“Ri Ṱoḓa u Fhindula nga uri, ‘Ee!’ ”

OFISI ya davhi ya Ṱhanzi dza Yehova ya ngei Nigeria i kha ḓi tou bva u wana vhurifhi vhune ha vha na tshipiḓa tshine tsha amba zwi tevhelaho:

“Murwa washu ane a pfi Anderson, o fa e na miṅwaha ya 14. Musi a sa athu fa, o vha e na khuhu mbili. O vha a tshi khou ṱoḓa u dzi rengisa uri a dzhie tshelede ya hone a i ise kha ofisi ya davhi u itela uri i vhe muṋeelo wa mushumo wa shango ḽoṱhe. Fhedzi o fa a sa athu dzi rengisa.

“Nga ṅwambo wa lutamo lwawe, riṋe sa vhabebi vhawe, ro alusa dzenedzo khuhu nahone ra dzi rengisa. Ri khou rumela tshelede ya hone sa muṋeelo wa Anderson. Nga ṅwambo wa mafulufhedziso a Yehova, ri na vhungoho ha uri hu si kale—zwenezwino—ri ḓo dovha ra vhona Anderson. Ri ṱoḓa u fhindula nga uri, ‘Ee!’ musi a tshi ri vhudzisa arali ro ita zwe a vha a tshi khou ṱoḓa u zwi ita. I ngoho, ro lavhelela nga maṱo matswuku u vhona Anderson na ‘gole ḽoṱhe ḽa dziṱhanzi’ ḽine ḽa ḓo vuswa.”—Vha-Heberu 12:1; Yohane 5:28, 29.

Samusi zwo sumbedzwa kha vhurifhi vhu re afho nṱha, u tenda kha mvuwo ndi fulufhelo ḽine ḽa khwaṱhisa Vhakriste vha ngoho. Miṱa ya dzimilioni i ḓo takala lungafhani musi i tshi ṱanganedza miraḓo yayo ine ya i funa ye ya vha yo fa u fana na muṱa wa ha Anderson!—1 Vha-Korinta 15:24-26.

Ipfi ḽa Mudzimu ḽi na ḽeneḽi fulufhelo ḽi khuthadzaho ḽa mvuwo sa zwiṅwe zwa zwithu zwinzhi zwavhuḓi zwine zwa ḓo ḓadzea hu si kale shangoni ḽiswa ḽa u luga nga fhasi ha Muvhuso wa Mudzimu. (2 Petro 3:13) I tshi ambela kha zwithu zwine Mudzimu a ḓo zwi itela vhathu nga tshenetsho tshifhinga, Bivhili i ri: “U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela.”—Ndzumbululo 21:4.