Naa Thabelo Dzaṋu Dzi nga Thusa?

NDI nnyi kha riṋe ane ha athu vhuya a ṱangana na zwiimo zwi konḓaho zwine ra si kone u zwi langa? Bivhili yo sumbedza uri muapostola Paulo o vha a tshi ḓivha uri thabelo i nga kwama mvelelo dza zwenezwo zwiimo.

Musi Paulo o valelwa khothoni zwi songo tea ngei Roma, o humbela vhatendi ngae uri vha mu rabelele, a dovha a ri: “Ndi simesa u ni fhembeledza uri ni ralo, uri ndi ṱavhanye u vhuyelela ha inwi.” (Vha-Heberu 13:18, 19) Kha tshiṅwe tshiitea, Paulo o sumbedza fulufhelo ḽa uri Mudzimu u ḓo thetshelesa thabelo musi a tshi vhofhololwa khothoni lwa u thoma. (Filemoni 22) Hu si kale Paulo a vhofhololwa nahone a bvela phanḓa na mushumo wa vhurumiwa.

Fhedzi naa thabelo i nga shandula mvelelo dza vhuleme haṋu? Khamusi. Naho zwo ralo, humbulani uri thabelo a i sokou vha maitele a vhurereli. Ndi vhudavhidzano ha vhukuma na Khotsi ashu wa ṱaḓulu a re na lufuno na maanḓa. Ri songo timatima u amba nga ho livhaho thabeloni dzashu, nahone nga murahu ri lindele ri sa fheli mbilu u vhona nḓila ine Yehova a ḓo fhindula ngayo.

Mudzimu a nga kha ḓi sa fhindula nga ho livhaho thabelo iṅwe na iṅwe, kana tshifhinga tshoṱhe a nga kha ḓi fhindula nga nḓila kana nga tshifhinga tshee ra si tshi lavhelele. Sa tsumbo, Paulo o rabela lunzhi-lunzhi nga ha “[mupfa, NW] ṋamani.” Mudzimu ho ngo fhelisa vhuleme ha Paulo, kana zwe zwa vha zwi tshi khou mu dina, fhedzi o khuthadza Paulo nga maipfi a khuthadzaho ane a ri: “Tshilidzi tshanga tsho U eḓana. Maanḓa anga a khunyelela hu shaiwaho nungo.”—2 Vha-Korinta 12:7-9.

Na riṋe ri nga vha na vhungoho ha uri naho Mudzimu a sa fhelisi vhuṅwe vhuleme vhune ra vha naho, a nga “vhea na tshivhana tshiné na kona u sera ngatsho’.” (1 Vha-Korinta 10:13) Ḽiṅwe ḓuvha, hu si kale, Mudzimu u ḓo fhelisa u shengela hoṱhe ha vhathu. Zwa zwino, u amba na “Mupfi wa dzithabelo” zwi nga ri thusa.—Psalme ya 65:2.