Musi Zwine Mudzimu A Zwi Funa Zwi Tshi Itwa Kha Ḽifhasi

MUSI Yesu a tshi funza vhafunziwa vhawe u rabela u ri, “Zwiné wa funa nga zwi itwe fhano fhasi vhunga zwi tshi itwa ngei ṱaḓulu,” o vha a tshi khou amba zwine a zwi ḓivha nga ṅwambo wa uri o tshila ṱaḓulu na Khotsi awe. (Mateo 6:10; Yohane 1:18; 3:13; 8:42) Musi Yesu a sa athu vha muthu wa ṋama, o vha a tshi ḓivha tshifhinga tsha musi tshiṅwe na tshiṅwe tshine tsha itea ṱaḓulu na kha ḽifhasi tsha vha tshi tshi tendelana na zwine Mudzimu a zwi funa. Zwenezwo zwo vha zwi zwifhinga zwi takadzaho zwa u sika na u fushea ngazwo.—Mirero 8:27-31.

Tsiko ya Mudzimu ya u thoma yo vha i zwivhumbiwa zwa muya, ‘vharuṅwa vhawe, vhahali vha maanḓa, vha shumisaho fhungo ḽawe.’ U bva tsheetsho u swika na ṋamusi ndi “vhaḓinḓa vhawe vha itaho zwiné a zwi funa.” (Psalme ya 103:20, 21) Naa muṅwe na muṅwe o vha e na mbofholowo ya u amba na u ḓikhethela? Ee, nahone musi ḽifhasi ḽi tshi sikwa, vhenevha ‘vhana vha Mudzimu vho fhululedza.’ (Yobo 38:7) U fhululedza havho ho sumbedza u takalela zwe Mudzimu a zwi dzudzanya, nahone vha tendelana na ndivho yawe.

Musi o no sika ḽifhasi, Mudzimu o ḽi lugiselela uri ḽi dzulwe nga vhathu nahone mafheleloni a sika munna na musadzi vha u thoma. (Genesi, ndima ya 1) Naa zwenezwi zwo vha zwo tewa nga u khoḓwa? Mafhungo o hevhedzwaho a ri: “Mudzimu a lavhelesa zwoṱhe zwe a ita a wana zwó naka nga ngoho,” ee, hu si na vhukhakhi.—Genesi 1:31.

Ndi zwifhio zwe Mudzimu a vha a tshi zwi funa nga vhabebi vhashu vha u thoma na vhana vhavho? U ya nga Genesi 1:28, zwo vha zwo naka nga ngoho: “Mudzimu a mbo vha fhaṱutshedza. Mudzimu a amba navho a ri: Bebani ni ande ni ḓadze shango, ni ḽi kunde, ni vhuse dzikhovhe dza lwanzhe na zwiṋoni zwa ṱaḓulu na dzoṱhe dziphukha dzi tshatshamaho kha ḽifhasi.” U itela u ḓadzisa wonoyo mushumo wavhuḓi, vhabebi vhashu vha u thoma vho vha vha tshi fanela u bvela phanḓa vha tshi tshila—nga hu sa fheli na vhana vhavho vho vha vho fanela u ita nga u ralo. Ho vha hu nga si vhe na makhaulambilu, u sa vha na khaṱulokwayo, vhuṱungu, kana lufu.

Tshenetsho tsho vha tshi tshifhinga tsha musi zwine Mudzimu a zwi funa zwo vha zwi tshi khou itwa ṱaḓulu na kha ḽifhasi. Muṅwe na muṅwe we a vha a tshi ḓo tshila u tendelana na zwine a zwi funa o vha a tshi ḓo wana dakalo ḽihulwane nga u ita nga u ralo. Zwithu zwo tshinyala ngafhi?

Ho itelwa khaedu zwine Mudzimu a zwi funa zwi songo lavhelelwa. Fhedzi yo piringululwa. Naho zwo ralo, yo bveledza tshifhinga tshilapfu tsha vhuṱungu he ha vha hu tshi ḓo ita uri hu vhe na u hanganea vhukuma nga ha zwine Mudzimu a zwi funa nga vhathu. Roṱhe ri a kwamiwa nga honovhu vhuṱungu. Yo vha i ifhio yeneyo khaedu?

Zwine Mudzimu A Zwi Funa Tshifhingani Tsha Vhushandukwa

Muṅwe wa “vhana vha Mudzimu” wa muya o vhona hu na khonadzeo ya u thithisa zwine Mudzimu a zwi funa kha vhathu, ndivho yawe i ya u ḓivhuyedza ene muṋe. Musi tshenetshi tshivhumbwa tsha muya tshi tshi khou humbula nga ha yeneyo khonadzeo, zwo vhonala zwi tshi konadzea vhukuma nahone zwi zwavhuḓi vhukuma. (Yakobo 1:14, 15) A nga vha o humbula uri arali a ita uri vhavhingani vha u thoma vha thetshelese ene nṱhani ha Mudzimu, nga zwenezwo Mudzimu o vha a tshi ḓo kombetshedzea u konḓelela vhuvhusahoṱhe ha u pikisana. A nga vha o humbula  uri Mudzimu o vha a sa ḓo vha haṱula, nga ṅwambo wa uri zwenezwo zwo vha zwi tshi ḓo amba u kundwa ha ndivho ya Mudzimu. Nṱhani hazwo, Yehova Mudzimu o vha a tshi ḓo fanela u shandula ndivho Yawe, a tshi tendela onoyu murwa wa muya Ane zwivhumbwa zwawe zwa vhathu zwino zwa ḓo vha zwi tshi khou mu thetshelesa. Zwo tea, ḽeneḽo ḽishandukwa nga murahu ḽo vhidzwa Sathane, zwine zwa amba, “Muhanedzi.”—Yobo 1:6.

A tshi tendelana na nyemulo yawe, Sathane o amba na musadzi. A mu kombetshedza u nyadza zwine Mudzimu a zwi funa na uri a ḓiitele phetho kha zwa vhuḓifari, nga uri: ‘A ni nga fi. . . . Ni ḓo nga Mudzimu, na ḓo ḓivha vhuḓi na vhuvhi.’ (Genesi 3:1-5) Kha musadzi, zwenezwi zwo vhonala sa zwine zwa ḓo mu ṋea mbofholowo, nahone o zwi thetshelesa samusi zwo vha zwi tshi vhonala zwi nḓila ya khwine ya vhutshilo. Nga murahu a ṱuṱuwedza na munna wawe uri a ṱanganele nae.—Genesi 3:6.

Zwenezwo ho vha hu si zwine Mudzimu a zwi funa kha vhenevho vhavhingani. Ho vha hu zwine vhone vhaṋe vha zwi funa. Nahone zwo vha zwi tshi ḓo ḓisa mvelelo dzi re na khombo. Mudzimu o vha o no vha vhudza uri honoho u sa thetshelesa ho vha hu tshi ḓo ita uri vha fe. (Genesi 3:3) Vho vha vha so ngo sikwa uri vha bvelele nga nnḓa ha u ḓitika nga Mudzimu. (Yeremia 10:23) Zwiṅwe hafhu, vho vha vha tshi ḓo vha vhathu vha songo fhelelaho, nahone u sa fhelela na lufu zwino zwo vha zwi tshi ḓo fhiriselwa kha vhana vhavho. (Vha-Roma 5:12) Sathane o vha a nga si kone u shandula dzenedzi mvelelo.

Naa dzenedzo mvelelo dzo shandula tshoṱhe ndivho ya Mudzimu kana zwine a zwi funa, malugana na vhathu na ḽifhasi? Hai. (Yesaya 55:9-11) Fhedzi zwo ita uri hu vhe na mbudziso dze dza vha dzi tshi fanela u fhindulwa: Naa vhathu ‘vha nga fana na Mudzimu, vha ḓivha vhuḓi na vhuvhi,’ samusi Sathane o amba nga u ralo? Nga maṅwe maipfi, arali ra ṋewa tshifhinga tsho eḓanaho, naa ri nga ḓiitela phetho ya zwo lugaho na zwi songo lugaho, zwi vhuyedzaho na zwi re na khombo, kha masia oṱhe a vhutshilo? Naa Mudzimu o fanelwa nga u thetsheleswa tshoṱhe, nga ṅwambo wa uri nḓila yawe ya kuvhusele ndi ya khwine? Naa zwine a zwi funa zwo fanelwa nga u thetsheleswa tshoṱhe? Ni nga fhindula hani dzenedzo mbudziso?

Ho vha hu na nḓila nthihi fhedzi ya u piringulula dzenedzo mbudziso phanḓa ha zwenezwo zwivhumbwa zwoṱhe zwo ṱalifhaho: U tendela vhe vha ṱoḓa mbofholowo vha tshi lingedza u bvelela. U sokou vha vhulaha zwo vha zwi sa ḓo fhindula dzenedzo mbudziso. U tendela vhathu vha tshi bvela phanḓa na buḓo ḽavho ḽa u vha na mbofholowo tshifhinga tsho eḓanaho zwo vha zwi tshi ḓo dzudzanya mafhungo nga ṅwambo wa uri mvelelo dzo vha dzi tshi ḓo vha khagala. Mudzimu o sumbedza uri o vha a tshi ḓo dzudzanya mafhungo nga yeneyo nḓila musi a tshi vhudza musadzi uri u ḓo vha na vhana. Nga zwenezwo ho vha hu tshi ḓo thoma muṱa wa vhathu. Nga ṅwambo wa zwenezwo, ri khou tshila ṋamusi!—Genesi 3:16, 20.

Naho zwo ralo, zwenezwo zwo vha zwi sa ambi uri Mudzimu o vha a tshi ḓo tendela vhathu na murwa wa muya wa ḽishandukwa vha tshi ita zwine vha zwi funa nga ho fhelelaho. Mudzimu ho ngo litshelela vhuvhusahoṱhe hawe, kana u litsha ndivho yawe. (Psalme ya 83:18) Zwenezwi o zwi ita zwa pfala nga u dzula o amba nga u pwashiwa ha muthomi wa vhushandukwa mafheleloni na u fhelisa mvelelo dzoṱhe dzi si dzavhuḓi. (Genesi 3:15) Ngauralo, u bva mathomoni, muṱa wa vhathu wo vha u na fulufhelo ḽa u wana thuso.

Zwa zwino, vhabebi vhashu vha u thoma vho ḓibvisa u katela na vhana vhavho vha tshifhingani tshi ḓaho kha vhuvhusi ha Mudzimu. U itela uri Mudzimu a thivhele mvelelo dzoṱhe dzi  tsikeledzaho dza phetho dzavho zwo vha zwi tshi ḓo ṱoḓa uri a vha vhetshele zwine a zwi funa kha tshiitea tshiṅwe na tshiṅwe. Zwo vha zwi tshi ḓo fana na u sa vha tendela vha tshi ḓilanga.

Vhukuma, vhathu vho vha vha tshi nga khetha vhuvhusi ha Mudzimu. Vho vha vha tshi nga guda uri ndi zwifhio zwine Mudzimu a zwi funa kha vhathu tshifhingani tshenetsho na u tendelana nazwo nga hune zwa nga konadzea ngaho. (Psalme ya 143:10) Naho zwo ralo, vho vha vha tshi ḓo vha na vhuleme samusi mbudziso ya u ḓitika ha vhathu nga vhone vhaṋe yo vha i tshi ḓo vha i sa athu fhindulwa.

Mvelelo dza u ḓikhethela ha vhathu dzo vhonala kha ḓivhazwakale ya vhathu. Kaini, tanzhe ḽa wonoyo muṱa, o vhulaha murathu wawe Abele nga ṅwambo wa uri “mishumo yawe ya vha mivhi, ya murathu wawe ya vha yo lugaho.” (1 Yohane 3:12) Zwenezwi ho vha hu si zwine Mudzimu a zwi funa, nga ṅwambo wa uri Mudzimu o kaidza Kaini nahone nga murahu a mu ṱarafa. (Genesi 4:3-12) Kaini o khetha vhuḓifari ha u ḓilanga ho ambiwaho nga Sathane; nga zwenezwo ‘o vha a tshi bva kha muvhi.’ Na vhaṅwe vho ita zwi fanaho.

Nga murahu ha miṅwaha i fhiraho 1500 ya ḓivhazwakale ya vhathu, “shango ḽa ḓi ṋaṋisa u tshinya ḽi tshi ya Mudzimu a tshi zwi vhona, ha ḓala zwa mavemu shangoni.” (Genesi 6:11) Ho vha hu tshi ṱoḓea uri hu dzhiiwe vhukando nga u ṱavhanya u itela u tsireledza shango kha u tshinyala. Mudzimu o dzhia vhukando nga u ḓisa maḓi mahulu a shango ḽoṱhe nahone a tsireledza muṱa muthihi uri u tshile—Noaxe, musadzi wawe, vharwa vhawe, na vhasadzi vhavho. (Genesi 7:1) Roṱhe ri vhaḓuhulu vhavho.

Tshifhingani tsha ḓivhazwakale ya vhathu u bva zwenezwo, Mudzimu o ṋea vhulivhisi vhane vha ṱoḓa u ḓivha nga mbilu yoṱhe zwine a zwi funa. O hevhedza vhanna vha fulufhedzeaho u ṅwala mafhungo awe uri muthu muṅwe na muṅwe ane a mu ṱoḓa a kone u wana vhulivhisi. Eneo mafhungo o ṅwaliwa Bivhilini. (2 Timotheo 3:16) O tendela nga lufuno vhathu vha fulufhedzeaho vha tshi vha na vhushaka nae, na u vha khonani dzawe. (Yesaya 41:8) Nahone o vha ṋea maanḓa ane a ṱoḓea u itela u konḓelela milingo i konḓaho ye vhathu vha vha nayo tshifhingani tshenetshi tsha miṅwaha minzhi ya u ḓilanga. (Psalme ya 46:1; Vha-Filipi 4:13) Ri livhuha lungafhani yeneyi thuso!

“Zwine Wa Funa Kha Zwi Itwe” Tshoṱhe

Zwe Mudzimu a zwi ita u swika zwino a si zwine a zwi funa tshoṱhe nga vhathu. Muapostola Petro wa Mukriste o ṅwala a ri: “Hone ro lindela maṱaḓulu maswa na ḽifhasi ḽiswa, zwo ambiwaho nga dzimbavhalelo dzawe, zwine u luga ha fhaṱa khazwo’.” (2 Petro 3:13) Enea maipfi a pfanyisedzo a ambela kha muvhuso muswa kha vhathu na lushaka luswa lwa vhathu nga fhasi ha wonoyo muvhuso.

A tshi shumisa maipfi a pfalaho, muporofita Daniele o ṅwala a ri: “Misini ya eneo mahosi, ndi hone Mudzimu wa ṱaḓulu a tshi ḓo vusa muvhuso une wa sa ḓo tshinyala lini na lini. . . . Wonoyo u ḓo pwashakanya mivhuso yoṱhe wa i lozwa; wone uṋe wa ima lini na lini.” (Daniele 2:44) Honovhu vhuporofita vhu dzula ho amba nga u fheliswa ha maitele a zwithu a re na vhuleme a ṋamusi na u dzhielwa hao vhudzulo nga Muvhuso, kana hulumeni, ya Mudzimu. Enea ndi mafhungo avhuḓi lungafhani! Khakhathi na tseḓa zwo ḓadza shango ḽa ṋamusi nga vhuvemu nahone zwenezwo zwi dovha zwa ṱoḓou tshinya ḽifhasi ḽine ḽiṅwe ḓuvha ḽa ḓo fheliswa.

Zwenezwi zwithu zwi ḓo itea lini? Vhafunziwa vha Yesu vho vhudzisa vha ri: “Zwi ḓo bvelela lini; U ri vhudze zwiné ra ḓo ḓivha ngazwo’ zwauri u vhuya hau na vhufhelo ha ḽifhasi zwi tsini.” A tshi fhindula nga u pfufhifhadza, Yesu o ri: “Huno mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe. Ndi hone hu tshi ḓo ḓa vhufhelo.”—Mateo 24:3, 14.

Zwi a ḓivhiwa zwavhuḓi uri wonoyu mushumo wa u huwelela zwino u khou itwa shangoni ḽoṱhe. Zwi vhonala uri no no zwi vhona kha vhahura vhaṋu. Kha bugu yawe ine ya pfi These Also Believe, Muphurofesa Charles S. Braden o ṅwala a ri: “Ṱhanzi dza Yehova dzo ṱanganya ḽifhasi ḽoṱhe nga u ṱanziela hadzo. . . . A hu na tshiṅwe tshigwada tsha vhurereli shangoni tshe tsha sumbedza u fhisea na u fhisetshela huhulwane kha u lingedza u phaḓaladza mafhungo maḓifha a Muvhuso u fana na Ṱhanzi dza Yehova.” Ṱhanzi dzi khou huwelela  nga mafulufulu enea mafhungo maḓifha mashangoni a fhiraho 230 nahone nga nyambo dzi ṱoḓaho u vha 400. Wonoyu mushumo we wa dzula wo ambiwa a u athu vhuya wa ḓadziswa nga u ralo tshifhingani tsho fhiraho. Ndi vhuṅwe ha vhuṱanzi vhunzhi ha uri zwino tshifhinga tshi khou sendela tsha uri wonoyo Muvhuso u dzhiele vhudzulo mivhuso ya vhathu.

Muvhuso we Yesu a amba uri u ḓo ḓivhadzwa ndi we a ri funza uri ri u rabelele kha thabelo yawe ya tsumbo: “Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:10) Ee, wonoyo Muvhuso ndi tshishumiswa tshine Mudzimu a ḓo tshi shumisa u ḓadzisa ndivho yawe, zwine a zwi funa, kha vhathu na kha ḽifhasi.

Zwi amba mini zwenezwo? Kha ri ri Ndzumbululo 21:3, 4 i fhindule: “Nda pfa ipfi ḽihulu ḽi tshi bva kha khuluṋoni ḽi tshi ri: Asiyo, thumba ya Mudzimu vhukati ha vhathu! Ene u ḓo fhaṱa mushasha vhukati havho, vhone vha vha vhathu vhawe, huno ene nga eṱhé, Mudzimu, u ḓo vha kha vhone, Mudzimu wavho. U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.” Nga zwenezwo zwine Mudzimu a zwi funa zwi ḓo vha zwi tshi khou itwa tshoṱhe kha ḽifhasi na ngei ṱaḓulu. * Naa a ni takaleli u vha tshipiḓa tshawo?

[Ṱhaluso dzi re magumoni a siaṱari]

[Tshifanyiso kha siaṱari 5]

U ḓilanga nga nnḓa ha Mudzimu zwo ḓisa makhaulambilu