Ndi Vhufhio Vhurereli Vhune na Fanela u vhu Khetha?

‘U FHAMBANA ha vhurereli zwi tou fana na nḓila dzo fhambanaho fhedzi dzi tshi ya fhethu huthihi. Vhu a fana samusi Mudzimu ndi muthihi.’ Enea mavhonele a ambiwa nga vhathu vhanzhi vhane vha ḓipfa uri naho u vha muraḓo wa vhurereli zwi zwa ndeme, a si zwa ndeme uri ndi vhurereli vhufhio vhune muthu a vhu khetha.

Arali muthu a songo zwi ṱhogomela zwavhuḓi, a nga phetha nga uri zwenezwo zwi a pfala samusi huna Mudzimu muthihi wa ngoho, Ramaanḓaoṱhe. (Yesaya 44:6; Yohane 17:3; 1 Vha-Korinta 8:5, 6) Naho zwo ralo, ri nga si dzhiele fhasi phambano ine ya vha hone, u katela na u hanedzana hune ha vha hone vhukati ha zwigwada zwa vhurereli zwine zwa amba uri zwi shumela Mudzimu wa ngoho. Zwo fhambana vhukuma kha matshilele, thendo, pfunzo na ṱhoḓea dzazwo. Phambano dza hone ndi khulwane vhukuma nga nḓila ine vhane vha vha kha vhuṅwe vhurereli kana tshiṅwe tshigwada zwa vha konḓela vhukuma u pfesesa kana u ṱanganedza zwine vhaṅwe vha zwi funza kana u tenda khazwo.

Kha ḽiṅwe sia Yesu o ri: “Mudzimu ndi muya; huno vha mu rabelaho nga vha mu rabele muyani na nga mafhungo-ngoho.” (Yohane 4:24) Naa u gwadamela Mudzimu nga mafhungo-ngoho zwi nga ita uri hu vhe na mihumbulo yo fhambanaho ya uri Mudzimu ndi nnyi, ndivho dzawe ndi dzifhio, na uri u ṱoḓa u gwadamelwa nga nḓila-ḓe? Naa zwi a pfala u tenda uri Mudzimu Ramaanḓaoṱhe u a tendela nḓila iṅwe na iṅwe ya u mu gwadamela?

Vhakriste vha Ngoho vha Ḓana ḽa u Thoma ḽa Miṅwaha na vha Zwino

Vhakriste vha ḓana ḽa u thoma ḽa miṅwaha vho vha vha tshi ita vha tshi vha na mihumbulo yo fhambanaho malugana na zwiṅwe zwithu. Sa tsumbo, musi a tshi khou amba na vhathu vha ngei Korinta, muapostola Paulo o ri: “Aṋu, vharathu vhanga, ndo ḓivhadzwa nga vha ha Kloe, zwauri hu na dzikhani vhukati haṋu. Ndi amba haya ané muthu waṋu muṅwe a ri: Nṋe ndi wa Paulo! muṅwe a ri: Nṋe ndi wa Apolo! muṅwe: Nṋe ndi wa Kefa! muṅwe: Nṋe ndi wa Kristo!”—1 Vha-Korinta 1:11, 12.

Naa Paulo o dzhia honoho u fhambana sa hu si ha ndeme? Naa muthu muṅwe na muṅwe o vha a tshi khou sokou ita zwithu nga nḓila ine a funa ngayo u itela u tshidzwa? Na khathihi! Paulo o ṱuṱuwedza a ri: “Ndi a ni kwengweledza, vharathu vhanga, nga dzina ḽa Yesu Kristo, ndi ri: Noṱhe ambani tshithihi, hu si vhe na dziphambano vhukati haṋu, ivhani vho dzudzanyiwaho, muhumbulo ú muthihi, na kuelekanyele kú kuthihi.”—1 Vha-Korinta 1:10.

Vhukuma, vhuthihi ha thendo hu nga si tou kombetshedzwa vhathu. Vhu nga swikelelwa arali vhathu vha ṱolisisa mafhungo nga vhuronwane nahone vha swikelela na u ṱanganedza phetho dzi fanaho. Ngauralo, pfunzo ya muthu nga eṱhe  ya Ipfi ḽa Mudzimu na lutamo lwa u ita zwine wa zwi guda nga u fulufhedzea ndi zwa ndeme u itela u ḓiphina nga vhuthihi he Paulo a amba ngaho. Naa honoho vhuthihi vhu nga swikelelwa? Samusi ro zwi vhona, misi yoṱhe Mudzimu o vha a tshi shumisana na vhathu vhawe sa tshigwada. Naa zwi a konadzea u ṱalula tshenetsho tshigwada ṋamusi?

U Vhuyelwa nga u vha Muraḓo wa Tshigwada tsho Teaho

Mupsalme David o vhuya a vhudzisa a ri: “Yehova, ndi nnyi wa u ḓo dzhena nḓuni yau? Ndi nnyi wa u ḓo dzula kha thavha-khethwa yau.” Yeneyo yo vha i mbudziso i nyanyulaho vhukuma. Davida o ṋea phindulo ya hone musi a tshi ri: “Ndi uyo ané a tshimbila nga yo lugaho, ané a ita zwivhuya, a amba a ngoho nga mbilu.” (Psalme ya 15:1, 2) U pfesesa Bivhili nga nḓila yo teaho zwi ḓo ita uri muthu a kone u ṱalula vhurereli vhune ha ṱanganedzwa nga Mudzimu. Nga zwenezwo, nga u vha muraḓo wa tshenetsho tshigwada, muthu a nga ḓiphina nga vhushaka na vhathu vhane vha gwadamela Mudzimu nga vhuthihi na “nga muya na nga mafhungo-ngoho.”

Ṱhanzi dza Yehova dzo sumbedza uri zwi a konadzea u swikelela vhuthihi siani ḽa vhurabeli na kha nyito na kha ḽino shango ḽi si na vhuthihi. Vhukati hadzo hu na vhathu vhe vha vha vhe miraḓo ya vhurereli vhunzhi ho fhambanaho na dzitshaka dzo fhambanaho. Dziṅwe Ṱhanzi dzo vha dzi sa tendi uri Mudzimu u hone. Hu uri dziṅwe dzo vha dzi sa dzhieli nṱha vhurereli. Hu na vhathu vhanzhi vho bvaho kha vhurereli, mvelele, na kha pfunzothendwa dzo fhambanaho vhane zwino vha ḓiphina nga vhuthihi ha vhurereli vhu sa wanali shangoni ṋamusi.

Mutheo wa honoho vhuthihi ndi Ipfi ḽa Mudzimu, Bivhili. Vhukuma, Ṱhanzi dza Yehova dzi ṱhogomela uri dzi nga si kombetshedze vhathu uri vha ite zwithu nga iṅwe nḓila. Fhedzi dzi a dzhiela nṱha ndugelo ya u ṱuṱuwedza vhaṅwe u guda Bivhili u itela uri vha kone u ita phetho dzavho siani ḽa mafhungo a vhurabeli kha mutheo wo khwaṱhaho. Nga yeneyi nḓila, vhanzhi vha nga kona u wana mbuyelo dzine dza bva kha u gwadamela Mudzimu “nga muya na nga mafhungo-ngoho.”

Ṋamusi hu na khonadzeo khulwane ya uri muthu a langiwe nga ṱhuṱhuwedzo mmbi na u fhurwa. U khetha vhurereli ho teaho ndi zwa ndeme vhukuma. Bivhili i amba uri “mu-endelana-na-vhaṱali u a ṱalifha-vho; mu-konana-na-tsilu u ḓo tambula-vho” na uri “u̗ ḓowelana na vhavhi zwi tshinyisa milayo mivhuya.” (Mirero 13:20; 1 Vha-Korinta 15:33) U ḓikonanya na vhagwadameli vha ngoho vha Mudzimu zwi a tsireledza. Ngauralo, Bivhili i ri humbudza u ri: “Kha ri sedzane nga tshashu, ri ṱuṱuwedzane lufunoni na kha mishumo mivhuya. Ri songo bvafha u ya huné ra kuvhangana; ndi zwiné vhaṅwe vha ita. Ri fhembeledzane; zwihulwane, ri ralo ngauri na inwi ni a zwi vhona zwauri ḓuvha ḽi vho tsha.” (Vha-Heberu 10:24, 25) Zwi takadza lungafhani musi khonani dza ngoho, vhahashu vha tshinnani na vha tshisadzini vha tshi thusana nga tshavho u itela u ḓadzisa vhuḓifhinduleli havho phanḓa ha Mudzimu!

Ottmar o tendelana na enea mavhonele. O aluswaho muṱani wa vhathu vhe vha vha vha tshi dzhena kereke ya Katolika kha ḽa Dzheremane, o mbo ḓi litsha u ya kerekeni. U ri: “Tshifhinga tshoṱhe musi ndi tshi ya kerekeni, ho vha hu si na zwe nda vha ndi tshi zwi guda.” Naho zwo ralo, o vha a tshi dzula e na lutendo kha Mudzimu. Nga murahu a mbo ḓi ṱangana na Ṱhanzi dza Yehova nahone a vha na vhuṱanzi ha uri ndi vhone vhashumeli vha Mudzimu vha ngoho. A vhona ṱhoḓea ya u ṱanganela navho. Zwa zwino u ri: “Ndi muraḓo wa ndangulo ya shango ḽoṱhe nahone ndi na mulalo wa ngelelo na wa mbiluni. Ndi khou bvela phanḓa u thuswa uri ndi vhe na nḓivho yo teaho nga ha Bivhili. Zwenezwo ndi zwithu zwa ndeme vhukuma kha nṋe.”

U Rambiwa ha vha re na Dzangalelo

Vhathu vhane vha shumisana sa tshigwada vha a kona u ita mushumo nga nḓila i bvelelaho u fhirisa muthu ane a khou ita tshithu e eṱhe. Sa tsumbo, musi Yesu a tsini na u fhambana na vhafunziwa vhawe o vha vhudza a ri: “Iyani-ha ni ite vhathu vhoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa. Ni vha funze u ita zwoṱhe zwe nda ni laya. Huno vhonani, ndi na’nwi misi yoṱhe u swika vhufheloni ha ḽifhasi.” (Mateo 28:19, 20) Wonoyo  mushumo wo vha u tshi nga swikelelwa hani arali ho vha hu si na vhulivhisi kana dzangano? Muthu o vha a tshi nga tevhedza hani nyeletshedzo dza Maṅwalo arali a lingedza u shumela Mudzimu e eṱhe?

Ṅwaha wo fhelaho, Ṱhanzi dza Yehova shango ḽoṱhe dzo phaḓaladza bugu dzo thewaho Bivhilini, zwibugwana na bugwana dzi linganaho 91 933 280, u katela na magazini dzi linganaho 697 603 247, nahone dza swikelela vhathu vha dzimilioni mashango a linganaho 235 nga mulaedza wa Ipfi ḽa Mudzimu. Wonoyu ndi musumbedzo wa dzangano ḽi re na vhuthihi na ḽo dzudzanywaho zwavhuḓi u itela u swikelela mushumo muhulwane u fhirisa wa vhathu vhane vha ita vhuḓidini nga vhoṱhe!

Nga nnḓa ha u phaḓaladza khandiso dza Bivhili, Ṱhanzi dza Yehova dzi fara pfunzo dza Bivhili nga mahala u itela u thusa vhathu uri vha pfesese vhudzivha ha zwine Mudzimu a zwi ṱoḓa. Ṅwaha wo fhelaho, dzo swikelela mbalo ya nṱha ya pfunzo dza Bivhili dza 5 726 509 vhege iṅwe na iṅwe dzi tshi khou guda na muthu muthihi kana zwigwada. Dzenedzi pfunzo dza Bivhili dzo thusa vhathu vha dzimilioni uri vha vhe na mutheo wo khwaṱhaho u itela u ita phetho siani ḽa vhurabeli. Ni a rambiwa uri ni gude nga ha zwine Mudzimu a zwi ṱoḓa samusi zwo sumbedzwa Bivhilini. Nga zwenezwo, ni ḓo kona u ita phetho.—Vha-Efesa 4:13; Vha-Filipi 1:9; 1 Timotheo 6:20; 2 Petro 3:18.

Vhurereli ndi ha ndeme u itela uri ni kone u takadza Mudzimu—fhedzi hu si vhurereli vhuṅwe na vhuṅwe. Ni fanela u thea phetho yaṋu ya vhurereli kha nḓivho yo teaho ya Bivhili, hu si kha mihumbulo ya vhathu. (Mirero 16:25) Gudani zwine zwa ṱoḓea kha vhurereli ha ngoho. Zwi vhambedzeni na zwine na tenda khazwo. Nga murahu ha zwenezwo ni kone u ita phetho yo teaho.—Doiteronomio 30:19.

[Tshifanyiso kha siaṱari 7]

Ṱhanzi dza Yehova dzi ḓiphina nga vhuthihi shangoni ḽi si na vhuthihi