Muvhuso Wa Mudzimu Ndi Wa Vhukuma Ṋamusi

Gurannḓa ya Australia ine ya pfi The Age i ri: “Zwi nga konadzea hani uri mashango manzhi a re na mvelele dzo fhambanaho na o bvelelaho nga nḓila dzo fhambanaho a vhe na vhuthihi? Ho vhuya ha ambiwa uri u dzhia vhukando ha iṅwe pulanete nthihi zwi nga ita uri mirafho ya vhathu i vhe na vhuthihi.”

NAA hu ḓo vha na u dzhia vhukando hune ha bva kha iṅwe pulanete? Naho ri sa ḓivhi arali hu tshi ḓo vha na vhuṅwe vhukando vhune ha ḓo dzhiiwa hune ha ḓo ita uri dzitshaka dzi vhe na vhuthihi, zwine ra zwi ḓivha ndi zwa uri vhuporofita ha Bivhili vhu amba nga mutsiko une wa khou ḓa une wa ḓo ita uri dzitshaka dzi vhe na vhuthihi. Nahone wonoyo mutsiko u ḓo vha wo bveledzwa nga maanḓa a sa bvi kha ḽifhasi.

Khosi David wa Isiraele ḽa kale o porofita nga ha zwenezwi zwiimo zwa shango. O hevhedzwa nga Mudzimu o ṅwala a ri: “Mahosi a ḽifhasi a a langana; vhavhusi vho rambana u ḓa u lwa na Yehova na Muḓodzwa wawe. Vha ri: Kha ri ṱhukhukanye mbofho dzavho! Kha ri laṱe kule tha̗mbo dzavho!” (Psalme ya 2:2, 3; Mishumo 4:25, 26) Ṱhogomelani uri mahosi a shango a ḓo ima oṱhe u itela u lwa na Yehova, Musiki wa fhethu hoṱhe, na muḓodzwa wawe, kana Khosi ye a i vhea, Yesu Kristo. Zwenezwo zwo vha zwi tshi ḓo bvelela hani?

U ya nga u tevhekana ha zwifhinga zwo rekhodiwaho Bivhilini na u ḓadzea ha vhuporofita nga ṅwaha wa 1914, Muvhuso wa Mudzimu wo tikwa ṱaḓulu, nahone Yesu Kristo a vhewa sa Khosi. * Nga tshenetsho tshifhinga dzitshaka dza shango  dzo vha dzi na muhumbulo u fanaho. Nṱhani ha u ḓivhea nga fhasi ha vhuvhusi ha Muvhuso muswa wa Mudzimu, vho thoma dzikhakhathi dza u ṱoḓa u wana maanḓa—zwenezwo zwa bveledza Nndwa ya Shango ya u Thoma.

Yehova Mudzimu u dzhia hani zwe vhavhusi vha vhathu vha zwi ita? “Hone, Ene o dzulaho ngei ṱaḓulu u a vha sea; Muhulu-hulu u a vha nyadza. U ḓo amba navho’ ó sinyuwa; u ḓo vha shusha ó halifha.” Nga zwenezwo Yehova u ḓo vhudza Murwa wawe, Khosi yo ḓodzwaho ya Muvhuso a ri: “Nkhumbele, ndi U ṋee Vhannḓa, vha vhe ifa ḽau, na migumo ya ḽifhasi, i vhe shango ḽau. U ḓo vha zhaka nga thonga ya tsimbi; U ḓo vha pwashakanya sa khali dza vumba.”—Psalme ya 2:4, 5, 8, 9.

Honoho u pwashakanywa ha dzitshaka dzi hanedzanaho nga thonga ya tsimbi hu ḓo bvelela nga Haramagedo. Bugu ya u fhedza ya Bivhili ya Ndzumbululo, i ṱalusa zwenezwi zwiitea zwi khaulaho mbilu sa “nndwa ya ḽone ḓuvha ḽihulu ḽa Mudzimu, Mu-vhusa-hoṱhe,” ḽine ‘mahosi a tshaka dzoṱhe’ a ḓo kuvhanganywa hone. (Ndzumbululo 16:14, 16) Dzi tshi ṱuṱuwedzwa nga muya wa madimoni, dzitshaka dza ḽifhasi dzi ḓo fheleledza dzo vha na vhuthihi nga muhumbulo muthihi—wa u lwa na Mudzimu, Ramaanḓaoṱhe.

Tshifhinga tshine vhathu vha ḓo kuvhangana u itela u lwa na vhuvhusi ha Mudzimu tshi khou sendela nga u ṱavhanya. Zwo fhambanaho na zwenezwo, ‘vhuthihi’ havho a vhu nga ḓo vha vhuyedza. Nṱhani hazwo, zwiito zwavho zwi ḓo vha zwi marangaphanḓa a mulalo we vhathu vha vha vho u lindela u bva kale. Zwenezwo zwi ḓo bvelela hani? Mafheleloni a yeneyo nndwa, Muvhuso wa Mudzimu “u ḓo pwashakanya mivhuso yoṱhe [ya shango] wa i lozwa; wone uṋe wa ima lini na lini.” (Daniele 2:44) Muvhuso wa Mudzimu, hu si dzangano naho ḽi ḽifhio ḽa vhathu, u ḓo vha muvhuso une wa ḓo fusha madzangalelo a vhathu u itela uri shango ḽi vhe na mulalo.

Mulanguli Muhulwane wa Muvhuso

Wonoyo ndi Muvhuso we vhathu vhanzhi vha u rabelela vha tshi ri: “Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:10) Nṱhani ha u ri u khakhiswe nga vhuimo ha mbilu, Muvhuso wa Mudzimu ndi muvhuso wa vhukuma we wa ita mishumo minzhi yavhuḓi u bva tshee wa tikwa ṱaḓulu nga 1914. Kha ri ṱhogomele dziṅwe mbuno dza ndeme dzine dza sumbedza uri Muvhuso wa Mudzimu ndi wa vhukuma na une wa kona u ita mishumo yavhuḓi ṋamusi.

Tsha u thoma, u na zwipiḓa zwiraru zwi re na maanḓa zwine zwa rangwa phanḓa nga Yesu Kristo, Khosi yo vhewaho. Nga 33 C.E., Yehova Mudzimu o ita uri Yesu Kristo a vhe Ṱhoho ya tshivhidzo tsha Vhukriste. (Vha-Efesa 1:22) Ngauralo, u bva tsheetsho Yesu o vha a tshi khou shumisa vhuṱoho hawe nahone a sumbedza vhukoni hawe ha u langula. Sa tsumbo, musi hu tshi vha na nḓala khulu kha ḽa Yudea nga ḓana ḽa u thoma ḽa miṅwaha, tshivhidzo tsha Vhukriste tsho mbo ḓi dzhia vhukando nga u ṱavhanya ha u thusa miraḓo yatsho. Ho mbo ḓi dzudzanywa mushumo u itela thuso, nahone Baranaba na Saulo vho mbo ḓi ya vha tshi bva Antiokia u itela u ṋea vhulivhisi.—Mishumo 11:27-30.

Hu nga lavhelelwa zwo engedzeaho kha Yesu Kristo, musi Muvhuso wawe u tshi ḓo vha u tshi khou vhusa. Tshifhinga tshoṱhe musi hu tshi vha na zwiwo—midzinginyo, dzinḓala, maḓi mahulu, ḓumbumazwikule, mimuya, tshivhidzo tsha Ṱhanzi dza Yehova tsha Vhukriste tshi ḓo aravha nga u ṱavhanya u itela u fusha ṱhoḓea dza  vhatendi ngavho na vhaṅwe vhathu vhe vha kwamea kha honoho vhupo. Sa tsumbo, musi hu tshi vha na mudzinginyo ngei El Salvador nga January na February 2001, ho mbo ḓi dzudzanywa nḓila dza u thusa kha zwipiḓa zwoṱhe zwa shango, nahone zwigwada zwa Ṱhanzi dza Yehova zwi bvaho Canada, Guatemala, na United States zwo mbo ḓi ḓa u itela thuso. Ho mbo ḓi vusuluswa fhethu huraru havho ha vhurabeli na mahaya a fhiraho 500 nga tshifhinga tshiṱuku.

Vhane vha Ḓo vha nga Fhasi ha Muvhuso wa Mudzimu

U bva tshee wa tikwa nga 1914, Muvhuso wa Mudzimu wa ṱaḓulu wo vha u tshi khou kuvhanganya na u dzudzanya vhathu vhawo kha ḽifhasi ḽoṱhe. Hezwi zwo vha zwi tshi ḓadzisa vhuporofita vhu swayeaho ho ṅwalwaho nga Yesaya vhune ha ri: “Vhufheloni ha maḓuvha thavha ya nnḓu ya Yehova [vhurabeli hawe ha ngoho ho imiselwaho nṱha] i ḓo vha yó dzudzwa ṱaḓulu ha dzithavha, . . . Ndi hone dzitshakha dzoṱhe dzi tshi ḓo i kuvhanganela.” Hovhu vhuporofita vhu sumbedza uri “vhathu vhanzhi” vha ḓo ya thavhani nahone vha ṱanganedza vhulivhisi na milayo ya Yehova.—Yesaya 2:2, 3,vhambedzani NW.

Wonoyu mushumo wo swikelela tshiṅwe tshipikwa tsha ndeme vhukuma ṋamusi—vhuthihi ha vhahashu vha Vhakriste vha fhiraho 6000 000 kha mashango a fhiraho 230 fhano kha ḽifhasi. Kha mabuthano a tshaka dzoṱhe a Ṱhanzi dza Yehova, vhaṱaleleli vha anzela u mangadzwa nga lufuno, mulalo na vhuthihi vhune ha vha hone kha tshaka, mvelele, na nyambo dzo fhambanaho. (Mishumo 10:34, 35) Naa a ni tendi uri muvhuso une wa nga ita uri vhathu vha tshaka dzo fhambanaho vha vhe na vhuthihi u fanela u vha u muvhuso wo khwaṱhaho na wa vhukuma?

Muvhuso wa Mudzimu na Pfunzo

Muvhuso muṅwe na muṅwe u na zwilinganyo zwine wa ṱoḓa vhadzulapo vhawo vha tshi zwi swikelela, nahone muthu muṅwe na muṅwe ane a ṱoḓa u vha nga fhasi ha wonoyo muvhuso u fanela u swikelela zwenezwo zwilinganyo. Nga hu fanaho, Muvhuso wa Mudzimu u na zwilinganyo zwine vhane vha ṱoḓa u vha nga fhasi hawo vha fanela u zwi swikelela. Naho zwo ralo, u itela uri vhathu vhanzhi nga u ralo vha bvaho fhethu ho fhambanaho vha ṱanganedze na u tendelana na zwilinganyo zwi fanaho ndi zwithu zwi konḓaho vhukuma. Enea mafhungo ndi maṅwe a mafhungo ane a sumbedza uri Muvhuso wa Mudzimu ndi wa ngoho—mbekanyamushumo yawo ya pfunzo i a swikelela mbilu na u shandula mihumbulo.

Wonoyu Muvhuso u kona hani u ḓadzisa wonoyu mushumo u konḓaho nga u rali? Nga maitele a u funza a vhaapostola a ‘nnḓu na nnḓu’ na u funza vhathu Ipfi ḽa Mudzimu nga muthihi nga muthihi. (Mishumo 5:42; 20:20) Enea maitele a shuma u swikela kha vhuimo vhufhio? Jacques Johnson ane a vha mufunzi wa Katolika o ṅwala nga ha vhuḓidini hawe ha u dzivhisa muṅwe musadzi uri a sa gude na Ṱhanzi dza Yehova kha gurannḓa ya vhege iṅwe na iṅwe ya Canada. O ri: “Ndo mbo ḓi thoma u ḓaḓa nahone nda zwi ṱhogomela uri ndi nga si kunde,  nda zwi ṱhogomela uri ho vha ho no fhela miṅwedzi yo vhalaho nahone vhenevho vhafumakadzi vha Ṱhanzi dza Yehova vho vha vho no vhumba vhushaka ho khwaṱhaho na onoyo musadzi we a vha a sa koni u bvela nnḓa. Vho vha vho no vha na mbofho nae u itela u mu thusa, u vha khonani yawe, na u vha na mbofho i bvaho mbiluni. Hu si kale a mbo ḓi thoma u vha muraḓo wo khwaṱhaho wa vhurereli havho nahone ho vha hu si tsheena tshithu tshe nda vha ndi tshi nga tshi ita u itela u mu thivhela.” U tou fana na onoyo muthu we a vha e muraḓo wa kereke ya Katolika we a ṱuṱuwedzwa nga mulaedza wa Bivhili we a funzwa nga Ṱhanzi dza Yehova na vhuḓifari ha Vhukriste, na vhaṅwe vhathu vha dzimilioni vha khou wana ṱhuṱhuwedzo i fanaho shangoni ḽoṱhe.

Enea maitele a pfunzo—pfunzo ya Muvhuso—o thewa Bivhilini, nahone a tikedza ndeme na zwilinganyo zwao zwa vhuḓifari. A funza vhathu uri vha funane na u ṱhonifhana hu sa londwi vhubvo havho. (Yohane 13:34, 35) A thusa vhathu uri vha aravhe kha nyeletshedzo ine ya ri: “Ni songo ḓi-vhambedza na vha shango ḽino. Aiwa, shandukani, kuhumbulele kwaṋu ku vhe kuswa. Uri ni kone u ṱalukanya uri zwiné Mudzimu a funa zwi tshi itwa ndi zwifhio, uri u funa zwivhuya na zwine zwa mu takadza, na zwi sí tshiṱahe.” (Vha-Roma 12:2) Nga ṅwambo wa uri vho litsha nḓila ye vha vha vha tshi tshila ngayo nahone vha tshila u tendelana na milayo na maitele a Muvhuso, vhathu vha dzimilioni vha wana mulalo na dakalo zwa zwino nahone vha vha na zwilavhelelwa zwavhuḓi zwa vhumatshelo.—Vha-Kolosa 3:9-11.

Tshithu tshavhuḓi vhukuma tshine tsha thusa uri hu swikelelwe vhuthihi ha shango ḽoṱhe ndi magazini une wa pfi Tshiingamo. Tsho dzudzanywa u itela uri tshi kone u ṱalutshedzelwa na u gandiswa nga nyambo dzo fhambanaho lune thero dza Tshiingamo khulwane dza kona u gandiswa nga nyambo dza 135, nahone zwenezwo zwa ita uri phesenthe dza vhathu vha 95 shangoni ḽoṱhe dzi kone u tshi vhala nga nyambo dzavho nga tshifhinga tshi fanaho.

Muṅwali wa Mormon o ita mutevhe wa vharumiwa vha vhuimo ha nṱha vhe vha bvelela nga nnḓa ha kereke yawe. Kha mutevhe wawe o katela Tshiingamo na Awake!, dzo gandiswaho nga Ṱhanzi dza Yehova sa magazini dza khwinesa dza u funza evangeli nahone a ri: “A huna muthu ane a nga pomoka Tshiingamo na Awake! mulandu wa u ṱuṱuwedza u sa londa—Nṱhani hazwo, dzi ita uri vhathu vha fhaṱuwe zwine zwa konḓa u wanala kha dziṅwe khandiso dza vhurereli. Tshiingamo na Awake! zwi a homolosa nga mbuno dzi pfalaho, dzo itwaho ṱhoḓisiso dzavhuḓi, nahone dzi amba nga zwithu zwine zwa itea.”

Huna vhuṱanzi vhunzhi vhune ha sumbedza uri Muvhuso wa Mudzimu u khou shuma zwa vhukuma. Ṱhanzi dza Yehova dzi ṱanganela kha mushumo wa u huwelela “mafhungo maḓifha a muvhuso” nga dakalo na nga mafulufulu kha vhahura vhavho, vha tshi vha ramba uri vha vhe nga fhasi hawo. (Mateo 24:14) Naa tshenetshi tshilavhelelwa tshi a ni takadza? Ni nga ḓiphina nga phaṱutshedzo dzine dza vha hone nga u ḓiṱanganya na vhane vha khou funzwa na u lwela u tshila nga zwilinganyo zwa Muvhuso. Zwiṅwe-hafhu, ni nga ḓiphina nga tshilavhelelwa tsha u tshila nga fhasi ha Muvhuso wa shango ḽiswa ḽo fulufhedziswaho ḽine ḽa ḓo vha ‘ḽo ḓala u luga.’—2 Petro 3:13.

[Ṱhaluso dzi re magumoni a siaṱari]

[Tshifanyiso kha siaṱari 4, 5]

Nga 1914 dzitshaka dzo thoma u ḓidzhenisa kha nndwa ya shango

[Zwifanyiso kha siaṱari 6]

Mushumo wa u ḓifunela u itela u thusa ndi vhuṱanzi ha uri Vhakriste vha na lufuno

[Tshifanyiso kha siaṱari 7]

Ṱhanzi dza Yehova shango ḽoṱhe dzi vhuyelwa nga mbekanyamushumo ya pfunzo i fanaho