Muvhigo Wa Vhahuweleli Vha Muvhuso

U Ṱanziela Fhethu Hune Vhathu Vha Shuma Hone

MUAPOSTOLA Mateo, Petro, Andrea, Yakobo, na Yohane, vho vha vha tshi fana nga nḓila-ḓe? Vhoṱhe vho vhidzwa nga Yesu musi vhe mishumoni yavho. Petro, Andrea, Yakobo, na Yohane vho vha vho farakanea kha mushumo wa u rea khovhe musi Yesu a tshi vha ramba, a ri: “Ntevheleni.” Mateo o vha e nḓuni ya muthelo musi a tshi vhidzwa uri a vhe mufunziwa wa Yesu.—Mateo 4:18-21; 9:9.

U ṱanziela kha vhathu vha re mishumoni yavho zwi nga vhuyedza. Dzi tshi dzhiela nṱha zwenezwo, zwenezwino Ṱhanzi dza Yehova ngei Dzhapani dzo ita vhuḓidini ho engedzeaho u itela u ṱanganela kha ḽeneḽi sia ḽa vhuḓinḓa. Ha vha na mvelelo dzifhio? Hu sa athu fhela miṅwedzi i si gathi, ha itwa nyendo dza u vhuyelela dza zwigidi, nahone ha thomiwa pfunzo dza Bivhili dzi ṱoḓaho u vha 250. Ṱhogomelani zwi tevhelaho zwe zwa ṱanganwa nazwo.

Muḓinḓa wa tshifhinga tshoṱhe wa ngei Tokyo o ṱangana na mulanguli wa khefi we a amba na Ṱhanzi miṅwahani i ṱoḓaho u vha 30 yo fhiraho musi a tshi kha ḓi vha mutukana wa tshikolo. Naho onoyo mulanguli a songo pfesesa zwinzhi zwa zwe zwa vha zwi tshi khou ambiwa musi a tshi kha ḓi vha tshikoloni, o mbo ḓi vha na dzangalelo kha Bivhili. Musi dzangalelo ḽo no vusuluswa, a ṱanganedza nga u ḓifunela pfunzo ya Bivhili hu tshi shumiswa bugu ine ya pfi Nḓivho Ine Ya Isa Vhutshiloni Vhu Sa Fheli. * Zwiṅwe hafhu, a thoma mbekanyamushumo ya u vhala Bivhili madekwana maṅwe na maṅwe musi a sa athu eḓela.

Muḓinḓa wa muvulanḓila o khetheaho o humbela muṱanganedzi wa vhaeni uri a rwele luṱingo onoyo mulanguli. Naho mulanguli o vha e siho, mufumakadzi we a fhindula luṱingo lwa mulanguli o vhudzisa a ri, “Naa ni nga takalela u amba na nṋe?” Nga murahu ha nyambedzano pfufhi kha luṱingo, onoyo mufumakadzi a ḓa hune ha ṱanganedzwa vhaeni nahone a amba uri u na dzangalelo kha u vhala Bivhili. Muvulanḓila o khetheaho a dzudzanya u vhuyelela e na Bivhili nahone a thoma pfunzo ya Bivhili nae, ye ya farelwa phakhani ya tsini nga matsheloni-tsheloni musi onoyo mufumakadzi a sa athu ya mushumoni.

Kha iṅwe ofisi, muṅwe munna o vhona mushumi ngae a tshi khou ṱanganedza magazini wa Tshiingamo na wa Awake!, fhedzi a dzi laṱa nga u ṱavhanya musi Ṱhanzi i tshi tou ṱuwa. Musi onoyo munna a tshi swika hayani, a vhudza musadzi wawe ane a vha Ṱhanzi nga zwe zwa itea nahone a amba uri o vha a tshi ḓo vha o thetshelesa arali o vha o ṋewa dzimagazini. Ṅwananyana wawe, we a pfa zwe a vha a tshi khou amba, a ṱalutshedza eneo mafhungo Ṱhanzi ine ya shuma kha yeneyo tsimu ya mabindu. Yeneyo Ṱhanzi ya dalela onoyo munna nga u ṱavhanya ofisini yawe nahone ya thoma pfunzo ya Bivhili nae. Nga u ṱavhanya onoyo munna a thoma u ya miṱanganoni nga Swondaha tshifhinga tshoṱhe.

U ṱanziela hune vhathu vha shuma hone zwo ḓisa dziṅwe mbuyelo. Vhahuweleli vhanzhi ngei Dzhapani vho mbo ḓi vha na vhutsila ha u ita nyendo dza u vhuyelela mavhengeleni, mamagani, na dziofisini. Zwiṅwe hafhu, nga yeneyi nḓila ya u ṱanziela, ho kwamiwa vhathu vhanzhi vhe vha vha vho fhola nahone ha thomiwa pfunzo dza Bivhili navho. Ha vha na mvelelo dzi swayeaho. Zwenezwino tshiṅwe tshivhidzo ngei Tokyo vhukati tsho vhiga pfunzo dza Bivhili dza 108, dze dza fhira kavhili tshivhalo tsho vhigiwaho ṅwaha wo fhiraho.

[Ṱhaluso dzi re magumoni a siaṱari]