Naa Ni Khou Khwaṱhiswa nga Ipfi Ḽa Mudzimu?
Naa Ni Khou Khwaṱhiswa nga Ipfi Ḽa Mudzimu?
MUSI no sedzana na milingo, ni lwa hani nayo? Siani ḽa Yesu, u humbula maṅwalo o teaho zwo mu thusa uri a kone u sedzana na milingo ya Sathane. (Mateo 4:1-11) Nga hu fanaho, musi Khosi Davida o sedzana na milingo ya muthu nga eṱhe, o khwaṱhiswa nga Ipfi ḽa Mudzimu. O ri: “Kha mbilaelo nnzhi dze dza ndzhena, mbilu yanga yo ḓi takadzwa nga phumudzo dzau.”—Psalme ya 94:19.
Nga hu fanaho, u humbula maṅwalo ane ra a funa zwi nga ri khuthadza kana u ri khwaṱhisa musi ro sedzana na milingo. Sa tsumbo, Rex, ane zwino a vha na miṅwaha ya 89, o thoma u vha muevangeli wa tshifhinga tshoṱhe u bva nga 1931. Naho zwo ralo, u ri: “Misi yoṱhe ndo vha ndi tshi anzela u ḓipfa ndi sa fanelei musi ndi tshi ṋewa mushumo wo khetheaho vhuḓinḓani.” O sedzana hani na zwenezwo zwiimo? O ri: “Ndo humbula luṅwalo lune nda lu funesa lwa Mirero 3:5, lune lwa ri: ‘Fulufhedza Mudzimu nga mbilu yau yoṱhe; U songo ḓi-tika nga u ri: Ndi a ṱalukanya.’ U humbula na u shumisa lwonolu luṅwalo zwo nthusa uri ndi bvele phanḓa na mishumo yanga nga hu bvelelaho.”
Na vhaswa vha a vhuyelwa nga u vha na maṅwalo ane vha a funesa. Jack wa miṅwaha ya rathi o amba uri luṅwalo lune a lu funesa ndi Mateo 24:14. Lwonolu luṅwalo lu mu ṱuṱuwedzela u ya u huwelela na vhabebi vhawe. U ri: “Ndi takalela u ya u ṱanziela mugivhela muṅwe na muṅwe na mme anga, khotsi anga, na khaladzi anga.”
U fana na Yesu, naa nga zwiṅwe zwifhinga ni a sedzana na milingo yo tou livhaho? Arali zwo ralo, Vha-Filipi 4:13 lu nga vha luṅwalo lune na lu funesa. U fana na Khosi Davida, naa ni a tambudzwa nga “mbilaelo nnzhi”? Arali zwo ralo, u humbula Vha-Filipi 4:6, 7 zwi nga thusa uri ni kone u sedzana na zwenezwo. Naa tshiṅwe tshifhinga ni a vhilaela uri u shumela haṋu Mudzimu a si ha ndeme? U humbula 1 Vha-Korinta 15:58 zwi ḓo ni ṋea maanḓa.
Nga u rwela ngomani maṅwalo o teaho, ri vha ri tshi khou tendela Ipfi ḽa Mudzimu ḽi tshi shuma vhutshiloni hashu. (Vha-Heberu 4:12) Maṅwalo o raloho ane ra a funa a nga ri khwaṱhisa na u ri khuthadza.—Vha-Roma 15:4.