Nḓila Ya U Wana Vhutshilo Vhulapfu Na Vhu Takadzaho

“MUTHU muṅwe na muṅwe u ṱoḓa u bvela phanḓa a tshi khou tshila; fhedzi a huna ane a ṱoḓa u vha mulala.” Hezwi ndi zwine vhaṅwe vha amba. Vhathu vhanzhi musi vhe tsini na maḓuvha a vhuawelo vha vha vho takalela u ri vha ḓo vha na zwifhinga zwi takadzaho na vhuḓifhinduleli vhuṱuku. Fhedzi, vha ofha u sa tsha vha na ndivho na u fhelelwa nga ndeme. Vha dovha vha ofha u fhedza tshifhinga vhe vhoṱhe, vha songo takala, na u vha na mutakalo u si wavhuḓi.

Tshiphiri tsha vhutshilo vhu takadzaho ndi tshifhio? U vha na khonani dzavhuḓi na muṱa u re na lufuno zwi a thusa u ita uri muswa na o no vhaho mualuwa vha takale. Fhedzi zwine vhaṅwe vha zwi ita u itela u ri vhutshilo ha mualuwa vhu takadze a si zwone fhedzi zwa ndeme. Zwa ndeme vhukuma zwi dovha zwa vha zwine vhaaluwa vha zwi itele vhaṅwe.

Ngudo ya tshifhinga tshilapfu ya vhavhingani vha vhaaluwa vha 423 yo sumbedza uri “u thusa vhaṅwe vhathu zwi nga thusa u engedza vhutshilo hashu.” Stephanie Brown, we a ita yeneyo ngudo, u ri: “Heyi ngudo i sumbedza uri a si zwine ra zwi wana kha vhushaka hashu na vhaṅwe zwine zwa ri vhuyedza; fhedzi ndi zwine ra zwi ṋea.” U ṋea ho raloho hu nga katela u thusa vhaṅwe nga mushumo wa hayani, u ṱhogomela vhana, u rumiwa nga vhaṅwe, u thusa vhaṅwe nga tshiṋamelwa, kana u thetshelesa muṅwe muthu ane a khou ṱoḓa u amba.

Miṅwahani i ṱoḓaho u vha 2000 yo fhelaho, Yesu Kristo o ri: “Mashudu a muṋei a fhira a muṋeiwa.” (Mishumo 20:35) U wana vhutshilo vhulapfu na vhu takadzaho a zwi ḓitiki nga u vha na tshelede nnzhi banngani, kana ngalafho dza u lwa na vhulala na zwiḽiwa. Nṱhani hazwo, zwi ḓitika nga u bvela phanḓa ro khwaṱha na u ṋekedza tshifhinga tshashu, na maanḓa u itela u khwaṱhisa vhutshilo ha vhaṅwe.

Naho zwo ralo, hu ḓo ṱoḓea zwi fhiraho zwenezwo u itela u tshidzwa kha vhulala, malwadze, na lufu. Ndi Muvhuso wa Mudzimu fhedzi une wa ḓo fhelisa zwenezwo zwithu. Nga fhasi ha vhuvhusi hawo, malwadze a ḓo vha e si tsheeho, na “lufu a lu tsha ḓo vha hone.” (Ndzumbululo 21:3, 4; Yesaya 33:24) Zwi re zwone ndi uri vhathu vha thetshelesaho vha ḓo tshila tshoṱhe vho takala ḽifhasini ḽa paradiso. (Luka 23:43) Ṱhanzi dza Yehova vha takalela u ṋea vhaṅwe thuso i bvaho Bivhilini ya u wana vhutshilo vhulapfu na vhu takadzaho.