U Ṱhogomela Vhalala—Ndi Vhuḓifhinduleli Ha Vhakriste
U Ṱhogomela Vhalala—Ndi Vhuḓifhinduleli Ha Vhakriste
“Ni ḓo vhuya na kalaha ndi tshi ḓi ralo; ndi ḓo ḓi ni hwala na vhuya na tshena mmvi.”—YESAYA 46:4.
1, 2. Nḓila ine Khotsi ashu wa ṱaḓulu a ṱhogomela ngayo yo fhambana hani na ya vhabebi?
VHABEBI vho ḓikumedzaho vha alusa vhana vhavho u bva hanani u vhuya u swika vha tshi vha miṅwahani ya vhufumi. Naho musi vhaswa vha tshi vha vhahulwane nahone vha vha na miṱa yavho, khotsi na mme avho vha bvela phanḓa vha tshi vha ṱhogomela na u vha tikedza nga lufuno.
2 Naho hu na mukano kha zwine vhathu vha nga zwi itela vhana vhavho, Khotsi ashu wa ṱaḓulu tshifhinga tshoṱhe u a kona u ṱhogomela na u thusa nga lufuno vhashumeli vhawe vha fulufhedzeaho. A tshi amba na vhathu vhawe vho nangiwaho vha zwifhingani zwa kale, Yehova o ri: “Ni ḓo vhuya na kalaha ndi tshi ḓi ralo; ndi ḓo ḓi ni hwala na vhuya na tshena mmvi.” (Yesaya 46:4) Enea ndi maipfi a khwaṱhisaho lungafhani kha vhalala vha Vhakriste! Yehova ha laṱi vhane vha dzula vha tshi fulufhedzea khae. Nṱhani hazwo, u fulufhedzisa u vha tikedza, u vha thusa, na u vha livhisa vhutshiloni havho hoṱhe, u vhuya u swika vha tshi vha vhalala.—Psalme ya 48:14.
3. Ndi zwifhio zwine zwa ḓo ṱhogomelwa kha ino thero?
3 Ri nga edzisa hani Yehova ane a ṱhogomela vhalala nga lufuno? (Vha-Efesa 5:1, 2) Kha ri ṱhogomele nḓila dzine vhana vho no aluwaho, vhalavhelesi vha tshivhidzo, na Vhakriste nga muthihi vha nga ṱhogomela ngadzo ṱhoḓea dza miraḓo ya vhalala vha vhushaka hashu ha shango ḽoṱhe.
Vhuḓifhinduleli Hashu Sa Vhana
4. Ndi vhuḓifhinduleli vhufhio vhune vhana vha Vhakriste vha vha naho kha vhabebi vhavho?
4 “Hulisa khotsi-au na mme-au.” (Vha-Efesa 6:2; Ekisodo 20:12) Nga wonoyu muredzo wo livhaho na u re wa ndeme u bvaho Maṅwaloni a Tshiheberu, muapostola Paulo o vha a tshi khou humbudza vhana nga vhuḓifhinduleli vhune vha vha naho kha vhabebi vhavho. Fhedzi enea maipfi a nga shuma hani kha u ṱhogomela vhalala? Tsumbo i ṱuṱuwedzaho ya Mukriste wa zwifhingani zwa nga phanḓa i ḓo ri thusa u fhindula yeneyi mbudziso.
5. (a) Ndi mini zwine zwa sumbedza uri Yosefa ho ngo hangwa vhuḓifhinduleli ha muṱa wahawe? (b) Zwi amba mini u hulisa vhabebi vhashu, nahone ndi tsumbo ifhio yavhuḓi ye Yosefa a i vhea malugana na zwenezwi?
5 Yosefa o fhedza miṅwaha ya 20 a sa vhoni khotsi awe vha mulala, Yakobo ane a vha musimulalushaka. Naho zwo ralo, zwi khagala uri Yosefa o dzula a tshi funa Yakobo. Zwi re zwone ndi uri musi Yosefa a tshi ḓidzumbulula zwine a vha zwone zwa vhukuma kha vhakomana vhawe, o vhudzisa a ri: “Khotsi-anga u kha ḓi tshila-naa?” (Genesi 43:7, 27; 45:3) Nga tshenetsho tshifhinga, ho vha hu na nḓala shangoni ḽa Kanana. Nga zwenezwo Yosefa a rumela mulaedza kha khotsi awe, a ri: “Pfulutshela ngeno ha nṋe, U songo tsha lenga! U ḓo dzula shangoni ḽa Goseni, wa vha tsini na nṋe. . . . Ndi ḓo U fha zwiḽiwa Ú henefhano.” (Genesi 45:9-11; 47:12) Ee, u hulisa vhabebi vha vhalala zwi katela u vha tsireledza na u vha tikedza nga zwithu zwi vhonalaho musi vhe vhuimoni vhune vha si kone u ḓiṱhogomela. (1 Samuele 22:1-4; Yohane 19:25-27) Yosefa o ṱanganedza nga u ḓifunela honovhu vhuḓifhinduleli.
6. Yosefa o zwi sumbedza hani uri u a funa khotsi awe zwa vhukuma, nahone ri nga edzisa hani tsumbo yawe?
6 A tshi thuswa nga Yehova, Yosefa o vha muṅwe wa vhathu vho pfumesaho na vha re na maanḓa vhukuma ngei Egipita. (Genesi 41:40) Fhedzi ho ngo ḓidzhiela nṱha nga maanḓa kana u farakanea lune a si kone u hulisa khotsi awe wa mulala vhe vha vha vhe na miṅwaha ya 130. Musi a tshi ṱhogomela uri Yakobo (kana Isiraele) u khou ḓa, “a mbo vhofha goloi yawe a yo’ ṱanganedza khotsi-awe henengei kha ḽa Goseni. A tshi mu vhona a mu kuvhatedza, a lila a fhedza tshifhinga ó mu kuvhatedza.” (Genesi 46:28, 29) U ṱanganedza nga u ralo ho vha hu tshi fhira u ṱhonifha ho ḓoweleaho. Yosefa o vha a tshi funa khotsi awe wa mulala nahone o vha a sa shoni u sumbedza lufuno lwawe. Arali ri na vhabebi vha vhalala, naa na riṋe ri a zwi sumbedza nga u ḓifunela uri ri a vha funa?
7. Ndi ngani Yakobo o vha a tshi khou ṱoḓa u vhulungwa ngei Kanana?
7 U ḓikumedza ha Yakobo kha Yehova ho dzula ho khwaṱha u vhuya u swika a tshi fa. (Vha-Heberu 11:21) Nga ṅwambo wa u vha hawe na lutendo kha mafulufhedziso a Mudzimu, Yakobo o humbela uri a vhulungwe ngei Kanana. Yosefa o hulisa khotsi awe nga u tendelana na yeneyo khumbelo, hu sa londwi tshinyalelo na vhuḓidini zwine zwa katelwa.—Genesi 47:29-31; 50:7-14.
8. (a) Ndi tshiitisi tshifhio tshihulwane tsha u ṱhogomela vhabebi vha vhalala? (b) Ndi mini zwe muṅwe mushumeli wa tshifhinga tshoṱhe a zwi ita u itela u ṱhogomela vhabebi vhawe vha vhalala? (Sedzani bogisi kha siaṱari 17.)
8 Ndi mini tsho ṱuṱuwedzaho Yosefa uri a ṱhogomele khotsi awe? Naho lufuno na u ḓipfa a tshi koloda u livhuha we a mu ṋea vhutshilo na we a mu alusa zwo vha zwi zwiitisi, a zwi timatimisi uri Yosefa o dovha a ḓipfa e na lutamo luhulwane lwa u takadza Yehova. Na riṋe ri fanela u ḓipfa nga u ralo. Paulo o ṅwala a ri: “Arali tshilikadzi í na vhana na vhaḓuhulu, havho tshihulu-hulu nga vha ḓi-funze u vha vha ofhaho Mudzimu nḓuni dzavho vhone vhaṋe, vha tevhedze-vho zwe vha tondiwa nga vhabebi vhavho, ngauri ndi zwone zwi takalelwaho nga Mudzimu.” (1 Timotheo 5:4) I ngoho, u funa Yehova na u vha na nyofho dza u mu ṱhonifha zwi ḓo ri sudzulusela u ṱhonifha vhabebi vha re vhalala, hu sa londwi vhuleme naho vhu vhufhio. *
Nḓila Ine Vhahulwane Vha Sumbedza Ngayo Uri Vha A Ṱhogomela
9. Ndi vhafhio vhe Yehova a vha khetha uri vha vhe vhalisa vha sambi, u katela na Vhakriste vha vhalala?
9 Musi vhutshilo hawe vhu tsini na u fhela, Yakobo o ambela kha Yehova sa ‘Mudzimu we a vha mulisa wawe tshee a bebwa u swika ḓuvha ḽa ṋamusi.’ (Genesi 48:15) Ṋamusi, Yehova u lisa vhashumeli vhawe a tshi shumisa vhalavhelesi vha Vhakriste, kana vhahulwane, nga fhasi ha vhulivhisi ha Murwa wawe, Yesu Kristo, “Mulisa muhulu.” (1 Petro 5:2-4) Vhalavhelesi vha nga edzisa hani Yehova musi vha tshi khou ṱhogomela miraḓo ya sambi ya vhalala?
10. Ho itwa mini u itela u ṋea vhalala vha Vhakriste thuso ya zwithu zwi vhonalaho? (Sedzani bogisi kha siaṱari 19.)
10 Nga murahunyana ha u thoma ha tshivhidzo tsha Vhukriste, vhaapostola vho khetha “vhanna vhaṱanu-na-vhavhili . . . vho ḓalaho Muya-mukhethwa na vhuṱali” u itela u lavhelesa u “kovhekanywa ha ḓuvha ḽiṅwe na ḽiṅwe” ha zwiḽiwa kha tshilikadzi dza Vhakriste dzi shayaho. (Mishumo 6:1-6, vhambedzani NW.) Nga murahu, Paulo o eletshedza Timotheo ane a vha mulavhelesi uri a vhee tshilikadzi dzo aluwaho dzine dza vha tsumbo kha mutevhe wa vhane vha fanelea u wana thuso ya zwithu zwi vhonalaho. (1 Timotheo 5:3, 9, 10) Nga hu fanaho, ṋamusi vhalavhelesi vha tshivhidzo vha dzudzanya u ṋea thuso i shumaho nga u ḓifunela kha Vhakriste vha vhalala musi zwenezwo zwi tshi ṱoḓea. Naho zwo ralo, hu katelwa zwo engedzeaho kha u ṱhogomela vhalala vha fulufhedzeaho.
11. Ndi mini zwe Yesu a zwi amba nga ha tshilikadzi i shayaho ye ya posa muṋeelo muṱuku?
11 Mafheloni a vhuḓinḓa hawe ha kha ḽifhasi, Yesu o dzula thembeleni nahone “a vhona maitele a vhathu vha tshi khou longa mali mbulungeloni.” Nga zwenezwo muṅwe muthu a kokodza ṱhogomelo yawe. Mafhungo a ri: “Ha ḓa tshilikadzi ya mutshinyali a longa zwikwati zwivhili zwiné vhuvhili hazwo zwa ita peni nthihi.” Yesu a vhidza vhafunziwa vhawe nahone a amba navho a ri: “Ngoho, ndi a ni vhudza iyi tshilikadzi ya mutshinyali afha mbulungeloni yo longa zwi fhiraho zwe vhoṱhe vha longa. Ngauri vhone vho longa vhoṱhe zwe vha ṱusa kha zwo ḓalaho; uyu musadzi ene o bvisa hu sí na tshithu. O longa zwoṱhe zwiné a vha nazwo’, zwiḽiwa zwawe zwoṱhe.” (Marko 12:41-44) Malugana na tshelede yo bviswaho, muṋeelo wa tshilikadzi wo vha u muṱuku, fhedzi Yesu o vha a tshi ḓivha nḓila ine Khotsi awe wa ṱaḓulu a dzhiela ngayo nṱha wonoyo musumbedzo wa u ḓikumedza u bvaho mbiluni. Hu sa londwi u shaya ha tshilikadzi ya mulala, Yesu ho ngo dzhiela fhasi zwe a zwi ita.
12. Vhahulwane vha nga sumbedza hani u livhuha thikhedzo ine ya itwa nga Vhakriste vha vhalala?
12 U fana na Yesu, vhalavhelesi vha Vhakriste a vha dzhieli fhasi zwine vhalala vha zwi ita u itela u tikedza vhurabeli ha ngoho. Vhahulwane vha na tshiitisi tsha u khoḓa vhalala nga u ṱanganela havho vhuḓinḓani, miṱanganoni, na u vha havho na ṱhuṱhuwedzo yavhuḓi tshivhidzoni, na u konḓelela havho. Maipfi a u ṱuṱuwedza a nga thusa vhalala u wana “dakalo” tshumeloni yavho khethwa, nga zwenezwo zwa ita uri vha si kulee nungo nga u vhambedza zwine vhaṅwe Vhakriste vha kona u zwi ita kana zwe vhone vhaṋe vha vha vha tshi kona u zwi khunyeledza tshifhingani tsho fhiraho.—Vha-Galata 6:4.
13. Ndi nga nḓila dzifhio dzine vhahulwane vha nga vhuyelwa nga vhukoni na tshenzhelo zwa vhalala?
13 Vhahulwane vha nga dzhiela nṱha thikhedzo ya ndeme ine ya itwa nga Vhakriste vha vhalala nga u shumisa zwe vha ṱangana nazwo vhutshiloni na vhukoni havho. Vhalala vha re tsumbo vha nga shumiswa zwifhinga zwoṱhe kha misumbedzo kana khaseledzo. Muṅwe muhulwane o ri: “Vhathetshelesi vha ṱhogomela na u thetshelesa nga vhuronwane musi ndi tshi haseledza na vhahashu vha tshinnani na vha tshisadzini vha vhalala vhe vha alusela vhana ngohoni.” Muhulwane wa tshiṅwe tshivhidzo o vhiga uri muvulanḓila wa tshisadzini a re na miṅwaha ya 71 o bvelela kha u thusa vhahuweleli vha Muvhuso u vha hone tshumeloni ya tsimu tshifhinga tshoṱhe. O dovha a vha thusa u ita “zwithu zwa ndeme,” zwi ngaho u vhala Bivhili na ndimana ya ḓuvha ḽiṅwe na ḽiṅwe na u elekanya nga zwine vha zwi vhala.
14. Muṅwe wa tshigwada tsha vhahulwane o sumbedza hani u dzhiela nṱha mulavhelesi ngae wa mulala?
14 Vhahulwane vha dovha vha dzhiela nṱha thikhedzo ya vhalavhelesi ngavho vha vhalala. José, ane a vha miṅwahani ya vhu-70 na o no fhedzaho miṅwaha ya mahumi e muhulwane, zwenezwino o itwa muaro muhulwane. Musi a tshi khou dzhia tshifhinga tshilapfu u ri a fhole, a humbula u litsha ndugelo yawe ya u vha mulavhelesi wa tshivhidzo. José u ri: “Maaravhele a vhaṅwe vhahulwane o mmangadza. Nṱhani ha uri vha ṱanganedze zwe nda amba, vho vhudzisa uri ndi thuso ifhio ye nda vha ndi tshi khou i ṱoḓa u itela u bvela phanḓa ndi tshi ṱhogomela vhuḓifhinduleli hanga.” Nga thikhedzo ya vhahulwane kha ḓi vhaho vhaswa, José o kona u bvela phanḓa o takala e mulavhelesi, nahone zwenezwi zwo vhuyedza tshivhidzo. Muhulwane ngae o ri: “Tshivhidzo tshi a dzhiela nṱha vhukuma mushumo wa José wa u vha muhulwane. Vha a mu funa na u mu ṱhonifha nga ṅwambo wa tshenzhelo na tsumbo yawe ya lutendo. U a vhuyedza tshivhidzo tshashu.”
U Ṱhogomelana
15. Ndi ngani Vhakriste vhoṱhe vha tshi fanela u vhilaelela mutakalo wa vhalala vha re vhukati havho?
15 A si vhana fhedzi vha re na vhabebi vha vhalala na vhashumeli vho vhewaho vhane vha fanela u vhilaelela nga ha vhalala. A tshi vhambedza tshivhidzo tsha Vhukriste na muvhili wa muthu, Paulo o ṅwala a ri: “Ndi Mudzimu we a ṱanganyanya muvhili, muraḓo wo ṱahelelwaho a ri u simese u huliswa, Hu u ri hu sa ḓo vha na u ṱalula kha muvhili, aiwa, miraḓo i vhilaele tshithu tshithihi, i tshi vhavhalelana.” (1 Vha-Korinta 12:24, 25) U itela uri tshivhidzo tsha Vhukriste tshi shume nga vhuthihi, muraḓo muṅwe na muṅwe u fanela u vhilaelela nga ha mutakalo wa vhatendi ngae, u katela na vhalala.—Vha-Galata 6:2.
16. Ri nga sumbedza hani dzangalelo kha vhalala musi ri miṱanganoni ya Vhukriste?
16 Miṱangano i ri ṋea tshibuli tshavhuḓi tsha u sumbedza dzangalelo ḽashu kha vhalala. (Vha-Filipi 2:4; Vha-Heberu 10:24, 25) Naa ri a ḓiṋea tshifhinga tsha u amba na vhalala nga zwenezwo zwiitea? Naho zwi tshi nga vha zwavhuḓi u vhudzisa nga ha mutakalo wavho wa ṋama, naa ri nga ‘ṅwatela zwifhiwa zwa Muya,’ khamusi nga u amba zwe ra ṱangana nazwo zwi khwaṱhisaho kana zwi re Maṅwaloni. Samusi vhalala vha nga si kone u tsa nṱha na fhasi, zwi ḓo vha zwavhuḓi uri ri ye khavho nṱhani ha uri ri vha lavhelele uri vha ḓe kha riṋe. Arali vhe na vhuleme ha u pfa, ri nga tea uri ri ambe nga u ongolowa nahone zwavhuḓi. Nahone arali ri tshi ṱoḓa u “ṱuṱuwedzana” zwa vhukuma, ri fanela u thetshelesa nga vhuronwane zwine mulala a khou zwi amba.—Vha-Roma 1:11, 12.
17. Ri nga sumbedza hani u vhilaelela vhalala vha Vhakriste vha sa koni u bva hayani?
17 Hu pfi mini arali vhaṅwe vhalala vha sa koni u ḓa miṱanganoni ya Vhukriste? Yakobo 1:27 i sumbedza uri ndi vhuḓifhinduleli hashu ha “u londola zwisiwana na dzitshilikadzi vhuṱunguni havho.” Muṅwe mubulo wa ḽiiti ḽa Lugerika ḽo ṱalutshedzelwaho nga uri “u londola” u amba “u dalela.” (Mishumo 15:36) Nahone vhalala vha a livhuha vhukuma u vha dalela hashu! Musi o valelwa khothoni ngei Roma hu ṱoḓaho u vha 65 C.E., Paulo wa “mukalaha” o vha e eṱhe. O vha o ṱulutshelwa u vhona mushumi ngae Timotheo nahone a ṅwala a ri: “Lusa u ṱavhanya u ḓa ha nṋe.” (Filemoni 9; 2 Timotheo 1:3, 4; 4:9) Naho vhe si zwivhotshwa, vhaṅwe vhalala a vha koni u bva hayani nga ṅwambo wa vhuleme ha mutakalo. Zwi re zwone ndi uri vha nga vha vha tshi khou ri ‘Ndi khou humbela uri ni ite zwine na kona u itela uri ni ḓe ni nndalele nga u ṱavhanya.’ Naa ri khou aravha yeneyo khumbelo?
18. Ndi mbuyelo dzifhio dzine dza nga vha hone nga u dalela vhalala?
18 Ni songo vhuya na dzhiela fhasi mvelelo dzi vhuyedzaho dza u dalela vhahashu vha muya vha tshinnani na vha tshisadzini vha vhalala. Musi Mukriste ane a pfi Onesiforo e ngei Roma, o ṱoḓa Paulo nga maṱo matswuku, a mu wana, nahone nga murahu ‘a mu netulusa lunzhi.’ (2 Timotheo 1:16, 17) Muṅwe mulala wa tshisadzini o ri: “Ndi takalela u fhedza tshifhinga na vhaswa. Zwine nda zwi funa nga maanḓa ndi zwa uri vha nndzhia ndi muraḓo wa muṱa wahavho. Zwi a nṱuṱuwedza vhukuma.” Muṅwe Mukriste wa mulala o ri: “Ndi a livhuha vhukuma musi muṅwe muthu a tshi nthumela garaṱa, a tshi nrwela luṱingo lwa mimunithi i si gathi, kana u dalelwa lwa tshifhinganyana. Zwi a homolosa vhukuma.”
Yehova U Lambedza Vhane Vha Ṱhogomela
19. Ndi phaṱhutshedzo dzifhio dzine dza vha hone nga u ṱhogomela vhalala?
19 U ṱhogomela vhalala zwi bveledza mbuyelo nnzhi. U konana na vhalala na u kona u shumisa nḓivho na tshenzhelo zwavho ndi tshibuli tsho khetheaho. Vhathu vhane vha ṱhogomela vhalala vha tshenzhela dakalo ḽihulwane ḽine ḽa vha hone nga u ṋea, u katela na mishumo na mulalo wa nga ngomu wa u ḓadzisa vhuḓifhinduleli ha Maṅwalo. (Mishumo 20:35) Zwiṅwe hafhu, vhane vha ṱhogomela vhalala a vho ngo fanela u ofha uri vhone vhaṋe vha ḓo litshelelwa musi vha tshi vha vhalala. Ipfi ḽa Mudzimu ḽi ri khwaṱhisedza u ri: “Mbilu ya mutondi i ḓo khwaṱha; mu-kela-vhaṅwe u ḓo kelwa-vho.”—Mirero 11:25.
20, 21. Yehova u dzhia hani vhane vha ṱhogomela vhalala, nahone ri fanela u ḓiimisela u ita mini?
20 Yehova u lambedza vhana vha ofhaho Mudzimu, vhalavhelesi, na vhaṅwe Vhakriste vha ṱhogomelaho nga ṅwambo wa u ṱhogomela nga u ḓifunela ṱhoḓea dza vhatendi vha vhalala ngavho. Eneo mavhonele a tendelana na hoyu murero: “Mu-tonda-vhaṱoma o adzima Yehova; u ḓo mu fha zwe a ṋea vhaḽa.” (Mirero 19:17) Arali lufuno lu tshi ri ṱuṱuwedzela u tonda vhaṱoma na vha shayaho, Mudzimu u dzhia honoho u ṋea hu khadzimiso ine a ḓo i lifha nga phaṱhutshedzo. U dovha a ri lifhela nga ṅwambo wa u ṋea ṱhogomelo ya lufuno vhagwadameli nga riṋe vha vhalala, vhane vhanzhi vho ‘tshinyala nga lwa shango u tendani.’—Yakobo 2:5.
21 Mudzimu u ri lambedza nga mafunda lungafhani! Hezwi zwi katela vhutshilo vhu sa fheli. Kha vhashumeli vhanzhi vha Yehova, zwenezwo zwi ḓo amba vhutshilo vhu sa fheli ḽifhasini ḽa paradiso, hune ha ḓo fheliswa mvelelo dza tshivhi tsho mamelwaho nahone vhalala vha fulufhedzeaho vha ḓo ḓiphina nga u vusuluswa vha vha vhaswa. (Ndzumbululo 21:3-5) Musi ro lindela tshenetsho tshifhinga tsha u fhaṱutshedzwa, u nga ri ri nga bvela phanḓa ri tshi ḓadzisa vhuḓifhinduleli hashu ha Vhukriste ha u ṱhogomela vhalala.
[Ṱhaluso dzi re magumoni a siaṱari]
^ phar. 8 U itela u wana nyeletshedzo dzi shumaho nga ha nḓila ine na nga ṱhogomela ngayo vhabebi vha vhalala, sedzani Awake! ya ḽa 8 February, 1994, masiaṱari 3-10.
Ni Nga Fhindula Nga Uri Mini?
• Vhana vha nga hulisa hani vhabebi vha vhalala?
• Vhahulwane vha nga sumbedza hani u dzhiela nṱha miraḓo ya sambi ya vhalala?
• Mukriste muṅwe na muṅwe a nga ita mini u itela u sumbedza vhalala dzangalelo ḽa vhukuma?
[Mbudziso Dza Pfunzo]
[Bogisi kha siaṱari 17]
Musi Vhabebi Vha Wahashu Vha Tshi Ṱoḓa Thuso
Philip o vha e mufhaṱi wa u ḓifunela ngei Liberia nga 1999 musi a tshi pfa mafhungo a uri khotsi awe vha khou lwala vhukuma. O no vha na vhungoho ha uri mme awe vha ḓo kundelwa u sedzana na vhuimo nga vhone vhaṋe, a phetha u humela hayani u itela u dzudzanya ṱhogomelo ya ngalafho ya khotsi awe.
Philip u ri: “Zwo vha zwi sa leluwi u humela hayani, fhedzi nda pfa uri u ṱhogomela vhabebi vhanga ndi vhuḓifhinduleli hanga ha u thoma.” Nga murahu ha miṅwaha miraru, a pfulusela vhabebi vhawe muḓini wo teaho vhukuma nahone a tshi thuswa nga Vhakriste ngae vha henefho, a khwinisa nnḓu u itela u swikelela ṱhoḓea dza khotsi awe dzo khetheaho.
Zwino mme a Philip vho ḓilugisela zwavhuḓi u sedzana na vhuleme ha mutakalo wa khotsi awe wo kalulaho. Zwenezwino, Philip o kona u ṱanganedza thambo ya u vha mushumi wa u ḓifunela ofisini ya davhi ḽa Ṱhanzi dza Yehova ya ngei Macedonia.
[Bogisi kha siaṱari 19]
A Vho Ngo Dzhiela Fhasi Ṱhoḓea Dzawe
Musi Ada, ane a vha Mukriste wa miṅwaha ya 85 wa ngei Australia, a tshi kundelwa u bva hayani nga ṅwambo wa mutakalo wawe u si wavhuḓi, vhahulwane vha tshivhidzo vho ita ndugiselelo dza u mu thusa. Vho dzudzanya tshigwada tsha vhatendi ngae vhe vha vha tshi nga mu thusa. Vhenevha vhahashu vha tshinnani na vha tshisadzini vho takalela u ṱhogomela mishumo i fanaho na u kunakisa, u kuvha, u bika na u mu rengela zwiṅwe zwishumiswa.
Yeneyo thuso yo thomiwa miṅwahani i ṱoḓaho u vha ya fumi yo fhiraho. U swika zwino, Ṱhanzi dza Yehova ngae dza 30 dzo no thusa kha u ṱhogomela Ada. Vha dzulela u mu dalela, u mu vhalela khandiso dza Bivhili, u bvela phanḓa vha tshi mu vhudza nga ha mvelaphanḓa ya muya ya vhane vha vha tshivhidzoni, na u rabela nae tshifhinga tshoṱhe.
Muhulwane wa Mukriste wa henefho o ri: “Vhane vha ṱhogomela Ada vha zwi dzhia i ndugelo u mu thusa. Vhanzhi vho ṱuṱuwedzwa nga u shuma hawe nga u fulufhedzea kha mahumi a miṅwaha o fhiraho, nahone zwo vha zwi sa pfali uri vha dzhiele fhasi ṱhoḓea dzawe.”
[Tshifanyiso kha siaṱari 16]
Naa ri a zwi sumbedza nga u ḓifunela uri ri a funa vhabebi vha vhalala?
[Tshifanyiso kha siaṱari 18]
Vhoṱhe tshivhidzoni vha nga sumbedza u funa havho vhatendi ngavho vha vhalala