Naa Nyeletshedzo Yavhuḓi I a Ṱoḓea?

VHATHU vhanzhi ṋamusi vha amba uri vha a kona u ṱalula vhuḓi na vhuvhi nahone vha na ndugelo ya u ita naho tshi tshini tshine vha funa. Vhaṅwe vha amba uri zwoṱhe zwo luga arali zwi tshi fusha muthu. Vhutshilo ha mbinganoni na ha muṱa, zwe u bva kale zwa dzhiiwa zwi thikho ya tshitshavha, zwi khomboni nga nḓila i ofhisaho vhukuma.—Genesi 3:5.

Ṱhogomelani Verónica, * a dzulaho Mexico. O amba u ri: “Nga u ṱavhanya nga murahu ha u fhedza miṅwaha ya 15 ro vhingana na munna wanga, o mmbudza uri u khou anḓana na muṅwe mufumakadzi. O amba uri samusi onoyu musadzi a tshee muṱuku nahone a tshi ita uri a takale, ha nga ḓo mu ṱutshela. Ndo vha ndo mangala uri khonani yanga ya tsini a i tsha ḓo vha tsini na nṋe u itela u mvumvusa. Ndo vha ndi tshi humbula uri lufu lwa vhane ra vha funesa ndi lwone lune lwa ḓisa vhuṱungu vhuhulu. Kha nṋe, vhuṱonḓolo ho mmbaisa vhukuma hu si nga uri ndo xelelwa nga ane nda mu funa, fhedzi o bvela phanḓa u ita zwithu zwe zwa vha zwi tshi khou mmbaisa.”

Hu dovha ha vha na vhuimo ha munna wa miṅwaha ya 22 o ṱalaho nahone u na murwa, fhedzi ha ṱoḓi u ṱanganedza vhuḓifhinduleli hawe sa khotsi. U lavhelela mme awe vha tshi mu ṱhogomela u katela na murwa wawe. Arali vha hana u ita zwine a khou ṱoḓa, u a sinyuwa vhukuma nahone a thoma u vha sema, u fana na ṅwana a si na mikhwa. Mme awe vha ḓipfa vhe si na thuso musi vho sedzana na honoho vhuḓifari vhu sinyusaho.

Hezwi a si zwone zwiitea zwi zwoṱhe. U fhandekana na u ṱalana nga lwa mulayo zwi khou engedzea fhethu hoṱhe. Vhana vhanzhi vho no vhona vhabebi vhavho vha tshi khou ṱuwa hayani nahone vha thoma vhuṅwe vhutshilo vhuswa. Vhaṅwe vhaswa a vha tsha ṱhonifha vhaṅwe, u katela na vhabebi vhavho, nahone vha ḓifara nga nḓila ye ya vha i siho na khathihi  mirafhoni yo fhiraho. U ḓifara luvhi nga u ṱangana nga dzimbeu, u shumisa luvhi zwidzidzivhadzi, u vutshela ha vhaswa, na u vhulahwa ha vhadededzi kana vhabebi zwi khou vha zwithu zwo ḓoweleaho mashangoni manzhi. Nahone ni nga vha no no ḓi ṱhogomela uri u alusa vhana na mbingano a si zwone zwithu zwi zwoṱhe zwi bveledzaho vhuleme shangoni ḽa ṋamusi.

Musi ro sedza zwenezwi zwithu zwine zwa khou bvelela, ri nga ḓi vhudzisa uri hu khou bvelela mini kha tshitshavha. Arali vhukuma vhathu vha tshi ḓivha vhuḓi na vhuvhi, ndi ngani hu na vhuleme vhunzhi nga u rali vhune ha khou konḓa u vhu tandulula. Naa hu na ṱhoḓea ya nyeletshedzo yavhuḓi? Naa hu na tshisima tshi fulufhedzeaho tshine ra nga wana hone yeneyo nyeletshedzo? Naho vhathu vhanzhi vha tshi amba uri vha a tenda kha Mudzimu na Ipfi ḽawe ḽo ṅwaliwaho, hezwi a zwi sumbedzi zwi tshi ṱuṱuwedza nḓila ine vha ita ngayo phetho dzavho. Fhedzi ndi mbuyelo dzifhio dzine ra nga dzi wana nga u ṱoḓa na u wana nyeletshedzo i bvaho ha Mudzimu? Kha ri ṱhogomele zwenezwo theroni i tevhelaho.

[Ṱhaluso dzi re magumoni a siaṱari]