Vhaswa, Naa Ni Khou Fhaṱa Vhumatshelo Ha Vhoiwe?
Vhaswa, Naa Ni Khou Fhaṱa Vhumatshelo Ha Vhoiwe?
“Ngauri ngelekanyo dzine nda khou ni elelwa ngadzo’ Nṋe ndi a dzi ḓivha; . . . Ndi ngelekanyo dza mulalo, a si dza u ni vhaisa; ndi dza uri ndi ni ṋee zwa matshelo, na fulufhelo.”—YEREMIA 29:11.
1, 2. Miṅwaha ya vhuswa i nga dzhiiwa nga nḓila dzifhio dzo fhambanaho?
VHAALUWA vhanzhi vha humbula nga miṅwaha ya vhuswa sa tshifhinga tshavhuḓi tsha vhutshilo. Vha humbula maanḓa na mafulufulu e vha vha vhe nao musi vha tshee vhaswa. Vha humbula nga tshifhinga tsha musi vhe na vhuḓifhinduleli vhu si gathi, tshifhinga tshee vha vha vha tshi ḓiphina vhukuma na zwibuli zwinzhi zwa vhutshilo zwe zwa vha zwi phanḓa havho.
2 Vhoiwe ni kha ḓivhaho vhaswa ni vhona zwithu nga nḓila yo fhambanaho. Ni nga kha ḓivha na vhuleme ha u sedzana na tshanduko dza vhuswa dza maḓipfele na dza ṋama. Tshikoloni, ni nga kha ḓi sedzana na mutsiko muhulwane wa thangana ya murole. Ni nga kha ḓivha ni tshi khou lwa vhukuma na u hana u shumisa luvhi zwidzidzivhadzi, zwikambi, na u ḓifara luvhi. Vhunzhi ha vhoiwe ni dovha na sedzana na mafhungo a u sa dzhia sia na maṅwe mafhungo a kwamaho lutendo lwaṋu. Vhukuma, miṅwaha ya vhuswa i nga vha tshifhinga tshi konḓaho. Naho zwo ralo, ndi tshifhinga tsha u vha na zwibuli. Mbudziso ndi ya uri, Ni ḓo shumisa hani zwenezwo zwibuli?
Ḓiphineni Nga Vhuswa Haṋu
3. Ndi nyeletshedzo na tsevho zwifhio zwe Salomo a zwi ṋea vhaswa?
3 Vhaaluwa vha ḓo ni vhudza uri vhuswa a vhu fhedzi tshifhinga tshilapfu, nahone vha amba ngoho. Nga murahu ha miṅwaha i si gathi ni ḓo vha ni si tsha vha muswa. Ngauralo ḓiphineni ngaho musi ni kha ḓi vha muswa! Yeneyo yo vha i nyeletshedzo ya Khosi Salomo, we a ṅwala a ri: “Hee iwe Mutuka! Takala misi Ú tshee muswa, U ḓifhelwe nga maḓuvha a vhutuka hau, U fare nḓila ine mbilu yau ya i funa, na ine maṱo au a i takalalela.” Naho zwo ralo, Salomo o sevha vhaswa a ri: “U songo ṱhupha mbilu yau, muvhili wau u dzivhele vhuvhi.” O dovha a ri: “Vhutuka na mavhudzi matswu ndi zwa mahandana.”—Muhuweleli 11:9, 10.
4, 5. Ndi ngani zwi vhuṱali uri vhaswa vha ḓilugiselele vhumatshelo havho? Fanyisani.
4 Naa ni a pfesesa zwe Salomo a vha a tshi khou amba zwone? U itela u ni thusa u pfesesa, humbulani nga ha muswa we a wana tshifhiwa tsha thengo khulu, khamusi ifa ḽa tshelede. U ḓo ita mini ngayo? A nga i tambisa yoṱhe nga u ḓitakadza—u fana na murwa wa ḽihwarahwara o ambiwaho kha tshifanyiso tsha Yesu. (Luka 15:11-23) Fhedzi hu ḓo itea mini musi o no fhedza tshelede yoṱhe? Vhukuma u ḓo ḓisola uri o vha tsilu! Kha ḽiṅwe sia, kha ri ri o shumisa tshenetsho tshifhiwa u itela u ḓilugiselela vhumatshelo, khamusi a vhulunga vhunzhi hayo nga vhuṱali. Mafheleloni, musi a tshi vho vhuyelwa nga tshelede yawe ye a i vhulunga, naa ni humbula uri a nga ḓisola uri ho ngo shumisa tshelede yawe yoṱhe nga u ḓiphina musi a tshee muswa? Vhukuma a zwo ngo ralo!
5 Humbulani nga ha miṅwaha yaṋu ya vhuswa sa tshifhiwa tshi bvaho ha Mudzimu, samusi zwo ralo. Naa ni ḓo i shumisa hani? Ni nga tambisa eneo maanḓa na mafulufulu nga u ḓiphina hu sa fheli ni sa vhuyi na humbula nga ha vhumatshelo. Fhedzi arali na ita nga u ralo, “vhutuka na mavhudzi matswu” zwi ḓo vha “mahandana” vhukuma. Ndi khwine lungafhani u shumisa nga vhuṱali vhuswa haṋu u itela u ḓilugiselela vhumatshelo!
6. (a) Ndi ngani nyeletshedzo ya Salomo i tshi ṋea vhulivhisi kha vhaswa? (b) Ndi zwifhio zwine Yehova a ḓo ṱoḓa u zwi itela muswa, nahone muswa a nga vhuyelwa hani nga zwenezwi?
6 Salomo o amba maṅwe maitele ane a nga ni thusa u shumisa vhuswa haṋu nga nḓila ya vhuṱali. O ri: “U songo hangwa Muvhumbi wau misi Ú tshee muswa.” (Muhuweleli 12:1) Hezwi ndi zwa ndeme arali ri tshi ṱoḓa u bvelela—u thetshelesa Yehova, na u ita zwine a funa. Yehova o vhudza Vhaisiraele vha kale zwine a khou ṱoḓa u vha itela zwone: “Ngauri ngelekanyo dzine nda khou ni elelwa ngadzo’ Nṋe ndi a dzi ḓivha; . . . Ndi ngelekanyo dza mulalo, a si dza u ni vhaisa; ndi dza uri ndi ni ṋee zwa matshelo, na fulufhelo.” (Yeremia 29:11) Yehova u ḓo dovha a ṱoḓa u ni ṋea ‘vhumatshelo na fulufhelo.’ Arali na mu humbula kha zwine na ita, u elekanya, na u ita dziphetho, ni ḓo vha na vhumatshelo na fulufhelo zwavhuḓi.—Ndzumbululo 7:16, 17; 21:3, 4.
“Sendelani Tsini Ha Mudzimu”
7, 8. Muswa a nga sendela hani tsini na Mudzimu?
7 Yakobo o ri ṱuṱuwedzela u humbula Yehova musi a tshi ri: “Sendelani tsini ha Mudzimu, na ene a sendele tsini haṋu.” (Yakobo 4:8) Yehova ndi Musiki, Wa Ṱaḓulu-ṱaḓulu, o tewaho nga u rabelwa na nga thendo. (Ndzumbululo 4:11) Arali ra sendela tsini hawe, u ḓo sendela tsini hashu. Naa ḽeneḽo dzangalelo ḽa lufuno a ḽi takadzi mbilu?—Mateo 22:37.
8 Ri sendela tsini na Yehova nga nḓila nnzhi. Sa tsumbo, muapostola Paulo o ri: “Konḓelelani thabeloni, fhaṱuwani khayo’ ni tshi livhuha.” (Vha-Kolosa 4:2) Nga maṅwe maipfi, ṱahulelani mukhuvha wa u rabela. Ni songo sokou fushea nga u sokou ri amen nga murahu ha khotsi aṋu kana muṅwe Mukriste nga inwi tshivhidzoni we a rabela. Naa no no vhuya na shululela Yehova zwa mbiluni yaṋu nahone na mu vhudza zwine na humbula, zwine na ofha, na vhuleme vhune na ṱangana naho? Naa no no vhuya na mu vhudza nga ha zwithu zwine zwa ni shonisa u zwi haseledza na muṅwe muthu? Thabelo dzi fulufhedzeaho na dzi bvaho mbiluni dzi ḓisa mulalo. (Vha-Filipi 4:6, 7) Dzi ri thusa u sendela tsini na Yehova na u ḓipfa a tshi khou sendela tsini hashu.
9. Vhaswa vha nga thetshelesa hani Yehova?
9 Ri vhona iṅwe nḓila ya u sendela tsini na Yehova kha haya maipfi o hevhedzwaho: “Thetshelesa U tshi eletshedzwa, U pfe vha tshi U rovhedza; ndi hone U tshi ḓo thanya matshelo.” (Mirero 19:20) Ee, arali na thetshelesa Yehova, ni vha ni tshi khou ḓifhaṱela vhumatshelo. Ni nga sumbedza hani uri ni a thetshelesa Yehova? Nga u ya miṱanganoni ya Vhukriste misi yoṱhe na u thetshelesa zwipiḓa zwa mbekanyamushumo. Hafhu ni dovha na ‘hulisa khotsi-aṋu na mme-aṋu’ nga u vha hone kha ngudo ya Bivhili ya muṱa. (Vha-Efesa 6:1, 2; Vha-Heberu 10:24, 25) Zwenezwo zwi a khoḓiwa. Zwiṅwe hafhu, naa ni a ‘bindulisa tshifhinga’ u itela u lugisela miṱangano, u vhala Bivhili misi yoṱhe, u ita ṱhoḓisiso? Naa ni a lingedza u shumisa zwe na vhala, u itela uri ni tshimbile sa ‘wa vhuṱali’? (Vha-Efesa 5:15-17; Psalme ya 1:1-3) Arali na ita zwenezwo, ni vha ni tshi khou sendela tsini na Yehova.
10, 11. Ndi mbuyelo dzifhio khulwane dzine vhaswa vha dzi wana nga u thetshelesa Yehova?
10 Kha maipfi a u thoma a bugu ya Mirero, muṅwali o hevhedzwaho o ṱalutshedza ndivho ya yeneyo bugu ya Bivhili. Ndi, “ya uri hu ḓihwe vhuṱali na u laiwa na u ṱalukanya, na zwine zwa ambiwa nga ṱhalukanyo; uri muthu a ṱanganedze ndaelá ya u mu funza u luga na maitele na vhugala; uri á songó thanya a ṋewe maano, mutuka a ṋewe nḓivho na ngelekanyo.” (Mirero 1:1-4) Ngauralo, musi ni tshi vhala na u shumisa zwo ṅwaliwaho kha Mirero—u katela na Bivhili yoṱhe—ni ḓo ṱahulela u luga na vhugala, nahone Yehova u ḓo takalela uri no sendela tsini nae. (Psalme ya 15:1-5) Musi ni tshi ṱahulela maitele, vhuṱali, nḓivho na ngelekanyo, ni ḓo kona u ita phetho dza khwine.
11 Naa ndi zwi sa pfali u lavhelela uri muswa a nga tshila nga nḓila ya vhuṱali? A zwo ngo ralo, samusi vhunzhi ha vhaswa vha Vhakriste vha tshi tshila nga nḓila ya vhuṱali. Nga ṅwambo wa zwenezwo, vhaṅwe vha a vha ṱhonifha nahone ‘vha si nyadze vhuṱhannga havho.’ (1 Timotheo 4:12) Vhabebi vhavho vha a ḓikukumusa ngavho zwo tea, na Yehova u amba uri vha takadza mbilu yawe. (Mirero 27:11) Naho vhe vhaṱuku, vha na vhungoho ha uri haya maipfi o hevhedzwaho a a shuma khavho: “Sedza uyo ané a luga, U vhone uyo wa zwivhuya; kha vhone maḓuvha a ḓaho ndi a mulalo.”—Psalme ya 37:37.
Itani Phetho Dzavhuḓi
12. Ndi ifhio iṅwe phetho ya ndeme ine vhaswa vha i ita, nahone ndi ngani yeneyo phetho i na mvelelo dza tshifhinga tshilapfu?
12 Vhuswa ndi tshifhinga tsha u ita dziphetho, dzine dziṅwe dzadzo dza vha na mvelelo dza tshoṱhe. Dziṅwe phetho dzine na dzi ita zwino dzi nga ni kwama miṅwaha minzhi ine ya khou ḓa. Phetho dza vhuṱali dzi bveledza vhutshilo ha dakalo na hu bvelelaho. Phetho dzi si dza vhuṱali dzi nga tshinyadza vhutshilo haṋu hoṱhe. Ṱhogomelani nḓila ine zwenezwo zwa vha ngoho ngaho kha phetho mbili dzine na tea u dzi ita. Ya u thoma: Ndi vhafhio vhane na vha khetha uri vha vhe khonani yaṋu? Ndi ngani zwi zwa ndeme? Murero wo hevhedzwaho uri: “Mu-endelana-na-vhaṱali u a ṱalifha-vho; mu-konana-na-tsilu u ḓo tambula-vho.” (Mirero 13:20) Nga maṅwe maipfi, ri fheleledza ri tshi vho fana na vhathu vhane ra konana navho—ri vha vho ṱalifhaho kana matsilu. Ni nga takalela u vha muthu wa mufuda-ḓe?
13, 14. (a) Nga nnḓa ha u kwamana na vhathu nga ho livhaho, vhukonani vhu katela na mini? (b) Ndi vhukhakhi vhufhio vhune vhaswa vha fanela u vhu iledza?
13 Musi ni tshi humbula nga ha vhukonani, zwi vhonala ni tshi humbula nga ha u vha na vhathu. Zwenezwo ndi ngoho, fhedzi hu na zwi fhiraho zwenezwo. Musi no ṱalela mbekanyamushumo ya thelevishini, u thetshelesa muzika, u vhala bugu, u ya u vhona filimu, kana u shumisa zwiṅwe zwithu kha Internet, ni khou ita vhukonani. Arali honoho vhukonani vhu ha khakhathi na ha u ḓifara luvhi kana u ṱuṱuwedza u shumisa luvhi zwidzidzivhadzi, u kambiwa, kana tshiṅwe tshithu tshi lwisanaho na maitele a Bivhili, ni vha ni tshi khou ita vhukonani na “vha matsilu,” vhane vha ita zwithu nga nḓila ine ya nga Yehova ha tshili.—Psalme ya 14:1.
14 Khamusi ni humbula uri samusi ni tshi ya miṱanganoni ya Vhukriste nahone ni tshi fhisea tshivhidzoni, no khwaṱha vhukuma lune na nga si kwamiwe nga filimu dza khakhathi kana muzika une wa takadza, fhedzi u na maipfi a si avhuḓi. Khamusi ni nga humbula uri hu nga si vhe na mvelelo mmbi arali na tou sedzanyana zwifanyiso zwa u ṱangana nga dzimbeu kha Internet. Muapostola Paulo u ni vhudza uri nḓila ine na humbula ngayo yo khakhea! U ri: “Ni so ngo khakha: U̗ ḓowelana na vhavhi zwi tshinyisa milayo mivhuya.” (1 Vha-Korinta 15:33) Zwi ṱungufhadzaho ndi uri vhaswa vhanzhi vha Vhakriste vho tshinya milayo yavho mivhuya nga u vha na khonani mmbi. Nga zwenezwo, ḓiimiseleni u iledza vhukonani ho raloho. Arali na ita nga u ralo, ni ḓo tevhela nyeletshedzo ya Paulo ine ya ri: “Ni songo ḓi-vhambedza na vha shango ḽino. Aiwa, shandukani, kuhumbulele kwaṋu ku vhe kuswa. Uri ni kone u ṱalukanya uri zwiné Mudzimu a funa zwi tshi itwa ndi zwifhio, uri u funa zwivhuya na zwine zwa mu takadza, na zwi sí tshiṱahe.”—Vha-Roma 12:2.
15. Ndi phetho ifhio ine vhaswa vha fanela u i ita, nahone ndi mitsiko ifhio ine nga zwiṅwe zwifhinga vha ṱangana nayo malugana na zwenezwi?
15 Iṅwe phetho ya vhuvhili ine na fanela u i ita ngei. Tshifhinga tshi ḓo swika hune na fanela u phetha zwine na khou ṱoḓa u zwi ita musi ni tshi fhedza tshikolo. Arali ni tshi dzula shangoni hune ha vha na ṱhahelelo ya mishumo, ni nga ḓipfa no tsikeledzea lune na ṱavhanyedza u ṱanganedza mushumo wavhuḓi muṅwe na muṅwe une wa vha hone. Arali ri tshi tshila shangoni ḽo pfumaho, ri nga kha ḓi khetha mishumo, ine miṅwe yayo ya vha i lingaho vhukuma. Samusi vha tshi ṱoḓa uri ni vhe na vhumatshelo havhuḓi, vhadededzi kana vhabebi vhaṋu vha nga ni ṱuṱuwedzela u tovhola buḓo ḽine ḽa ḓo ni ṋea tshelede, khamusi na lupfumo. Naho zwo ralo, u gudela ḽeneḽo buḓo zwi nga fhungudza vhukuma tshifhinga tshine na nga tshi fhedza ni tshi khou shumela Yehova.
16, 17. Ṱalutshedzani nḓila ine maṅwalo o fhambanaho a nga thusa ngayo muswa u vha na mavhonele o linganyiselwaho a mushumo?
16 Humbulani u ya Bivhilini musi ni sa athu ita phetho. Bivhili i ri ṱuṱuwedzela u shuma u itela u ḓitshidza na u ḓi shavhedza. (2 Vha-Thesalonika 3:10-12) Naho zwo ralo, hu na zwiṅwe zwithu zwine zwa katelwa. Ri ni ṱuṱuwedza u vhala maṅwalo a tevhelaho na u humbula nga nḓila ine a nga thusa ngayo muswa u linganyisela musi a tshi khetha buḓo: Mirero 30:8, 9; Muhuweleli 7:11, 12; Mateo 6:33; 1 Vha-Korinta 7:31; 1 Timotheo 6:9, 10. Nga murahu ha u vhala dzenedzo ndimana, naa ni a vhona mavhonele a Yehova kha eneo mafhungo?
17 Mushumo wa shango u songo vhuya wa vha wa ndeme vhukuma lune wa dzhiela vhudzulo u shumela Yehova. Ndi zwavhuḓi vhukuma u fanelea u wana mushumo wo teaho nga pfunzo ya murole wa nṱha fhedzi. Arali ni tshi ṱoḓa pfunzo yo engedzeaho kha murole wa nṱha, ndi zwithu zwine na fanela u zwi haseledza na vhabebi vhaṋu. Fhedzi ni songo vhuya na xelelwa nga “zwithu zwa ndeme vhukuma”—zwithu zwa muya. (Vha-Filipi 1:9, 10, NW) Ni songo ita vhukhakhi vhu fanaho na he Baruki, muṅwaleli wa Yeremia, a vhu ita. O xelelwa nga u dzhiela nṱha ndugelo yawe ya tshumelo nahone a thoma ‘u ḓi-ṱoḓela zwihulwane.’ (Yeremia 45:5) O vha o hangwa lwa tshifhinganyana uri a huna ‘zwithu zwihulwane’ kha ḽino shango zwine zwa nga mu sendedza tsini na Yehova kana u mu thusa u ponyoka musi hu tshi fheliswa Yerusalema. Hu nga ambiwa zwi fanaho na kha riṋe ṋamusi.
U Dzhiela Nṱha Zwithu Zwa Muya
18, 19. (a) Vhunzhi ha vhahura vhaṋu vha khou tambula nga mini, nahone ni fanela u ḓipfa hani malugana navho? (b) Ndi ngani vhathu vhanzhi vha sa pfi nḓala ya muya?
18 Naa no no vhona zwifanyiso zwa vhana vha re mashangoni hu re na nḓala kha zwirathisi zwa mafhungo? Arali zwo ralo, ni nga vha no vha pfela vhuṱungu vhukuma. Naa ni a pfela vhuṱungu vhahura vhaṋu nga nḓila i fanaho? Ndi ngani ni tshi fanela u vha pfela vhuṱungu? Nga uri vhunzhi havho vha khou fa nga nḓala. Vha khou tambula nga nḓala yo porofitiwaho nga Amosi musi a tshi ri: “Ḓivhani-ha , hu amba Muṋe wa vhoṱhe Yehova, hu ḓo ḓa maḓuvha, ane kha shango nda ḓo ruma nḓala, i si nḓala ya vhuswa, ḽi si ḓora ḽa maḓi; hu ḓo lilwa u pfa fhungo ḽa Yehova, vha si ḽi wane.”—Amosi 8:11.
19 Ndi ngoho uri vhunzhi ha vhathu vhane vha khou fa nga nḓala ya muya a vha “ṱhogomeli ṱhoḓea dzavho dza muya.” (Mateo 5:3, NW) Vhanzhi a vha pfi nḓala ya muya. Vhaṅwe vha nga pfa u nga ri vho fushea vhukuma. Fhedzi arali zwo ralo, ndi nga ṅwambo wa uri vha khou ḓifusha nga “vhuṱali ha shango,” vhune ha katela zwithu zwi vhonalaho, mahumbulelwa a zwa saintsi, mihumbulo ya nga ha vhuḓifari, na zwiṅwe zwithu. Vhaṅwe vha humbula uri “vhuṱali” ha musalauno vhu ita uri pfunzo dza Bivhilini dzi si tsha vha tshifhingani. Naho zwo ralo, “shango ḽí songo ṱalukanya Mudzimu kha vhuṱali hawe nga vhuṱali haḽo.” Vhuṱali ha shango a vhu nga ḓo ni thusa u sendela tsini na Mudzimu. Vhu sokou vha “vhutsilu phanḓa ha Mudzimu.”—1 Vha-Korinta 1:20, 21; 3:19.
20. Ndi ngani zwi vhutsilu u ṱoḓa u edzisa vhathu vhane vha si rabele Yehova?
20 Musi ni tshi sedza kha zwenezwo zwifanyiso zwa vhana vha re na nḓala, naa ni a takalela u fana navho? Na khathihi! Fhedzi vhaṅwe vhaswa vha miṱani ya Vhakriste vho sumbedza lutamo lwa u ṱoḓa u fana na vhathu vhane vha khou fa nga nḓala vhane vha tshila navho. Zwi vhonala uri vhenevho vhaswa vha humbula uri vhaswa vha shango a vha na mbilaelo nahone vha ḓiphina nga vhutshilo. Vha a hangwa uri vhenevho vhaswa vho ḓifhambanya na Yehova. (Vha-Efesa 4:17, 18) Vha dovha vha hangwa nga ha mvelelo mmbi dza u fa nga nḓala ya muya. Dziṅwe dzadzo ndi u vhifha muvhilini hu sa ṱoḓei ha vhaswa vha miṅwahani ya vhufumi na mvelelo dza ṋama na dza maḓipfele dza u ḓifara luvhi, u daha fola, u kambiwa, na u shumisa luvhi zwidzidzivhadzi. U fa nga nḓala ya muya zwi bveledza muya wa vhuravhele, u sa vha na fulufhelo, na u sa vha na buḓo vhutshiloni.
21. Ri nga ḓitsireledza hani uri ri sa ṱanganedze mavhonele o khakheaho a vhathu vha sa gwadameli Yehova?
21 Nga zwenezwo, musi ni tshikoloni vhukati ha vhane vha si vhe vhagwadameli vha Yehova, ni songo tenda u langiwa nga mavhonele avho. (2 Vha-Korinta 4:18) Vhaṅwe vha ḓo amba nga zwithu zwa muya nga nḓila ya lunyadzo. Zwiṅwe hafhu, zwirathisi zwa mafhungo zwi nga bveledza mafhungo a vhufhura, a ambaho uri u ḓifara luvhi, u kambiwa, kana u shumisa luambo lwo tshikafhalaho a zwo ngo khakhea. Ilwani na yeneyo ṱhuṱhuwedzo. Bvelani phanḓa ni tshi ṱanganela tshifhinga tshoṱhe na vhathu vha re na ‘lutendo na luvalo lwavhuḓi.’ Tshifhinga tshoṱhe “ni simese u shuma mushumo wa Mudzimu hoṱhe.” (1 Timotheo 1:19; 1 Vha-Korinta 15:58) Dzulani no farakanea Holoni ya Muvhuso na tshumeloni ya tsimu. Miṅwahani yaṋu musi ni tshikoloni, ṱanganelani kha tshumelo ya vhuvulanḓila ha u thusa tshifhinga tshoṱhe. Khwaṱhisani mavhonele aṋu a muya nga yeneyi nḓila, nahone ni ḓo dzula no khwaṱha.—2 Timotheo 4:5.
22, 23. (a) Ndi ngani vhaswa vha Vhakriste kanzhi vha tshi ita phetho dzine vhaṅwe vha sa kone u dzi pfesesa? (b) Vhaswa vha ṱuṱuwedzelwa u ita mini?
22 Mavhonele a zwithu a muya a ḓo ita uri ni ite phetho dzine vhaṅwe vhathu vha sa dzi pfesese. Sa tsumbo, muṅwe muṱhannga wa Mukriste o vha e ramuzika o ṋewaho nahone o vha a tshi phasa nga maraga dza nṱha kha thero dzoṱhe tshikoloni. Musi a tshi fhedza tshikolo, o ṱanganela na khotsi awe kha mushumo wa u kunakisa mafasiṱere u itela uri a kone u dzhenela buḓo ḽa u vha muhuweleli wa tshifhinga tshoṱhe, kana muvulanḓila. Vhadededzi vhawe a vho ngo vhuya vha pfesesa zwiitisi zwa phetho yawe, fhedzi arali no sendela tsini na Yehova, ri na vhungoho ha uri ni a pfesesa.
23 Musi ni tshi khou humbula nga ha nḓila ine na nga shumisa ngayo vhuswa haṋu vhune ha vha ha ndeme, ‘ḓi-kuvhanganyeleni zwiné zwa ḓo ita thikho yavhuḓi ya matshelo, uri ni wane vhutshilo vhu re vhutshilo nangoho.’ (1 Timotheo 6:19) Ḓiimiseleni u ‘humbula Muvhumbi waṋu Muhulwane’ ni tshee muswa—na vhutshiloni haṋu hoṱhe. Yeneyo ndi yone nḓila i yoṱhe ya u fhaṱa vhumatshelo vhu bvelelaho, vhumatshelo vhu sa fheli.
[Mbudziso Dza Pfunzo]
Ni Nga Ri Mini?
• Ndi nyeletshedzo ifhio yo hevhedzwaho ine ya thusa vhaswa musi vha tshi khou dzudzanya vhumatshelo?
• Ndi dzifhio dziṅwe nḓila dzine vhaswa vha nga ‘sendela tsini na Mudzimu’ ngadzo?
• Ndi dzifhio dziṅwe phetho dzine muswa a nga dzi ita dzine dza ḓo kwama vhumatshelo hawe?
[Zwifanyiso kha siaṱari 15]
Naa ni ḓo tendela zwithu zwine na zwi ṱoḓa zwi tshi ni ḽela maanḓa na mafulufulu zwaṋu zwoṱhe zwa vhuswa?
[Tshifanyiso kha siaṱari 17]
Vhaswa vho ṱalifhaho vha Vhakriste vha dzula vha tshi khou humbula nga zwithu zwa muya