Naa Ri Fanela U Rabela Vharuṅwa U Itela U Wana Thuso?

NAA zwo tea u rabela vharuṅwa nga zwifhinga zwa musi ro tsikeledzea? Vhanzhi vha nga humbula nga u ralo. Zwi re zwone ndi uri New Catholic Encyclopedia i ri: “Muthu a nga rabela . . . vharuṅwa . . . nga muhumbulo wa uri vha ri pfumedzanya na Mudzimu.” Naa ri fanela u rabela vharuṅwa uri vha vhe vhapfumedzanyi vhashu?

Ipfi ḽa Mudzimu ḽi na madzina mavhili fhedzi a vharuṅwa vha Mudzimu vha fulufhedzeaho, Mikaele na Gabriele. (Daniele 8:16; 12:1; Luka 1:26; Yuda 9) Samusi enea madzina o bulwa Bivhilini, ri humbula uri muruṅwa muṅwe na muṅwe ndi muthu wa muya o khetheaho a re na dzina, hu si u sokou vha tshiṅwe tshithu tshi re na maanḓa. Naho zwo ralo, vhaṅwe vharuṅwa vho hana u ḓibula madzina avho. Sa tsumbo, musi Yakobo a tshi vhudzisa muruṅwa we a mu dalela uri a bule dzina ḽawe, o hana u ita nga u ralo. (Genesi 32:29; Vhahaṱuli 13:17, 18) A huna mutevhe wa madzina a vharuṅwa wo ṅwaliwaho Bivhilini, zwenezwo zwi tshi khou thivhela vhathu uri vha si vha ṋee ṱhogomelo i songo teaho.

Muṅwe wa mishumo ya vharuṅwa ndi u fhirisela milaedza ya Mudzimu kha vhathu. Zwi re zwone ndi uri maipfi a u thoma a Luheberu na a Lugerika ane a ri “muruṅwa” a amba “muḓinḓa.” Naho zwo ralo, vharuṅwa a si vhapfumedzanyi vhane vha isa thabelo dza vhathu kha khuluṋoni ya Wa Ṱaḓulu-ṱaḓulu. Mudzimu o ḓiimisela uri dzenedzo thabelo dzi livhiswe khae nga dzina ḽa Murwa wawe, Yesu Kristo, we a ri: “Arali ni tshi humbela Khotsi nga dzina ḽanga, a ni ṋee.”—Yohane 15:16; 1 Timotheo 2:5.

Yehova Mudzimu ha vhuyi a farakanea vhukuma lune a si kone u ri thetshelesa arali ra mu rabela nga nḓila yo teaho. Bivhili i ri ṋea heyi khwaṱhisedzo: “Yehova u tsini na vhoṱhe vhané vha mu vhidza, vhoṱhe vhané vha mu vhidza nga ngoho.”—Psalme ya 145:18.