Mudzimu u a Ni Ṱhogomela zwa Vhukuma

ZWO ḓowelea u ṱoḓa thuso kha Mudzimu musi ro hanganea. Zwi re zwone ndi uri “ndi muhulu, ndi wa maanḓa manzhi; vhuṱali hawe a vhu na a vhu vhalaho a fhedza.” (Psalme ya 147:5) Ndi ene ane a kona u ri thusa u itela u sedzana na vhuleme hashu. Nga nnḓa ha zwenezwo, Bivhili i ri ramba uri ri ‘tevhulele dzimbilu dzashu’ phanḓa hawe. (Psalme ya 62:8) Nga zwenezwo, ndi ngani vhathu vhanzhi nga u rali vha tshi kha ḓi vha na mavhonele a u ri Mudzimu ha fhinduli thabelo dzavho? Naa zwenezwo zwi amba uri ha ṱhogomeli?

Nṱhani ha u ṱavhanya u vhona Mudzimu mulandu nga u sa dzhenelela, humbulani tshifhinga tsha musi ni tshi kha ḓi vha ṅwana. Musi vhabebi vhaṋu vha sa ṱavhanyi u ni ṋea zwoṱhe zwe na vha ni tshi zwi ṱoḓa, naa no vhuya na vha vhona mulandu wa uri a vha ni funi? Vhana vhanzhi vha ita nga u ralo. Naho zwo ralo, musi ni tshi aluwa, ni ṱhogomela uri lufuno lu sumbedzwa nga nḓila nnzhi na uri u tenda zwiṅwe na zwiṅwe zwine ṅwana a humbela a zwi sumbedzi lufuno.

Nga hu fanaho, arali Yehova a sa fhinduli thabelo dzashu tshifhinga tshoṱhe nga nḓila ine ra lavhelela ngayo, a zwi ambi uri u khou ri dzhiela fhasi. Zwi re zwone ndi uri Mudzimu u sumbedza u ri ṱhogomela roṱhe nga nḓila nnzhi.

‘Ri Tshila nga Ene’

Zwi re zwone ndi uri “ri tshi tshila, ri tshi tshimbila, ri tshi vha hone” ndi nga ṅwambo wa Mudzimu. (Mishumo 17:28) U ri ṋea hawe vhutshilo zwi sumbedza uri vhukuma u a ri ṱhogomela nga lufuno!

Zwiṅwe hafhu, Yehova u ri ṋea zwine ra zwi ṱoḓa u itela uri ri bvele phanḓa ri tshi tshila. Ri vhala u ri: “Dzikholomo U dzi melisela hatsi, muthu u tondwa nga thoro ya mavhele, ye wa ri vhuswa vhu bve mavuni.” (Psalme ya 104:14) Zwi re zwone ndi uri Musiki washu ha ri ṋei fhedzi ṱhoḓea dza mutheo dza vhutshilo. U ri ṋea nga mafunda “mvula i bvaho ṱaḓulu na zwifhinga zwa mufuro. A fusha dzimbilu dzashu nga zwiḽiwa na nga dakalo.”—Mishumo 14:17.

Naho zwo ralo, vhaṅwe vha nga vhudzisa, ‘Arali Mudzimu a tshi ri funa nga maanḓa, ndi ngani a tshi tendela ri tshi shengela?’ Naa ni a ḓivha phindulo ya yeneyo mbudziso?

Naa Ri nga Vhea Mudzimu Mulandu?

Vhunzhi ha tshengelo ndi ye vhathu vha tou ḓi vhangela vhone vhaṋe. Sa tsumbo, khombo khulwane dza miṅwe mishumo ine ya nga ri huvhadza dzi a ḓivhea vhukuma. Naho zwo ralo, vhathu vha ṱanganela kha vhuaḓa ha u ṱangana nga dzimbeu, u shumisa luvhi halwa na zwiṅwe zwidzidzivhadzi, u daha fola, u ṱanganela kha mitambo i vheaho vhutshilo khomboni, u reila nga luvhilo lwo kalulaho na zwiṅwe-vho. Arali honoho vhuḓifari vhu re na khombo vhu tshi bveledza tshengelo, ndi nnyi ane a tea u vhonwa mulandu? Naa ndi Mudzimu kana muthu ane a khou ita zwithu nga vhutsilu? Ipfi ḽa Mudzimu ḽo hevhedzwaho ḽi ri: “Ni songo khakha, Mudzimu ha hoiwi. Tshenetsho tshiné muthu a zwala, u ḓo tshi kaṋa.”—Vha-Galata 6:7.

Nga nnḓa ha tshengelo dzine vhathu vha tou ḓi vhangela dzone, kanzhi vhathu vha tou vhaisana. Musi lushaka lu tshi dzhenela nndwani, vhukuma Mudzimu ho ngo fanela u vhonwa mulandu kha tshengelo dzine dza ḓo bveledzwa ngayo. Musi tshigevhenga tshi tshi vutshela mudzulapo, naa Mudzimu u fanela u vhonwa mulandu kha u huvhala naho hufhio hune ha nga vha hone kana lufu? Na khathihi! Musi muvhusi wa khunzi a tshi tsikeledza, u shengedza, na u vhulaha vhathu vhane a vha vhusa, naa ri fanela u vhona Mudzimu mulandu? Zwenezwo zwi ḓo vha zwi sa pfali.—Muhuweleli 8:9.

Naho zwo ralo, hu pfi mini nga vha dzimilioni  vhane vha khou tshila nga fhasi ha vhushai ho kalulaho kana vhane vha khou sika nga nḓala? Naa ndi Mudzimu ane a tea u vhonwa mulandu? Hai. Ḽifhasi ḽashu ḽi ri ṋea zwiḽiwa zwinzhi u itela u fusha muthu muṅwe na muṅwe. (Psalme ya 10:2, 3; 145:16) Ndi u sa kovhiwa ha zwiḽiwa zwinzhi zwe Mudzimu a zwi ṋea nga nḓila i linganaho zwine zwa ita uri hu vhe na nḓala na vhushai ho phaḓalalaho. Nahone tseḓa ine vhathu vha vha nayo i thivhela uri vhuleme vhu sa piringululwe.

Tshiitisi Tshihulwane

Nga zwenezwo, ndi nnyi ane a tea u vhonwa mulandu musi muṅwe muthu a tshi lwala kana u fa nga ṅwambo wa vhulala? Naa zwi nga ni mangadza u ḓivha uri Mudzimu hana mulandu na kha zwenezwo? Mudzimu ho ngo sika muthu uri a vhe mulala na u fa.

Musi vhavhingani vha u thoma, Adamu na Eva, vho vhewa tsimuni ya Edeni, Yehova o vha ṋea tshilavhelelwa tsha u tshila nga hu sa fheli ḽifhasini ḽa paradiso. Naho zwo ralo, zwi khagala uri o vha a tshi ṱoḓa uri ḽifhasi ḽi dzulwe nga vhathu vhane vha ḓo takalela zwe vha zwi ṱanganedza. Naho zwo ralo, o ita uri hu vhe na zwine zwa ṱoḓea khavho arali vha vhe vha tshi ṱoḓa u wana honoho vhutshilo. Adamu na Eva vho vha vha tshi ḓo tshila Paradisoni fhedzi arali vha vhe vho dzula vha tshi thetshelesa Musiki wavho a re na lufuno.—Genesi 2:17; 3:2, 3, 17-23.

Zwi ṱungufhadzaho ndi uri Adamu na Eva vho vha mashandukwa. Eva o khetha u thetshelesa Sathane Diabolo. O mu zwifhela nahone a amba uri Mudzimu o vha tshi khou mu dzima tshiṅwe tshithu tshavhuḓi. Nga u ralo a thoma u tshila nga u ḓilanga nahone a lingedza u ‘nga Mudzimu, uri a ḓivhe vhuḓi na vhuvhi.’ Adamu na ene a tevhela vhushandukwa hawe.—Genesi 3:5, 6.

Adamu na Eva vho sumbedza u sa fanelea u tshila nga hu sa fheli nga ṅwambo wa u tshinya havho nga yeneyi nḓila. Vho welwa nga khombo dzo bveledzwaho nga tshivhi. Maanḓa na nungo dzavho zwo fhungudzea, nahone mafheleloni vha fa. (Genesi 5:5) Naho zwo ralo, vhushandukwa havho ho vha na mvelelo dzo kalulaho vhukuma. Ri kha ḓi shengela nga ṅwambo wa mvelelo dza tshivhi tsha Adamu na Eva. Muapostola Paulo o ṅwala a ri: “Ndi zwone vhunga zwivhi zwó dzhena shangoni nga muthu muthihi [Adamu], zwivhi zwa ḓisa lufu, lufu lwo vhuya lwa ṱanganya vhathu vhoṱhe nge vhoṱhe vha tshinya.” (Vha-Roma 5:12) Ee, nga ṅwambo wa vhushandukwa ha Adamu na Eva, tshivhi na lufu zwo phaḓalala u fana na vhulwadze vhu vhulayaho kha vhathu vhoṱhe.

 Vhuṱanzi ho Khwaṱhaho ha uri Mudzimu u a Ṱhogomela

Naa zwenezwo zwi amba uri zwivhumbwa zwa Mudzimu zwa vhathu zwo tshinyadzwa lwa tshoṱhe? Hai, nahone zwino ri ḓa kha vhuṱanzi ho khwaṱhaho ha uri Mudzimu u a ri ṱhogomela. Nga tshiṱhavhelo tshawe tshihulwane, Mudzimu o ṋekedza nḓila ya u rengulula vhathu kha tshivhi na lufu. Mutengo wa u rengulula wa vhutshilo ha Yesu ho fhelelaho wo ṋekedzwa nga u ḓifunela hu tshi itelwa riṋe. (Vha-Roma 3:24) Nga zwenezwo, muapostola Yohane o ṅwala a ri: “Mudzimu o funa shango zwingafha-ngafha, a vhuya a ṋekedza Murwa wawe mu-bebwa-eṱhe, uri vhoṱhe vha mu tendaho, vha si lovhe, tshavho hu vhe u tshila tshoṱhe.” (Yohane 3:16) Nga ṅwambo wa yeneyo nyito i swayeaho ya lufuno, ri dovha ra vha na fulufhelo ḽa u tshila nga hu sa fheli. Paulo o ṅwalela Vharoma a ri: “Vhunga u khakha ha muthihi hó ḓisela vhathu vhoṱhe u laṱiwa, na u lulamisa ha muthihi hó ḓisela vhathu vhoṱhe u pfi vho luga, nga vha tshile.”—Vha-Roma 5:18.

Ri nga vha na vhungoho ha uri nga tshifhinga tsho teaho tsha Mudzimu, a hu tsha ḓo vha na tshengelo kana lufu Ḽifhasini. Nṱhani hazwo, hu ḓo vha na zwiimo zwe zwa dzula zwo vhoniwa hu tshee nga phanḓa kha bugu ya Ndzumbululo: “Asiyo, thumba ya Mudzimu vhukati ha vhathu! Ene u ḓo fhaṱa mushasha vhukati havho, vhone vha vha vhathu vhawe, huno ene nga eṱhé, Mudzimu, u ḓo vha kha vhone, Mudzimu wavho. U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.” (Ndzumbululo 21:3, 4) Ni nga kha ḓi ri, ‘Ndi ḓo vha ndi si tsha tshila musi zwenezwo zwithu zwi tshi bvelela.’ Naho zwo ralo, mbuno ndi ya uri zwi nga kha ḓi ralo. Naho arali na fa, Mudzimu a nga ni vusa vhafuni. (Yohane 5:28, 29) Yeneyo ndi ndivho ya Mudzimu nga riṋe, nahone zwenezwo ndi zwine zwa ḓo bvelela. Zwi tou vha mazwifhi madala-dala u amba uri Mudzimu ha ṱhogomeli vhathu!

“Sendelani Tsini ha Mudzimu”

Zwi a khuthadza u ḓivha uri Mudzimu o thoma tshipiringululi tsha tshoṱhe tsha vhuleme ha u shengela ha vhathu. Naho zwo ralo, hu pfi mini zwino? Ri nga ita mini arali ra felwa nga ane ra mu funa kana arali vhana vhashu vha lwala? Vhukuma, a tshi athu u vha tshifhinga tsha Mudzimu tsha u fhelisa vhulwadze na lufu. Bivhili i sumbedza uri ri fanela u lindela tshifhinganyana uri zwenezwo zwithu zwi piringululwe. Fhedzi Mudzimu ho ngo ri laṱa. Mufunziwa Yakobo o ri: “Sendelani tsini ha Mudzimu, na ene a sendele tsini haṋu.” (Yakobo 4:8) Ee, Musiki washu u ri ramba uri ri vhe na vhushaka ha tsini nae, nahone vhane vha vha na vhushaka nae vha a vhona thikhedzo yawe na kha zwiimo zwi konḓaho vhukuma.

Ri sendela tsini na Mudzimu nga nḓila-ḓe? Khosi Davida o vhudzisa mbudziso i fanaho hu ṱoḓaho u vha zwigidi zwiraru zwa miṅwaha yo fhiraho a ri: “Yehova,. . . ndi nnyi wa u ḓo dzula kha thavha-khethwa?” (Psalme ya 15:1) Davida o fhindula mbudziso yawe musi a tshi bvela phanḓa u ri: “Ndi uyo ané a tshimbila nga yo lugaho, ané a ita zwivhuya, a amba a ngoho nga mbilu. Ané a si tshinye nga lulimi lwawe, a si levhele muṅwe.” (Psalme ya 15:2, 3) Nga maṅwe maipfi, Yehova u ṱanganedza vhane vha tevhela buḓo ḽe Adamu na Eva vha ḽi landula. U sendela tsini na vhane vha ita zwine a zwi funa.—Doiteronomio 6:24, 25; 1 Yohane 5:3.

Ri nga ita hani zwine Mudzimu a zwi funa? Ri fanela u guda “zwo nakaho zwi takalelwaho nga Mutshidzi washu Mudzimu,” nahone nga zwenezwo ri khethe u tshila u tendelana na zwenezwo. (1 Timotheo 2:3) Zwenezwo zwi katela u guda nḓivho yo teaho ya Ipfi ḽa Mudzimu, Bivhili. (Yohane 17:3; 2 Timotheo 3:16, 17) Zwi katela zwi fhiraho u sokou vhala Bivhili nga nḓila yo ḓoweleaho. Ri fanela u edzisa Vhayuda vha ngei Berea vha ḓana ḽa u thoma ḽa miṅwaha vhe vha pfa Paulo a tshi khou funza. Ri vhala zwi tevhelaho nga havho: “Vho ṱanganedza mafhungo a Murena vhó takala, vha vhala maṅwalo misi yoṱhe, vha tshi ṱoḓa huné a pfana na zwiné vha zwi pfa.”—Mishumo 17:11.

Nga hu fanaho ṋamusi, u guda Bivhili nga vhuronwane zwi khwaṱhisa lutendo lwashu kha Mudzimu nahone zwa ri thusa u fhaṱa vhushaka ha tsini nae. (Vha-Heberu 11:6) Zwi dovha zwa ri thusa u pfesesa zwavhuḓi nḓila ine Yehova a shumisana ngayo na vhathu—hu si kha mbuyelo dza tshifhinganyana fhedzi, fhedzi zwihuluhulu dza tshifhinga tshilapfu kha vhoṱhe vha mbilu dzavhuḓi.

Ṱhogomelani zwo ambiwaho nga Vhakriste  vha si gathi vhane vha vha na vhushaka ha tsini na Mudzimu. Danielle wa miṅwaha ya 16 o ri: “Ndi funa Yehova nga mbilu yanga yoṱhe, nahone ndi na zwinzhi zwine nda tea u mu livhuha ngazwo. O nṋea vhabebi vha re na lufuno vhane vha mu funa zwa vhukuma na vhe vha mpfunza u tendelana na Ipfi ḽawe.” Muṅwe Mukriste wa ngei Uruguay o ri: “Mbilu yanga yo ḓala nga ndivhuho, nahone ndi sudzulusea u livhuha Yehova nga ṅwambo wa tshilidzi tshawe tshi songo ri fanelaho u katela na vhukonani hawe.” Mudzimu u ṱanganedza na vhane vha kha ḓivha vhaṱuku. Gabriela wa miṅwaha ya sumbe o ri: “Ndi funa Mudzimu u fhira tshithu naho tshi tshifhio shangoni ḽoṱhe! Ndi na Bivhili yanga. Ndi a funa u guda nga ha Mudzimu na Murwa wawe.”

Ṋamusi, vha dzimilioni shangoni ḽoṱhe vha tendelana nga mbilu yoṱhe na mupsalema we a ri: “Nṋe ndi ḓifhelwa nga u vha tsini na Mudzimu.” (Psalme ya 73:28) Vho thuswa u sedzana na vhuleme vhune vha ṱangana naho zwino, nahone vha na fulufhelo ḽo khwaṱhaho ḽa u tshila nga hu sa fheli kha ḽifhasi ḽa Paradiso. (1 Timotheo 4:8) Ndi ngani ni sa zwi iti tshipikwa tshaṋu ‘u sendela tsini na Mudzimu’? I ngoho, ri a khwaṱhisedzwa u ri: “Ha kule na roṱhe ri re fhano.” (Mishumo 17:27) Ee, Mudzimu u a ni ṱhogomela zwa vhukuma!

[Zwifanyiso kha siaṱari 5]

U ri ṱhogomela ha Yehova hu vhonala nga nḓila nnzhi

[Tshifanyiso kha siaṱari 7]

Na vhana vhaṱuku vha nga sendela tsini na Mudzimu

[Zwifanyiso kha siaṱari 7]

Ṋamusi, Yehova u ri thusa u konḓelela. Nga tshifhinga tsho teaho, u ḓo fhelisa vhulwadze na lufu