Ilwani Na Muya Wa Shango Ḽine Ḽa Khou Shanduka
Ilwani Na Muya Wa Shango Ḽine Ḽa Khou Shanduka
“A ro ngo ṋewa muya wa shango, ro ṋewa Muya u bvaho Mudzimuni.”—1 Vha-korinta 2:12.
1. Eva o fhurwa nga nḓila-ḓe?
“ṊOWA yo mphura.” (Genesi 3:13) Nga eneo maipfi a si gathi, musadzi wa u thoma, Eva, o lingedza u ṱalutshedza uri ndi ngani o shandukela Yehova Mudzimu. Zwe a zwi amba zwo vha zwi ngoho, naho zwi songo vhuyafhedza vhutshinyi hawe. Nga murahu muapostola Paulo o hevhedzwa u ṅwala a ri: “Ndi [Eva] we a fhuriwa tshoṱhe.” (1 Timotheo 2:14) O fhurwa uri a tende zwa uri u sa thetshelesa—u ḽa muri wo dzivhiswaho—zwi ḓo mu vhuyedza, zwi ḓo mu ita uri a fane na Mudzimu. O dovha a fhurwa nga mbonalo ya we a vha a tshi khou mu fhura. Ho ngo zwi ḓivha uri Sathane Diabolo o vha a tshi khou amba a tshi shumisa ṋowa.—Genesi 3:1-6.
2. (a) Sathane u xedza hani vhathu ṋamusi? (b) “Muya wa shango” ndi mini, nahone ndi mbudziso dzifhio dzine ra ḓo dzi haseledza zwino?
2 U bva misini ya Adamu na Eva, Sathane o bvela phanḓa a tshi fhura vhathu. Zwi re zwone ndi uri ndi “muxedzi wa shango ḽoṱhe.” (Ndzumbululo 12:9) Vhutsila hawe a vhu athu shanduka. Naho a si tsha shumisa ṋowa ya vhukuma, u bvela phanḓa a tshi ḓidzumba. A tshi shumisa u ḓimvumvusa, vhuhashi ha mafhungo, na zwiṅwe zwishumiswa, Sathane u xedza vhathu nga u ita uri vha tende uri a vha ṱoḓi kana u vhuyelwa nga vhulivhisi ha lufuno ha Mudzimu. Vhuḓidini ha Diabolo vhu bvelaho phanḓa ha u fhura vhathu ho ita uri fhethu hoṱhe vhathu vha vhe na mavhonele a u shandukela milayo ya Bivhili na maitele. Bivhili i zwi vhidza “muya wa shango.” (1 Vha-Korinta 2:12) Wonoyo muya u ṱuṱuwedza nga maanḓa thendo, mavhonele, na matshilele a vhane vha sa ḓivhe Mudzimu. Wonoyo muya u sumbedzwa hani, nahone ri nga lwisana hani na ṱhuṱhuwedzo yawo i tshinyaho? Kha ri vhone.
Vhuḓifari Havhuḓi Vhu Khou Tshinyala
3. Ndi ngani “muya wa shango” wo ḓala musalauno?
3 Musalauno, muya wa shango wo ḓala vhukuma. (2 Timotheo 3:1-5) Zwi vhonala uri no no zwi ṱhogomela uri vhuḓifari vhu khou tshinyala. Maṅwalo a a ṱalusa uri ndi ngani zwo ralo. Nga murahu ha u tikwa ha Muvhuso wa Mudzimu nga ṅwaha wa 1914, ho vha na nndwa ṱaḓulu. Sathane na vharuṅwa vhawe vha madimoni vho kundwa nahone vha poselwa kha ḽifhasi. E na mbiti, Sathane o engedza vhuḓidini hawe ha u fhura shango ḽoṱhe. (Ndzumbululo 12:1-9, 12, 17) A tshi ita zwoṱhe zwine a nga kona, u lingedza u ‘khakhisa na vho nangiwaho.’ (Mateo 24:24) Samusi ri vhathu vha Mudzimu, u a ri vutshela vhukuma. U lingedza u ri pwasha muyani u itela uri ri si tsha takalelwa nga Yehova nahone ri xelelwe nga tshilavhelelwa tsha vhutshilo vhu sa fheli.
4. Vhashumeli vha Yehova vha dzhia hani Bivhili, nahone shango ḽi i dzhia hani?
4 Sathane u lingedza u tshinya Bivhili, bugu ya ndeme ine ya ri funza nga ha Musiki washu a re na lufuno. Vhashumeli vha Yehova vha a funa na u dzhiela nṱha Bivhili. Ri a zwi ḓivha uri ndi Ipfi ḽa Mudzimu ḽo hevhedzwaho, hu si fhungo ḽa vhathu. (1 Vha-Thesalonika 2:13; 2 Timotheo 3:16) Naho zwo ralo, shango ḽa Sathane ḽi ḓo ṱoḓa uri ri humbule nga nḓila yo fhambanaho na yeneyo. Sa tsumbo, marangaphanḓa a bugu i lwisanaho na Bivhili a ri: “A huna tshithu tshine tsha vha ‘tshikhethwa’ nga ha Bivhili, nahone a ‘si ipfi ḽa Mudzimu.’ A yo ngo ṅwalwa nga vhakhethwa vho hevhedzwaho, fhedzi yo ṅwalwa nga vhafunzi vha ṱoḓaho u vha na maanḓa.” Vhathu vhane vha itwa uri vha tende zwenezwo vha nga xedzwa nga hu leluwaho nga muhumbulo wa uri vho vhofholowa u rabela Mudzimu nga nḓila naho ifhio ine vha funa yone—kana u sa mu rabela na luthihi.—Mirero 14:12.
5. (a) Muṅwe muṅwali o ri mini malugana na vhurereli vhune ha shumisa Bivhili? (b) Ndi ifhio miṅwe mihumbulo ya shango yo ḓoweleaho ine ya hanedzana na zwine Bivhili ya zwi amba? (Katelani na bogisi ḽi re kha siaṱari ḽi tevhelaho.)
5 U vutshelwa ha Bivhili nga ho livhaho na hu songo livhaho, u katela na muhoyo wa vhurereli wa vhane vha amba uri vha a i tikedza, zwo engedza kha u ita uri vhurereli vhu sa ṱanganedzwe, u katela na vhurereli vhune ha shumisa Bivhili. Vhurereli vhu vutshelwa nga muhasho wa mafhungo na nga vhathu vho funzeaho vhukuma. Muṅwe muṅwali o ri: “Mavhonele a Vhuyuda na a Vhukriste o ḓalaho kha mvelele dzo ḓoweleaho a si avhuḓi. Honoho vhurereli vhu dzhiiwa vhu ha kale, vhu vhune ha ita uri u vhibva muhumbuloni zwi ongolowe na u thithisa mvelaphanḓa ya saintsi. Eneo maḓipfele a lunyadzo a miṅwahani ya zwenezwino o ita uri u holedzwa na vengo zwi engedzee.” Ḽeneḽo vengo kanzhi ḽi itwa nga vhane vha hanedza uri Mudzimu u hone na vhane vha ‘elekanya zwi siho.’—Vha-Roma 1:20-22.
6. Ndi mavhonele afhio ane shango ḽa vha nao nga maitele a u ṱangana nga dzimbeu o dzivhiswaho nga Mudzimu?
6 Nga zwenezwo, a zwi mangadzi uri vhathu vha khou pambuwa tshoṱhe kha maitele a Mudzimu a matshilele. Sa tsumbo, Bivhili i ṱalusa vhusawana sa zwi ‘shonisaho.’ (Vha-Roma 1:26, 27) I dovha ya amba uri vhane vha ita vhupombwe na vhuṱonḓolo a vha nga ḽi ifa ḽa Muvhuso wa Mudzimu. (1 Vha-Korinta 6:9) Naho zwo ralo, mashangoni manzhi a hu ṱanganedzwi eneo maitele a u ṱangana nga dzimbeu fhedzi, fhedzi a do vha a sumbedzwa kha dzibugu, dzimagazini, dzinyimbo, dzifilimu, na kha mbekanyamushumo dza thelevishini. Vhane vha sasaladza eneo maitele vha dzhiiwa vhe matsilu, vhe vhasasaladzi, nahone vha tshi kha ḓi vha vho salela kha mahumbulele a musalauno. Nṱhani ha uri vha dzhie maitele a Mudzimu sa misumbedzo ya u vhilaelela nga lufuno, shango ḽi a dzhia a tshi thithisi tsha mbofholowo na u ḓiphina ha muthu.—Mirero 17:15; Yuda 4.
7. Ndi mbudziso dzifhio dzine ra fanela u ḓivhudzisa dzone?
7 Kha ḽino shango ḽine ḽa khou pikisa Mudzimu nga ho khwaṱhaho, zwi ḓo vha vhuṱali kha riṋe uri ri sedze mavhonele na vhuḓifari hashu. Tshifhinga tshoṱhe, ri fanela u ḓiṱolisisa nga thabelo na nga u fulufhedzea u itela u vha na vhungoho ha uri a ri khou kheluwa nga zwiṱuku nga zwiṱuku kha mahumbulele na maitele a Yehova. Sa tsumbo, ri fanela u ḓivhudzisa uri: ‘Naa ndi a takadzwa nga mafhungo e nda vha ndi tshi ḓo vha ndo a iledza miṅwahani yo fhiraho? Naa ndi a ṱanganedza matshilele ane a si ṱanganedzwe nga Mudzimu? Naa ndi vho dzhiela fhasi zwithu zwa muya zwe nda vha ndi sa zwi iti tshifhingani tsho fhiraho? Naa nḓila ine nda tshila ngayo i a sumbedza uri ndi vhea madzangalelo a Muvhuso u thoma vhutshiloni hanga?’ (Mateo 6:33) U elekanya nga zwenezwo zwi ḓo ri thusa u lwa na muya wa shango.
‘Ni Songo Kumbiwa’
8. Muthu a nga pambutshela hani kule na Yehova?
8 A tshi ṅwalela Vhakriste ngae, muapostola Paulo o ri: “Tshashu nga hu vhe u simesa u sedza e ra a pfa, uri ri sa ḓo kumbiwa.” (Vha-Heberu 2:1) Arali tshikepe tsha kumbiwa tshi nga si swike hune tsha khou ya hone. Arali mulavhelesi watsho a sa ṱhogomela muya na magabelo, tshikepe tshawe tshi nga kumbiwa nga hu leluwaho tsha fhira vhuimazwikepe ho tsireledzeaho nahone tsha ya vhugabeloni hu re na matombo. Nga hu fanaho, arali ra sa ṱhogomela mafhungo-ngoho a ndeme a Ipfi ḽa Mudzimu, ri nga pambuselwa kule na Yehova nga hu leluwaho nahone ra pwashetshelwa nga gungwa ḽa muya. Ri ḓo vha ri songo tou landula mafhungo-ngoho tshoṱhe u itela uri zwenezwo zwithu zwi bvelele kha riṋe. Zwi re zwone ndi uri a si vhanzhi vhe vha landula Yehova nga u ṱavhanya na nga khole. Kanzhi vha dzhenelela nga zwiṱuku nga zwiṱuku kha zwithu zwine zwa vha thithisa uri vha si livhise ṱhogomelo kha Ipfi ḽa Mudzimu. Vha ita zwivhi vha songo zwi ṱhogomela. U fana na mulavhelesi wa tshikepe o eḓelaho, vhenevho vhathu vha a eḓela u vhuya u swika vha tshi wela khomboni.
9. Yehova o fhaṱutshedza Salomo nga nḓila-ḓe?
9 Ṱhogomelani buḓo ḽa vhutshilo ha Salomo. Yehova o mu ṋea vhuhosi uri a vhuse Vhaisiraele. Mudzimu o tendela Salomo uri a fhaṱe thembele na u mu ṋea vhulivhisi ha uri a ṅwale zwipiḓa zwa Bivhili. Yehova o amba nae kha zwiitea zwivhili nahone a mu ṋea lupfumo, bvumo, nahone a vhusa nga mulalo. Tsha ndeme vhukuma ndi uri Yehova o fhaṱutshedza Salomo nga vhuṱali vhuhulwane. Bivhili i ri: “Mudzimu o vha o ṋea Salomo vhuṱali na nḓivho khulu; mbilu yawe yo vha i tshi ṱalukanya zwithu zwinzhi zwine u anda hazwo ha nga ha muṱavha wa philiphilini ya lwanzhe. Vhuṱali ha Salomo ho vha hu tshi fhira vhuṱali ha vhoṱhe vho dzulaho thungo ya Vhubvaḓuvha, na hoṱhe vhuṱali ha Vha-Egipita.” (1 Dzikhosi 4:21, 29, 30; 11:9) I ngoho, muṅwe muthu a nga humbula uri muthu we a vha o tea u dzula a tshi fulufhedzea kha Mudzimu, o vha e Salomo. Naho zwo ralo, Salomo o pambutshela kha vhugunei. Zwenezwo zwo bvelela hani?
10. Ndi vhulivhisi vhufhio he Salomo a kundwa u vhu tevhela, nahone ha vha na mvelelo ifhio?
10 Salomo o vha a tshi ḓivha na u pfesesa zwavhuḓi Mulayo wa Mudzimu. A zwi timatimisi uri o vha e na dzangalelo kha ndaela dze dza vha dzo ṅwaliwa u itela vhane vha vha mahosi ngei Isiraele. Muṅwe wa yeneyo milayo wo vha u tshi ri: ‘[Khosi] i songo dzea vhasadzi vhanzhi, uri mbilu yayo i sa ḓo pambuwa.’ (Doiteronomio 17:14, 17) Hu sa londwi honoho vhulivhisi vhu pfalaho, Salomo o vha e na vhasadzi vha maḓana a sumbe vha vhakololo na vhaṅwe vhasadzi vha maḓana mararu. Vhunzhi ha vhenevho vhasadzi vho vha vha tshi rabela midzimu i sili. A ri ḓivhi uri ndi ngani Salomo o vhinga vhasadzi vhanzhi nga u ralo, kana u ḓivha nḓila ye a vhuyafhedza ngayo u itela u ita nga u ralo. Zwine ra zwi ḓivha ndi uri o kundwa u thetshelesa vhulivhisi ha Mudzimu vhu pfalaho. Ho vha na mvelelo ye Yehova a sevha ngayo nga hu pfalaho uri i ḓo vha hone. Ri a vhala: “Vhasadzi [vha Salomo] vha ungeledza mbilu yawe, a tevhela midzimu i sili.” (1 Dzikhosi 11:3, 4) Nga zwiṱuku nga zwiṱuku, vhuṱali hawe vhu bvaho ha Mudzimu ha fhela. A pambuwa. Nga u ya ha tshifhinga, lutamo lwa Salomo lwa u ṱoḓa u takadza vhasadzi vhawe vha vhahedeni lwa dzhiela vhudzulo lutamo lwawe lwa u thetshelesa na u takadza Mudzimu. Zwi ṱungufhadza lungafhani kha Salomo we u thomani a ṅwala maipfi a tevhelaho: “Ṅwana’nga, ṱalifha, U takadze mbilu yanga; ndi kone u hanedza vha u nnyadza.”—Mirero 27:11.
Muya Wa Shango U Na Maanḓa
11. Zwine ra zwi dzhenisa mihumbuloni yashu zwi kwama hani mahumbulele ashu?
11 Tsumbo ya Salomo i ri funza zwa uri hu na khombo u humbula uri nga ṅwambo wa uri ri ḓivha mafhungo-ngoho, ṱhuṱhuwedzo ya shango i nga si kwame mahumbulele ashu. U fana na zwiḽiwa zwine zwa kwama mivhili yashu, na zwine ra zwi humbula zwi a kwama mihumbulo yashu. Zwine ra zwi dzhenisa mihumbuloni yashu zwi a ṱuṱuwedza mahumbulele na mavhonele zwashu. Zwenezwi ndi ngoho, nga ṅwambo wa uri khamphani khulwane dzi shumisa zwigidi zwa dzimilioni zwa dzirannda ṅwaha muṅwe na muṅwe u itela u kunguwedza zwibveledzwa. Kha dzenedzo khunguwedzo hu vha hu na maipfi na zwifanyiso zwi kungaho vharengi. Vhakunguwedzi na vhone vha a zwi ḓivha uri u vhona khunguwedzo luthihi kana luvhili a zwi anzeli u kunga vhathu uri vha ṱavhanye vha renge zwibveledzwa. Naho zwo ralo, u sumbedzwa lunzhi-lunzhi ha yeneyo khunguwedzo zwi ita uri vharengi vha takalele tshenetsho tshibveledzwa. Honoho u kunguwedza hu a shuma—ngauri arali ho vha hu sa shumi, ho vha hu sa ḓo vha na muthu ane a ḓo bindudza nga zwenezwo. Hu na ṱhuṱhuwedzo ya maanḓa kha mahumbulele na kha mavhonele a lushaka.
12. (a) Sathane u ṱuṱuwedza hani mahumbulele a vhathu? (b) Ndi mini zwine zwa sumbedza uri Vhakriste vha nga ṱuṱuwedzwa?
12 U fana na muvhambadzi, Sathane u tikedza mihumbulo yawe nga u ita uri i vhonale i yavhuḓi, a tshi zwi ḓivha uri nga u ya ha tshifhinga a nga kungela vhathu kha nḓila yawe ya kuhumbulele. A tshi shumisa u ḓimvumvusa na dziṅwe nḓila, Sathane u fhura vhathu uri vha tende zwa uri zwivhuya ndi zwivhi nahone zwivhi ndi zwivhuya. (Yesaya 5:20) Na vhaṅwe Vhakriste vha ngoho vho kundwa nga vhuḓidini ha Sathane ha u phaḓaladza mafhungo a mazwifhi. Bivhili i a sevha: “Muya u tou amba wa bula, zwauri zwifhingani zwa mafhelelo vhaṅwe vha ḓo shandukela lutendo, vha ḓi-ṋekedza kha mimuya ya vhufhura na kha dzipfunzo dza mimuya mivhi, Kha vhané vha ḓi-kanganyedza nga u amba mazwifhi, vhané luvaloni lwavho vhone vhaṋe lwa nga lwo fhisiwa nga tsimbi.”—1 Timotheo 4:1, 2; Yeremia 6:15.
13. Khonani mmbi ndi dzifhio, nahone khonani dzashu dzi nga ri ṱuṱuwedza hani?
13 Roṱhe ri nga kwamiwa nga muya wa shango. Ṱhuṱhuwedzo ya maitele a Sathane i na maanḓa vhukuma. Bivhili i ri ṱuṱuwedza nga vhuṱali uri: “Ni so ngo khakha: U̗ ḓowelana na vhavhi zwi tshinyisa milayo mivhuya.” (1 Vha-Korinta 15:33) U ḓowelana na vhavhi zwi nga kwama tshithu tshiṅwe na tshiṅwe kana muthu muṅwe na muṅwe—u katela na tshivhidzoni—u itela u sumbedza muya wa shango. Arali ri tshi humbula uri u ḓowelana na vhavhi zwi nga si ri vhaise, naa a ro ngo fanela u phetha nga uri vhukonani havhuḓi vhu nga si ri vhuyedze? Zwi ḓo vha zwo khakhea lungafhani u humbula nga u ralo! Bivhili i ṱalusa zwavhuḓi eneo mafhungo musi i tshi ri: “Mu-endelana-na-vhaṱali u a ṱalifha-vho; mu-konana-na-tsilu u ḓo tambula-vho.”—Mirero 13:20.
14. Ri nga lwa na muya wa shango nga nḓila-ḓe?
14 U itela u lwa na muya wa shango, ri fanela u ita vhukonani na vhathu vho ṱalifhaho—vhane vha shumela Yehova? Ri fanela u ḓadza mihumbulo yashu nga zwithu zwine zwa fhaṱa lutendo lwashu. Muapostola Paulo o ṅwala a ri: “Tsho salaho, Vharathu, zwi re mafhungo-ngoho, na zwa vhugala, na zwa u luga, na zwo ṱambaho, na zwi tamisaho, na zwa phungo mbuya, na zwi re vhuvhuya, kana zwi khoḓwaho, elekanyani zwenezwo!” (Vha-Filipi 4:8) Samusi ri na mbofholowo ya u ḓikhethela, ri nga khetha kha zwithu zwine ra elekanya nga hazwo. U nga ri tshifhinga tshoṱhe ri nga khetha u elekanya nga zwithu zwine zwa ḓo ri sendedza tsini-tsini na Yehova.
Muya Wa Mudzimu U Na Maanḓa Vhukuma
15. Vhakriste vha Korinta ḽa kale vho vha vho fhambana hani na vhaṅwe vhadzulapo vha wonoyo muḓi?
15 U fhambana na vhane vha xedzwa nga muya wa shango, Vhakriste vha ngoho vha livhiswa nga muyamukhethwa wa Mudzimu. Paulo o ṅwalela tshivhidzo tsha Korinta a ri: “Riṋe-ha a ro ngo ṋewa muya wa shango, ro ṋewa Muya u bvaho Mudzimuni uri ri ḓivhe zwe Mudzimu a ri tonda ngazwo’.” (1 Vha-Korinta 2:12) Korinta ḽa kale wo vha u muḓi wo tangwaho nga muya wa shango. Ngauralo vhunzhi ha vhadzulapo vho vha vha tshi ḓifara luvhi lwe mubulo une wa ri “u vha Mukorinta” wo vha u tshi amba “u ḓifara luvhi.” Sathane o vha o swingisa mihumbulo ya vhathu. Nga ṅwambo wa zwenezwo, vha pfesesanyana kana u sa ḓivha tshithu nga ha Mudzimu wa ngoho. (2 Vha-Korinta 4:4) Ngauralo, a tshi shumisa muya wawe mukhethwa, Yehova o vula maṱo a vhaṅwe Vhakorinta, uri vha kone u wana nḓivho ya mafhungo-ngoho. Muya wawe wo vha sudzulusa na u vha livhisa u itela u ita tshanduko khulwane vhutshiloni havho uri vha takalelwe na u fhaṱutshedzwa ngae. (1 Vha-Korinta 6:9-11) Naho muya wa shango wo vha u na maanḓa, muya wa Yehova wo vha u na maanḓa vhukuma.
16. Ri nga wana hani muya wa Mudzimu na u dzula ri nawo?
16 Zwo tou ralo na ṋamusi. Muyamukhethwa wa Yehova u na maanḓa mahulwane ḽifhasini, nahone u u ṋea zwi tshi bva mbiluni na nga mafunda vhoṱhe vhane vha u humbela vhe na lutendo. (Luka 11:13) Naho zwo ralo, u itela u wana muya wa Mudzimu, ri fanela u ita zwi fhiraho u sokou lwa na muya wa shango. Ri fanela u dovha ra guda Ipfi ḽa Mudzimu tshifhinga tshoṱhe na u ḽi shumisa vhutshiloni hashu u itela uri muya washu na muhumbulo zwi tendelane na mahumbulele awe. Arali ra ita nga u ralo, Yehova u ḓo ri khwaṱhisa u itela u lwa na vhukwila naho vhu vhufhio vhune Sathane a nga vhu shumisa u itela u ri pwasha muyani.
17. Zwe Loto a ṱangana nazwo zwi nga ri ṱuṱuwedza nga nḓila dzifhio?
17 Naho Vhakriste vhe si tshipiḓa tsha shango ḽino, vha shangoni. (Yohane 17:11, 16) A huna na muthihi washu ane a nga iledza tshoṱhe muya wa shango, nga ṅwambo wa uri ri nga shuma kana u tshila na vhane vha sa fune Mudzimu kana nḓila dzawe. Naa ri ḓipfa u fana na Loto, we a vha “a tshi diniwa,” na u dinalea, nga ṅwambo wa mishumo mivhi ya vhathu vha Sodoma vhe a vha a tshi tshila vhukati havho? (2 Petro 2:7, 8) Arali zwo ralo, zwi nga ri ṱuṱuwedza. Yehova o tsireledza na u tshidza Loto, nahone a nga ita zwi fanaho kha riṋe. Khotsi ashu wa lufuno u a vhona na u ḓivha zwiimo zwashu, nahone a nga ri thusa na u ri ṋea maanḓa ane ra a ṱoḓa u itela u vhulunga vhumuya hashu. (Psalme ya 33:18, 19) Arali ra ḓitika ngae, u mu fulufhela, na u mu vhidzelela, u ḓo ri thusa u lwa na muya wa shango, hu sa londwi uri zwiimo zwashu zwi khou konḓa lungafhani.—Yesaya 41:10.
18. Ndi ngani ri tshi fanela u dzhiela nṱha vhushaka hashu na Yehova?
18 Kha shango ḽo fhandekanaho na Mudzimu na ḽo fhurwaho nga Sathane, riṋe samusi ri vhathu vha Yehova ri a fhaṱutshedzwa nga u ḓivha mafhungo-ngoho. Ri tshenzhela dakalo na mulalo zwine shango ḽi si vhe nazwo. (Yesaya 57:20, 21; Vha-Galata 5:22) Ri takalela fulufhelo ḽavhuḓi ḽa vhutshilo vhu sa fheli kha ḽifhasi ḽa Paradiso, hune muya wa ḽino shango ḽine ḽa khou mbwandamela u sa tsha ḓo vha hone. Nga zwenezwo, u nga ri ri nga dzhiela nṱha vhushaka hashu ha ndeme na Mudzimu nahone ra fhaṱutshela u khakhulula nḓowelo naho ifhio ya u fa muyani. Kha ri sendele tsini-tsini na Yehova, nahone u ḓo ri thusa u lwa na muya wa shango.—Yakobo 4:7, 8.
Ni Nga Ṱalusa?
• Sathane u fhura na u xedza vhathu nga nḓila dzifhio?
• Ri nga iledza hani u pambutshela kule na Yehova?
• Ndi mini zwine zwa sumbedza uri muya wa shango u na maanḓa?
• Ri nga wana hani na u dzula ri na muya u bvaho ha Mudzimu?
[Mbudziso Dza Pfunzo]
[Tshati kha siaṱari 11]
VHUṰALI HA SHANGO HO FHAMBANA NA HA MUDZIMU
Ngoho a yo ngo fhelela—vhathu vha tou ḓiitela ngoho yavho.
“Mafhungo a [Mudzimu] ndi a ngoho.”—Yohane 17:17.
U itela u ḓivha zwo lugaho na zwi songo lugaho, fulufhelani maḓipfele aṋu.
“Mbilu ndi yone mudzia-tshimbevha vhukuma, ndi mmbi.”—Yeremia 17:9.
Itani zwine na ṱoḓa u zwi ita.
“Munna hune a ya ha ḓi-isi na̗ u̗ kanda a khwaṱhisa.”—Yeremia 10:23.
Lupfumo lu ri ḓisela dakalo.
“Ngauri mudzi wa zwoṱhe zwi re zwivhi ndi u tama mali.”—1 Timotheo 6:10.
[Tshifanyiso kha siaṱari 10]
Salomo o pambutshela kule na vhurabeli ha ngoho nahone a shandukela kha midzimu ya mazwifhi
[Tshifanyiso kha siaṱari 12]
U fana na mukunguwedzi, Sathane u tikedza muya wa shango. Naa ni a lwa nawo?