‘O Ri Funza U Ṱhonifha Vhurereli Hawe’

MUṄWE wa Ṱhanzi dza Yehova a bvaho vunḓuni ḽa Rovigo, Italy, o tumbula uri u na khentsara, nahone o vha e vhuimoni vhu konḓaho vhukuma. Nga murahu ha u valelwa lwo vhalaho vhuongeloni, he henefho a humbela uri a alafhiwe hu sa shumiswi malofha, o thuswa nga vhaongi vha tshumelo ya khentsara ya hune a dzula hone.

Lutendo lwo khwaṱhaho na u vha na tshumisano ha onoyu mulwadze wa miṅwaha ya 36 zwo takadza madokotela na vhaongi vhe vha vha vha tshi khou mu alafha. Nga phanḓa ha musi onoyu mulwadze a tshi fa nga khentsara, muṅwe wa vhaongi vhe vha vha vha tshi khou mu thusa o ṅwala kha magazini wa vhaongi nga zwe a ṱangana nazwo kha mulwadze we a mu vhidza Angela.

“Angela u na mafulufulu nahone o ḓiimisela u tshila. U a ḓivha zwiimo zwawe na vhuhulwane ha vhulwadze hawe, nahone u fana na riṋe roṱhe, u khou ṱoḓa dzilafho, kana mushonga. . . . Riṋe vhaongi ro thoma u ḓowelana nae nga zwiṱuku nga zwiṱuku. Ho ngo hana thuso ye ra mu ṋea yone. U fhambana na zwenezwo, vhukonani ha Angela ho ita uri zwithu zwi ri lelutshele. Zwo vha zwi tshi takadza u mu thusa, samusi ro vha ri tshi zwi ḓivha uri tshi ḓo vha tshi tshifhinga tsha u ṱangana na muthu wa lufuno na tsha uri roṱhe ri vhuyelwe. Ra ṱhogomela nga u ṱavhanya uri vhurereli hawe ho vha hu tshi khou ḓo ri thithisa musi ri tshi alafha vhulwadze hawe.” O humbula nga yeneyo nḓila ngauri o vha a tshi tenda uri Angela u fanela u shelwa malofha, zwithu zwe a zwi hana.—Mishumo 15:28, 29.

“Samusi ri vhathu vho gudiselwaho u ṱhogomela vhalwadze, ra vhudza Angela uri a ri khou tendelana na phetho yawe, fhedzi nga thuso yawe, ra pfesesa nḓila ine vhutshilo ha vha ha ndeme ngayo khae. Ro dovha ra pfesesa vhuhulwane ha vhurereli hawe khae na kha muṱa wa hawe. Angela ho ngo fulufhuwa. Ho ngo fulufhuwa nga vhulwadze hawe. O vha o ḓiimisela. O vha a tshi ṱoḓa u tshila, u lwa, na u bvela phanḓa a tshi khou tshila. O ṱalutshedza u ḓiimisela hawe na thendo dzawe. O vha e na tshivhindi tshine kanzhi ri sa vhe natsho nahone a ri na lutendo lwo khwaṱhaho u fana na lwawe. . . . Angela o ri funza ndeme ya u ṱhonifha vhurereli hawe, zwithu zwo fhambanaho na maitele a mushumo washu. . . . Ri tenda uri Angela o ri funza ndeme khulwane, ngauri ri ṱangana na vhathu vha mifuda yoṱhe, vha zwiimo zwo fhamba-fhambanaho, vha vhurereli hoṱhe, nahone ri nga guda khavho na u ṋea tshiṅwe tshithu kha naho e nnyi ane ra ṱangana nae.”

Wonoyo magazini wo ombedzela Mulayo wa Maitele a Matshilele o Teaho a Vhaongi vha Italia, wo rwelwaho ṱari nga 1999, une wa ri: “Muongi u ita mishumo yawe, u dzhiela nṱha vhurereli ha muṅwe muthu, vhuḓifari, na maitele a mvelele, u katela na tsinde na mbeu.” Nga zwiṅwe zwifhinga, zwi nga konḓela madokotela na vhaongi u ṱhonifha thendo dza vhurereli dza mulwadze, nahone ri a dzhiela nṱha na u livhuha vhane vha ṱoḓa u ita nga u ralo.

Phetho dzine Ṱhanzi dza Yehova dza dzi ita malugana na mutakalo wadzo na ngalafho zwo dzudzanyea zwavhuḓi. Dzi ṱhogomela nga ho dzikaho zwine Maṅwalo a amba zwone, nahone samusi zwo sumbedzwa kha mafhungo a Angela, a dzi vhafelalutendo. (Vha-Filipi 4:5) Ḽifhasini ḽoṱhe, tshivhalo tsho engedzeaho tsha vhathu vhe vha gudiselwa u ṱhogomela vhalwadze tsho ḓiimisela u ṱhonifha mvalo dza vhalwadze vhavho vhane vha vha Dziṱhanzi.