Nganeavhutshilo

U Ḓikumedza Huṱuku Ho Ri Ḓisela Phaṱhutshedzo Khulwane

MUANETSHELI NDI GEORGE NA ANN ALJIAN

Nṋe na musadzi wanga a ro ngo vhuya ra humbula uri hu nga swika hune ra ṱanganyisa ipfi ḽi ambaho “mufunzi” na “mbevha.” A ro ngo vhuya ra humbula uri ri miṅwahani yashu ya vhu-60 ri nga vha ri tshi khou guda muṅwalo u konḓaho hu u itela u ambedzana na vhathu vha bvaho Kule Vhubvaḓuvha. Naho zwo ralo, hezwi ndi zwe nṋe na Ann ra zwi ita mafheloni a vho-1980. Litshani ri ni vhudze nḓila ye u ḓiṋekedza hashu huṱuku miṅwahani yo fhelaho ha ri ḓisela ngayo phaṱhutshedzo nnzhi.

NDO bebelwa muṱani wa Vhaarmenia nahone ndo vha ndi tshi dzhena Kereke ya Armenia. Ann o vha a tshi dzhena ya Katolika ya Roma. Roṱhe ro litsha thendo dzashu dza vhurereli musi ri tshi vhingana nga 1950. Ndo vha ndi na miṅwaha ya 27 nahone Ann a na ya 24. Ro vha ri tshi dzula kha nnḓu i re nṱha ha bindu ḽanga ḽa u kuvha zwiambaro ngei Ḓoroboni ya Jersey, New Jersey, United States. Nga tshenetsho tshifhinga ndo vha ndo no fhedza miṅwaha miṋa ndi na ḽeneḽi bindu.

Nga 1955 ra renga nnḓu yavhuḓi ya kamara tharu dza u eḓela ngei Middletown, New Jersey. Wonoyo muḓi wo vha u vhukule ha khilomithara dza 60 u bva binduni ḽanga, hune nda shuma hone maḓuvha a rathi kha vhege. Ndo vha ndi tshi vhuya hayani vhusiku vhukuma. Ndo vha ndi tshi vhonana fhedzi na Ṱhanzi dza Yehova musi dzi tshi ḓa tshifhinga tshoṱhe binduni ḽanga nahone dza ntshimbidzela khandiso ya Bivhili. Nda vhala yeneyo khandiso nga mafulufulu vhukuma. Naho bindu ḽanga ḽo vha ḽi tshi ḽa tshifhinga tshanga tshoṱhe na ṱhogomelo, ndo thoma u ṱhonifha vhukuma Bivhili.

Nga u ṱavhanya nda ṱhogomela uri tshiṱitshi tsha radio tsha Watchtower, WBBR, tsho vha tshi tshi hasha nyambo dza Bivhili musi ndi tshi khou reila u ya na u vhuya binduni ḽanga. Nda thetshelesa nga vhuronwane dzenedzi nyambo, nahone  dzangalelo ḽanga ḽa aluwa lwe nda humbela uri Ṱhanzi dzi ndalele. Nga November 1957, George Blanton a ndalela hayani hanga nahone a thoma u guda na nṋe Bivhili.

Muṱa Washu Wo Thoma U Vha Na Vhuthihi Vhurabelini Ho Kunaho

Ann o ḓi pfa hani nga ha zwenezwi? Litshani a ni ṱalutshedze.

“Mathomoni ndo vha ndi tshi pikisa vhukuma. Ndo vha ndi tshi vha thithisa lunzhi musi George a tshi khou guda Bivhili lwe a phetha u ya u gudela huṅwe fhethu, zwithu zwe a zwi ita miṅwedzi ya malo. Nga tshenetsho tshifhinga, George a thoma u ya miṱanganoni nga dzi Swondaha Holoni ya Muvhuso. Nga zwenezwo nda vhona uri o vha o ḓiimisela nga ha u guda hawe Bivhili nga uri ḽeneḽo ḽo vha ḽi ḽone ḓuvha ḽawe fhedzi ḽa u awela. Fhedzi o dzula e munna na khotsi wavhuḓi—nahone a khwinisa u fhira henefho—nahone mavhonele anga a thoma u shanduka. Zwi re zwone ndi uri nga zwiṅwe zwifhinga musi ndi tshi khou kunakisa ṱafula musi hu si na ane a khou mbona, ndo vha ndi tshi dzhia magazini wa Awake! we George a vha a tshi dzulela u sia henefho, nahone nda u vhala. Nga zwiṅwe zwifhinga, George o vha a tshi mmbalela thero dza Awake! dze dza vha dzi sa ambi nga ha pfunzothendwa, fhedzi dze dza vha dzi tshi hulisa Musiki tshifhinga tshoṱhe.

“Nga maṅwe madekwana musi George o ya u guda na Wahashu Blanton, nda dzhia khandiso ye murwa washu wa miṅwaha mivhili, George, a i vhea thungo ha mmbete wanga. Yo vha i tshi amba nga fulufhelo ḽa vhafu. Naho ndo vha ndo neta, nda thoma u i vhala samusi makhulutshisadzi wanga vho vha vha tshi kha ḓi tou bva u fa, nahone ndo vha ndo ṱungufhala vhukuma. Nda vhona na u pfesesa mafhungo-ngoho a Bivhili nga u ṱavhanya uri vho faho a vha khou shengela huṅwe fhethu nahone vha ḓo vusiwa kha mvuwo ya tshifhingani tshi ḓaho. Nga u ṱavhanya nda vuwa nda tou dzula kha mbete, ndi tshi khou vhala nga mafulufulu nahone ndi tshi khou talela mbuno dze nda vha ndi tshi khou ṱoḓa u dzi sumbedza George musi a tshi vhuya hayani a tshi bva u guda Bivhili.

Munna wanga ho ngo tou tenda zwavhuḓi uri ndi nṋe. Musi a tshi bva hayani, ndo vha ndi tshi khou mu pikisa, zwino ndo vha ndo takala nga mafhungo-ngoho a Bivhilini e nda vha ndi tshi khou a vhala! A ro ngo eḓela u vhuya u swika nga maḓautsha ri tshi khou amba nga ha Bivhili. George a ṱalutshedza ndivho ya Mudzimu nga ha ḽifhasi. Nda mu humbela madekwana eneo arali a tshi nga kona u gudela hayani u itela uri ndi ṱanganele navho.

“Wahashu Blanton a themendela uri vhana vhashu na vhone vha ḓe kha gundo yashu. Ro humbula uri vha tshee vhaṱuku vhukuma, samusi muṅwe o vha e na miṅwaha mivhili muṅwe e na miṋa. Naho zwo ralo, Wahashu Blanton a ri sumbedza Doiteronomio 31:12, ine ya ri: ‘U kuvhanganye vhathu vhoṱhe, vhanna na vhasadzi na vhana, . . . u itela uri vha pfe na u guda.’ Ro livhuha honohu vhulivhisi nahone ra dovha ra lugisela uri vhana vha fhindule musi ri tshi khou guda Bivhili. Ro vha ri tshi lugiselela phindulo dzashu roṱhe, fhedzi a ro ngo vhuya ra vha vhudza zwine  vha fanela u amba. Ri humbula uri zwenezwo zwo thusa u livhisa vhana vhashu u ita uri mafhungo-ngoho a vhe avho. Tshifhinga tshoṱhe ri livhuha vhulivhisi he Wahashu Blanton a ri ṋea hone u itela u thusa muṱa washu u aluwa muyani.”

Zwiimo Zwi Konḓaho Zwi Ṱoḓaho U Ḓiṋekedza

Samusi ro vha ri tshi khou guda roṱhe Bivhili, ro vha na vhuṅwe vhuleme he ra sedzana naho. Samusi bindu ḽanga ḽo vha ḽi kule, kanzhi ndo vha ndi tshi vhuya hayani nga murahu ha awara ya vhuṱahe nga madekwana. Nga ṅwambo wa zwenezwi, ndo vha ndi sa koni u ya miṱanganoni vhukati ha vhege, naho ndo vha ndi tshi ya nga dzi Swondaha. Nga tshenetsho tshifhinga, Ann o vha a tshi ya miṱanganoni yoṱhe nahone a tshi khou ita mvelaphanḓa nga u ṱavhanya. Na nṋe ndo vha ndi tshi ṱoḓa u ya miṱanganoni yoṱhe u katela na u fara pfunzo ya hayani i vhuyedzaho. Ndo vha ndi tshi zwi ḓivha uri ndi fanela u ḓiṋekedza. Ngauralo nda phetha u fhungudza awara dzine nda shuma dzone, naho zwenezwo zwo vha zwi tshi ḓo ita uri vhathu vha si tsha ḓa nga vhunzhi binduni.

Yeneyi ndugiselelo ya shuma zwavhuḓi. Ro vha ri tshi dzhia ngudo ya muṱa i ya ndeme u fana na miṅwe miṱangano miṱanu ya vhege iṅwe na iṅwe Holoni ya Muvhuso. Ro vha ri tshi i vhidza muṱangano wa vhurathi. Ngauralo ra i vhetshela ḓuvha na tshifhinga—Ḽavhuraru nga awara ya malo nga madekwana vhege iṅwe na iṅwe. Nga zwiṅwe zwifhinga nga murahu ha tshilalelo, musi ri tshi fhedza u ṱanzwa zwigeḓelo, muṅwe washu u ḓo ri, “ndi tshifhinga tsha ‘muṱangano’!” Ann o vha a tshi thoma pfunzo arali ndo lenga, nahone nda bvela phanḓa nga u ṱavhanya musi ndi tshi swika.

Tshiṅwe tshithu tshe tsha vha tshi tshi ita uri ri dzule ro khwaṱha ri na vhuthihi sa muṱa tsho vha tshi u vhala ndimana ya ḓuvha roṱhe nga matsheloni. Naho zwo ralo, ho vha hu na vhuleme ha u dzudzanya zwenezwi. Roṱhe ro vha ri tshi vuwa nga zwifhinga zwo fhambanaho. Ra haseledza zwenezwi nahone ra phetha uri roṱhe ri ḓo vuwa nga tshifhinga tshi fanaho, ra ḽa zwiḽiwa zwa nga matsheloni nga 6:30 nga matsheloni, nahone ra vhala ndimana ya ḓuvha roṱhe. Yeneyi ndugiselelo yo ri vhuyedza vhukuma. Musi vharwa vhashu vha tshi aluwa, vha khetha u yo shuma Bethele. Ro vhona uri yeneyi khaseledzo ya ḓuvha ḽiṅwe na ḽiṅwe yo khwaṱhisa vhumuya havho.

Ndugelo Dza Nga Murahu Ha Ndovhedzo Dzo Ṱoḓa U Ḓiṋekedza Huhulwane

Nda lovhedzwa nga 1962, nahone nga murahu ha u rengisa bindu ḽanga ḽe nda vha naḽo miṅwaha ya 21, nahone nda wana mushumo tsini na hayani u itela uri ri kone u shumela Yehova ri roṱhe. Hezwi zwo vula nḓila dza u wana phaṱhutshedzo nnzhi. Ro ḓivhetshela tshipikwa tsha uri roṱhe ri dzhenele vhuḓinḓa ha tshifhinga tshoṱhe. Hezwo zwo thoma nga 1970 musi murwa washu wa tanzhe, Edward, a tshi vha muḓinḓa kana muvulanḓila wa tshifhinga tsho ḓalaho nga u ṱavhanya musi a tshi tou fhedza tshikolo tsha nṱha. Nga murahunyana, murwa washu George a thoma u vulanḓila, nahone Ann a tevhela nga murahu. Ndo ṱuṱuwedzwa vhukuma nga vhuraru havho ngauri vho vha vha tshi mmbudza nga zwe vha ṱangana nazwo tshumeloni ya tsimu. Ra haseledza ri muṱa nḓila ine ra nga khwinisa ngayo vhutshilo hashu u itela uri roṱhe ri kone u vha tshumeloni ya tshifhinga tshoṱhe. Ra phetha u rengisa nnḓu. Ro dzula kha yeneyo nnḓu miṅwaha ya 18 nahone muṱa washu ro u alusela khayo. Ro vha ri tshi funa nga maanḓa nnḓu yashu, fhedzi Yehova a fhaṱutshedza phetho yashu ya u i rengisa.

Edward a rambiwa u ya Bethele nga 1972, nahone George nga 1974. Naho nṋe na Ann ro vha ṱuvha, a ro ngo humbula nga nḓila ine zwa nga vha zwavhuḓi ngayo arali vha vhe vha tshi khou dzula tsini hashu, vho vhinga, nahone vhe na vhana. Nṱhani hazwo, ro takalela uri vharwa vhashu vho vha vha tshi khou shumela Yehova ngei Bethele. * Ro tendelana na Mirero 23:15, ine ya ri: “Ṅwana’nga!  Mbilu yau yá vha na vhuṱali, na nṋe mbilu yanga i ḓo takala-vho.”

Ro Dzhenela Tshumelo Ya Vhuvulanḓila Ho Khetheaho

Samusi vharwa vhashu vhoṱhe vho vha vhe Bethele, ro bvela phanḓa ri tshi khou vulanḓila. Ḽiṅwe ḓuvha nga 1975, ra ṱanganedza vhurifhi he ha vha hu tshi khou ri ramba u dzhenela mushumo wa u vulanḓila tsimuni i songo avhelwaho ya Clinton County, Illinois. Zwenezwo zwo ri mangadza lungafhani! Hezwo zwo vha zwi tshi amba uri ri fanela u ṱutshela New Jersey, he ra vha ri tsini na vharwa vhashu ngei New York na hune khonani na mashaka ashu vha dzula hone. Naho zwo ralo, ro dzhia wonoyo mushumo u tshi bva ha Yehova nahone ra ita vhuḓidini he ha ri ḓisela phaṱhutshedzo ntswa.

Nga murahu ha miṅwedzi yo vhalaho ri tshi khou shuma tsimuni i songo avhelwaho, ra thoma u fara miṱangano holoni ya tshitshavha ngei Carlyle, Illinois. Fhedzi ro vha ri tshi ṱoḓa fhethu ha tshoṱhe ha u ṱanganela hone. Wahashu wa henefho na musadzi wawe vha wana tshitentsi tshe tsha vha tshi na kuḓu kuṱuku tshe ra kona u tshi hira. Ra kunakisa kuḓu kwoṱhe u katela na bunga ḽi re nga nnḓa nahone henefho fhethu ra hu ita fhethu huṱuku ha miṱangano. Ri kha ḓi humbula zwavhuḓi bere ye ya vha i tshi ṱoḓa u ḓivha uri ri khou ita mini. Tshifhinga tshoṱhe yo vha i tshi ṱolela nga fasiṱere u itela u vhona zwine ra khou ita muṱanganoni!

Nga u ya ha tshifhinga, ha vhumbiwa Tshivhidzo tsha Carlyle, nahone ro vha ro takala u shela mulenzhe kha zwenezwi. Ro thuswa nga vhavhingani vha kha ḓivhaho vhaswa vha vhavulanḓila, Steve na Karil Thompsom, vhe na vhone vha ḓa u shuma tsimu i songo avhelwaho. Muṱa wa ha Thompson wo dzula henefho miṅwaha yo vhalaho nahone nga murahu vha ya Tshikoloni tsha Bivhili tsha Watchtower tsha Gilead nahone vha pfulutshela mushumoni wa vhurumiwa ngei Afurika Vhubvaḓuvha, hune vha shuma hone u dalela zwivhidzo.

Hu si kale fhethu hashu huṱuku ha u ṱanganela ha thoma u ḓala, nahone ra thoma u ṱoḓa holo khulwane. Onoyo wahashu na musadzi wawe vha dovha vha ri thusa nahone ra renga tshitentsi tshe tsha vha tsho tea vhukuma Holo ya Muvhuso. Ro vha ro takala lungafhani musi nga murahu ha miṅwaha i si gathi, ri tshi rambiwa u vha hone musi hu tshi khou ṋekedzwa Holo ya Muvhuso ntswa ngei Carlyle! Ndo vha na ndugelo ya u ṋea nyambo ya u i ṋekedza. Mushumo washu henefho wo vha u wavhuḓi kha riṋe, phaṱhutshedzo i bvaho ha Yehova.

Ra Wana Tsimu Ntswa

Nga 1979 ra wana mushumo muswa ngei Harrison, New Jersey. Ro shuma henefho miṅwaha i ṱoḓaho u vha 12. Nga tshenetsho tshifhinga ra thoma u guda Bivhili na muṅwe musadzi wa Mutshaina, nahone hezwi zwa ita uri ri vhe na pfunzo nnzhi dza Vhatshaina. Nga tshifhinga tshi fanaho, ro guda uri ho vha hu na vhagudiswa vha Vhatshaina na miṱa vha dzulaho tsimuni yashu. Nga  ṅwambo wa zwenezwi, ra ṱuṱuwedzelwa u guda Lutshaina. Naho zwenezwi zwo vha zwi tshi amba u fhedza tshiṅwe tshifhinga ḓuvha ḽiṅwe na ḽiṅwe ri tshi khou guda lwonolwo luambo, zwo ita uri ri kone u vha na pfunzo nnzhi dza Bivhili dzi takadzaho na Vhatshaina hune ra dzula hone.

Miṅwahani yeneyo, ro ṱangana na zwiimo zwinzhi zwi seisaho, zwihuluhulu musi ri tshi lingedza u amba Lutshaina. Ḽiṅwe ḓuvha Ann a ḓiamba uri u “mbevha” ya Bivhili nṱhani ha “mufunzi” wa Bivhili. Eneo maipfi a a fana vhukuma. Ṋemuḓi a sea nahone a ri: “Dzhenani. A thi athu vhuya nda amba na mbevha dza Bivhili u thomani.” Ri kha ḓi vha na vhuleme ha u guda lwonolwo luambo.

Nga murahu ra iswa kha vhuṅwe vhupo ngei New Jersey he ra bvela phanḓa ri tshi shuma tsimuni ya Vhatshaina. Nga murahu ra rambiwa u pfulutshela Boston, Massachusetts, he tshigwada tsha Vhatshaina tsha vha tshi tshi khou aluwa miṅwaha i ṱoḓaho u vha miraru. Yo vha ndugelo yashu u tikedza tshenetshi tshigwada miṅwaha ya sumbe yo fhelaho na u takalela u vhona tshi tshi vha tshivhidzo nga ḽa 1 January, 2003.

U Wana Phaṱhutshedzo Nga U Ḓikumedza

Kha Maleaxi 3:10, ri vhala thambo ya Yehova ya uri vhathu vhawe vha ḓise zwiṱhavhelo zwavho u itela uri a vha shululele phaṱhutshedzo dzawe u vhuya u swika hu si tsheena a shayaho. Ro rengisa bindu ḽe nda vha ndi tshi ḽi funa vhukuma. Ro rengisa haya hashu, he ra vha ri tshi hu funa nga maanḓa. Nahone hu na zwithu zwe ra zwi litsha. Fhedzi, musi ri tshi zwi vhambedza na phaṱhutshedzo, zwithu zwe ra zwi ṱutshela ndi zwiṱuku vhukuma.

Vhukuma, ndi phaṱhutshedzo khulwane lungafhani dze Yehova a ri shululela dzone! Ro fushea vhukuma musi ri tshi vhona vhana vhashu vha tshi ṱanganedza mafhungo-ngoho, ro takalela u ṱanganela vhuḓinḓani ha tshifhinga tshoṱhe vhu ṋeaho vhutshilo, nahone ro vhona Yehova a tshi ṱhogomela ṱhoḓea dzashu. Vhukuma, u ḓiṋekedza hashu huṱuku ho ri ḓisela phaṱhutshedzo khulwane!

[Ṱhaluso dzi re magumoni a siaṱari]

[Tshifanyiso kha siaṱari 25]

Louise na George Blanton vhe na Ann, 1991

[Tshifanyiso kha siaṱari 26]

Holo ya Muvhuso ngei Carlyle, yo ṋekedzwaho nga ḽa 4 June, 1983

[Tshifanyiso kha siaṱari 27]

Ri na Tshivhidzo tsha Boston Chinese tshine tsha kha ḓi tou bva u vhumbiwa

[Tshifanyiso kha siaṱari 28]

Ndi na Edward, Connie, George, na Grace