Vhagudiswa vho Ṱhaphudzaho vha Gilead vha Bvela Phanḓa vhe Vhakaṋi vha Fhiseaho!

“KHAṊO ndi khulu, vhakaṋi vhone a si vhanzhi. Ndi zwone humbelani Muṋe wa khaṋo uri a rume vhakaṋi khaṋoni yawe.” (Mateo 9:37, 38) Enea maipfi o vha a tshi pfala vhukuma kha vhagudiswa vho ṱhaphudzaho vha kilasi ya vhu-116 vha Tshikolo Tsha Bivhili Tsha Watchtower Tsha Gilead musi vha tshi khou ḓilugiselela u ya mishumoni yavho ya vhurumiwa.

Nga Mugivhela, wa ḽa 13 March, 2004, vhathu vha 6 684 vho kuvhangana ngei Tshisimani Tsha u Gudisa Tsha Patterson, New York, u katela na vhaṅwe vhe vha vha vho ṱalela kha dzithelevishini fhethu ho fhambanaho u itela u pfa mbekanyamushumo ya vho ṱhaphudzaho tshikoloni, he kilasi ya wana ndayo na ṱhuṱhuwedzo. Roṱhe ri nga vhuyelwa nga nyeletshedzo ye ya ṋewa samusi ri tshi khou shuma nga u fhisea khaṋoni ya muya.

Maipfi a u vula nga Theodore Jaracz, muraḓo wa Tshigwada Tshi Langaho we a ṱhaphudza Kilasi ya vhusumbe ya Gilead, o ombedzela maipfi a Yesu ane a ri: “Iyani . . . ni ite vhathu vhoṱhe vhafunziwa.” (Mateo 28:19, 20) Zwenezwo zwo vha zwo tea lungafhani, samusi vhe vha ṱhaphudza vho rumelwa u shuma mashangoni a 20 o fhambanaho! O humbudza vhagudiswa uri ngudo i bvaho Ipfini ḽa Mudzimu yo vha shomedzela u vha vhashumi vha fhiseaho khaṋoni ya ndeme vhukuma, nahone a vha ṱuṱuwedza u hulisa Yehova nga zwoṱhe zwine vha amba na u ita.—Mateo 5:16.

Nḓila Ya u vha Vhakaṋi vha Bvelelaho

Tshiambi tsha u thoma kha mbekanyamushumo tsho vha tshi Robert Wallen, we a shuma vhukuma na Tshikolo Tsha Gilead miṅwaha minzhi. Musi a tshi khou amba nga tshiṱoho tshine tsha ri “Pfaneleo Yavhuḓi ya u Pfela Vhuṱungu,” o vhudza vhagudiswa a ri: “U pfela vhuṱungu ndi luambo lune na vho dzingaho nḓevhe vha lupfa na vha re mabofu vha kona u hu vhona.” Yesu o vha a tshi ṱhogomela vhukuma u tsikeledzea ha vhaṅwe na u ṱoḓa u vha thusa. (Mateo 9:36) Vhagudiswa vha ḓo wana zwibuli zwinzhi zwa u ita nga u ralo—mushumoni wa u huwelela, tshivhidzoni, hayani ha vhurumiwa, na mbinganoni dzavho. Tshiambi tsho ṱuṱuwedza vho ṱhaphudzaho nga u ri: “Itani uri pfaneleo ya u pfela vhuṱungu i vhonale vhutshiloni haṋu musi ni tshi khou shumela vhaṅwe. Hu ḓo ṱoḓea uri ni ḓifare zwavhuḓi vhutshiloni ha ḓuvha ḽiṅwe na ḽiṅwe musi ni hayani ha vhurumiwa. Nga zwenezwo, ḓiimiseleni u ambara mbilu-tshilidzi.”—Vha-Kolosa 3:12.

Ha tevhela Gerrit Lösch, muraḓo ya Tshigwada Tshi Langaho we a ṱhaphudza kilasi ya vhu-41 ya tshikolo tsha Gilead, o amba nga thero ine ya ri “Vhahuweleli vha u Tshidzwa.” (Yesaya 52:7) U itela uri vhathu vha ponyoke musi ano maitele a zwithu a tshi fheliswa, vha fanela u thoma vha wana nḓivho yo teaho i bvaho Ipfini ḽa Mudzimu, vha ḓivhadze khagala lutendo lwavho, nahone vha lovhedzwe. (Vha-Roma 10:10; 2 Timotheo 3:15; 1 Petro 3:21) Naho zwo ralo, tshiitisi tshihulwane tsha u huwelela u tshidzwa a si tsha u tshidza  vhathu, fhedzi ndi tsha u hulisa Mudzimu. Nga zwenezwo, Wahashu Lösch o ṱuṱuwedza vhe vha vha vha tshi khou ya u vha vharumiwa a ri: “Hwalani mulaedza wa Muvhuso ni u ise mugumoni wa ḽifhasi, nahone ni vhe vhahuweleli vha fhiseaho vha u tshidzwa, zwoṱhe zwi rendise Yehova.”—Vha-Roma 10:18.

Mugudisi wa Gilead ane a pfi Lawrance Bowen o vhudzisa a ri: “Ni vhonetshela Lungafhani”? O ambela kha maipfi a Yesu o ṅwaliwaho kha Mateo 6:22 nahone a ṱuṱuwedza vhagudiswa vho ṱhaphudzaho u ita uri vha dzule iṱo ḽavho “ḽó tsha” u itela u ri “vha vhonetshele nga lwa muya nga nḓila ine ya hulisa Yehova na i vhuyedzaho vhathu ngavho.” U bva mathomoni a vhuḓinḓa hawe, Yesu o vhea tsumbo yo fhelelaho malugana na zwenezwi nga u livhisa ṱhogomelo yawe kha u ita zwine Mudzimu a zwi funa. Nga u elekanya nga zwithu zwavhuḓi zwe Khotsi awe vha mu funza musi e ṱaḓulu zwo thusa Yesu u konḓelela milingo ya Saṱhane musi e sogani. (Mateo 3:16; 4:1-11) Yesu o sumbedza tshoṱhe u ḓitika nga Yehova u itela u ḓadzisa mushumo we Mudzimu a mu ṋea wone. Nga hu fanaho, u itela u konḓelela milingo ine vha ḓo ṱangana nayo, vharumiwa vha fanela u bvela phanḓa vha tshi ḓigudisa Bivhili na u ḓitika tshoṱhe nga Yehova.

Mark Noumair, mugudisi wa Gilead we a ṱhaphudza kilasi ya vhu-77 ya Gilead, o phetha wonoyu  mutevhe wa dzinyambo nga tshiṱoho tshine tsha ri “Ri Zwanḓani Zwau.” (Yoshua 9:25) O ṱuṱuwedza vhagudiswa u edzisa mavhonele a Vhagibeoni vha kale. Naho Gibeoni wo vha u “muḓi muhulu, . . .[na] vhanna vhawo vho vha vhe vhahali vhoṱhe,” Vhagibeoni a vho ngo ṱoḓa vhuimo ha nṱha kana u lavhelela zwithu zwi tshi itwa nga nḓila yavho. (Yoshua 10:2) Vho takalela u shuma vhe “vhafhanzi vha dzikhuni na vhaki vha maḓi” nga fhasi ha Vhalevi u itela u tikedza vhurabeli ha Yehova. (Yoshua 9:27) Zwi re zwone ndi uri miraḓo ya kilasi yo ṱhaphudzaho yo vhudza Yoshua Muhulwane, Yesu Kristo, ya ri “Ri Zwanḓani Zwau.” Zwino, musi vha tshi khou thoma mishumo yavho mashangoni a kule, vha fanela u ṱuwa na eneo mavhonele, vha ṱanganedze mushumo naho u ufhio une Yoshua Muhulwane a ḓo vha ṋea wone.

Zwe zwa Ṱanganwa Nazwo na Dzinyambedzano

Tshiṱoho tsha nyambedzano tshe Wallace Liverance, we a ṱhaphudza kilasi ya vhu-61 ya Gilead na ane a dovha a vha mugudisi, a tshi haseledza na tshigwada tsha vhagudiswa tsho vha tshi tshi ri, “U Vula Maṅwalo nga Vhuḓalo.” Vho ṱalutshedza na u ita misumbedzo ya zwe vha ṱangana nazwo zwe zwa vha takadza vhuḓinḓani ha tsimu musi vha tshi khou bvela phanḓa na tshikolo tshavho. Zwo vha zwi khagala uri ngudo yavho khulwane ya Maṅwalo miṅwedzi i fhiraho miṱanu yo dzhena mbiluni dzavho nahone zwa vha sudzulusela u vhudza vhaṅwe zwe vha zwi guda. (Luka 24:32) Tshifhingani tsha gundo ya miṅwedzi miṱanu, muṅwe mugudiswa o kona u vhudza murathu wawe ṅwana wa mme awe zwithu zwe a vha a tshi khou zwi guda. Hezwo zwo ṱuṱuwedza murathu wawe u ṱoḓa tshivhidzo tsha hune a dzula hone nahone a thoma u ḓigudisa Bivhili. Zwino ndi muhuweleli a songo lovhedzwaho.

Nga murahu ha dzenedzo tshenzhelo, Richard Ashe na John Gibbard vho fara nyambedzano na vhashumi vha fulufhedzeaho vha Yehova vha tshifhinga tshilapfu vho vhalaho, u katela na vhadaleli vha zwivhidzo vhe vha vha vha tshi khou wana ngudo yo khetheaho Tshisimani Tsha Pfunzo Tsha Watchtower. Vho vha vhe vho ṱhaphudzaho kale kilasi dza Tshikolo Tsha Gilead. Muṅwe o humbula uri Wahashu Knorr o amba zwi tevhelaho tshifhingani tsha ngudo ya kilasi: “Gilead ni ḓo guda vhukuma. Fhedzi arali ra bva ri tshi khou ḓikukumusa, ri ḓo kundelwa. Ri tea u bva ri na mbilu dza vhulenda.” Vhahashu vha dalelaho zwivhidzo vho ṱuṱuwedza yeneyi kilasi uri vha vhe vhathu vha ṱhogomelaho vhaṅwe, na u tshilisana na vhaṅwe nga nḓila i fanaho na ye kristo a ita ngayo, na u ṱanganedza nga u ḓiṱukufhadza mushumo naho u ufhio une vha ṋewa wone. A zwi timatimisi uri u shumisa yeneyi nyeletshedzo zwi ḓo thusa vharumiwa vhaswa u vha vha bvelelaho mishumoni yavho.

Bvelani Phanḓa ni Vhakaṋi vha Fhiseaho

Vhathetshelesi vho vha na tshibuli tsha u thetshelesa Stephen Lett, muṅwe wa muraḓo wa Tshigwada Tshi Langaho. O ṋea nyambo khulwane ya mbekanyamushumo, i re na tshiṱoho tshine tsha ri “Bvelani Phanḓa ni Vhakaṋi vha Fhiseaho!” (Mateo 9:38) Khaṋoni ya vhukuma, tshifhinga tsha u kaṋa zwiliṅwa ndi tshiṱuku. Hu na ṱhoḓea ya uri vhakaṋi vha shume nga maanḓa. Naa a si zwa ndeme vhukuma zwenezwo kha tshino tshifhinga tsha vhufhelo ha ano maitele a zwithu? Khaṋoni khulwane ya muya, vhutshilo ha vhathu vhu khomboni. (Mateo 13:39) Wahashu Lett o ṱuṱuwedza vho ṱhaphudzaho u sa ‘ita mushumo nga dzithotho’ fhedzi vha ‘duge muyani’ na u ‘shumela Yehova’ kha ino khaṋo ine ya sa tsha ḓo dovhololwa. (Vha-Roma 12:11) Tshiambi tsho redza maipfi a Yesu ane a ri: “Imisani maṱo aṋu ni vhone masimu; o tshena, khaṋo yo no swika.” (Yohane 4:35) Nga murahu a ṱuṱuwedza vho ṱhaphudzaho u sumbedza u fhisetshela mushumo wa u kaṋa nga u ita vhuḓidini ha u swikelela vhathu nga tshifhinga na fhethu zwine vha nga wanala ngazwo na nga u dzhiela nṱha vhukuma u ṱanziela nga nḓila i songo dzudzanyiwaho. U ṱhogomela u ita zwibuli zwi nga ita uri zwi leluwe u ṋea vhuṱanzi ho khwaṱhaho. Yehova ndi Mudzimu a fhiseaho, nahone u lavhelela roṱhe ri tshi mu edzisa na u shuma vhukuma khaṋoni ya muya.—2 Dzikhosi 19:31; Yohane 5:17.

Musi a tshi phetha mbekanyamushumo, mudzulatshidulo, Wahashu Jaracz, o fhirisa dzindumeliso dzi bvaho ofisini dza madavhi o vhalaho nahone a ṋea vhagudiswa diploma dzavho. Muṅwe mugudi o ṱhaphudzaho o vhala vhurifhi vhu bvaho kha kilasi, vhu tshi kho ṱalusa u livhuha huhulwane nga ngudo ye vha i wana. Zwi khagala uri mbekanyamushumo ya vhagudi vho ṱhaphudzaho ya kilasi ya vhu-116 yo ita uri vhoṱhe vhe vha vha vhe hone vha ḓiimisele u bvela phanḓa na mushumo wa u kaṋa nga u fhisea.

[Bogisi kha siaṱari 25]

MBALO DZA KILASI

Mbalo ya mashango o imelwaho: 6

Mbalo ya mashango e vha rumelwa khao: 20

Mbalo ya vhagudiswa: 46

Mbalotshikati ya miṅwaha: 34,2

Mbalotshikati ya miṅwaha ngohoni: 17,2

Mbalotshikati ya miṅwaha ya vhuḓinḓani ha tshifhinga tshoṱhe: 13,9

[Tshifanyiso kha siaṱari 26]

Kilasi Ya Vhu-116 Ya Vhagudiswa Vho Ṱhaphudzaho Vha Tshikolo Tsha Bivhili Tsha Watchtower Tsha Gilead

Kha mutevhe u re fhasi, miduba yo vhaliwa u bva phanḓa u ya murahu, nahone madzina o tevhakanyiswa u bva kha tsha monde u ya kha tsha u ḽa mudubani muṅwe na muṅwe.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.