Vhurifhi vhu Yaho kha Noaxe

“HA NOAXE, ndo no vhala lunzhi Bivhilini nga ha inwi na nga nḓila ye na fhaṱa ngayo gugwa ḽe ḽa ni tshidza na muṱa waṋu tshifhingani tsha Maḓi Mahulu.”

Eneo ndi marangaphanḓa a vhurifhi ha musidzana wa miṅwaha ya 15 ane a pfi Minnamaria he a vhuisa kha muṱaṱisano wa u ṅwala wa vhagudiswa vha re na miṅwaha ya 14 u ya kha ya 21. Wonoyu muṱaṱisano wo vha wo dzudzanywa nga vha zwa tshumelo ya poswo ya Finland, Dzangano ḽa Vhadededzi ḽa Luambo lwa Ḓamuni lwa Finland, na ḽa Finnish Literature Society. Vhaṱaṱisani vho vha vha tshi tea u ṅwala vhurifhi nga ha zwithu zwi bvaho kha iṅwe bugu. Vhurifhi ho vha hu tshi nga ṅwalelwa muṅwali wa bugu kana mubvumbedzwa a re khayo. Vhadededzi vho khetha marifhi a vhagudiswa vhavho a fhiraho 1400 nahone vha a rumela kha vhahaṱuli vha wonoyo muṱaṱisano. Nga zwenezwo vhahaṱuli vho khetha vhuthihi he ha avhelwa pfufho ya nṱhesa, na a fumi o wanaho pfufho ya vhuvhili ya nṱhesa, nahone maṅwe a fumi o wana pfufho ya vhuraru ya nṱhesa. Minnamaria o vha o takalela uri vhurifhi hawe ho wela kha pfufho ya vhuraru.

Ndi ngani Minnamaria, a re mugudiswa wa miṅwahani ya vhufumi, o ṅwalela Noaxe vhurifhi, munna we a tshila miṅwahani ya 5000 yo fhiraho? O ri: “Tshithu tsha u thoma u ḓa muhumbuloni wanga ndi Bivhili. Ndi a ḓivhesa nga ha vhabvumbedzwa vha re Bivhilini. Ndo no vhalesa nga havho lune vha vhonala vha tshi nga vha a tshila kha nṋe. Ndo khetha Noaxe nga ṅwambo wa uri vhutshilo hawe ho vha vhu vhu nyanyulaho nahone ho fhambana na hanga.”

Vhurifhi he Minnamaria a vhu ṅwalela Noaxe ho phetha nga haya maipfi: “Ni kha ḓi vha tsumbo ya lutendo na ya u thetshelesa. Vhutshilo haṋu vhu ṱuṱuwedza vhoṱhe vhane vha vhala Bivhili uri vha tshile u tendelana na lutendo lwavho.”

Honovhu vhurifhi ha muswa ane a vha muvhali wa Bivhili ndi tsumbo yavhuḓi ya nḓila ine vhukuma Bivhili ya vha ‘tshithu tshi tshilaho na u vha na maanḓa ngayo’ kha vhathu, vhaṱuku na vhahulwane.—Vha-Heberu 4:12.