Naa U Sa Dzhia sia Zwi Ita Uri Vhakriste Vha Sa Kone U Sumbedza Lufuno?

U VHA Mukriste zwi katela zwi fhiraho u sokou vhala Bivhili, u rabela, na u imba nyimbo nga Swondaha. Zwi katela na u ita mishumo mivhuya, ri tshi itela Mudzimu na vhaṅwe vhathu. Bivhili i ri: “Ri songo funa nga u amba na nga lulimi; nga ri fune nga mushumo na nga mafhungo-ngoho.” (1 Yohane 3:18) Yesu o vha a tshi kwamea vhukuma nga vhaṅwe, nahone Vhakriste vha fanela u mu edzisa. Muapostola Paulo o ṱuṱuwedza vhatendi ngae uri vha “simese u shuma mushumo wa Mudzimu.” (1 Vha-Korinta 15:58) Fhedzi mushumo wa Mudzimu ndi mini? Naa zwi katela u lingedza u shandukisa maitele a muvhuso u itela u vhuyedza vha shayaho na vho  tsikeledzeaho? Naa zwenezwo ndi zwe Yesu a zwi ita?

Naho Yesu o ṱuṱuwedzwa uri a ite zwenezwo, o hana u dzhenelela kha mafhungo a zwa politiki kana u dzhia sia. O hana maanḓa e Sathane a vha a tshi khou ṱoḓa u mu ṋea one a u vhusa mivhuso yoṱhe ya shango, o hana u ḓidzhenisa kha u ṱaṱisana malugana na u badela muthelo, nahone a dovha a hana musi tshigwada tsha vhathu tshi tshi ṱoḓa u mu ita khosi. (Mateo 4:8-10; 22:17-21; Yohane 6:15) Fhedzi u sa dzhia hawe sia a ho ngo ita uri a sa kone u thusa vhaṅwe.

Yesu o vha o livhisa ṱhogomelo kha zwithu zwe zwa vha zwi tshi ḓo ḓisela vhaṅwe zwivhuya zwa nga hu sa fheli. Naho u fusha vhathu vha zwigidi zwiṱanu na u fhodza vhathu zwo thusa vhathu vha si gathi nahone lwa tshifhinganyana, pfunzo yawe yo ita uri vhathu vhoṱhe vha wane phaṱutshedzo dza nga hu sa fheli. Yesu o mbo ḓi ḓivhiwa sa “Mufunzi,” fhedzi hu si sa mudzudzanyi wa u ḓisela vhathu mbofholowo. (Mateo 26:18; Marko 5:35; Yohane 11:28) O ri: “Ndi zwe nda bebelwa zwone, ndo ḓela zwone fhano shangoni uri ndi vhe ṱhanzi ya mafhungo-ngoho.”—Yohane 18:37.

U Huwelela Mafhungo A Khwine U Fhira Maitele A Zwa Politiki

Mafhungo-ngoho e Yesu a a funza o vha e si pfunzo ya zwa politiki. Nṱhani hazwo, o vha o ḓisendeka nga Muvhuso we ene a vha a tshi ḓo vha Khosi yawo. (Luka 4:43) Wonoyu Muvhuso ndi hulumeni wa ṱaḓulu, nahone u ḓo dzhiela vhudzulo vhuvhusi hoṱhe ha vhathu na u ḓisela vhathu mulalo u sa fheli. (Yesaya 9:6, 7; 11:9; Daniele 2:44) Ngauralo, ndi ḽone fulufhelo ḽi ḽoṱhe ḽa vhathu. Naa u ḓivhadza fulufhelo ḽo raloho ḽo khwaṱhaho a zwi ambi u sumbedza lufuno u fhirisa u ṱuṱuwedza vhathu uri vha fulufhele vhathu uri vha vha ḓisele vhumatshelo ho tsireledzeaho? Bivhili i ri: “Ni songo fulufhedza mahosi; ndi vhana vha vhathu; kha vhone a huna mutshidzi. Muya wavho u a ṱuwa; vha vhuyelela mavuni avho; ḓuvha ḽeneḽo na maano avho o lovha. Wa mashudu ndi uyo ané Mudzimu wa Yakobo a vha Mutshidzi wawe, fulufhelo ḽawe a ri ndi Yehova Mudzimu wawe.” (Psalme ya 146:3-5) Ngauralo nṱhani ha u ruma vhafunziwa vhawe uri vha huwelele nga ha nḓila ya khwine ya u dzudzanya mivhuso, Yesu o vha funza uri vha huwelele nga ha “mafhungo maḓifha a muvhuso.”—Mateo 10:6, 7; 24:14.

Nga zwenezwo, wonoyu ndi wone “mushumo wa Mudzimu” une vhahuweleli vha Vhakriste vha fanela u u ita. Nga ṅwambo wa uri vhathu vhane vha ḓo vha nga fhasi ha Muvhuso wa Mudzimu vha fanela u funana, wonoyo Muvhuso u ḓo fhelisa vhushai nga u kovhekanya vhathu zwine vha zwi ṱoḓa nga nḓila yo linganyiselwaho. (Psalme ya 72:8, 12, 13) Enea ndi one mafhungo maḓifha nahone a fanela u huwelelwa.

Ṋamusi, Ṱhanzi dza Yehova dzo dzudzanywa mashangoni a linganaho 235 u itela wonoyu “mushumo wa Mudzimu.” U tendelana na ndaela ya Yesu, dzi ṱhonifha mivhuso yoṱhe. (Mateo 22:21) Fhedzi dzi dovha dza tevhedza haya maipfi e a a vhudza vhatevheli vhawe: “A ni vha shango ḽino, ndo ni nanga na bva kha ḽone.”—Yohane 15:19.

Vhaṅwe vhe vha vha vha tshi tikedza maitele a politiki vho shanduka nga murahu ha u guda zwavhuḓi Bivhili. Ra-politiki wa ngei Italy we a vha e muraḓo wa Dzangano ḽa Katolika, kereke ye ya vha i tshi langulwa nga dzangano, o ri: “Ndo ḓidzhenisa kha maitele a zwa politiki, ndi tshi humbula uri muthu u fanela u ita mushumo wa ndeme kha mafhungo a zwa politiki na a mvelaphanḓa ya lushaka.” Nga murahu ha u ṱutshela mushumo sa ṋeḓorobo u itela u vha muhuweleli wa Muvhuso wa Mudzimu sa muṅwe wa Ṱhanzi ya Yehova, o  ṱalutshedza uri ndi ngani vhuḓidini ha vhathu siani ḽa zwa politiki vhu tshi kundelwa. O ri: “Shango ḽi zwine ḽa vha zwone, hu si nga ṅwambo wa uri vhathu vho lugaho siani ḽa vhuḓifari a vho ngo lingedza u khwinisa zwiimo zwa matshilisano a vhathu, fhedzi ndi nga ṅwambo wa uri vhuḓidini ha vhathu vho lugaho vha si gathi ho tsikeledzwa kana u kundwa nga vhuvhi ha vhathu vhanzhi.”

U sa dzhenelela kha maitele a zwa politiki u itela u huwelela fulufhelo ḽa ngoho ḽa vhathu a zwi iti uri Vhakriste vha sa kone u thusa vhaṅwe. Vhane vha vha thusa uri vha vhe nga fhasi ha Muvhuso wa Mudzimu vha guda u shandukisa mavhonele avho a tshinyadzaho, uri vha ṱhonifhe vhuvhusi, na u khwinisa vhutshilo havho ha muṱa, na uri vha vhe na mavhonele o linganyiselwaho siani ḽa zwithu zwi vhonalaho. Zwa ndeme vhukuma ndi uri Ṱhanzi dza Yehova dzi thusa vhathu uri vha ḓiphine nga vhushaka ha tsini-tsini na Mudzimu.

Vhahuweleli vha Muvhuso wa Mudzimu vha vhuyedza vhathu vhane vha dzula navho. Fhedzi zwi fhiraho zwenezwo, vha livhisa vhathu uri vha vhe na fulufhelo kha muvhuso wa vhukuma une wa ḓo ḓisa mulalo wa tshoṱhe kha vhane vha funa Mudzimu. Nga ṅwambo wa u sa dzhia havho sia, Vhakriste vha kona u ṋekedza thuso ya tshoṱhe na i shumaho ṋamusi.

[Bogisi/Tshifanyiso kha siaṱari 7]

Ndo Ṱutshela Politiki Nahone Nda Thoma U Huwelela Nga Ha Muvhuso Wa Mudzimu

Musi Átila a tshi kha ḓi vha mutukana o guda kha vhafunzi vhawe ngei Belém kha ḽa Brazil uri vhurereli vhu nga shumiswa u itela u lwela mbofholowo. O takala musi a tshi pfa uri vhathu vha ḓo fheleledza vho vhofhololwa kha mutsiko nahone a ṱanganela kha tshigwada tsha vhalweli vha mbofholowo, he a guda u dzudzanya vhathu uri vha dzhenele mafulo a migwalabo na a u lwisana na muvhuso.

Fhedzi Átila o vha a tshi takalela na u funza tshigwada tsha vhana vha u lwela mbofholowo, a tshi shumisa bugu ye a ṋewa yone ine ya pfi U Thetshelesa kha Mufunzi Muhulu. * Yeneyo bugu yo vha i tshi funza nga ha u ḓifara zwavhuḓi na u thetshelesa vhavhusi. Hezwi zwo ita uri Átila a ḓivhudzise uri ndi ngani vhane vha tikedza mafhungo a u shumisa vhurereli u itela u lwela mbofholowo vha sa tevheli zwilinganyo zwa nṱha zwa matshilele zwa Yesu na uri ndi ngani vhaṅwe vha tshi hangwa vhathu vha shengelaho musi vha tshi wana vhuimo ha nṱha. Nga zwenezwo a ḓibvisa kha tshenetsho tshigwada. Nga murahu ha zwenezwo, a dalelwa nga Ṱhanzi dza Yehova nahone dza amba nae nga ha Muvhuso wa Mudzimu. A mbo ḓi thoma u guda Bivhili nahone a guda nga ha dzilafho ḽa ngoho ḽa u tsikeledzwa ha vhathu.

Nga tshenetsho tshifhinga, Átila a ya muṱanganoni wa Katolika we wa vha u tshi khou amba nga ha Vhurereli na Dzipolitiki. Vhagudisi vha hone vho ṱalutshedza vha ri: “Vhurereli na dzipolitiki zwi a tshimbidzana.” A dovha a ya muṱanganoni Holoni ya Muvhuso. A vhona phambano khulwane vhukuma! Ho vha hu si na muthu ane a khou daha, ane a khou nwa halwa, kana ane a khou amba miswaswo yo bvaho. A mbo ḓi ita phetho ya u ṱanganela navho kha mushumo wa u huwelela, nahone nga murahunyana a lovhedzwa. Zwino u a zwi vhona uri ndi ngani u shumisa vhurereli u itela u lwela mbofholowo zwi si tshipiringululi tsha vhukuma tsha vhashai.

[Ṱhaluso i re magumoni a siaṱari]

[Zwifanyiso kha siaṱari 6]

U sa dzhia sia ha vhashumeli vha vhakriste a zwi iti uri vha sa thuse vhaṅwe