Ni a zwi Humbula?

Naa no takalela u vhala thero dza zwenezwino dza Tshiingamo? Ndi ngani ni sa ṱhogomeli arali ni tshi nga fhindula mbudziso dzi tevhelaho?

• Complutensian Polyglot yo vha i mini, nahone ndi ngani yo vha i ya ndeme?

Yo vha i Bivhili yo gandiswaho nga nyambo nnzhi yo ṅwaliwaho nga nḓila i fanaho, nahone ḽo vha ḽi ḽiṅwalwa ḽa khwinesa nga tshenetsho tshifhinga ḽe ḽa vha ḽi hone nga Luheberu, Lugerika, na Lulatini, u katela na zwiṅwe zwipiḓa zwa Luaramiki. Yeneyi Bivhili i re na nyambo nnzhi yo vha i mvelaphanḓa khulwane ya u bveledza ḽiṅwalwa ḽo teaho vhukuma ḽa nyambo dza u thoma.—4/15, masiaṱari 28-31.

• Vhathu vha nga takadza hani Mudzimu?

Samusi e muthu a tshilaho zwa vhukuma, Yehova u a kona u humbula, u dzhia vhukando, na u vha na maḓipfele. Ndi “Mudzimu o takalaho” nahone u takalela u ḓadzisa ndivho yawe. (1 Timotheo 1:11, vhambedzani NW; Psalme ya 104:31) Musi ri tshi dzhiela nṱha maḓipfele a Mudzimu, ri ḓo kona u ḓivha zwine ra nga zwi ita uri ri takadze mbilu yawe.—5/15, masiaṱari 4-7.

• Ndi ngani Davida o tendela musadzi wawe Mihali a tshi vha na tshifanyiso?

Musi Khosi Saulo i tshi ita tshimbevha tsha u ṱoḓou vhulaha Davida, Mihali o mu thusa uri a shavhe, nahone a vhea tshenetsho tshifanyiso vhulaloni khamusi tshe tsha vha tshi na tshivhumbeo tsha munna. A nga vha o vha e na tshenetsho tshifanyiso nga ṅwambo wa uri mbilu yawe yo vha i siho tshoṱhe kha Mudzimu. Davida o vha a sa zwi ḓivhi kana u tenda nga ṅwambo wa uri o vha e ṅwananyana wa Khosi Saulo. (1 Koronika 16:25, 26)—6/1, siaṱari 29.

• Ndi mafhungo-ngoho afhio a ndeme e Mudzimu a amba nga ha malofha?

Nga zwe Mudzimu a zwi amba nga murahu ha Maḓi Mahulu, kha Mulayo wa Mushe, na kha ndaela i re kha Mishumo 15:28, 29, o livhisa ṱhogomelo kha tshiṱhavhelo tshi katelaho u shululwa ha malofha a Yesu. Ndi nga eneo malofha fhedzi hune ra nga hangwelwa zwivhi na u vha na mulalo na Mudzimu. (Vha-Kolosa 1:20)—6/15, masiaṱari 14-19.

• Ndi vhuṱolo vhungana ha Yesu ho bulwaho Bivhilini?

Mafhungo a Evangeli a ambela kha vhuṱolo ha Yesu ha 35. Fhedzi tshivhalo tsho livhaho tsha vhuṱolo ha Yesu, u katela na vhu songo vhigiwaho, a tsho ngo ambiwa. (Mateo 14:14)—7/15, siaṱari 5.