Naa Zwine Mudzimu a Zwi Funa Zwi Khou Itwa?

“Zwiné wa funa nga zwi itwe fhano fhasi vhunga zwi tshi itwa ngei ṱaḓulu.”—Mateo 6:10.

JULIO na Christina vho vha vho lavhelesa vho tshuwa musi vhana vhavho vhaṋa vha tshi swa u vhuya u swika vha tshi fa. Goloi yavho ye ya vha yo pakiwa yo tshaiswa nga mureili we a vha o kambiwa, nahone ya ṋanga mulilo. Ṅwana wa vhuṱanu, ane a pfi Marcos, o tshidzwa kha wonoyo mulilo, fhedzi mulilo wo vha wo no fhisa muvhili wawe, wo mu tshinyadza tshoṱhe. O vha e na miṅwaha ya ṱahe. Khotsi awe vho vha vho ṱungufhala. Vha ḓikhuthadza khathihi na muṱa wavho nga haya maipfi: “Holu ndi lufuno lwa Mudzimu, ri fanela u pfesesa zwenezwo, hu sa londwi uri mvelelo dza hone ndi dzavhuḓi kana a si dzavhuḓi.”

Musi hu tshi itea makhaulambilu a fanaho na enea, vhanzhi vha aravha nga nḓila i fanaho. Vha humbula uri ‘Arali Mudzimu e ramaanḓa oṱhe nahone a tshi ri ṱhogomela, zwe zwa bvelela zwi fanela u vha zwi tshi ri vhuyedza nga iṅwe nḓila, naho zwenezwo zwi tshi nga konḓa u zwi pfesesa.’ Naa ni a tendelana na eneo mahumbulele?

Muhumbulo wa uri tshiṅwe na tshiṅwe tshine tsha itea, tshavhuḓi kana tshivhi, tshi sumbedza lufuno lwa Mudzimu kanzhi zwi vha zwo thewa kha maipfi a Yesu a re kha zwine zwa vhidzwa Thabelo ya Murena, yo redzwaho afho nṱha. Naa zwine Mudzimu a zwi funa zwi khou itwa ngei ṱaḓulu? Musi ri tshi rabela uri ‘Zwine wa zwi funa kha zwi itwe fhano fhasi,’ naa a ri khou tenda uri zwo iteaho kha ḽifhasi ndi lufuno lwa Mudzimu?

Vhanzhi a vha na vhuṱanzi na wonoyu muhumbulo. Khavho, zwi sumbedza uri Mudzimu ha na maḓipfele kha zwivhumbwa zwawe zwa vhathu. Vha vhudzisa u ri: ‘Ndi ngani Mudzimu a re na lufuno a tshi funa uri hu bvelele zwithu zwi ofhisaho kha vhathu vha si na mulandu? Arali Mudzimu a tshi khou ṱoḓa ri tshi guda kha zwithu zwivhi zwine zwa bvelela, ndi ngudo ifhio ine ra nga i wana?’ Khamusi yeneyo ndi nḓila ine na ḓipfa ngayo.

Malugana na zwenezwi, murathu wa Yesu, mufunziwa Yakobo, o ṅwala a ri: “Hu so ngo vha na ané, a tshi lingwa, a ri: ndi lingwa zwi tshi bvaho ha Mudzimu, ngauri Mudzimu ha lingi nga vhuvhi, na hone ha lingi muthu.” (Yakobo 1:13) Mudzimu a si mu bveledzi wa vhuvhi. Ngauralo, zwi khagala uri a si zwoṱhe zwine zwa bvelela kha ḽifhasi ṋamusi zwine zwa vha zwine Mudzimu a zwi funa. Maṅwalo a dovha a amba nga zwi funwaho nga vhathu, dzitshaka, na nga Diabolo. (Yohane 1:13; 2 Timotheo 2:26; 1 Petro 4:3) Naa ni a tenda zwa uri zwe zwa bvelela kha muṱa wa Julio na Christina a si zwine Khotsi wa ṱaḓulu a re na lufuno a zwi funa?

Ngauralo, Yesu o vha a tshi khou amba mini musi a tshi funza vhafunziwa vhawe u rabela uri: “Zwiné wa funa nga zwi itwe”? Naa ho vha hu u sokou humbela Mudzimu uri a dzhenelele, kana Yesu o vha a tshi khou ri funza u rabelela tshiṅwe tshithu tsha ndeme na tsha khwine, tshanduko dzine roṱhe ra nga dzi lavhelela? Kha ri dovhe ri ṱolisise zwo engedzeaho zwine Bivhili ya zwi amba.

[Ṱhaluso dza Vhubvo ha Tshifanyiso kha siaṱari 3]

Car: Dominique Faget-STF/AFP/Getty Images; child: FAO photo/B. Imevbore