Mbudziso dzi Bvaho ha Vhavhali
Mbudziso dzi Bvaho ha Vhavhali
Yesu o vha a tshi khou amba mini musi a tshi vhudza vhafunziwa vhawe uri: “Iṱali ndó zwi vhona Sathane a tshi wa vhunga nḓadzi i tshi rwa i tshi bva ṱaḓulu?”
Yesu o vha a kha ḓi tou bva u khetha vhafunziwa vha 70, nahone a vha “ruma nga vhavhili uri vha mu range phanḓa, vha ye miḓini na miḓanani yoṱhe ye a vha a tshi funa u ya khayo’ ene muṋe.” Musi vhenevho vha 70 vha tshi vhuya, vho vha vho takala nge vha bvelela kha mushumo wavho. Vha ri: “Murena, na mimuya mivhi ri a i vhusa nga dzina ḽau.” Nga tshenetsho tshifhinga, Yesu a ri: “Iṱali ndó zwi vhona Sathane a tshi wa vhunga nḓadzi i tshi rwa i tshi bva ṱaḓulu.”—Luka 10:1, 17, 18.
Mathomoni, zwi nga vhonala uri Yesu o vha a tshi khou ambela kha tshiitea tsho no bvelelaho. Fhedzi, nga murahu ha miṅwaha ya 60 Yesu o amba eneo maipfi a re afho nṱha, muapostola Yohane o no vhaho mulala o amba nga nḓila i fanaho a ri: “Ha shakulwa ḽiḽa ḽigweṋa ḽihulu, ḽiṋowa ḽa kale na kale ḽine ḽa pfi Diabolo, ene Saṱhane, muxedzi wa shango ḽoṱhe, ḽa poswa kha ḽifhasi, na vharuṅwa vhaḽo vha poswa henefho-vho.”—Ndzumbululo 12:9.
Musi Yohane a tshi ṅwala eneo maipfi, Sathane o vha a kha ḓi vha ṱaḓulu. Ri zwi ḓivha hani? Nga ṅwambo wa uri Ndzumbululo ndi bugu ya vhuporofita, hu si ya ḓivhazwakale. (Ndzumbululo 1:1) Nga zwenezwo, Sathane o vha a sa athu poswa kha ḽifhasi misini ya Yohane. Nga zwenezwo, vhuṱanzi vhu sumbedza uri zwenezwi zwo bvelela nga u ṱavhanya nga murahu ha musi Yesu o vhewa a vha Khosi ya Muvhuso wa Mudzimu nga 1914. *—Ndzumbululo 12:1-10.
Nga zwenezwo ndi ngani Yesu o amba nga ha u pandelwa ha Sathane ṱaḓulu nga nḓila ine ya nga zwo no itea? Vhaṅwe vhagudi vho humbula uri Yesu o vha a tshi khou kaidza vhafunziwa vhawe nge vha sumbedza u ḓikukumusa hu songo teaho. Vha tenda uri o vha a tshi khou amba uri: ‘No kunda madimoni, fhedzi ni songo ḓikukumusa. Sathane o ḓikukumusa, nahone zwenezwo zwo ita uri awe nga u ṱavhanya.’
A ri ṱoḓi u humbulela eneo mafhungo. Fhedzi zwi vhonala uri Yesu o vha o takala na vhafunziwa vhawe nahone a ambela kha u vutshelwa ha Sathane ha tshifhingani tshi ḓaho. U fhira vhafunziwa vhawe vhoṱhe, Yesu o vha a tshi ḓivha vhukuma vengo ḽihulwane ḽa Diabolo. Edzani u humbula nga ha dakalo ḽe Yesu a vha naḽo musi a tshi pfa uri madimoni a maanḓa o shavha vhafunziwa vhawe vha songo fhelelaho! Honohu u kundwa ha madimoni ho vha hu tshi tou vha mavhala a nngwe a ḓuvha ḽi ḓaho musi Yesu, Mikaele muruṅwa muhulwane, a tshi ḓo lwa na Sathane nahone a mu pandela ṱaḓulu a mu posa kha ḽifhasi.
Musi Yesu a tshi amba uri o vhona Sathane “a tshi wa,” zwi vhonala uri o vha a tshi khou ombedzela vhungoho ha u wa ha Sathane. Hezwi zwi a fana na vhuṅwe vhuporofita ha Bivhilini vhune ha amba nga zwiitea zwa tshifhingani tshi ḓaho nga nḓila ine ha nga ho no ḓadzea. Sa tsumbo, ṱhogomelani u ṱanganyiswa ha tshifhinga tsha kale na tshi ḓaho kha vhuporofita ha malugana na Messia kha Yesaya 52:13–53:12. Zwi vhonala uri Yesu o vha a tshi khou sumbedza fulufhelo ḽa uri u pandelwa ha Sathane ṱaḓulu ho vha hu tshi ḓo itea u ya nga he Khotsi Awe a livha ngaho. Yesu o dovha a vha na vhungoho ha uri Mudzimu nga tshifhinga tsho teaho u ḓo valela Sathane na madimoni awe mugodini nahone nga murahu vha fheliswa lwa tshoṱhe.—Vha-Roma 16:20; Vha-Heberu 2:14; Ndzumbululo 20:1-3, 7-10.
[Ṱhaluso dzi re magumoni a siaṱari]
^ phar. 5 Sedzani bugu ine ya pfi Nḓivho Ine ya Isa Vhutshiloni Vhu sa Fheli, ndima ya 10, na ine ya pfi Revelation—Its Grand Climax At Hand! ndima ya 27, yo gandiswaho nga Ṱhanzi dza Yehova.