Vhalala—Miraḓo Ya Ndeme Ya Vhushaka Hashu Ha Vhukriste
Vhalala—Miraḓo Ya Ndeme Ya Vhushaka Hashu Ha Vhukriste
‘Vhó ṱavhiwaho nḓuni ya Yehova, vha a mela . . . Vha aṋwa naho vhó no vha vha maḓuvha.’—PSALME YA 92:13, 14.
1. Vhathu vhanzhi vha dzhia hani vhalala?
YEHOVA u funa vhashumeli vhawe vhoṱhe vha fulufhedzeaho, u katela na vhalala. Naho zwo ralo, u ya nga u anganyela ha muvhuso, vhalala vha ṱoḓaho u vha hafu ya milioni ngei United States vha a farwa luvhi kana u sa ṱhogomelwa ṅwaha muṅwe na muṅwe. Mivhigo i fanaho ya shangoni ḽoṱhe i sumbedza uri honoho u farwa luvhi ha vhalala ndi vhuleme ha khungulu yoṱhe. Ḽiṅwe dzangano ḽi ambela kha tshiitisi tsha honovhu vhuleme sa “mavhonele o ḓoweleaho kha vhathu vhanzhi . . .a uri vhalala a vha tsha vha vha ndeme, na uri a vha na thuso nahone vha ḓitika tshoṱhe nga thuso ya vhaṅwe.”
2. (a) Yehova u dzhia hani vhashumeli vhawe vha vhalala vha fulufhedzeaho? (b) Ndi ṱhaluso ifhio i takadzaho ine ra i wana kha Psalme ya 92:12-15?
2 Yehova Mudzimu u dzhiela nṱha vhashumeli vhawe vha vhalala vha fulufhedzeaho. U lavhelesa ‘muthu wa nga ngomu hashu’—vhuimo hashu ha muya—nṱhani ha vhushayanungo hashu ha ṋama. (2 Vha-Korinta 4:16) Ipfini ḽawe, Bivhili, ri wana khwaṱhisedzo i takadzaho i tevhelaho: “Muvhuya u ḓo naka vhunga mutshevho; u ḓo mela vhunga ṱhaululo thavhani ya Libanoni. Vhó ṱavhiwa nḓuni ya Yehova, vha mela vhé khoroni dza Mudzimu washu. Vha aṋwa naho vhó no vha vha maḓuvha, vha kulukusha vha tshi ṱuma lurere. Uri vha ḓivhadze uri: o lugaho ndi Yehova.” (Psalme ya 92:12-15) U ṱhogomela dzenedzi ndimana zwi ḓo dzumbulula masia a ndeme ane vhalala vha nga a ita kha vhushaka hashu ha Vhukriste.
“Vha Aṋwa Naho Vhó No Vha Vha Maḓuvha”
3. (a) Ndi ngani vhavhuya vha tshi vhambedzwa na mitshevho? (b) Vhalala vha nga “aṋwa naho vhó no vha vha maḓuvha” nga nḓila-ḓe?
3 Mupsalme o vhambedza muvhuya na mutshevho ‘wo ṱavhiwaho khoroni dza Mudzimu.’ Vha “aṋwa naho vhó no vha vha maḓuvha.” Naa a ni tendi zwa uri wonoyu ndi muhumbulo u ṱuṱuwedzaho? Mitshevho yavhuḓi, yo lapfaho yo vha yo ḓala dzikhoroni dza mashango a Vhubvaḓuvha a Bivhilini. Nga nnḓa ha ndeme yayo ya u khavhisa, mitshevho yo vha i tshi dzhielwa nṱha nga ṅwambo wa u aṋwa hayo mitshelo minzhi, hune miṅwe yayo ya bvela phanḓa i tshi aṋwa miṅwaha i fhiraho ḓana. * Nga u dzula no khwaṱha vhurabelini ha ngoho, na inwi nga hu fanaho ni ḓo vha “na zwiaṋwiwa kha mishumo mivhuya yoṱhe.”—Vha-Kolosa 1:10.
4, 5. (a) Ndi zwiaṋwiwa zwifhio zwa ndeme zwine Vhakriste vha fanela u zwi aṋwa? (b) Ṋeani tsumbo dza Maṅwalo dza vhalala vhe vha aṋwa “zwiaṋwiwa zwa milomo.”
4 Yehova u lavhelela uri Vhakriste vha aṋwe “zwiaṋwiwa zwa milomo”—maipfi ane a ambiwa u itela u renda ene na ndivho dzawe. (Vha-Heberu 13:15) Naa zwenezwi zwi a shuma kha inwi samusi ni mulala? Ee, zwi a shuma.
5 Bivhili i na tsumbo dza vhalala vhe vha ṱanziela nga tshivhindi nga dzina ḽa Yehova na ndivho dzawe. Mushe o vha o no vha na ‘miṅwaha ya mahumi maṱanu na mavhili’ musi Yehova a tshi mu ruma uri a vhe muporofita na muimeleli wawe. (Psalme ya 90:10; Ekisodo 4:10-17) U vha mulala a zwo ngo thivhela muporofita Daniele uri a si ṋee vhuṱanzi nga tshivhindi malugana na vhuvhusahoṱhe ha Yehova. Zwi vhonala uri Daniele o vha e miṅwahani ya vhu-90 musi Belesatsara a tshi mu humbela uri a ṱalutshedzele muṅwalo u songo ḓoweleaho we wa vha u kha luvhondo. (Daniele, ndima 5) Nahone hu pfi mini nga muapostola Yohane wa mulala? Mafheloni a vhutshilo hawe ha u shuma nga u fulufhedzea, o valelwa tshiṱangadzimeni tsha Patimo ‘nge a amba fhungo ḽa Mudzimu na vhuṱanzi ha Kristo.’ (Ndzumbululo 1:9) Zwi tou vha khagala uri ni nga humbula nga vhaṅwe vhabvumbedzwa vhanzhi vha Bivhilini vhe vha aṋwa “zwiaṋwiwa zwa milomo” miṅwahani yavho ya u fhedza.—1 Samuele 8:1, 10; 12:2; 1 Dzikhosi 14:4, 5; Luka 1:7, 67-79; 2:22-32.
6. Yehova u shumisa hani “vhahulwane” u itela u porofita kha enea maḓuvha a vhufhelo?
6 A tshi amba nga muporofita Yoele wa Muheberu, muapostola Petro o ri: “Zwine zwa ḓo vha hone misi ya vhufhelo ngezwi: Mudzimu u ri ndi ḓo shulula Muya wanga kha ṋama yoṱhe [u katela na “vhahulwane”];. . . vha ḓo porofita.” (Mishumo 2:17, 18; Yoele 2:28) Ngauralo, kha enea maḓuvha a vhufhelo, Yehova u shumisa miraḓo ya tshigwada tsho ḓodzwaho ya vhalala na “dziṅwe nngu” u ḓivhadza ndivho dzawe. (Yohane 10:16) Vhaṅwe vha vhenevha vho aṋwa nga u fulufhedzea zwiaṋwiwa zwa Muvhuso mahumi a miṅwaha.
7. Sumbedzani nḓila ine vhalala vha nga bvela ngayo phanḓa vha tshi aṋwa zwiaṋwiwa zwa Muvhuso hu sa londwi vhushayanungo ha ṋama.
7 Ṱhogomelani Sonia, we a vha muhuweleli wa Muvhuso wa tshifhinga tshoṱhe u bva nga 1941. Hu sa londwi u lwisana hawe na vhulwadze vhu sa fholi lwa tshifhinga tshilapfu, u fara pfunzo dza Bivhili muḓini wawe tshifhinga tshoṱhe. Sonia u ri: “U huwelela mafhungo maḓifha ndi tshipiḓa tsha vhutshilo hanga. Zwi re zwone ndi uri ndi vhutshilo hanga. A thi ṱoḓi u litsha u huwelela.” Zwenezwino, Sonia na mukomana wawe, Olive vho amba nga mulaedza wa fulufhelo u re Bivhilini na Janet, we a vha a tshi khou lwala lu isaho lufuni we vha ṱangana nae vhuongeloni musi o lindela u vhona dokotela. Mme a Janet, vhane vha vha Mukatolika o ḓikumedzaho, vho takadzwa vhukuma nga dzangalelo ḽa lufuno ḽo sumbedzwaho ṅwananyana wavho lwe vha tenda u vha na pfunzo ya Bivhili ya hayani nahone vha ita mvelaphanḓa khulwane. Naa ni nga shumisa zwibuli zwi fanaho u itela u aṋwa zwiaṋwiwa zwa Muvhuso?
8. Kalebe wa mulala o sumbedza hani u fulufhela hawe Yehova, nahone Vhakriste vha vhalala vha nga edzisa hani tsumbo yawe?
8 Nga u bvela phanḓa nga tshivhindi mushumoni wa u huwelela Muvhuso hu sa londwi vhushayanungo ha u vha mulala, Vhakriste vha vhalala vha tevhela tsumbo ya Kalebe Muisiraele a fulufhedzeaho, we a ṱuwa na Mushe sogani miṅwaha ya mahumi maṋa. Kalebe o vha e na miṅwaha ya 79 musi a tshi pfuka Mulambo wa Yorodane a tshi ya Shangoni ḽo Fulufhedziswaho. Nga murahu ha u lwa e swole kha magundo a mmbi ya Isiraele miṅwaha ya rathi, o vha a tshi ḓo vha o fushea nga zwe a zwi swikelela tshifhingani tsho fhiraho nahone a dzula a puta zwanḓa. Fhedzi ho ngo ita nga u ralo, o humbela mushumo u konḓaho wa u kunda “miḓi mihulu ya mitsheṱo” ye ya vha i dzithavhani dza Yuda fhethu he ha vha hu tshi dzula Vha-Enaki, vhanna vha vhulapfu vhu songo ḓoweleaho. A tshi thuswa nga Yehova, Kalebe o “vha pandela vhunga Yehova ó amba.” (Yoshua 14:9-14; 15:13, 14) Ivhani na vhungoho ha uri Yehova u na inwi, samusi o vha e na Kalebe, musi ni tshi khou bvela phanḓa ni tshi aṋwa zwiaṋwiwa zwa Muvhuso ni mulala. Nahone arali na dzula ni tshi fulufhedzea, u ḓo ni ṋea fhethu shangoni ḽawe ḽo fulufhedziswaho.—Yesaya 40:29-31; 2 Petro 3:13.
“Vha Kulukusha Vha Tshi Ṱuma Lurere”
9, 10. Vhakriste vha vhalala vha nga dzula hani vho khwaṱha lutendoni na vhu muyani? (Sedzani bogisi kha siaṱari 13.)
9 A tshi livhisa ṱhogomelo kha vhashumeli vha Yehova vha fulufhedzeaho, mupsalme o imba a ri: “Muvhuya u ḓo naka vhunga mutshevho; u ḓo mela vhunga ṱhaululo thavhani ya Libanoni. Vha aṋwa naho vhó no vha vha maḓuvha, vha kulukusha vha tshi ṱuma lurere.”—Psalme ya 92:12,14.
10 Ni nga dzula hani no khwaṱha muyani hu sa londwi vhulala? Tshithu tsha ndeme tshine tsha ita uri mutshevho u dzule wo naka ndi nga ṅwambo wa u wana maḓi o kunaho tshifhinga tshoṱhe. Nga hu fanaho, ni nga wana zwiḽiwa kha maḓi a mafhungo-ngoho a Bivhili nga u guda Ipfi ḽa Mudzimu na nga u ṱanganela na ndangulo yawe. (Psalme ya 1:1-3; Yeremia 17:7, 8) U khwaṱha haṋu muyani zwi ni ita uri ni vhe wa ndeme kha vhatendi nga inwi. Ṱhogomelani nḓila ine zwenezwi zwa khwaṱhisedzwa ngayo nga tsumbo ya Tshifhe Muhulu Yoyada wa mulala.
11, 12. (a) Ndi mushumo ufhio wa ndeme we Yoyada a u ita kha ḓivhazwakale ya muvhuso wa Yuda? (b) Yoyada o shumisa hani maanḓa awe u itela u tikedza vhurabeli ha ngoho?
11 Khamusi Yoyada o vha e na miṅwaha i fhiraho ḓana musi Khosi Athalia wa Mufumakadzi a re na vhuhovheleli a tshi vhusa ḽa Yuda nga u vhulaha vhaḓuhulu vhawe. Yoyada wa mulala o vha a tshi ḓo ita mini? Ene na musadzi wawe vho dzumba Yoasi, muḽaifa fhedzi o ponyokaho wa vhuhosini miṅwaha ya rathi thembeleni. Nga zwenezwo, Yoyada o ḓivhadza uri Yoasi a re na miṅwaha ya sumbe ndi khosi nahone a ita uri Athalia a vhulahwe.—2 Koronika 22:10-12; 23:1-3, 15, 21.
12 Samusi o vha e mueletshedzi wa khosi, Yoyada o shumisa maanḓa awe u itela u tikedza vhurabeli ha ngoho. O “vhofha mulanga na vhathu vhoṱhe na khosi, ha vhofhiwa ha pfi vha vhe vhathu vha Yehova.” Musi vha tshi laedzwa nga Yoyada, vhathu vho thutha nnḓu ya Baali mudzimu wa mazwifhi nahone vha pwashakanya dzialetare dza hone, zwifanyiso, na u vhulaha tshifhe. Yoasi o vusulusa mishumo ya thembeleni nahone a ita mushumo munzhi wa u vusulusa thembele. “Yoasi o ita zwe zwa takadza Yehova misi yoṱhe ya vhutshilo hawe a tshi funzwa nga tshifhé Yoyada.” (2 Koronika 23:11, 16-19; 24:11-14; 2 Dzikhosi 12:3) Musi a tshi fa e na miṅwaha ya 130, Yoyada o ṋewa khuliso i swayeaho nga u vhulungwa na mahosi ngauri ‘o itela Isiraele, na Mudzimu na nnḓu Yawe zwavhuḓi.’—2 Koronika 24:15, 16.
13. Vhakriste vha vhalala vha nga ‘itela hani zwavhuḓi Mudzimu wa ngoho na nnḓu yawe’?
13 Khamusi mutakalo u si wavhuḓi kana zwiṅwe zwiimo zwi nga ni thivhela uri ni sa ite zwine na nga zwi kona u itela u tikedza vhurabeli ha ngoho. Naho zwo ralo, ni nga kona u ‘itela zwavhuḓi Mudzimu wa ngoho na nnḓu yawe.’ Ni nga sumbedza u fhisetshela nnḓu ya Yehova ya muya nga u ya na nga u ṱanganela miṱanganoni ya tshivhidzo na vhuḓinḓani ha tsimu tshifhinga tshiṅwe na tshiṅwe hune zwa konadzea ngaho. U ṱanganedza haṋu nyeletshedzo ya Bivhili nga u ḓifunela na u tikedza haṋu nga u fulufhedzea “mukoma a fulufhedzeaho na wa vhuṱali” na tshivhidzo zwi ḓo khwaṱhisa vhushaka hashu ha Vhukriste. (Mateo 24:45-47) Ni nga dovha na ṱuṱuwedza vhagwadameli nga inwi ‘u funa mishumo mivhuya.’ (Vha-Heberu 10:24, 25; Filemoni 8, 9) Nahone ni ḓo vhuyedza vhaṅwe arali na dzhia vhukando u tendelana na nyeletshedzo ya muapostola Paulo ine ya ri: “Vhahulwane nga vha vhe vho dzulaho vhó dzivhuluwa, vha vhe na vhugala, vha-ita-nga-tsha-vhuhulwane, vha sá lwaliho kha u tenda, kha lufuno na kha u konḓelela. Hu ḓi nga vhasadzi vhahulwane, kha maitele avho vha tshile lwo fanelaho vhakhethwa, vha songo vha vhaluṱanyi, vha songo vha vho vhoxwaho nga u nwesa; vha vhe vhafunzi vha zwivhuya.”—Tito 2:2-4.
14. Vho no fhedzaho tshifhinga tshilapfu vhe vhalavhelesi vha Vhakriste vha nga ita mini u itela u tikedza vhurabeli ha ngoho?
14 Naa ni na miṅwaha minzhi ni muhulwane wa tshivhidzo? Nyeletshedzo ya muṅwe we a fhedza tshifhinga tshilapfu e muhulwane wa tshivhidzo ndi heyi, “shumisani vhuṱali ni si na tseḓa he na vhu kuvhanganya miṅwahani yoṱhe. Ṋeani vhaṅwe vhuḓifhinduleli, nahone ni shumise tshenzhelo yaṋu na vhaṅwe vho ḓiimiselaho u guda. . . Sedzani vhukoni kha vhaṅwe. Engedzani na u ṱuṱuwedza honoho vhukoni. Ni ite ndugiselelo dza vhumatshelo.” (Doiteronomio 3:27, 28) Dzangalelo ḽaṋu kha mushumo wa u huwelela nga ha Muvhuso ḽi ḓo vhuyedza vhanzhi kha vhushaka hashu ha Vhukriste.
‘U Ḓivhadza Uri Yehova O Luga’
15. Vhalala vha Vhakriste ‘vha ḓivhadza uri Yehova o luga’ nga nḓila-ḓe?
15 Vhashumeli vha Mudzimu vha vhalala vha shumisa vhuḓifhinduleli havho vho takala “uri vha ḓivhadze uri: o lugaho ndi Yehova.” Arali ni mulala wa Mukriste, zwine na zwi amba na mishumo yaṋu zwi nga sumbedza vhaṅwe uri ‘Yehova ndi dzhavhelo ḽaṋu, a si na hune a khakha.’ (Psalme ya 92:15) Mutshevho u ṱanziela pfaneleo dzavhuḓi dza Musiki wawo. Fhedzi Yehova o ni ṋea ndugelo ya u ṱanziela nga hae kha vhane zwino vha khou ṱanganedza vhurabeli ha ngoho. (Doiteronomio 32:7; Psalme ya 71:17, 18; Yoele 1:2, 3) Ndi ngani zwenezwo zwi zwa ndeme?
16. Ndi tsumbo dzifhio dza Bivhilini dzine dza sumbedza ndeme ya u ‘ḓivhadza uri Yehova o luga’?
16 Musi Yoshua murangaphanḓa wa Muisiraele o “no kalaha e wa maḓuvha,” o “vhidza Vha-Isiraele vhoṱhe, vhakoma, na vhahulwane, na vhahaṱuli, na dzinduna,” nahone a vha humbudza nga maitele a Mudzimu o lugaho. O ri: “Zwe Yehova Mudzimu waṋu a ita a tshi vuledza oṱhe Mafhungo avhuḓi e a ni amba ngao’; ha ngo sia na ḽithihi; oṱhe o vulea; a huna ḽe ḽa ṱáhela.” (Yoshua 23:1, 2, 14) Enea maipfi o khwaṱhisa lwa tshifhinganyana u ḓiimisela ha vhathu u dzula vha tshi fulufhedzea. Naho zwo ralo, musi Yoshua o no fa, “ha vuwa vha thangá ntswa, vha sá ḓivhi Yehova, na mishumo yawe ye a itela Isiraele. Vha-Isiraele vha ita zwe zwa vhifhela Yehova nga u’ vha shumela vho-Baali.”—Vhahaṱuli 2:8-11.
17. Yehova u shumisana hani na vhathu vhawe vha zwifhingani zwa musalauno?
17 U fulufhedzea ha tshivhidzo tsha Vhukriste tsha musalauno a hu ḓitiki nga vhuṱanzi ha vhashumeli vha Mudzimu vha vhalala. Naho zwo ralo, lutendo lwashu kha Yehova na kha mafulufhedziso awe lu a khwaṱha musi ri tshi pfa mafhungo a “mishumo mihulu” ye a i itela vhathu vhawe kha ano maḓuvha a vhufhelo. (Vhahaṱuli 2:7; 2 Petro 1:16-19) Arali ni na miṅwaha minzhi ni tshi khou ṱanganela na ndangulo ya Yehova, ni nga humbula nga tshifhinga tsha musi hu na vhahuweleli vha si gathi vha Muvhuso dzinguni ḽa haṋu kana shango kana u pikiswa ha mushumo wa u huwelela. Nga u ya ha tshifhinga, na vhona Yehova a tshi fhelisa zwiṅwe zwithithisi na u ‘ṱavhanyisa’ nyengedzeo ya vhahuweleli vha Muvhuso. (Yesaya 54:17; 60:22) No ṱhogomela u ṱaluswa zwavhuḓi ha mafhungo-ngoho a Bivhili na u ṱanziela u khwiniswa hu bvelaho phanḓa ha ndangulo ya Mudzimu i vhonalaho. (Mirero 4:18; Yesaya 60:17) Naa ni a ṱoḓa u ṱuṱuwedza vhaṅwe nga u vha vhudza zwe na ṱangana nazwo malugana na maitele a Yehova o lugaho? Zwenezwi zwi nga vha na mvelelo dzavhuḓi na dzi khwaṱhisaho vhukuma kha vhushaka hashu ha Vhukriste!
18. (a) Ṋeani tsumbo ya mvelelo ya tshifhinga tshilapfu ya ‘u ḓivhadza uri Yehova o luga.’ (b) Inwi no tshenzhela hani u luga ha Yehova?
18 Ndi kha zwiitea zwifhio he na ṱhogomelwa nga lufuno na u livhiswa nga Yehova vhutshiloni haṋu? (Psalme ya 37:25; Mateo 6:33; 1 Petro 5:7) Wahashu wa tshisadzini wa mulala ane a vhidzwa Martha o vha a tshi dzulela u ṱuṱuwedza vhaṅwe nga uri: “Naho ha nga bvelela mini, ni songo laṱa Yehova. U ḓo ni tikedza.” Yeneyi nyeletshedzo yo kwama vhukuma Tolmina, muṅwe wa vhagudiswa vha Bivhili vha Martha, we a lovhedzwa mathomoni a vho-1960. Tolmina u ri: “Musi munna wanga a tshi lovha, ndo pfa ndo vhaisala vhukuma, fhedzi eneo maipfi o ita uri ndi si ṱahele muṱangano na muthihi. Nahone Yehova o nkhwaṱhisa vhukuma u itela u bvela phanḓa.” Tolmina na ene o ṋea yeneyo nyeletshedzo vhunzhi ha vhagudiswa vhawe vha Bivhili miṅwahani yo fhiraho. I ngoho, nga u ṋea ṱhuṱhuwedzo na u amba nga maitele a Yehova o lugaho, ni nga fhaṱa vhukuma lutendo lwa vhatendi nga inwi.
Yehova U Dzhiela Nṱha Vhalala Vha Fulufhedzeaho
19, 20. (a) Yehova u dzhia hani mishumo ya vhashumeli vhawe vha vhalala? (b) Ndi mini zwine zwa ḓo haseledzwa kha thero i tevhelaho?
19 Shango ḽa ṋamusi, ḽi ṱaluswaho nga u sa livhuha, a ḽi dzhieli nṱha vhalala. (2 Timotheo 3:1, 2) Musi vha tshi humbulwa, kanzhi hu vha hu nga ṅwambo wa zwe vha zwi swikelela tshifhingani tsho fhiraho—zwe vha vha vhe zwone, nṱhani ha zwine vha khou zwi ita zwino. U fhambana na zwenezwo, Bivhili i ri: “Mudzimu ha ṱaluli; ha nga hangwi zwe na shuma na ḓi-netisa lufunoni ni tshi itela dzina ḽawe; no shumela vhakhethwa, na zwino ni khou vha shumela.” (Vha-Heberu 6:10) Vhukuma, Yehova Mudzimu u a humbula rekhodo yaṋu ya u shuma nga u fulufhedzea. Fhedzi u dovha a dzhiela nṱha zwine na khou bvela phanḓa ni tshi zwi ita tshumeloni yawe. Ee, u dzhia vhalala vha fulufhedzeaho vhe Vhakriste vha re na mbuyelo, na vho khwaṱhaho muyani.—Vha-Filipi 4:13.
20 Naa ni dzhia miraḓo ya vhalala ya vhushaka hashu ha Vhukriste u fana na nḓila ine Yehova a vha dzhia ngayo? Arali ni tshi zwi ita, ni ḓo sudzulusea u vha sumbedza lufuno. (1 Yohane 3:18) Thero i tevhelaho i ḓo haseledza dziṅwe nḓila dzi shumaho dza u sumbedza lwonolwo lufuno kha u ṱhogomela ṱhoḓea dzavho.
[Ṱhaluso dzi re magumoni a siaṱari]
^ phar. 3 Tshiṱokola tshiṅwe na tshiṅwe tshi nga vha na mitshelo i ṱoḓaho u vha tshigidi nahone i nga lemela khilogireme dza malo kana u fhira. Muṅwe muṅwali u anganyela uri “muri muṅwe na muṅwe u aṋwaho mitshelo u aṋwa thani mbili kana tharu dza mitshelo sa mbuyelo kha vhaṋe vhayo tshifhingani tsha u tshila hayo.”
Ni Nga Fhindula Nga Uri Mini?
• Vhalala “vha aṋwa” nga nḓila-ḓe?
• Ndi ngani u khwaṱha muyani ha vhalala vha Vhakriste hu ha ndeme?
• Vhalala ‘vha ḓivhadza uri Yehova o luga’ nga nḓila-ḓe?
• Ndi ngani Yehova a tshi dzhiela nṱha vhashumeli vhawe vha tshifhinga tshilapfu?
[Mbudziso Dza Pfunzo]
[Bogisi kha siaṱari 13]
Nḓila Ye Vhaṅwe Vha Dzula Vho Khwaṱha Ngayo Lutendoni
Ndi mini tshe tsha thusa Vhakriste vha tshifhinga tshilapfu u dzula vho khwaṱha lutendoni na vhu muyani havho? Hezwi ndi zwe vhaṅwe vha zwi amba:
“U vhala maṅwalo ane a livhisa ṱhogomelo kha vhushaka hashu na Yehova ndi zwa ndeme. Hu ṱoḓaho u vha madekwana maṅwe na maṅwe, ndi amba nga ṱhoho Psalme 23 na 91.”—Olive, o lovhedzwaho nga 1930.
“Ndo vha ndi tshi ita vhungoho ha uri misi yoṱhe ndi vhe hone kha nyambo iṅwe na iṅwe ya ndovhedzo na u thetshelesa nga vhuronwane, zwi tshi tou nga ndi ya ndovhedzo yanga. U dzula ndi tshi humbula zwavhuḓi nga ha u ḓiṋekedza hanga ndi vhukando ha ndeme ha u dzula ndi tshi fulufhedzea.”—Harry, o lovhedzwaho nga 1946.
“Thabelo ya ḓuvha ḽiṅwe na ḽiṅwe ndi ya ndeme—misi yoṱhe ri tshi humbela u thuswa, u tsireledzwa, na u fhaṱutshedzwa nga Yehova, ‘dzinḓilani dzashu dzoṱhe ri tshi ḓivha ene’.” (Mirero 3:5, 6)—Antônio, o lovhedzwaho nga 1951.
“U thetshelesa tshenzhelo dza vhe vha shumela Yehova miṅwaha minzhi zwo vusulusa u ḓiimisela hanga u dzula ndi tshi fulufhedzea khae.”—Joan, o lovhedzwaho nga 1945.
“Ndi zwa ndeme u sa ḓidzhiela nṱha. Zwine ra vha nazwo ndi nga ṅwambo wa tshilidzi tsha Mudzimu tshi songo ri fanelaho. U vha na enea mavhonele zwi ita uri ri bvele phanḓa ro lavhelesa kha sia ḽo lugaho ḽa zwiḽiwa zwa muya zwine zwa ṱoḓea u itela u konḓelela u swika vhufheloni.”—Arlene, o lovhedzwaho nga 1954.
[Tshifanyiso kha siaṱari 11]
Vhalala vha aṋwa zwiaṋwiwa zwa ndeme zwa Muvhuso
[Tshifanyiso kha siaṱari 14]
U khwaṱha ha vhalala vhu muyani ndi zwa ndeme