‘Iyani Ni Ite Vhafunziwa’
‘Iyani Ni Ite Vhafunziwa’
“Ndo ṋewa maanḓa oṱhe ngei ṱaḓulu na fhano fhasi. Nga zwenezwo, iyani ni ite vhathu vhoṱhe vhafunziwa.”—MATEO 28:18, 19.
1, 2. (a) Ndi mushumo ufhio we Yesu a u ṋea vhatevheli vhawe? (b) Ndi mbudziso dzifhio malugana na ndaela dza Yesu dzine dza ḓo haseledzwa?
HO VHA hu nga tshimedzi ngei Isiraele nga 33 C.E., nahone vhatevheli vha Yesu vho vha vho kuvhangana thavhani ngei Galilea. Murena wavho ane a kha ḓi tou bva u vuwa vhafuni u tsini na u gonya ṱaḓulu, fhedzi u na tshiṅwe tshithu tsha ndeme tshine a fanela u vha vhudza tshone. Yesu u na mushumo une a ṱoḓa u vha ṋea wone. Wo vha u mushumo ufhio? Vhafunziwa vhawe vho aravha hani? Nahone wonoyo mushumo uri kwama hani ṋamusi?
2 Zwe Yesu a zwi amba zwo ṅwaliwa kha Mateo 28:18-20: “Ndo ṋewa maanḓa oṱhe ngei ṱaḓulu na fhano fhasi. Nga zwenezwo, iyani ni ite vhathu vha tshakha dzoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa. Ni vha funze u ita zwoṱhe zwe nda ni laya. Huno vhonani, ndi na’nwi misi yoṱhe u swika vhufheloni ha ḽifhasi.” (vhambedzani NW) Yesu o amba nga ha “maanḓa oṱhe,” “tshaka dzoṱhe,” “zwoṱhe zwe nda ni laya,” na “misi yoṱhe.” Ndaela yawe i katelaho yeneyi mibulo miṋa i takusa mbudziso dza ndeme, dzine dza nga pfufhifhadzwa nga maipfi ndi ngani? Ngafhi? mini? na lini? Kha ri haseledze dzenedzi mbudziso nga nthihi nga nthihi. *
“Ndo Ṋewa Maanḓa Oṱhe”
3. Ndi ngani ri tshi fanela u thetshelesa ndaela ya u ita vhafunziwa?
3 Tsha u thoma, ndi ngani ri tshi fanela u thetshelesa ndaela ya u ita vhafunziwa? Yesu o ri: “Ndo ṋewa maanḓa oṱhe ngei ṱaḓulu na fhano fhasi. Nga zwenezwo, iyani ni ite vhathu vha tshaka dzoṱhe vhafunziwa.” Mubulo une wa ri “nga zwenezwo” u sumbedza tshiitisi tshihulwane tsha uri ndi ngani ri tshi fanela u thetshelesa yeneyi ndaela. Ndi nga ṅwambo wa uri Yesu, ene we a ṋea ndaela, u na “maanḓa oṱhe.” Maanḓa awe ndi mahulwane lungafhani?
4. (a) Yesu u na maanḓa mangafhani? (b) U pfesesa hashu maanḓa a Yesu hu fanela u ri sudzulusela u dzhia hani ndaela ya u ita vhafunziwa?
4 Yesu u na maanḓa kha tshivhidzo tshawe, nahone u bva nga 1914 o vha na maanḓa kha Muvhuso muswa wa Mudzimu une wa kha ḓi tou bva u tikwa. (Vha-Kolosa 1:13; Ndzumbululo 11:15) Ndi muruṅwa muhulwane nahone nga ṅwambo wa zwenezwo mmbi yoṱhe ya ṱaḓulu ya vharuṅwa vha zwigidi zwa dzimilioni i fhasi ha maanḓa awe. (1 Vha-Thesalonika 4:16; 1 Petro 3:22; Ndzumbululo 19:14-16) O ṋewa eneo maanḓa nga Khotsi awe u itela u fhelisa “mivhuso yoṱhe, na vhadzia-maanḓa vhoṱhe na vhadzia-nungo” vhane vha lwa na milayo yo lugaho. (1 Vha-Korinta 15:24-26; Vha-Efesa 1:20-23) Yesu ha na maanḓa kha zwithu zwi tshilaho fhedzi. U dovha a vha “muhaṱuli wa vha tshilaho na vho faho” nahone u na maanḓa e a ṋewa nga Mudzimu a u vusa vho faho. (Mishumo 10:42; Yohane 5:26-28) Vhukuma ndaela yo ṋewaho nga Muthu a re na maanḓa mahulwane nga u rali i fanela u dzhiiwa i ya ndeme vhukuma. Nga zwenezwo, ri thetshelesa ndaela ya Kristo nga ṱhonifho na nga u ḓifunela ya u ‘ya na u ita vhafunziwa.’
5. (a) Petro o thetshelesa hani maipfi a Yesu? (b) U thetshelesa ha Petro kha ndaela ya Yesu zwo ḓisa phaṱhutshedzo dzifhio?
5 Mathomoni a vhuḓinḓa hawe ha kha ḽifhasi, Yesu o funza vhafunziwa vhawe nga nḓila khulwane uri u ṱhogomela maanḓa awe na u thetshelesa ndaela dzawe zwi ḓisa phaṱhutshedzo. O vhuya a vhudza Petro we a vha e murei wa khovhe, a ri: “Sendedza he ha ita tivha, ni ṱharamudze mammbule aṋu uri ni fashe.” Petro o vha e na vhuṱanzi ho khwaṱhaho ha uri a huna khovhe, ngauralo a vhudza Yesu a ri: “Thovhela, ro ḓi-netisa vhusiku hoṱhe ri si wane tshithu.” Naho zwo ralo, Petro o amba zwi tevhelaho nga u ḓiṱukufhadza: “Huno vhunga wó no amba, mammbule ndi a a ṱharamudza.” Musi Petro o no thetshelesa ndaela ya Kristo, o fasha “khovhe nzhi.” O kulea nungo, Petro “a wela tsini ha magona a Yesu a ri: Ibvá kha nṋe, ngauri ndi munna wa mu-ita-zwivhi, Murena!” Fhedzi Yesu a mu fhindula a ri: “U songo ofha; zwino U ḓo thoma u vha mufashi wa vhathu.” (Luka 5:1-10; Mateo 4:18) Ri guda mini kha aya mafhungo?
6. (a) Mafhungo a u fashwa ha khovhe nga vhuṱolo a sumbedza mini malugana na mufuda wa u thetshelesa une Yesu a ṱoḓa wone? (b) Ri nga edzisa hani Yesu?
6 Yesu o ṋea Petro, Andrea, na vhaṅwe vhaapostola mushumo wa u “fasha vhathu,” hu si nga phanḓa, fhedzi nga murahu ha u fasha khovhe nga nḓila i mangadzaho. (Marko 1:16, 17) Zwi khagala uri Yesu o vha a tshi ṱoḓa uri vha ḓivhe uri ndi ngani vha tshi fanela u thetshelesa. O ṋea vhenevho vhanna zwiitisi zwi pfalaho zwa uri ndi ngani vha tshi fanela u mu thetshelesa. Samusi u thetshelesa havho ndaela ya Yesu ya u ṱharamudza mambule zwo ḓisa mvelelo dzavhuḓi, na u thetshelesa ndaela ya Yesu ya u “fasha vhathu” zwi ḓo ḓisa phaṱhutshedzo khulwane. Vhaapostola vho thetshelesa Yesu nga lutendo luhulwane. Eneo mafhungo a phetha nga uri: “Musi vhó sendedza magungwa avho philiphilini, vha ṱutshela zwoṱhe, vha mu tevhela.” (Luka 5:11) Ṋamusi, musi ri tshi khou ita mushumo wa u ita vhafunziwa, ri edzisa Yesu. A ri ṱoḓi vhathu vha tshi sokou ita zwine ra vha vhudza zwone, fhedzi ri a vha ṱalutshedza uri ndi ngani vha tshi fanela u thetshelesa ndaela ya Kristo.
Zwiitisi zwi Pfalaho na Zwiṱuṱuwedzi zwo Teaho
7, 8. (a) Ndi zwiitisi zwifhio zwa Maṅwalo zwa u huwelela nga Muvhuso na u ita vhafunziwa? (b) Ndi luṅwalo lufhio lwe lwa ni ṱuṱuwedza vhukuma u bvela phanḓa ni tshi ita mushumo wa u huwelela? (Dovhani ni sedze ṱhaluso i re magumoni a siaṱari.)
7 Nga ṅwambo wa uri ri a ṱhogomela maanḓa a Kristo, ri a ṱanganela mushumoni wa u huwelela Muvhuso na wa u ita vhafunziwa. Ndi zwifhio zwiṅwe zwiitisi zwa Maṅwalo zwi itaho uri ri ite wonoyu mushumo zwine ra nga zwi vhudza vhane ra ṱoḓa uri vha ite mishumo mivhuya? Ṱhogomelani zwo ambiwaho nga Ṱhanzi dzo vhalaho dzi fulufhedzeaho dzi bvaho mashangoni o fhambanaho, nahone ni ṱhogomele nḓila ine maṅwalo o redzwaho a tikedza ngayo zwine vha amba.
8 Roy, o lovhedzwaho nga 1951 u ri: “Musi ndi tshi ḓiṋekedza kha Yehova, ndo mu fulufhedzisa u mu shumela misi yoṱhe. Ndi ṱoḓa u tevhela zwe nda fulufhedzisa.” (Psalme ya 50:14; Mateo 5:37) Heather, we a lovhedzwa nga 1962 u ri: “Musi ndi tshi humbula zwoṱhe zwe Yehova a nyitela zwone, ndi ṱoḓa u mu sumbedza u livhuha hanga nga u mu shumela nga u fulufhedzea.” (Psalme ya 9:1, 9-11; Vha-Kolosa 3:15) Hannelore, o lovhedzwaho nga 1954 u ri: “Tshifhinga tshoṱhe musi ri vhuḓinḓani, ri tikedzwa nga vharuṅwa—ndi ndugelo khulwane lungafhani!” (Mishumo 10:30-33; Ndzumbululo 14:6, 7) Honor, o lovhedzwaho nga 1962 u ri: “Musi tshifhinga tsha Yehova tsha u haṱula tshi tshi swika, a thi ṱoḓi na muthu na muthihi hune nda dzula hone a tshi pomoka Yehova na Ṱhanzi dzawe sa vha sa londi nahone vha ri, ‘a thongo vhuya nda wana tsevho!’ ” (Hesekiele 2:5; 3:17-19; Vha-Roma 10:16, 18) Claudio, o lovhedzwaho nga 1974 u ri: “Musi ri tshi khou huwelela, ri vha ri “phanḓa ha Mudzimu na Kristo.” Edzani u humbula nga zwenezwo! Musi ri vhuḓinḓani, ri vha ri tshi khou ḓiphina nga u vha na Khonani dza khwine.”—2 Vha-Korinta 2:17. *
9. (a) Mafhungo a u fasha khovhe he Petro na vhaṅwe vhaapostola vha ṱangana naho a dzumbulula mini nga ha zwiitisi zwo teaho zwa u thetshelesa Kristo? (b) Ndi tshiitisi tshifhio tsho teaho tsha u thetshelesa Mudzimu na Kristo ṋamusi, nahone ndi ngani?
9 Mafhungo a u fashwa ha khovhe hu mangadzaho a dovha a sumbedza vhuhulwane ha u vha na tshiitisi tsho teaho tsha u thetshelesa Kristo—lufuno. Musi Petro a tshi ri, “Ibvá kha nṋe, ngauri ndi munna wa mu-ita-zwivhi,” Yesu ho ngo ṱuwa, kana u sasaladza Petro nga tshivhi naho tshi tshifhio. (Luka 5:8) Yesu ho ngo vhuya a sasaladza Petro nge a mu humbela uri a ṱuwe. Nṱhani hazwo, Yesu o fhindula nga vhulenda a ri: “U songo ofha.” U ofha hu songo teaho ho vha hu tshi ḓo vha hu tshiitisi tsho khakheaho tsha u thetshelesa Kristo. Nṱhani hazwo, Yesu o vhudza Petro uri ene na khonani dzawe vha ḓo ita mushumo wa ndeme wa u fasha vhathu. Ṋamusi, nga hu fanaho a ri shumisi nyofho kana zwiṅwe zwiṱuṱuwedzi zwi si zwavhuḓi, u fana na u ḓipfa u na mulandu na u ḓisola, u itela u kombetshedza vhaṅwe u ri vha thetshelese Kristo. Ndi u thetshelesa fhedzi hu bvaho mbiluni ho thewaho kha u funa Mudzimu na Kristo hune ha takadza mbilu ya Yehova.—Mateo 22:37.
“Ni Ite Vhathu vha Tshakha Dzoṱhe Vhafunziwa”
10. (a) Ndi mbuno ifhio ya ndaela ye Yesu a i ṋea vhafunziwa vhawe ye ya vha ḓisela vhuleme vhuhulwane? (b) Vhafunziwa vho aravha hani kha ndaela ya Yesu?
10 Mbudziso ya vhuvhili ine ra nga i vhudzisa malugana na ndaela ya Kristo ndi ya uri, Ndi ngafhi hune wonoyu mushumo wa u ita vhafunziwa wa fanela u itwa hone? Yesu o vhudza vhatevheli vhawe a ri: “Ni ite vhathu vha tshaka dzoṱhe vhafunziwa.” Nga phanḓa ha tshifhinga tsha vhuḓinḓa ha Yesu, vhathu vha dzitshaka vho vha vha tshi ṱanganedzwa musi vha tshi ḓa Isiraele u shumela Yehova. (1 Dzikhosi 8:41-43) Yesu ene muṋe o huwelela zwihuluhulu kha Vhayuda vha ṋama, fhedzi zwino u vhudza vhatevheli vhawe uri vha ye kha vhathu vha tshaka dzoṱhe. Zwi re zwone ndi uri, fhethu hune khovhe dza wanala hone, kana fhethu ha u huwelela, ha vhafunziwa vhawe ho vha hu tshi katela fhedzi “kudamu” kuṱuku—Vhayuda vha ṋama—fhedzi hu si kale ho vha hu tshi ḓo katela “lwanzhe” lwoṱhe lwa vhathu. Naho wonoyu wo vha u tshi ḓo vha mushumo u konḓaho kha vhafunziwa vhawe, vho thetshelesa vho khwaṱha ndaela ya Yesu. Nga murahu ha miṅwaha i sa swiki 30 nga murahu ha lufu lwa Yesu, muapostola Paulo o kona u ṅwala uri mafhungo maḓifha o huwelelwa hu si kha Vhayuda fhedzi, fhedzi na “kha zwivhumbwa zwoṱhe zwa tsini ha ḽiṱaḓulu.”—Vha-Kolosa 1:23.
11. Ndi nyengedzeo ifhio ya ‘fhethu ha u rea khovhe’ ye ya bvelela mathomoni a ḓana ḽa vhu-20 ḽa miṅwaha?
11 Zwifhingani zwa zwenezwino, ho vhonala u engedzea ho raloho ha fhethu ha u huwelela. Mathomoni a ḓana ḽa vhu-20 ḽa miṅwaha, ‘fhethu ha u rea khovhe’ ho vha hu tshi wanala mashangoni a si gathi. Fhedzi vhatevheli vha Kristo nga tshenetsho tshifhinga vho tevhela tsumbo ya Vhakriste vha ḓana ḽa u thoma ḽa miṅwaha nahone vha engedza nga mafulufulu tsimu ine vha huwelela khayo. (Vha-Roma 15:20) Mathomoni a vho-1930, vho vha vha tshi khou ita vhafunziwa mashangoni a ṱoḓaho u vha ḓana. Ṋamusi, ‘fhethu ha u rea khovhe’ hu wanala mashangoni a 235.—Marko 13:10.
“Vha Nyambo Dzoṱhe”
12. Vhuporofita ha Sakaria 8:23 vhu ombedzela vhuleme vhufhio?
12 U ita vhafunziwa vha tshaka dzoṱhe zwi a konḓa hu si nga vhuhulwane ha tsimu fhedzi, fhedzi na nga vhunzhi ha nyambo dzi ambiwaho nga dzitshaka. A tshi shumisa muporofita Sakaria, Yehova o dzula o amba a ri: “Misi iyo vhanna vha ná fumi [vha nyambo dzoṱhe, NW], vha ḓo fara munna muthihi wa Yuda, vha tou mu fara nga dzinguvho, vha ri: Litsha ri tshimbile na vho-inwi, ngauri ro zwi pfa zwauri Mudzimu u na inwi.” (Sakaria 8:23) Nga u ḓadzea huhulwane ha honovhu vhuporofita, ‘munna wa Muyuda’ u imela masalela a Vhakriste vho ḓodzwaho, ngeno “vhanna vha ná fumi” vha tshi imela vha “gogo ḽihulu.” * (Ndzumbululo 7:9, 10; Vha-Galata 6:16) Gogo ḽihulu ḽa vhafunziwa vha Kristo ḽi ḓo waniwa kha tshaka nnzhi, nahone samusi Sakaria o zwi ṱhogomela, vha ḓo vha vha tshi khou amba nyamba dzo vhalaho. Naa ḓivhazwakale ya musalauno ya vhathu vha Mudzimu i sumbedza ḽeneḽo sia ḽa vhufunziwa? Ee.
13. (a) Ndi mvelaphanḓa ifhio malugana na dzinyambo ye ya vha hone vhukati ha vhathu vha Mudzimu vha musalauno? (b) Tshigwada tsha mukoma a fulufhedzeaho tsho aravha hani kha ṱhoḓea ine ya khou engedzea ya zwiḽiwa zwa muya nga nyambo dzo fhambanaho? (Katelani na bogisi ḽine ḽa ri “Khandiso dza Vha sa Vhoni.”)
13 Nga 1950 luambo lwa ḓamuni lwa Ṱhanzi dza Yehova tharu kha ṱhanu shangoni ḽoṱhe lwo vha lu Luisimane. Nga 1980 tshenetsho tshivhalo tsha shanduka tsha vha vhathu vhavhili kha vhaṱanu, nahone ṋamusi ndi muthu muthihi kha vhaṱanu a ambaho Luisimane. Mukoma a fulufhedzeaho na wa vhuṱali o kona hani u swikelela dzenedzi nyambo nnzhi? Nga u ṋea zwiḽiwa zwa muya nga nyambo nnzhi u fhira naho hu lini. (Mateo 24:45) Sa tsumbo, nga 1950 khandiso dzashu dzo vha dzi tshi gandiswa nga nyambo dza 90, fhedzi ṋamusi dzi gandiswa nga nyambo dzi ṱoḓaho u vha 400. Naa honohu u livhisa ṱhogomelo kha vhathu vha nyambo dzo fhambanaho zwo ḓisa mvelelo? Ee! Mbalotshikati ya vhathu vha ṱoḓaho u vha 5000 vha bvaho kha “ndimi dzoṱhe” vha vha vhafunziwa vha Kristo vhege iṅwe na iṅwe ya ṅwaha! (Ndzumbululo 7:9) Nahone nyengedzeo i khou bvela phanḓa. Kha maṅwe mashango “mambule” a khou fasha zwavhuḓi vhukuma!—Luka 5:6; Yohane 21:6.
Vhuḓinḓa vhu Fushaho—Naa ni Nga Ṱanganela Khaho?
14. Ri nga thusa hani vhathu vha re tsimuni yashu vhane vha amba luambo lusili? (Katelani na bogisi ḽine ḽa ri “Luambo lwa Zwanḓa na U Ita Vhafunziwa.”)
14 Mashangoni manzhi a Vhukovhela, u swika ha vhathu vhanzhi vha bvaho mashangoni a nnḓa zwo bveledza vhuleme ha u ita vhafunziwa kha vhathu vha “ndimi dzoṱhe.” (Ndzumbululo 14:6) Ri nga thusa hani vhathu vha re tsimuni yashu vhane vha si ambe luambo lu fanaho na lwashu? (1 Timotheo 2:4) Ri shumisa zwishumiswa zwo teaho. Ṋeani vhenevho vhathu khandiso nga luambo lwavho. Arali zwi tshi konadzea, dzudzanyani Ṱhanzi dzine dza amba luambo lwavho uri dzi vha dalele. (Mishumo 22:2) Zwi a leluwa zwino u ita dzenedzi ndugiselelo, samusi vhunzhi ha Ṱhanzi dzo guda u amba luambo lwo engedzeaho u itela u thusa vhathu vha bvaho mashangoni a nnḓa uri vha vhe vhafunziwa vha Kristo. Muvhigo u sumbedza uri u thusa nga yeneyi nḓila zwi a vhuyedza vhukuma.
15, 16. (a) Ndi tsumbo dzifhio dzi sumbedzaho uri zwi a vhuyedza u thusa vhane vha amba luambo lu sili? (b) Ndi mbudziso dzifhio dzine ra nga dzi ṱhogomela malugana na u shuma tsimu ya luambo lu sili?
15 Ṱhogomelani tsumbo mbili dzi bvaho Netherlands, hune mushumo wa u huwelela Muvhuso wa itwa nga nyambo dza 34. Vhavhingani vha Dziṱhanzi vho khetha nga u ḓifunela u ya u ita vhafunziwa vhukati ha ṱhunḓu dzi ambaho Lupolish. Vhuḓidini havho ho vhuyedza vhukuma lwe wa munna a vhuya a kombetshedzea u fhungudza maḓuvha e a vha a tshi shuma ngao u itela uri a vhe na ḓuvha ḽo engedzeaho kha vhege uri a kone u guda Bivhili na vha re na dzangalelo. Nga u ṱavhanya vhenevho vhavhingani vho vha vha tshi khou fara pfunzo dza Bivhili dza 20 vhege iṅwe na iṅwe. Vha ri: “Vhuḓinḓa hashu ho ita uri ri takale.” Vhane vha ita vhathu vhafunziwa vha a takala vhukuma musi vhane vha pfa mafhungo-ngoho a Bivhili nga luambo lwavho vha tshi sumbedza u zwi livhuha. Sa tsumbo, tshifhingani tsha muṱangano we wa farwa nga Luvietman, muṅwe mukalaha o ima nahone a humbela thendelo ya u amba. A tshi khou tsengisa miṱodzi, o vhudza Dziṱhanzi a ri: “Ndi a livhuha vhukuma kha vhuḓidini vhune na khou vhu ita ha u guda luambo lwanga lu konḓaho. Ndo takalela u guda zwithu zwinzhi zwavhuḓi zwi bvaho Bivhilini na musi ndo no kalaha.”
16 Ndi ngazwo zwi sa mangadzi uri vhane vha shuma zwivhidzoni zwa luambo lusili vha ḓipfa vho lambedzwa vhukuma. Vhavhingani vha bvaho Britain vho ri: “Vhuḓinḓa ha tsimu ya luambo lwa nnḓa ndi he ra vhu takalela vhukuma kha miṅwaha yashu yoṱhe ya 40 ri tshumeloni ya Muvhuso.” Naa ni nga dzudzanya zwiimo zwaṋu u itela u shuma kha honohu vhuḓinḓa vhu nyanyulaho? Arali ni kha ḓi ya tshikoloni, naa ni nga guda luambo lusili u itela u ḓilugiselela wonoyu mufuda wa vhuḓinḓa? U ita nga u ralo zwi nga ita uri ni vhe na vhutshilo vhu fushaho ho ḓalaho dziphaṱhutshedzo. (Mirero 10:22) Ndi ngani ni sa zwi haseledzi na vhabebi vhaṋu?
U Shandula Maitele Ashu
17. Ri nga swikela hani vhathu vhanzhi tsimuni ya zwivhidzoni zwashu?
17 Zwi a pfala uri zwiimo a zwi tendeli vhunzhi hashu u “ṱharamudza” mambule tsimuni dza luambo lusili. Naho zwo ralo, ri nga kona u swikelela vhathu vho engedzeaho u fhira zwino tsimuni ya zwivhidzoni zwashu. Hani? Nga u shandula maitele ashu nṱhani ha mulaedza washu. Fhethu hunzhi hu na vhathu vhanzhi vhane vha dzula zwifhaṱoni zwo tsireledzwaho vhukuma. Vhanzhi a ri vha wani mahayani musi ri tshi vha dalela ri vhuḓinḓani ha nnḓu nga nnḓu. Nga u ralo ri fanela u ṱharamudza “mambule” ashu nga zwifhinga zwo fhambanaho na fhethu ho fhambanaho. Nga zwenezwo ri ḓo vha ri tshi khou edzisa Yesu. O lingedza nga nḓila dzoṱhe u amba na vhathu nga fhasi ha zwiimo zwo fhambanaho.—Mateo 9:9; Luka 19:1-10; Yohane 4:6-15.
18. U ṱanziela nga maitele o fhambanaho zwo sumbedza u bvelela nga nḓila-ḓe? (Katelani na bogisi ḽine ḽa ri “U Ita Vhafunziwa kha Vhathu vha Tsimuni ya Mabinduni.”)
18 Zwipiḓani zwiṅwe zwa shango, u ṱanziela fhethu huṅwe na huṅwe hune vhathu vha wanala hone ndi maitele a ndeme a u ita vhafunziwa. Vhane vha ita vhathu vhafunziwa vha re na tshenzhelo vho livhisa ṱhogomelo vhukuma kha u ṱanziela fhethu ho fhambanaho. Nga nnḓa ha u ya nnḓu nga nnḓu, vhahuweleli zwino vha ṱanziela vhukavhamabufho, dziofisini, mavhengeleni, hune ha pakiwa dzigoloi, vhuima bisi, dziphakani, dzibitshini, na huṅwe fhethu. Vhunzhi ha Ṱhanzi dzo lovhedzwaho dza ngei Hawaii dzo wanala fhethu ho raloho. U shumisa maitele o fhambanaho zwi ri thusa u ita nga vhuḓalo zwe Yesu a laedza vhafunziwa vhawe.—1 Vha-Korinta 9:22, 23.
19. Ndi masia afhio mavhili a ndaela ya Yesu kha riṋe ane a ḓo haseledzwa theroni i tevhelaho?
19 Mushumo wa Yesu wa u ita vhafunziwa a u kateli zwidodombedzwa zwa uri ndi ngani na ngafhi hune ra tea u ita wonoyu mushumo fhedzi, fhedzi u dovha wa katela uri ndi mini zwine ra tea u zwi huwelela na uri ri ḓo ita zwenezwo u swika lini. Enea masia mavhili a ndaela ya Yesu kha riṋe a ḓo haseledzwa theroni i tevhelaho.
[Ṱhaluso dzi re magumoni a siaṱari]
^ phar. 2 Ri ḓo haseledza mbudziso mbili dza u thoma kha ino khandiso. Mbili dza u fhedzisa dzi ḓo haseledzwa theroni i tevhelaho.
^ phar. 8 Zwiṅwe zwiitisi zwa u huwelela zwi wanala kha Mirero 10:5; Amosi 3:8; Mateo 24:42; Marko 12:17; Vha-Roma 1:14, 15.
^ phar. 12 U itela u wana mafhungo o engedzeaho a u ḓadzea ha honovhu vhuporofita, sedzani Tshiingamo, tsha ḽa 15 May, 2001, siaṱari 12, na bugu Vhuporofita ha Yesaya—Tshedza Tsha Vhathu Vhoṱhe, Volumu 2, siaṱari 408, yo gandiswaho nga Ṱhanzi dza Yehova.
Naa Ni a Zwi Humbula?
• Ri ṱanganela kha u huwelela Muvhuso na u ita vhafunziwa nga zwiitisi na zwiṱuṱuwedzi zwifhio?
• Vhashumeli vha Yehova ṋamusi vho ita ndaela ya Yesu ya u ita vhafunziwa vha tshaka dzoṱhe u swika kha vhuimo vhufhio?
• Ri nga shumisa hani ‘maitele a u fasha’ o fhambanaho, nahone ndi ngani ri tshi tea u ita nga u ralo?
[Mbudziso Dza Pfunzo]
[Bogisi/Zwifanyiso kha siaṱari 10]
Khandiso dza Vha sa Vhoni
Albert ndi muhulwane wa Mukriste nahone a dovha a vha muḓinḓa wa tshifhinga tshoṱhe ane a dzula United States. Ha vhoni. Nga u shumisa khandiso dza Bivhili dza vhathu vha sa vhoni zwo mu thusa uri a vhe a bvelelaho vhukuma vhuḓinḓani hawe, u katela na kha mishumo yawe samusi e mulavhelesi wa tsimu. U kona hani u ita mishumo ya tshivhidzo?
James, ane a vha mulavhelesi wa tshivhidzo, u ri: “A ri athu vhuya ra vha na mulavhelesi wa tsimu a bvelelaho tshivhidzoni tshashu a fhiraho Albert.” Albert ndi muṅwe wa vhathu vha ṱoḓaho u vha 5000 vha sa vhoni kha ḽa United States vhane, miṅwaha yoṱhe, vha wana khandiso dza Bivhili dza vhathu vha sa vhoni nga Luisimane na nga Lupania. Zwi re zwone ndi uri u bva nga 1912 u ya phanḓa, tshigwada tsha mukoma a fulufhedzeaho tsho gandisa khandiso dzi fhiraho ḓana dzo fhambanaho dza vhathu vha sa vhoni. Nga u shumisa thekinolodzhi ya musalauno, Ṱhanzi dza Yehova zwino dzi gandisa khandiso dza dzimilioni dza vhathu vha sa vhoni ṅwaha muṅwe na muṅwe nga nyambo dzi fhiraho fumi na u dzi phaḓaladza mashangoni a fhiraho 70. Naa ni a ḓivha muṅwe muthu ane a nga vhuyelwa nga dzenedzi khandiso dza Bivhili dzo lugiselelwaho vha sa vhoni?
[Bogisi/Tshifanyiso kha siaṱari 11]
Luambo lwa Zwanḓa na u Ita Vhafunziwa
Ṱhanzi dza Yehova shangoni ḽoṱhe, u katela na vhunzhi ha vhaswa vha fhiseaho, vho guda luambo lwa zwanḓa u itela u thusa vhathu vho dzingaho nḓevhe uri vha vhe vhafunziwa vha Kristo. Nga ṅwambo wa zwenezwo, kha ḽa Brazil fhedzi, ho lovhedzwa vhathu vho dzingaho nḓevhe vha 63 nga ṅwaha muthihi wa zwenezwino nahone Ṱhanzi dzo dzingaho nḓevhe dza 35 henefho ndi vhaevangeli vha tshifhinga tshoṱhe. Shangoni ḽoṱhe, hu na zwivhidzo na zwigwada zwi shumisaho luambo lwa zwanḓa zwi fhiraho 1200. Tsimu ya vhathu vha shumisaho luambo lwa zwanḓa ndi yone khulwane vhukuma shangoni, u katela na Russia ḽoṱhe!
[Bogisi kha siaṱari 12]
U Ita Vhafunziwa kha Vhathu vha Tsimuni ya Mabinduni
Musi vho dalela vho ramabindu dziofisini dzine vha shuma khadzo, iṅwe Ṱhanzi ya ngei Hawaii yo ṱangana na mulangi wa khamphani ya vhuendedzi. Naho o vha o farakanea, onoyo munna o tenda u guda Bivhili mimunithi ya 30 nga vhege ofisini yawe. Nga matsheloni maṅwe na maṅwe a Ḽavhuraru, o vha a tshi vhudza vhane a shuma navho uri vha songo mu thithisa nga luṱingo nahone a thetshelesa vhukuma zwe a vha a tshi khou zwi guda. Iṅwe Ṱhanzi ngei Hawaii i guda Bivhili luthihi nga vhege na muṋe wa vhengele ḽa u runga zwienda. Yeneyo ngudo yo vha i tshi farelwa henefho vhengeleni kha khaunthara. Musi hu tshi ḓa ane a khou ṱoḓa thuso, onoyo wa Ṱhanzi u a imela thungo. Musi we a vha a tshi khou ṱoḓa thuso o no ṱuwa, Ṱhanzi i bvela phanḓa na u vhala.
Mulanguli na muṋe wa vhengele vho kwamiwa nga ṅwambo wa uri Ṱhanzi dzo dzhia vhukando ha u ṱharamudza “mambule” fhethu ho fhambanaho. Naa ni nga humbula nga fhethu tshivhidzoni tsha vhoiwe hune na nga kona u kwama vhathu vhane vha konḓa u wanala mahayani avho?
[Tshifanyiso kha siaṱari 12]
Naa ni nga shuma tsimuni ya luambo lusili?