi mini zwe zwa vha zwi tshi nga vha zwo ita uri Davida a ḓikukumuse, nahone ri zwi ḓivha hani uri ho ngo ita nga u ralo?
5 Bvumo, lunako, u vha muswa, vhukoni, vhutsila kha u lidza, vhutsila ha nndwa, u takalelwa nga Mudzimu—zwi vhonala uri Davida o vha e na pfaneleo dzoṱhe dzavhuḓi. Dzenedzi pfaneleo dzo vha dzi tshi nga mu ita uri a ḓikukumuse, fhedzi a huna na nthihi yadzo ye ya ita uri a ite nga u ralo. Ṱhogomelani musi Davida a tshi fhindula Khosi Saulo, we a ṋea Davida ṅwananyana wawe uri a mu vhinge. A tshi ḓiṱukufhadza zwa vhukuma, Davida o ri: “Ndi nṋe nnyi? Na vhutshilo hanga ndi mini? Na lushaka lwa khotsi-anga ndi mini, ndi tshi pfi ndi vhe mukwasha wa Thovhela?” (1 Samuele 18:18) A tshi amba nga yeneyi ndimana, muṅwe mugudi o ṅwala a ri: “Zwe Davida a vha a tshi khou amba ndi zwa uri pfaneleo dzawe, kana vhuimo hawe, kana u vha hawe wa mutevhe wa vhuhosini, zwo vha zwi si nga si ite uri a fanelee khuliso ya u vha mukwasha wa khosi.”
6. Ndi ngani ri tshi fanela u ṱahulela u ḓiṱukufhadza?
6 U ḓiṱukufhadza ha Davida ho vha ho thewa kha uri o vha a tshi ḓivha zwa uri Yehova ndi muhulwane vhukuma kha vhathu vha songo fhelelaho nga nḓila dzoṱhe. Davida o mangadzwa nga zwa uri Mudzimu u a ṱhogomela vhathu. (Psalme ya 144:3) Davida o vha a tshi zwi ḓivha uri bvumo naho ḽi ḽifhio ḽine a nga vha e naḽo ho vha hu nga ṅwambo wa uri Yehova o sumbedza u ḓiṱukufhadza, a ḓivhea vhuimoni ha fhasi u itela u mu tika, u mu tsireledza, na u mu ṱhogomela. (Psalme ya 18:35) Yeneyo ndi ngudo yavhuḓi lungafhani kha riṋe! Vhutsila hashu, zwine ra zwi swikelela, na ndugelo dzashu a zwo ngo fanela u ita uri ri ḓikukumuse. Muapostola Paulo o ṅwala a ri: “Ndi nnyi ane a U ṱalula? U na tshini tshe U si tou fhiwa? Hone arali wó tou fhiwa U zuwela’ni wa nga a wo ngo tou fhiwa?” (1 Vha-Korinta 4:7) U itela u vha na muyamukhethwa wa Mudzimu na u takalelwa ngae, ri fanela u ṱahulela na u dzula ri tshi ḓiṱukufhadza.—Yakobo 4:6.
“Ni Songo Ḓi-lifhedzela”
7. Ndi tshifhio tshibuli tshe tsha sokou vha hone tsha uri Davida a vhulahe Khosi Saulo?
7 Naho bvumo ḽa Davida ḽi songo ita uri a ḓikukumuse, ḽo bveledza vengo ḽa u vhulaha kha Khosi Saulo, we a vha e si tsheena muya wa Mudzimu. Naho Davida o vha a songo khakha, o shavha nga ṅwambo wa uri vhutshilo hawe ho vha vhu khomboni nahone a yo dzula sogani. Ḽiṅwe ḓuvha, musi Khosi Saulo a tshi khou zwima Davida, a dzhena bakoni, a sa ḓivhi uri Davida na vhanna vhawe vho dzumbama henefho. Vhanna vhe vha vhe na Davida vha mu kombetshedza uri a shumise tshenetsho tshibuli tshe tsha vha tshi tshi vhonala uri tsho vha hone nga ṅwambo wa Mudzimu u itela uri a vhulahe Saulo. Edzani u humbula vhe swiswini, vha tshi khou hevhedza Davida uri: “Ngoho, ṋamusi ndi ḽone ḓuvha ḽe Yehova a ḽi amba a tshi ri: Ngangoho swina ḽau Nṋe ndi ḓo ḽi kumedzela zwanḓani zwau; U ḽi ite zwine wa funa.”—1 Samuele 24:2-6.
8. Ndi ngani Davida o hana u lifhedza?
8 Davida o hana u huvhadza Saulo. Nga u vha na lutendo na u sa fhela mbilu, o fushea nga u litsha mafhungo zwanḓani zwa Yehova. Musi khosi yo no ṱuwa henefho bakoni, Davida o i vhidzelela nahone a ri: “Yehova u ḓo ri haṱulela. Yehova u ḓo U lifhedza zwine wa khou ṋyita. Tshanḓa tshanga tshone a tshi nga vhi kha iwe.” (1 Samuele 24:13) Naho o vha a tshi ḓivha uri Saulo o vha o khakha, Davida ho ngo ḓilifhedzela, kana u amba luvhi na Saulo kana nga hae. Kha zwiitea zwo fhambanaho, Davida o hana u ḓilifhedzela. Nṱhani hazwo, o ḓitika nga Yehova uri a lugise mafhungo.—1 Samuele 25:32-34; 26:10, 11.
9. Ndi ngani ri songo fanela u lifhedza musi ri tshi khou pikiswa kana u tovholwa?
9 U fana na Davida, ni nga ḓiwana ni zwiimoni zwi konḓaho. Khamusi ni tshi khou pikiswa kana u tovholwa nga vhane na dzhena navho tshikolo, vhane na shuma navho, miraḓo ya muṱa, kana vhaṅwe vhane vha si tende zwine na zwi tenda. Ni songo lifhedza. Lindelani Yehova, ni tshi humbela muya wawe mukhethwa uri u ni thuse. Khamusi vhenevho vhathu vha sa tendi vha ḓo kwamiwa nga vhuḓifari haṋu havhuḓi nahone vha vha vhatendi. (1 Petro 3:1) Hu sa londwi zwine zwa nga bvelela, ivhani na vhungoho ha uri Yehova u a vhona vhuimo haṋu na uri u ḓo vhu lugisa nga tshifhinga tshawe. Muapostola Paulo o ṅwala a ri: “Ni songo ḓi-lifhedzela, vhafunwa; ṋeani mbiti ya Mudzimu nḓila, ngauri ho ṅwaliwa ha pfi: U lifhedza ndi hanga, ndi Nṋe ané nda ḓo tevhedza! u ralo Murena.”—Vha-Roma 12:19.
“Ni Thetshelese Ndayo”
10. Davida o wela hani tshivhini, nahone o lingedza hani u tshi dzumba?
10 Ho no fhela miṅwaha. Davida o mbo ḓi vha khosi i funwaho i re na bvumo vhukuma. U tshila hawe nga u fulufhedzea nga hu swayeaho, u katela na dzipsalme dzavhuḓi dze a dzi ṅwala dza u renda Yehova, zwi nga vha zwo ṋea muhumbulo wa uri o vha e munna we a vha a sa ḓo vhuya a ita tshivhi tshihulwane. Naho zwo ralo, o wela tshivhini tshihulwane. Ḽiṅwe ḓuvha, musi khosi i kha ṱhanga ya nnḓu yayo ya vhona musadzi wa u naka a tshi khou ṱamba. A vhudzisesa nga hae. Musi a tshi ṱhogomela uri musadzi o vha e Batseba na uri munna wawe Uria, o vha e nndwani, Davida a ri a vhidzwe nahone a lala nae. Nga murahu, a zwi ṱhogomela uri u na thumbu. Zwenezwi zwo vha zwi tshi ḓo vha vhuṱunzi lungafhani arali eneo mafhungo a bvukululwa! U ya nga Mulayo wa Mushe, vhupombwe ho vha hu mulandu wo tewaho nga lufu. Zwi vhonala uri khosi yo humbula uri tshenetsho tshivhi tshi nga si ḓivhee. A rumela mulaedza mmbini, u tshi khou amba uri Uria u tea u humela Yerusalema. Davida o vha o fulufhela zwa uri Uria o vha a tshi ḓo eḓela na Batseba, fhedzi zwenezwo zwi sa itee. Musi o no hanganea, Davida a rumela Uria nndwani e na luṅwalo lwa Yoaba, mulanga mmbi. Luṅwalo lwo laedza uri Uria a vhewe fhethu he nndwa ya vhifha zwine zwa ḓo ita uri a vhulahwe. Yoaba o ita zwenezwo, nahone Uria a vhulahwa. Musi Batseba o no tevhedza mukhuvha wa u lilela munna wawe, Davida a mu dzhia a vha musadzi wawe.—2 Samuele 11:1-27.
11. Nathani o vhudza Davida mini, nahone o aravha hani?
11 Maano awe a vhonala o shuma, naho Davida o vha o fanela u zwi ḓivha uri mafhungo oṱhe o vha e khagala phanḓa ha Yehova. (Vha-Heberu 4:13) Ha fhela miṅwedzi, nahone ṅwana a bebwa. Nga zwenezwo, a tshi livhiswa nga Mudzimu, Nathani muporofita a ya kha Davida. Muporofita a anetshela khosi mafhungo a mupfumi we a vha e na nngu nnzhi we a dzhia na u vhulaha ngwana nthihi fhedzi ya mutshinyali. Eneo mafhungo o ita uri Davida a humbule nga ha khaṱulokwayo, fhedzi ho ngo vhuya a zwi humbulela uri eneo mafhungo a na zwine a amba zwone. Davida o haṱula nga u ṱavhanya mupfumi. O sinyuwa, a vhudza Nathani a ri: “Uyo munna tshawe ndi u vhulahwa.”—2 Samuele 12:1-6.
12. Ndi ifhio khaṱulo ye Yehova a ita kha Davida?
12 Muporofita a fhindula a ri: “Munna uyo ndi iwe.” Davida o vha o ḓihaṱula. A zwi timatimisi uri u sinyuwa ha Davida zwo ita uri a ṱavhanye u shona na u ṱungufhala vhukuma. O mangala, a thetshelesa musi Nathani a tshi ṋea khaṱulo ya Yehova i sa iledzei. Ho vha hu si na maipfi a u khuthadza. Davida o nyadza fhungo ḽa Yehova nga u ita tshivhi. Naa ho ngo vhulaha Uria nga pfumo ḽa maswina? Pfumo ḽo vha ḽi sa ḓo ṱuwa muṱani wa Davida. Naa ho ngo dzhia musadzi wa Uria nga tshiphiri? Ho vha hu tshi ḓo itea vhuvhi vhu fanaho na honoho khae, hu si tshiphirini, fhedzi muṅwe na muṅwe a tshi zwi vhona.—2 Samuele 12:7-12.
13. Davida o aravha hani ndayo ya Yehova?
13 Zwine zwa nga ita uri Davida a khoḓiwe, ndi zwa uri ho ngo hanedza vhutshinyi hawe. Ho ngo halifhela muporofita Nathani. Ho ngo vhona vhaṅwe mulandu kana u vhuyafhedza zwe a zwi ita. Musi o sedzana na zwivhi zwawe, Davida o tenda mulandu, a ri: “Ndo tshinya, ndo levhela Yehova.” (2 Samuele 12:13) Psalme 51 i sumbedza u pfa hawe vhuṱungu nga ṅwambo wa vhutshinyi hawe na u rembuluwa hawe. O humbela Yehova a ri: “U songo mpandela maṱoni au, U songo ṱusa muya mukhethwa wau kha nṋe.” O vha a tshi tenda uri Yehova, nga khathutshelo yawe, a nga si ḓo dzhiela fhasi “mbilu yo ṱhavhiwaho, yo paḓukanaho” nga tshivhi. (Psalme ya 51:11, 17) Davida o bvela phanḓa a tshi ḓitika nga muya wa Mudzimu. Naho Yehova a songo tsireledza Davida kha mvelelo dzi vhavhaho dza tshivhi tshawe, o mu hangwela.
14. Ri fanela u aravha hani ndayo ya Yehova?
14 Roṱhe a ro ngo fhelela, nahone roṱhe ri a khakha. (Vha-Roma 3:23) Zwiṅwe zwifhinga ri nga wela tshivhini tshihulwane, samusi na Davida o zwi ita. U fana na khotsi wa lufuno ane a laya vhana vhawe, ngauralo Yehova u laya vhane vha ṱoḓa u mu shumela. Naho ndayo i tshi vhuyedza, a zwi leluwi u i ṱanganedza. Zwi re zwone ndi uri nga zwiṅwe zwifhinga i a ‘ṱungufhadza.’ (Vha-Heberu 12:6, 11) Naho zwo ralo, arali ra “thetshelesa ndayo,” ri nga pfumedzanywa na Yehova. (Mirero 8:33, NW) U itela u bvela phanḓa ri tshi ḓiphina nga phaṱhutshedzo ya muya wa Yehova, ri fanela u ṱanganedza ndayo na u ita uri ri takalelwe nga Mudzimu.
Ni Songo Fulufhela Lupfumo Lu Si Na Halwo
15. (a) Vhaṅwe vhathu vha shumisa lupfumo lwavho nga nḓila-ḓe? (b) Davida o vha e na lutamo lwa u shumisa lupfumo lwawe nga nḓila-ḓe?
15 A huna zwi sumbedzaho uri Davida o vha e na vhuimo ha nṱha kana uri muṱa wahawe wo vha wo pfuma. Naho zwo ralo, tshifhingani tsha u vhusa hawe, Davida o kuvhanganya lupfumo lunzhi. Samusi ni tshi zwi ḓivha, vhanzhi vha kuvhanganya lupfumo lwavho, vha tshi ṱoḓa u lu engedza nga lwa vhupangwa, kana u lu shumisa nga lwa tseḓa. Vhaṅwe vha shumisa tshelede yavho u itela u rendisa vhone vhaṋe. (Mateo 6:2) Davida o shumisa lupfumo lwawe nga nḓila yo fhambanaho na yeneyo. O vha a tshi ṱulutshelwa u hulisa Yehova. Davida o sumbedza Nathani lutamo lwawe lwa u ṱoḓa u fhaṱela Yehova thembele ine ya ḓo dzula mbulungelo ya mulanga, ye nga tshenetsho tshifhinga yo vha i Yerusalema “yó fulelwa nga mikumba.” Yehova o takadzwa nga mihumbulo ya Davida, fhedzi a tshi shumisa Nathani a mu vhudza uri thembele yo vha i tshi ḓo fhaṱwa nga Salomo.—2 Samuele 7:1, 2, 12, 13.
16. Ndi ndugiselelo dzifhio dze Davida a dzi ita u itela u fhaṱwa ha thembele?
16 Davida o kuvhanganya lupfumo u itela uri lu shumiswe kha wonoyu mushumo muhulwane wa u fhaṱa. A tshi vhudza Salomo, Davida o ri: “Nnḓu ya Yehova ndo i vhetshela dzitalente dza musuku dzi ná maḓana a ná fumi a tshi vhaliwa ka-ḓana; na dzitalente dza maseṱha dzi ná maḓana a ná ḓana a tshi vhaliwa ka-ḓana; na tsimbi tswuku na ngweḓi i sá vhalei u anda hayo; na dzithanda na matombo ndo lugisa; na iwe U kha ḓi ḓo inga nga zwau.” Kha lupfumo lwawe, o ṋeela dzitalente dza musuku dzi na maḓana a na fumi a tshi vhaliwa ka-ḓana na dzitalente dza maseṱha dzi na maḓana a na ḓana a tshi vhaliwa ka-ḓana. * (1 Koronika 22:14; 29:3, 4) U ṋea ha Davida ha mafunda ho vha hu si u itela u vhonwa, fhedzi ho vha hu musumbedzo wa lutendo na u ḓikumedza kha Yehova Mudzimu. A tshi dzhiela nṱha Tshisima tsha lupfumo lwawe, o vhudza Yehova a ri: “Zwoṱhe zwi tshi bva ha Iwe ra U ṋea zwe zwa bva zwanḓani zwau.” (1 Koronika 29:14) Mbilu ya Davida i re na mafunda yo mu sudzulusela u ita zwoṱhe zwe a vha a tshi nga kona u itela u tikedza vhurabeli ho kunaho.
17. Nyeletshedzo i re kha 1 Timotheo 6:17-19 i shuma hani kha vhapfumi na vha shayaho?
17 U nga ri ri nga shumisa lupfumo lwashu nga nḓila i fanaho u itela u ita zwivhuya. Nṱhani ha u ṱoḓa lupfumo, ndi zwavhuḓi u ṱoḓa u takalelwa nga Mudzimu—zwine zwa vha nḓila ya vhuṱali ha ngoho na dakalo. Paulo o ṅwala a ri: “Vho pfumaho lwa tshifhinga tsha zwino vha faye, vha sa ḓó ḓi-ita vhahulwane, na hone vha so ngo fulufhela lupfumo lu sí na halwo, vha fulufhele Mudzimu, ané a ri kumedza zwoṱhe lwa u tou pfumisa, uri ri ḓifhelwe ngazwo’. Nga vha ite zwivhuya, vha pfume u ita zwo nakaho, vha vhe vhakovhi, vha u ita vhushaka na vhaṅwe. Vhané vha ḓi-kuvhanganyela zwiné zwa ḓo ita thikho yavhuḓi ya matshelo, uri vha wane vhutshilo vhu re vhutshilo nangoho.” (1 Timotheo 6:17-19) Hu sa londwi tshiimo tshashu tsha ikonomi, kha ri ḓitike nga muya wa Mudzimu na u tovhola buḓo ḽa vhutshilo ḽine ḽa ḓo ri ita uri ri ‘pfume Mudzimuni.’ (Luka 12:21) A huna tshithu tshine tsha vha tsha ndeme u fhira u takalelwa nga Khotsi ashu wa ṱaḓulu a re na lufuno.
Ḓiṋekedzeni Uri Ni Ṱanganedzwe Nga Mudzimu
18. Davida o vhetshela Vhakriste tsumbo yavhuḓi nga nḓila ifhio?
18 Vhutshiloni hawe hoṱhe, Davida o ṱoḓa u ṱanganedzwa nga Yehova. Kha luimbo, o vhidzelela a ri: “Nkhathutshele, Mudzimu, nkhathutshele! Ngauri muya wanga u khuda nga Iwe.” (Psalme ya 57:1) U fulufhela hawe Yehova zwo vha zwi si mahandana. Davida o kalaha, “ó no vha wa maḓuvha.” (1 Koronika 23:1) Naho Davida o ita tshivhi tshihulwane, u a humbulwa sa muṅwe wa ṱhanzi nnzhi dza Mudzimu dze dza sumbedza lutendo lu swayeaho.—Vha-Heberu 11:32.
19. Ri nga ḓiṋekedza hani uri ri ṱanganedzwe nga Mudzimu?
19 Musi ni tshi sedzana na zwiimo zwi shandukaho vhutshiloni, humbulani uri samusi Yehova o tikedza, u khwaṱhisa, na u kaidza Davida, A nga ita zwi fanaho kha inwi. Muapostola Paulo o sedzana na tshanduko nnzhi vhutshiloni u fana na Davida. Naho zwo ralo, o dzula a tshi fulufhedzea nga u ḓitika nga muya wa Mudzimu. O ṅwala a ri: “Zwoṱhe ndi zwi kona nga a nkonisaho.” (Vha-Filipi 4:12, 13) Arali ra ḓitika nga Yehova, u ḓo ri thusa uri ri bvelele. U ṱoḓa ri tshi bvelela. Arali ra mu thetshelesa nahone ra sendela tsini nae, u ḓo ri ṋea maanḓa a u ita zwine a zwi funa. Nahone arali ra bvela phanḓa ri tshi ḓitika nga muya wa Mudzimu, ri ḓo kona u ‘ḓiṋekedza uri ri ṱanganedzwe nga Mudzimu’ zwino na nga hu sa fheli.—2 Timotheo 2:15.
[Ṱhaluso dzi re magumoni a siaṱari]
^ phar. 16 Ndeme ya muṋeelo wa Davida, u ya nga maitele a ṋamusi, yo vha i tshi fhira Rannda dza zwigidi zwa milioni dza 8,3.
Ni Ḓo Fhindula Hani?
• Ndi ngani ri tshi fanela u ḓilinda kha u ḓihudza?
• Ndi ngani ri songo fanela u ḓilifhedzela riṋe vhaṋe?
• Ri fanela u vha na mavhonele afhio nga ndayo?
• Ndi ngani ri tshi fanela u fulufhela Mudzimu nṱhani ha lupfumo?
[Mbudziso Dza Pfunzo]
[Tshifanyiso kha siaṱari 16]
Davida o ḓitika nga muya wa Mudzimu nahone a ṱoḓa u ṱanganedzwa ngae. Naa ni khou ita zwi fanaho?
[Tshifanyiso kha siaṱari 18]
“Zwoṱhe zwi tshi bva ha Iwe ra U ṋea zwe zwa bva zwanḓani zwau”