“Ni Vha Funze U Ita Zwoṱhe Zwe Nda Ni Laya”
“Ni Vha Funze U Ita Zwoṱhe Zwe Nda Ni Laya”
“Iyani-ha ni ite vhathu vhoṱhe vhafunziwa . . . Ni vha funze u ita zwoṱhe zwe nda ni laya.”—MATEO 28:19, 20.
1. Ndi nyambedzano ifhio ye ya vha hone vhukati ha mufunziwa Filipo na munna a bvaho Ethiopia?
MUNNA a bvaho Ethiopia o fara lwendo lwa u ya Yerusalema. Musi e henefho o rabela Mudzimu ane a mu funa, Yehova. Zwi vhonala uri o vha a tshi dovha a funa Ipfi ḽa Mudzimu ḽo hevhedzwaho. Musi a tshi khou humela hayani e kha goloi yawe, o vha tshi khou vhala kopi ya maṅwalo a muporofita Yesaya musi Filipo, mufunziwa wa Kristo, a tshi ṱangana nae. Filipo a vhudzisa Muetiopia a ri: “Naa zwiné wa zwi vhala U khou zwi pfa naa?” Onoyo munna a fhindula a ri: “Ndi ḓo zwi kona hani hú si na a mpfunzedzaho?” Filipo o bvela phanḓa u thusa onoyo mugudi wa Maṅwalo a fhiseaho u vha mufunziwa wa Kristo.—Mishumo 8:26-39.
2. (a) Phindulo ya Muetiopia ndi ya ndeme nga nḓila-ḓe? (b) Ndi mbudziso dzifhio dzine ra ḓo dzi ṱhogomela dzi tshimbidzanaho na ndaela ya Kristo ya u ita vhafunziwa?
2 Phindulo ya Muetiopia ndi i swayeaho vhukuma. O ri: “Ndi ḓo zwi kona hani hú si na a mpfunzedzaho?” Vhukuma o vha a tshi ṱoḓa muṅwe muthu uri a mu thuse u pfesesa zwe a vha a tshi khou zwi vhala. Yeneyi phindulo i sumbedza ndeme ya pfunzo yo khetheaho ye Yesu a i katela kha ndaela yawe ya u ita vhafunziwa. Ndi pfunzo ifhio? U itela u wana phindulo, kha ri bvele phanḓa ri tshi ṱhogomela maipfi a Yesu a wanalaho kha Mateo ndima ya 28. Thero yo fhiraho yo haseledza nga mbudziso dzine dza ri ndi ngani, na ngafhi? Zwino ri ḓo haseledza dziṅwe mbudziso mbili dzi tshimbidzanaho na ndaela ya Kristo ya u ita vhafunziwa—mini nahone lini?
“Ni Vha Funze u Ita Zwoṱhe zwe nda Ni Laya”
3. (a) Muthu u vha hani mufunziwa wa Yesu Kristo? (b) U ita vhafunziwa zwi katela na mini?
3 Ndi mini zwine ra tea u zwi funza u itela u thusa vhaṅwe u vha vhafunziwa vha Kristo? Yesu o laedza vhatevheli vhawe a ri: “Iyani-ha ni ite vhathu vhoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa. Ni vha funze u ita zwoṱhe zwe nda ni laya.” (Mateo 28:19, 20) Nga zwenezwo, ri fanela u funza zwithu zwe Kristo a laedza. * Nga zwenezwo, ndi mini zwine zwa fanela u itwa u itela vhungoho ha uri vhathu vhane vha funzwa nga milayo ya Yesu vha vhe vhafunziwa na u dzula vho ralo? Iṅwe mbuno i vhonala nga nḓila ye Yesu a khetha ngayo maipfi nga vhuronwane. Ṱhogomelani uri ho ngo sokou ri: ‘Ni vha funze zwoṱhe zwe nda ni laya.’ Nṱhani hazwo, o ri: “Ni vha funze u ita zwoṱhe zwe nda ni laya.” (Mateo 19:17) Zwenezwo zwi amba mini?
4. (a) Zwi amba mini u ita zwe zwa laedzwa? (b) Fanyisani nḓila ine ra nga funza ngayo muṅwe muthu u ita zwe Kristo a laedza?
4 U ita zwe zwa laedzwa zwi amba ita uri “maitele a muthu a tendelane” na ndaela—u i thetshelesa, kana u i tevhela. Nga zwenezwo, ri nga funza hani muṅwe muthu u ita, kana u thetshelesa, zwithu zwe Kristo a zwi laedza? Humbulani nga ha nḓila ine ane a gudisa vhathu u reila a funza ngayo vhagudiswa vhawe u ṱhogomela milayo ya badani. Mugudisi a nga funza vhagudiswa vhawe milayo ya badani musi e kilasini. Fhedzi u itela u funza vhagudiswa vhawe u tevhedza yeneyo milayo, u fanela u ṋea vhenevho vhagudiswa vhulivhisi musi vha tshi khou reila zwa vhukuma fhethu hu re na dzigoloi na uri vha lwele nga nungo dzoṱhe u shumisa zwe vha zwi guda. Nga hu fanaho, musi ri tshi guda na vhathu Bivhili, ri vha funza ndaela ya Kristo. Naho zwo ralo, ri dovha ra ṱoḓa u funza vhagudiswa musi vha tshi khou lwela u shumisa ndaela dza Kristo vhutshiloni havho ha ḓuvha ḽiṅwe na ḽiṅwe na vhuḓinḓani. (Yohane 14:15; 1 Yohane 2:3) Nga zwenezwo, u tevhedza nga vhuḓalo ndaela ya Kristo ya u ita vhafunziwa zwi ṱoḓa uri ri vha funze na u vha livhisa. Nga yeneyo nḓila, ri ḓo vha ri tshi khou edzisa tsumbo yo vhewaho nga Yesu na nga Yehova.—Psalme ya 48:14; Ndzumbululo 7:17.
5. Ndi ngani muthu ane ra guda nae Bivhili a tshi nga timatima u thetshelesa ndaela ya Kristo ya u ita vhafunziwa?
5 U funza vhaṅwe u ita zwe Yesu a laedza zwi katela u vha thusa u dzhiela nṱha ndaela ya u ita vhafunziwa. Wonoyu u nga vha mushumo u konḓaho kha vhaṅwe vhane ra guda navho Bivhili. Naho khamusi vho vha vhe miraḓo i fhiseaho ya iṅwe kereke ya vhudzhagane, a si kanzhi u tshi wana uri vhafunzi vhavho vha kale vha vhurereli vho vhuya vha vha funza nga ha u ya u ita vhafunziwa. Vhaṅwe vhafunzi vha kereke vha tenda vho khwaṱha uri kereke dza ḽa Vhudzhagane dzo kundwa vhukuma u vhudza sambi ḽadzo u vha vhaevangeli. Musi a tshi amba nga ha ndaela ya Yesu ya u ya shangoni u itela u thusa vhathu uri vha vhe vhafunziwa, mugudi wa Bivhili ane a pfi John R. W. Stott o ri: “U kundelwa hashu u thetshelesa heyi ndaela ya ndeme zwi sumbedza vhushayanungo vhuhulwane ha Vhakriste vha evangeli kha mushumo wa vhuevangeli ṋamusi.” O engedza nga uri: “Ri na nḓowelo ya u huwelela mulaedza washu ro ima kule. Nga zwiṅwe zwifhinga ri fana na vhathu vhane vha ṋea muthu ane a khou nwela khothe nyeletshedzo ro ima fhethu ha tsireledzo hu re khunzi-khunzini. A ri dzheni maḓini u itela u vha tshidza. Ri ofha u ṋukala.”
6. (a) Musi ri tshi thusa vhagudi vha Bivhili, ri nga tevhela hani tsumbo ya Filipo? (b) Ri nga sumbedza hani u ṱhogomela musi mugudi wa Bivhili a tshi thoma u ya mushumoni wa u huwelela?
6 Arali muthu ane ra guda nae Bivhili o vha e tshipiḓa tsha vhurereli vhune miraḓo yaho ya “ofha u ṋukala,” zwi nga mu konḓela u kunda nyofho dzawe dza u dzhena maḓini, nga lwa pfanyisedzo, na u thetshelesa ndaela ya Kristo ya u ita vhafunziwa. U ḓo ṱoḓa thuso. Nga zwenezwo, a ro ngo tea u fhela mbilu musi ri tshi mu ṋea ndayo na vhulivhisi zwine zwa khwaṱhisa u pfesesa hawe na u mu sudzulusela u dzhia vhukando, samusi pfunzo ya Filipo yo vula ngelelo ya Muetiopia nahone ya mu sudzulusela u ri a lovhedzwe. (Yohane 16:13; Mishumo 8:35-38) Zwiṅwe hafhu, lutamo lwashu lwa u funza vhagudiswa vha Bivhili lu fanela u ri sudzulusela u shuma navho u itela u vha livhisa musi vha tshi huwelela nga Muvhuso lwa u thoma.—Muhuweleli 4:9, 10; Luka 6:40.
‘Zwithu Zwoṱhe’
7. U funza vhaṅwe u “ita zwoṱhe” zwi katela u vha funza ndaela dzifhio?
7 A ri gumi nga u funza fhedzi vhafunziwa vhaswa uri vha ite vhafunziwa. Yesu o ri laedza u funza vhaṅwe “u ita zwoṱhe” zwe a laedza. Zwenezwo zwi katela ndaela mbili khulwane—u funa Mudzimu na vhahura. (Mateo 22:37-39) Vhafunziwa vhaswa vha nga funzwa hani u ita zwe zwa laiwa?
8. Fanyisani nḓila ine mufunziwa muswa a nga funzwa ngayo ndaela ya u sumbedza lufuno.
8 Dovhani ni humbule nga ha tshifanyiso tsha ane a gudisa u reila. Musi mugudiswa a tshi khou pfuka vhukati ha dzigoloi mugudisi o dzula nga thungo, mugudiswa u khou guda u reila nga u thetshelesa mugudisi wawe na nga u sedza vhaṅwe vhareili. Sa tsumbo, mugudisi a nga kha ḓi livhisa ṱhogomela kha mureili we nga vhulenda a tendela muṅwe muthu a tshi dzhena phanḓa hawe kha mutevhe wa dzigoloi; kana mureili we nga vhulenda a fhungudza mavhone a goloi yawe u itela uri a sa kombodze goloi dzine dza khou ḓa dzo livhana nae; kana mureili we a ṱoḓa u thusa nga u ḓifunela muthu we a mu ḓowela we goloi yawe ya tshinyala. Dzenedzo tsumbo dzi funza mugudiswa ngudo ya ndeme ine a nga i shumisa musi a tshi khou reila. Nga hu fanaho, mufunziwa muswa ane a khou tshimbila nḓilani i yaho vhutshiloni u guda kha mugudisi wawe na kha tsumbo dzavhuḓi dzine a dzi vhona tshivhidzoni.—Mateo 7:13, 14.
9. Mufunziwa muswa a nga guda hani zwine u tevhedza ndaela ya u sumbedza lufuno ya amba zwone?
9 Sa tsumbo, mugudiswa wa Bivhili a nga kha ḓi vhona mubebi a re eṱhe ane a ita vhuḓidini ha u ḓa Holoni ya Muvhuso na vhana vhawe vhaṱuku. A nga kha ḓi vhona muthu o tsikeledzeaho ane a ḓa miṱanganoni nga u fulufhedzea hu sa londwi u lwisana hawe na mutsiko, tshilikadzi ya mualuwa ine ya ḓisa vhaṅwe vhaaluwa nga goloi miṱanganoni yoṱhe ya tshivhidzo, kana muswa a re miṅwahani ya vhufumi ane a ṱanganela kha u kunakisa Holo ya Muvhuso. Mugudiswa wa Bivhili a nga kha ḓi ṱhogomela muhulwane wa tshivhidzo ane a ranga phanḓa nga u fulufhedzea tshumeloni ya tsimu hu sa londwi vhunzhi ha vhuḓifhinduleli hawe ha tshivhidzoni. A nga kha ḓi ṱangana na Ṱhanzi yo holefhalaho ine i sa kone u bva nḓuni fhedzi ine ya ṋea ṱhuṱhuwedzo ya muya kha vhoṱhe vhane vha i dalela. Mugudiswa a nga sedza vhavhingani vhane vha khou ita tshanduko khulwane vhutshiloni havho u itela uri vha ṱhogomele vhabebi vhavho vho aluwaho. Nga u sedza vhenevho Vhakriste vha vhulenda, vha thusaho, na vha fulufhedzeaho, mufunziwa muswa u guda nga u vhona tsumbo uri zwi amba mini u thetshelesa ndaela ya Kristo ya u funa Mudzimu na vhahura, zwihuluhulu vhatendi nga riṋe. (Mirero 24:32; Yohane 13:35; Vha-Galata 6:10; 1 Timotheo 5:4, 8; 1 Petro 5:2, 3) Nga yeneyi nḓila, muraḓo muṅwe na muṅwe wa tshivhidzo tsha Vhukriste u nga—nahone u fanela—u funza na u livhisa.—Mateo 5:16.
“U Swika Vhufheloni ha ḽifhasi”
10. (a) Ri ḓo bvela phanḓa ri tshi ita vhafunziwa u swika lini? (b) Ndi tsumbo ifhio ye Yesu a i vhea malugana na u ita mishumo?
10 Ri fanela u ita vhafunziwa u swika lini? U swika vhufheloni ha ano maitele a zwithu. (Mateo 28:20) Naa ri a kona u khunyeledza tshenetshi tshipiḓa tsha ndaela ya Yesu? Ro ḓiimisela u ita nga u ralo ri tshivhidzo tsha shango ḽoṱhe. Miṅwahani yo fhelaho, ro ṋekedza nga u ḓifunela tshifhinga tshashu, maanḓa, na thundu u itela u wana “vhe vha vhetshelwa vhutshilo vhu sá fheli.” (Mishumo 13:48) Zwino, Ṱhanzi dza Yehova dzi fhedza mbalotshikati i fhiraho awara dza milioni tharu ḓuvha ḽiṅwe na ḽiṅwe dzi tshi khou huwelela nga Muvhuso na kha mushumo wa u ita vhafunziwa shangoni ḽoṱhe. Ri ita nga u ralo nga ṅwambo wa uri ri tevhela tsumbo ya Yesu. O ri: “Zwanga zwiḽiwa ndi uri nda ita zwi funwaho nga o nthumaho, na u vuledza mushumo wawe.” (Yohane 4:34, vhambedzani NW) Zwenezwo ndi zwine ra zwi funa vhukuma. (Yohane 20:21) Ri ṱoḓa u ita zwi fhiraho u thoma u ita wonoyu mushumo we ra fhiwa wone; ri ṱoḓa u u fhedzisa.—Mateo 24:13; Yohane 17:4.
11. Ho bvelela mini kha vhaṅwe vhahashu vha tshinnani na vha tshisadzini vha Vhakriste, nahone ri fanela u ḓivhudzisa mini?
11 Naho zwo ralo, zwi a ri ṱungufhadza u vhona uri vhaṅwe vhatendi nga riṋe vho fhola muyani nahone, nga ṅwambo wa zwenezwo, a vha tsha thetshelesa ndaela ya Kristo ya u ita vhafunziwa. Naa hu na nḓila ine ra nga vha thusa ngayo u dovha vha ṱanganela na tshivhidzo na u vusulusa mushumo wavho wa u ita vhafunziwa? (Vha-Roma 15:1; Vha-Heberu 12:12) Nḓila ye Yesu a thusa ngayo vhaapostola vhawe musi vho fhola lwa tshifhinganyana i sumbedza zwine ra nga zwi ita ṋamusi.
Sumbedzani Ṱhogomelo
12. (a) Nga phanḓa ha lufu lwa Yesu, vhaapostola vhawe vho ita mini? (b) Yesu o ṱhogomela hani vhaapostola vhawe hu sa londwi uri vho sumbedza vhushayanungo vhuhulwane?
12 Mafheloni a vhuḓinḓa ha Yesu ha kha ḽifhasi, musi lufu lwawe lu tsini, vhaapostola vhawe vha “mu ṱutshela vhoṱhe vha shavha.” Samusi Yesu o vha o dzula o amba, vho ‘balangana vhoṱhe, muṅwe a ya hawe, muṅwe a ya hawe.’ (Marko 14:50; Yohane 16:32) Yesu o sedzana hani na u fhola muyani ha khonani dzawe? Nga u ṱavhanya nga murahu ha mvuwo yawe, Yesu o vhudza vhaṅwe vha vhafunziwa vhawe a ri: “Ni songo ofha; tshimbilani ni yo vhudza vharathu vhanga, vha ye Galilea; vha ḓo mbona henengei.” (Mateo 28:10) Naho vhaapostola vho sumbedza vhushayanungo vhuhulwane, Yesu o bvela phanḓa a tshi vha vhidza “vharathu vhanga.” (Mateo 12:49) Ho ngo vha fhelela mbilu. Nga yeneyi nḓila, Yesu o vha e na tshilidzi na u hangwela, samusi na Yehova e na tshilidzi na u hangwela. (2 Dzikhosi 13:23) Ri nga edzisa hani Yesu?
13. Ri fanela u sedza hani vho fholaho muyani?
13 Ri fanela u sumbedza u pfela vhuṱungu vhathu vho fholaho kana u litsha u ṱanganela vhuḓinḓani. Ri fanela u dzula ri tshi humbula nga mishumo ya lufuno ye vhenevha vhatendi nga riṋe vha i ita tshifhingani tsho fhelaho—kha musi vhaṅwe miṅwaha i fhiraho fumi. (Vha-Heberu 6:10) Ro ṱuvha vhukuma vhukonani havho. (Luka 15:4-7; 1 Vha-Thesalonika 2:17) Naho zwo ralo, ri nga sumbedza hani u vha vhilaelela?
14. Ri tshi edzisa Yesu, ri nga thusa hani vhathu vho fholaho?
14 Yesu o vhudza vhaapostola vho tsikeledzeaho uri vha fanela u ya Galilea nahone vha ḓo mu vhona henefho. Nga iṅwe nḓila Yesu o vha a tshi khou vha ramba uri vha ḓe muṱanganoni wo khetheaho. (Mateo 28:10) Nga hu fanaho ṋamusi, ri ṱuṱuwedza vho fholaho muyani u ḓa miṱanganoni ya tshivhidzo tsha Vhukriste, nahone ri nga vha ṱuṱuwedza lu fhiraho luthihi u ita ngauralo. Kha vhaapostola, honoho u rambiwa havho ho aṋwa mitshelo, ngauri ‘vhafunziwa vha fumi na muthihi vho tshimbila vha ya Galilea, vha ya thavhani ye Yesu a vha laedza.’ (Mateo 28:16) Ri ḓipfa ro takala lungafhani musi vho fholaho vha tshi aravha nga nḓila i fanaho kha thambo yashu ya lufuno nahone vha dovha hafhu u ḓa miṱanganoni ya Vhukriste!—Luka 15:6.
15. Ri nga tevhela tsumbo ya Yesu ya u ṱanganedza vho fholaho vho ḓaho hune ra ṱanganela hone nga nḓila-ḓe?
15 Ri fanela u aravha hani musi Mukriste o fholaho a tshi ḓa Holoni ya Muvhuso? Yesu o ita mini musi a tshi vhona vhaapostola vhawe, vhe lutendo lwavho lwa vha lwo fhola lwa tshifhinganyana, vho swika fhethu he vha langana u ṱangana hone? “Yesu a ḓa ha vhone a amba navho.” (Mateo 28:18) Ho ngo sokou vha sedza o ima kule, fhedzi o ya khavho. Edzani u humbula uri vhaapostola vha nga vha vho ḓipfa vho vhofholowa lungafhani musi Yesu a tshi dzhia honoho vhukando u thoma! U nga ri na riṋe ri nga dzhia vhukando u thoma nahone ri ṱanganedze nga lufuno vhathu vho fholaho muyani vhane vha khou ita vhuḓidini ha u vhuyelela tshivhidzoni tsha Vhukriste.
16. (a) Ri nga guda mini kha nḓila ye Yesu a shumisana ngayo na vhatevheli vhawe? (b) Ri nga edzisa hani mavhonele a Yesu kha vho fholaho? (Sedzani ṱhaluso i re magumoni a siaṱari.)
16 Ndi zwifhio zwiṅwe zwe Yesu a zwi ita? Tsha u thoma, o ḓivhadza a ri: “Ndo ṋewa maanḓa oṱhe.” Tsha vhuvhili, o vha ṋea mushumo a ri: “Iyani-ha ni ite vhathu vhoṱhe vhafunziwa.” Tsha vhuraru, o vha fulufhedzisa a ri: “Ndi na’nwi misi yoṱhe.” Fhedzi naa no ṱhogomela zwe Yesu a si zwi ite? Ho ngo kaidza vhafunziwa vhawe nga ṅwambo wa vhushayanungo havho na u timatima. (Mateo 28:17) Naa nḓila ye a amba ngayo yo shuma? Ee. Nga u ṱavhanya, vhaapostola vho dovha vha “ḓivhadza mafhungo-maḓifha.” (Mishumo 5:42) Nga u tevhela tsumbo ya Yesu ya nḓila ya u dzhia na u fara vho fholaho, ri nga fulufhela u vha na mvelelo dzi takadzaho tshivhidzoni tshashu. *—Mishumo 20:35.
“Ndi Na’nwi Misi Yoṱhe”
17, 18. Ndi mbuno ifhio i khwaṱhisaho i wanalaho kha maipfi a Yesu ane a ri, “ndi na’nwi misi yoṱhe”?
17 Maipfi a u fhedza a ndaela ya Yesu, “ndi na’nwi misi yoṱhe,” a na mbuno i khwaṱhisaho vha vhoṱhe vhane vha khou lwela u ḓadzisa ndaela ya Kristo ya u ita vhafunziwa. Hu sa londwi u pikiswa naho hu hufhio hune maswina ashu anga ri ḓisela hone kha mushumo washu wa u huwelela nga Muvhuso na u ambiwa luvhi naho hu hufhio hune ha nga ri wela, a ri na tshiitisi tsha u ofha. Ndi ngani? Yesu, Murangaphanḓa washu, a re na “maanḓa oṱhe ngei ṱaḓulu na fhano fhasi,” u na riṋe u itela u ri tikedza!
18 Fulufhedziso ḽa Yesu ḽine ḽa ri “ndi na’nwi misi yoṱhe” ndi tshisima tshihulwane tsha khuthadzo. Musi ri tshi khou lwela u ḓadzisa ndaela ya Kristo ya u ita vhafunziwa, ri ḓo ṱangana na maḓuvha a takadzaho na a pfisaho vhuṱungu. (2 Koronika 6:29) Vhaṅwe vhashu ro no ṱangana na zwifhinga zwi pfisaho vhuṱungu musi ri tshi khou lilela vhane ra vha funa vho faho. (Genesi 23:2; Yohane 11:33-36) Vhaṅwe vha khou lwisana na vhulala, hune mutakalo na maanḓa zwa vha zwi tshi khou fhela. (Muhuweleli 12:1-6) Ngeno vhaṅwe nga miṅwe misi vha tshi vha na mutsiko u kulaho nungo. (1 Vha-Thesalonika 5:14) Nahone vhunzhi hashu ri khou lwisana na vhuleme vhuhulwane ha zwa dzi tshelede. Naho zwo ralo, hu sa londwi honoho vhuleme, ri a bvelela vhuḓinḓani hashu nga ṅwambo wa uri Yesu u na riṋe “misi yoṱhe,” u katela maḓuvha a si avhuḓi vhutshiloni hashu.—Mateo 11:28-30.
19. (a) Ndaela ya Yesu ya u ita vhafunziwa i katela mini? (b) Ndi mini zwine zwa ita uri ri kone u ḓadzisa ndaela ya Kristo?
19 Samusi ro zwi vhona kha ino thero na yo fhiraho, ndaela ya Yesu ya u ita vhafunziwa i katela masia oṱhe. Yesu o ri vhudza uri ndi ngani na uri ndi ngafhi hune ra fanela u ḓadzisa ndaela yawe. O dovha a ri vhudza zwine ra tea u zwi funza na uri ri fanela u ita nga u ralo u swikela lini. Vhukuma, u ḓadzisa yeneyi ndaela khulwane a zwi leluwi. Fhedzi nga thuso ya maanḓa a Kristo na u vha hawe na riṋe, ri nga i khunyeledza! Naa a ni tendi zwenezwo?
[Ṱhaluso dzi re magumoni a siaṱari]
^ phar. 3 Iṅwe bugu yo sumbedza uri Yesu o ri, ‘ni vha lovhedze . . . nahone ni bvele phanḓa ni tshi vha funza,’ hu si uri ‘ni vha lovhedze na u vha funza.’ Nga zwenezwo, ndaela ya u lovhedza na u funza “a si . . . zwithu zwivhili zwine zwa khou tou tevhekana.” Nṱhani hazwo, “u funza ndi maitele a bvelaho phanḓa, ane a ḓa nga phanḓa ha ndovhedzo . . . na u bvela phanḓa nga murahu ha ndovhedzo.”
^ phar. 16 Mafhungo o engedzeaho nga ha nḓila ya u dzhia na u thusa vho fholaho a wanala kha Tshiingamo tsha ḽa 1 February, 2003, masiaṱari 15-18.
Ni nga Fhindula Hani?
• Ni funza hani vhaṅwe u ita zwe Yesu a laedza?
• Ndi ngudo dzifhio dzine vhafunziwa vhaswa vha nga dzi guda kha vhaṅwe tshivhidzoni?
• Ri nga ita mini u itela u thusa vho fholaho muyani?
• Ndi maanḓa na khuthadzo zwifhio zwine ra zwi wana kha fulufhedziso ḽa Yesu ḽa uri “ndi na’nwi misi yoṱhe”?
[Mbudziso Dza Pfunzo]
[Zwifanyiso kha siaṱari 15]
Ri fanela u vha vhane vha funza na u livhisa
[Zwifanyiso kha siaṱari 17]
Vhafunziwa vhaswa vha guda ngudo dza ndeme kha tsumbo dzo vhewaho nga vhaṅwe