Tshifhiwa Tsha Ndeme Vhukuma

MUSI e tsini na u fa, muapostola Yohane wa mulala o ṅwala a ri: “Kha nṋe dakalo ḽi fhiraho ḽiṅwe ndi ḽa musi ndi tshi pfa upfi vhana vhanga vha khou tshimbila kha mafhungo-ngoho.”—3 Yohane 4.

Muapostola a fulufhedzeaho o vha a tshi khou ambela kha vhana vhawe vha muya. Naho zwo ralo, vhabebi vhanzhi vha nga ḓipfa nga nḓila i fanaho na ya muapostola nga ha vhana vhavho. Vho shuma vhukuma u itela u alusa vhana vhavho “nga u vha laya na u vha kwengweledzela zwa Murena,” nahone zwino vha a takala u vhona vhana vhavho vho aluwaho vha tshi khou “tshimbila kha mafhungo-ngoho.” (Vha-Efesa 6:4) Zwi re zwone ndi uri u funza vhana vhau nḓila ya u wana vhutshilo vhu sa fheli zwi fana na u vha ṋea ifa ḽa ndeme vhukuma. Hezwo ndi nga ṅwambo wa uri u ḓikumedza kha Mudzimu, zwine zwa katela u tshila nga nḓila ine Yehova a ṱoḓa Vhakriste vha tshi tshila ngayo, “hu na mbavhalelo ya kha vhuno vhutshilo na kha vhu ḓaho.”—1 Timotheo 4:8.

Yehova, Khotsi o fhelelaho, u dzhiela nṱha vhukuma vhabebi vha ofhaho Mudzimu vhane vha lingedza nga nungo dzoṱhe u funza vhana vhavho zwithu zwa muya. Musi vhana vha tshi thetshelesa, vha wana dakalo ḽihulwane ḽa u bvela phanḓa na vhurabeli ha ngoho vhe na vhabebi vhavho. Musi vhenevho vhana vha tshi vha vhaaluwa, vha dzula vha tshi humbula nga dzenedzo tshenzhelo. Vhaṅwe vha humbula nga dakalo musi vha tshi ṱanganela lwa u tou thoma kha Tshikolo tsha Vhuḓinḓa ha lwa Ṱaḓulu. * Kana khamusi vha humbula nga tshifhinga tsha musi vha tshi thoma u kona u vhala ndima ya Bivhili vhuḓinḓani ha nnḓu nga nnḓu musi vhe na muṅwe wa vhabebi vhavho. Naa vha nga vhuya vha hangwa musi vha tshi khou pfa vhabebi vhavho vha tshi khou vhala bugu ine ya pfi Bugu Yanga ya Mafhungo a Bivhili kana ine ya pfi U Thetshelesa kha Mufunzi Muhulu?  * Gabriel u humbula tshiṅwe tshithu tshe a vha a tshi tshi funa vhukuma: “Musi ndi na miṅwaha miṋa fhedzi, mme anga vho vha vha tshi nyimbela ḓuvha ḽiṅwe na ḽiṅwe musi vha tshi khou bika. Ndi kha ḓi humbula vhukuma luṅwe luimbo lwa Muvhuso. Nga murahu, lwo nthusa u vhona ndeme ya tshumelo ya Yehova.” Khamusi na inwi ni kha ḓi humbula luimbo lwavhuḓi lune Gabriel a khou amba nga halwo. Ndi lwa vhu-157 kha bugu ya luimbo i vhidzwaho Sing Praises to Jehovah, nahone lu na tshiṱoho tshine tsha ri “Rabela Yehova u Tshee Muswa.”

Lwonolu luimbo lu thoma nga uri: “Vhana  vhaṱuku vho vhuya vha hulisa Mudzimu;/Vha, imbelela, vha tshi hulisa Yesu.” Vhukuma, ho vha na vhana vhe vha vha na ndugelo ya u ṱanganela na Yesu, nahone zwi vhonala vho mu takadza nga nḓila ye vha vha vha tshi ḓifara ngayo i homolosaho. Yesu o dovha a shumisa u ṱoḓa ha vhana u funziwa sa tsumbo ine vhatevheli vhawe vha tea u i tevhela. (Mateo 18:3, 4) Ngauralo vhana vha na zwithu zwa ndeme zwine vha nga zwi ita vhurabelini ha Yehova. Hafhu, maipfi a lwonolu luimbo a bvela phanḓa nga uri: “Ee, na vhana vha nga hulisa Mudzimu wavho.”

Nga nḓila ya tsumbo ine vha ḓifara ngayo—hayani, tshikoloni, na huṅwe fhethu—vhana vhanzhi vho hulisa Mudzimu na miṱa ya havho. Yo vha phaṱutshedzo khulwane lungafhani khavho u vha na “vhabebi vha Vhakriste vhane vha funa zwo lugaho.” (Doiteronomio 6:7) Vhabebi vha ofhaho Mudzimu vha ita zwine Mudzimu a zwi amba, ane a vha Khotsi wa lufuno, na ane a funza zwivhumbiwa zwawe u tshimbila nḓilani yo teaho. Nahone vha wana phaṱutshedzo khulwane lungafhani! Nga hu fanaho, musi vha tshi funza vhana vhavho miṱani yavho, vha takala lungafhani u vha na vhana vhane “vha vha thetshelesa na u vha takadza”! (Yesaya 48:17, 18) Angélica, ane zwino a shuma davhini ḽa ofisi ḽa Mexico ḽa Ṱhanzi dza Yehova u ri: “Vhabebi vhanga tshifhinga tshoṱhe vho ita vhuḓidini ha u tshila u tendelana na maitele a Bivhili. Hezwo zwo ita uri vhuswa hanga vhu takadze. Ndo vha ndo takala.”

Vhakriste vho raloho vha a tenda uri zwi a vhuyedza vhukuma u ṱhogomela ifa ḽau ḽa muya. Khamusi ni muswa we a aluselwa muṱani une wa vha na maitele a vhukuma a Vhukriste. Arali zwo ralo, lwonolu luimbo lu fanaho lu a ni ṱuṱuwedza nga uri: “Vhoiwe vhaswa vha Vhakriste, lwelani u dzula nḓila dzaṋu dzo kuna.” Tshifhinga tshi ḓo swika tsha uri ni ḓiitele dziphetho, zwino “gudani u ḓitika nga Yehova ni tshee muswa./Fhedzi ni songo lwela u vha na bvumo.”

Arali na ita vhukhakhi ha u vhea phanda u ṱoḓa u vha na bvumo vhutshiloni haṋu, ngudo yoṱhe ye na i wana i nga vha ya mahandana nahone ni nga tshinya zwilavhelelwa zwaṋu zwa vhumatshelo. Lutamo lwa u ṱoḓa u vha na bvumo lu nga ita uri ni sa dzule no fhaṱuwa. Vhaṅwe vho fheleledza vha tshi khou konana na vhathu, vhane naho vha tshi vhonala vhe vhavhuḓi nahone vha tshi kunga, vha sa ṱhonifhi zwilinganyo zwa Vhakriste. Hezwo zwo vhonala kha Tara, mutambi dendele kha vidio ya Young People Ask—How Can I Make Real Friends? U fana na Tara, muswa muṅwe na muṅwe wa Mukriste ane a ita vhukonani na vhathu vha sa dzhieli nṱha vhurabeli ha ngoho vha thoma u zwi ṱhogomela nga u ṱavhanya kana ho no vha kale uri “khonani mmbi dzi ḓo ni tshinya,” samusi luimbo lu tshi ralo. Zwi dzhia miṅwaha minzhi u ṱahulela vhuḓifari havhuḓi, fhedzi vhu nga tshinyala nga u bonya ha iṱo.

Vhukuma, u tshila nga nḓila ine ya sumbedza  u ṱhonifha Mudzimu a zwi leluwi. Naho zwo ralo, samusi luimbo lu tshi bvela phanḓa lu tshi ri, “arali na humbula Mudzimu waṋu ni tshee muswa,/Nahone na shumela Yehova nga muya na nga ngoho,’’ ni ḓo fhaṱa mutheo wo khwaṱhaho u itela uri ni bvelele vhukuma. Nahone “musi ni tshi vha mualuwa ni ḓo wana dakalo.” Ni ḓo thoma u ṱhogomela vhukuma uri nga fhasi ha ṱhogomelo ya Yehova, a huna tshithu tshine tsha nga ni thivhela u ita zwo lugaho phanḓa hawe. Yeneyo ndi yone nḓila ya u vha mualuwa o vhibvaho na a ofhaho Mudzimu. Zwiṅwe hafhu, u dzhiela nṱha nḓila ye na aluswa ngayo ya Vhukriste zwi ni ṋea tshibuli tsha u “takadza mbilu ya Mudzimu.” Ndi ndugelo khulwane lungafhani ine vhathu vha nga vha nayo!—Mirero 27:11.

Nga zwenezwo, vhaswa, tshifhinga tshoṱhe humbulani nga nḓila ine ngudo i bvaho ha Yehova na kha vhabebi vha Vhakriste ya vha ya ndeme ngayo. U nga ri nḓila khulwane ine vha ni funa ngayo i nga ni sudzulusela u ita zwi takadzaho Yehova. U fana na Yesu Kristo na Timotheo muswa a fulufhedzeaho, ni ḓo ita uri Khotsi aṋu wa ṱaḓulu na vhabebi vhaṋu vha kha ḽifhasi vha takale. Nahone arali zwa itea na vha mubebi, zwi vhonala ni tshi ḓo tendelana na Angélica, we a bulwa mathomoni, we a ri: “Arali zwa itea nda vha na ṅwana, ndi ḓo lingedza nga nḓila dzoṱhe u dzhenisa u funa Yehova mbiluni ya onoyo ṅwana, nahone nda ita uri a livhiswe nga lwonolwo lufuno.” Vhukuma, nḓila yo lugaho i isaho vhutshiloni vhu sa fheli ndi ifa ḽa ndeme vhukuma!

[Ṱhaluso dzi re magumoni a siaṱari]