Liberia​—U Engedzea Ha Mulaedza Wa Muvhuso Hu Sa Londwi Nndwa

HO VHA na nndwa ya vhadzulapo i sa langei ngei Liberia miṅwaha i fhiraho ya fumi. Vhukatini ha 2003, maravhele vho lwa vha tshi dzhena musanda, Monrovia. Vhunzhi ha Ṱhanzi dza Yehova dzo kombetshedzea u ṱutshela mahaya adzo, nga zwiṅwe zwifhinga lunzhi-lunzhi. Vho vha vha tshi dzulela u dzhielwa thundu dzavho.

Zwi ṱungufhadzaho ndi uri tshifhingani tsha nndwa henefho musanda, zwigidi zwa vhathu vho vhulahwa. Vhaṅwe vhavho ho vha hu Ṱhanzi mbili, muṅwe ndi wahashu wa tshinnani na wa tshisadzi. Vhaṅwe vhahashu vho sedzana hani na vhuimo vhu konḓaho, nahone ho itwa mini u itela u vha thusa?

Thuso Kha Vhane Vha I Ṱoḓa

Tshifhingani tshoṱhe tsha nndwa, davhi ḽa ofisi ḽa Liberia ḽa Ṱhanzi dza Yehova ḽo lugiselela thuso ya vhane vha i ṱoḓa. Ho ṋekedzwa zwiḽiwa, zwishumiswa zwa nḓuni zwa ndeme, na mishonga. Tshifhingani tsha musi maravhele a tshi khou langa vhuimazwikepe, ho mbo ḓi vha na ṱhahelelo ya zwiḽiwa. Ofisi ya davhi yo vhonela phanḓa yeneyi tshanduko nahone yo vha i na zwa u thusa Ṱhanzi dza zwigidi zwiraru dze dza shavhela Holoni dza Muvhuso u mona na ḓorobo. Vhahashu vho kovha zwenezwo zwiḽiwa nga nḓila ye vha zwi shumisa u vhuya u swika vhuimazwikepe hu tshi vula. Davhi ḽa Belgium na ḽa Sierra Leone a rumela mishonga, nahone davhi ḽa Britain na ḽa Fura a rumela zwiambaro.

Hu sa londwi vhuimo vhu si havhuḓi, vhahashu vho dzula vhe na mavhonele avhuḓi nahone vho takala. Zwe zwa ambiwa nga muṅwe we na ene a shavha hayani hawe luraru zwo vha zwi tshi fana na zwe vhanzhi vha ṱangana nazwo. O ri: “Hezwi ndi zwiimo zwine ra huwelela nga hazwo; zwa uri ri khou tshila tshifhingani tsha maḓuvha a vhufhelo.”

U Aravha Kha Mafhungo Maḓifha

Hu sa londwi khakhathi dza shangoni ḽeneḽo ḽoṱhe, Ṱhanzi dzo vha na mvelelo dzavhuḓi tsimuni. Ho vha na mbalo khulwane ya vhahuweleli vha Muvhuso vha 3 879 nga January 2003, nahone nga February vha fara pfunzo dza Bivhili dza hayani dza 15 227.

Vhathu vha aravha nga u ṱavhanya kha mafhungo maḓifha. Tsumbo ya zwenezwi yo itea muvhunduni wa tshipiḓani tsha tshipembe-vhukovhela tsha ḽeneḽi shango. Tshivhidzo tsho vha tsho dzudzanya u pembelela Tshihumbudzo tsha lufu lwa Kristo ngei muvhunduni muhulwane wa Bewahn, u re vhukule ha khilomithara ṱhanu nga milenzhe u bva hune vha ṱanganela hone nga misi. Musi Vhahashu vha sa athu ya henefho muvhunduni u ramba vhathu uri vha ḓe Tshihumbudzoni, vho rumela thambo kha ṋeḓorobo wa Bewahn. Musi a tshi wana yeneyo thambo, a dzhia Bivhili yawe, a ya kha vhadzulapo vha wonoyo muvhundu, a vhala luṅwalo lu re henefho kha thambo, a tshi vha ṱuṱuwedza uri vha ye Tshihumbudzoni. Ngauralo musi vhahuweleli vha tshi swika, vho wana uri mushumo wavho wo vha wo no itwa! Ṋeḓorobo, u katela na vhana vhawe, na vhasadzi vhawe vhavhili, vha ḓa Tshihumbudzoni. Vhoṱhe vhe vha ḓa vho vha vhe 27. U bva tsheetsho,  ṋeḓorobo a ṱutshela Kereke ya Methodist, a thoma u guda na Dziṱhanzi, nahone a vha ṋea tshitentsi tsha u fhaṱela hone Holo ya Muvhuso.

U Shandula Mavhonele

Vhuḓifari ha vhahashu ho shuma nga maanḓa u shandula mavhonele a vhane vha hanedza mafhungo-ngoho. Ṱhogomelani tsumbo ya munna ane a pfi Opoku. Muḓinḓa wa muvulanḓila o khetheaho o ṱangana nae tshumeloni ya tsimu nahone a mu tshimbidzela magazini wa Tshiingamo. Opoku o vha e na dzangalelo kha thero i re kha magazini, fhedzi o vha e si na tshelede. Musi a tshi ṱalutshedzwa uri a u rengiswi, muvulanḓila a mu siela magazini nahone a lugiselela u dovha a mu dalela. Musi a tshi vhuyelela, Opoku a vhudzisa muvulanḓila a ri: “Naa ni a nḓivha? Vhunzhi ha vhathu vha vhoiwe ngei ḓoroboni ya Harper vha a nḓivha. Ndo vha ndi tshi pandela vhana vha vhoiwe tshikoloni!” Nga murahu a ṱalutshedza uri o vha e ṱhoho ya tshikolo tsha nṱha ḓoroboni yeneyo na uri o vha a tshi tovhola vhana vha Ṱhanzi dza Yehova nga u sa gwadamela havho fulaga.

Naho zwo ralo, misumbedzo miraru ya lufuno lwa Vhukriste lwo sumbedzwaho nga Ṱhanzi dza Yehova yo ita uri Opoku a ṱolisise mavhonele awe. Wa u thoma, o vhona Ṱhanzi dzi tshi khou ṱhogomela wahavho wa muya we a vha a tshi khou lwala vhukuma. Vho ita na u lugiselela uri a wane ngalafho shangoni ḽa nga tsini. Opoku o humbula uri we a vha a tshi khou lwala o vha e “murangaphanḓa” wa Dziṱhanzi, fhedzi a wana u ri o vha a tshi sokou vha Ṱhanzi zwayo. Tsha vhuvhili, nga vho-1990, Opoku o vha e tshavhi ngei Côte d’Ivoire. Ḽiṅwe ḓuvha musi o farwa nga ḓora, o ya u renga maḓi kha muṅwe muṱhannga. Opoku o vha o fara tshelede khulwane fhedzi nahone onoyo muṱhannga o vha e si na tshintshi, fhedzi a tendela Opoku a tshi wana maḓi a songo mu badelisa. Musi a tshi ṋea Opoku maḓi, onoyo muṱhannga a mu vhudzisa a ri: “Naa ni humbula uri hu ḓo vhuya ha vha na tshifhinga tshine vhathu vha ngaho nṋe na inwi vha ḓo ṋeana zwithu hu songo thoma ha humbelwa tshelede?” Opoku o mbo ḓi humbulela uri ndi muṅwe wa Ṱhanzi dza Yehova, nahone onoyo muṱhannga a tenda. Mafunda na vhulenda zwa onoyu wahashu zwo mu takadza vhukuma. Mafheleloni, u tenda ha muvulanḓila o khetheaho u mu ṋea magazini a songo badela zwo ita uri Opoku a tende uri nḓila ye a vha tshi dzhia ngayo Dziṱhanzi yo vha yo khakhea nahone zwenezwo zwa shandula mavhonele awe. A ita mvelaphanḓa ya muya nahone zwino ndi muhuweleli a songo lovhedzwaho.

Naho vhahashu vha Liberia vha tshi khou bvela phanḓa vha tshi sedzana na zwiimo zwi konḓaho vhukuma, vha fulufhela Mudzimu na u huwelela mafhungo maḓifha nga u fulufhedzea a zwiimo zwa khwine nga fhasi ha vhuvhusi ho lugaho ha Muvhuso wa Mudzimu. Yehova ha nga ḓo vhuya a hangwa mushumo wavho wa biko na lufuno lune vha lu sumbedza vha tshi itela dzina ḽawe.—Vha-Heberu 6:10.

[Mimapa kha siaṱari 30]

(U itela uri ni vhone nḓila ye mafhungo a dzudzanywa ngayo nga vhuḓalo, sedzani khandiso)

MONROVIA

[Zwifanyiso kha siaṱari 31]

Zwifhingani zwa khakhathi, vhathu vha Yehova vha a ṋea thuso ya muya na ya ṋama kha vhane vha i ṱoḓa