Naa Ri Fanela U Itela Vhaṅwe Zwivhuya Kana U Sokou Iledza U Vha Khakhela?

“NI SONGO ita zwithu zwine na sa ṱoḓe vhaṅwe vha tshi ni ita zwone.” Ḽeneḽi ndi ḽiambele ḽa mudededzi wa Mutshaina a ḓivheaho ane a dovha a vha muḓivhi wa zwa vhurereli ha Vhucofucian. Ṋamusi, hune ha vha miṅwaha i ṱoḓaho u vha 2500 yo fhiraho, vhanzhi vha kha ḓi tenda uri muthu o lugaho ndi muthu ane a sa vhaise vhaṅwe vhathu.

Vhukuma, ḽeneḽi ḽiambele ḽine ḽa vha maitele a Vhacofucian ndi ḽa ndeme kha maṅwe masia. Kha ḽiṅwe sia, Bivhili i dzumbulula vhuṅwe vhulivhisi siani ḽa vhuḓifari na nḓila ine vhathu vha ita ngayo zwithu. Nga nnḓa ha zwine zwa nga vhidzwa tshivhi tsha khole, tshivhi tshine muthu a tshi itela muṅwe muthu o ḓiimisela, Bivhili i amba nga ha tshivhi tsha u litsha u itela muṅwe muthu zwithu zwavhuḓi. Mufunziwa Yakobo wa Mukriste o ṅwala a ri: “Zwino ané a ḓivha tshiné a nga tonda ngatsho’, a litsha u tshi ita, á ralo o ita zwivhi.” (Yakobo 4:17) Nṱhani ha u sokou vhudza Vhakriste uri vha songo khakhela vhaṅwe, Yesu Kristo o ṋea heyi nyeletshedzo: “Zwoṱhe zwiné na funa vhathu vha tshi ni ita, na inwi ni vha ite zwenezwo.”—Mateo 7:12.

U bva kale, ndivho ya Mudzimu yo vha i ya uri vhathu vha fare vhaṅwe nga nḓila ine vha ṱoḓa u farwa ngayo. O vhea tsumbo yavhuḓisa ya u ṱhogomela mutakalo wa vhaṅwe vhathu nga nḓila ye a sika ngayo muthu: “Mudzimu a mbo sika muthu, ha vha u ḓi-fanyisa, ha vha u fanyisa Mudzimu; a sika vhé munna na musadzi a tshi vha sika.” (Genesi 1:27) Hezwi zwi amba uri Mudzimu o ṋea vhathu luvalo, lune musi lwo gudiswa zwavhuḓi, lwa vha livhisa uri vha fare vhaṅwe nga nḓila ine vhone vha ṱoḓa u farwa ngayo.

Vhathu vhanzhi vha a tambudzwa vha si na fulufhelo na thuso nga vhathu vha sa humbuleli na vha re na tseḓa. Zwi tou vha khagala uri zwa ndeme a si u sokou sa vhaisa vhaṅwe fhedzi, nṱhani hazwo, zwa ndeme ndi u itela vhaṅwe zwivhuya na u vha thusa. Nga ṅwambo wa zwenezwi, Ṱhanzi dza Yehova vha dzhia vhukando nga u ḓifunela u itela u thusa vhaṅwe uri vha gude nga ha fulufhelo ḽi mangadzaho ḽi re Ipfini ḽa Mudzimu. Musi vha tshi vhudza vhahura vhavho nga ha mafhungo maḓifha a Bivhili, vha ita zwenezwo nga muya wa lufuno, vha tshi ita zwine vha zwi lavhelela zwi tshi itwa khavho.