Naa Mudzimu u na Mulandu wa Vhuleme Hashu?

MUSI ṅwana muhulwane wa Marion a tshi huvhala vhukuma maluvhini, Marion o ita zwe vhunzhi hashu ro vha ri tshi ḓo vha ro zwi ita. * O rabela Mudzimu uri a mu thuse. Marion o ri: “A thi vhuyi nda humbula tshiṅwe tshifhinga tshee nda vhuya nda ḓipfa ndo fulufhuwa na u vha na vhumvumvu u fana na tshenetshi.” Nga murahu, vhuimo ha ṅwananyana wawe ha tou ṋaṋa, nahone Marion a thoma u timatima Mudzimu. O vhudzisa a ri: “Ndi ngani zwenezwi zwithu zwi tshi khou bvelela?” Ho ngo pfesesa uri ndi ngani Mudzimu a re na lufuno na a ṱhogomelaho o mu laṱa.

Zwe Marion a ṱangana nazwo zwo ḓowelea. Vhathu vhanzhi shangoni ḽoṱhe vha ḓipfa vho laṱwa nga Mudzimu musi vhe vhuṱunguni. Lisa o amba zwi tevhelaho nga murahu ha u vhulahwa ha muḓuhulu wawe: “Ndi kha ḓi vha na mbudziso dza uri ndi ‘ngani MUDZIMU o tendela zwithu zwivhi.’ Lutendo lwanga kha Mudzimu a lwo ngo tsha khwaṱha u fana na u thomani.” Musi o no welwa nga makhaulambilu e a kwama murwa wawe wa lushie, muṅwe mufumakadzi o ri: “Mudzimu ho ngo nkhuthadza kha zwe zwa bvelela. Ho ngo vhuya a sumbedza luswayo zwalwo lwa u ṱhogomela kana u pfela vhuṱungu.” O dovha a ri: “Ndi nga si ḓo vhuya nda hangwela Mudzimu.”

Vhaṅwe vha vha na maḓipfele a u sinyutshela Mudzimu musi vha tshi sedza shangoni ḽine vha khou tshila khaḽo. Vha vhona mashangoni ho ḓala vhushai na u sika nga nḓala, tshavhi dza nndwa dzo hanganeaho, tshivhalo tshi sa vhalei tsha vhana vha re dzitsiwana nga ṅwambo wa AIDS, na vhathu vha dzimilioni vhane vha khou shengedzwa nga maṅwe malwadze. Musi zwenezwi na makhaulambilu a fanaho zwi tshi bvelela, vhanzhi vha vhona Mudzimu mulandu wa u sa vha ṱhogomela.

Naho zwo ralo, ngoho ndi ya uri Mudzimu ho ngo fanela u vhonwa mulandu wa vhuleme vhune ha khou shengedza vhathu. Zwi re zwone ndi uri hu na zwiitisi zwi pfalaho zwa u tenda uri Mudzimu hu si kale u ḓo fhelisa tshengelo yo ḓiselwaho vhathu. Ri humbela uri ni vhale thero i tevhelaho nahone ni vhone zwa uri Mudzimu u a ri ṱhogomela zwa vhukuma.

[Ṱhaluso dzi re magumoni a siaṱari]