Ri Songo Kulea Nungo Naho Ro Neta
Ri Songo Kulea Nungo Naho Ro Neta
“Yehova ndi Mudzimu wa lini na lini, we a sika shango hune ḽa guma, . . . o netaho u mu ṋea maanḓa; a sá koni u mu ṋea nungo nnzhi.”—YESAYA 40:28, 29.
1, 2. (a) Ndi u ramba hufhio hu kungaho hune ha itelwa vhoṱhe vhane vha ṱoḓa u vha vhurabelini ho kunaho? (b) Ndi mini zwine zwa nga ḓisa khombo kha vhumuya hashu?
SAMUSI ri vhafunziwa vha Yesu, ri a ḓivha zwavhuḓi nga ha u ramba hawe hu kungaho: “Iḓani ha nṋe noṱhe no netaho, no lemelwaho; nṋe ndi ḓo ni awedza. . . . Ngauri dzhogo yanga a i gogoni, muhwalo wanga u a leluwa.” (Mateo 11:28-30) Vhakriste vha dovha vha ṋewa “maḓuvha a u ḓi-phiṋa ane a . . . bva ha [Yehova, NW].” (Mishumo 3:20) A zwi timatimisi uri no no wana mvelelo dzi homolosaho nga u guda mafhungo-ngoho a Bivhili, nga u vha na fulufhelo ḽavhuḓi ḽa vhumatshelo, na nga u shumisa milayo ya Yehova vhutshiloni haṋu.
2 Naho zwo ralo, vhaṅwe vharabeli vha Yehova vha a neta nga lwa maḓipfele. Kha zwiṅwe zwiitea honohu u kulea nungo hu vha ha tshifhinganyana. Nga zwiṅwe zwifhinga u neta hu nga vha ha tshifhinga tshilapfu. Nga u ya ha tshifhinga, vhaṅwe vha nga pfa uri vhuḓifhinduleli havho ha Vhukriste ndi muhwalo nṱhani ha uri vhu vhe vhu homolosaho samusi Yesu o fulufhedzisa. Eneo maḓipfele a si avhuḓi a nga ita uri hu vhe na khombo khulwane kha vhushaka ha Mukriste na Yehova.
3. Ndi ngani Yesu o ṋea nyeletshedzo i wanalaho kha Yohane 14:1?
3 Nga phanḓanyana a sa athu farwa na u vhulahwa, Yesu o vhudza vhafunziwa vhawe a ri: “Dzimbilu dzaṋu dzi songo tshenuwa; tendani Mudzimu, ni tende na nṋe.” (Yohane 14:1) Yesu o amba enea maipfi samusi vhafunziwa vhawe vho vha vhe tsini na u sedzana na zwiitea zwi ofhisaho. Zwenezwi zwo vha zwi tshi ḓo tevhelwa nga u tovholwa. Yesu o vha a tshi khou zwi ḓivha uri vhaapostola vhawe vha ḓo khukhulisea nga ṅwambo wa u kulea nungo. (Yohane 16:1) Arali a songo langiwa, maḓipfele a si avhuḓi o vha a tshi nga ita uri vha si khwaṱhe muyani nahone a ita uri vha si fulufhele Yehova. Hezwo zwo tou ralo na kha Vhakriste ṋamusi. U kulea nungo ha tshifhinga tshilapfu hu nga ḓisa vhuṱungu vhuhulwane, nahone mbilu dzashu dzi nga lemedzwa. (Yeremia 8:18) Muthu wa nga ngomu a nga fhelelwa nga maanḓa. Nga fhasi ha wonoyo mutsiko, ri nga pwashea maḓipfeleni na kha vhumuya, nahone ra xelelwa nga lutamo lwa u shumela Yehova.
4. Ndi mini zwine zwa nga ri thusa u ita uri mbilu dzashu dza pfanyisedzo dzi si nete?
4 Bivhili i ṋea nyeletshedzo yo teaho vhukuma ine ya ri: “Kha zwoṱhe zwine zwa pfi zwi lindwe U vhulungese mbilu yau; ngauri ndi yone ine vhutshilo ha bva khayo’.” (Mirero 4:23) Bivhili i ṋea nyeletshedzo i shumaho ine ya ri thusa u tsireledza mbilu yashu ya pfanyisedzo kha u kulea nungo na u neta muyani. Naho zwo ralo, tsha u thoma, ri fanela u ḓivha zwavhuḓi tshiitisi tsha u neta hashu.
U vha Mukriste a si Muhwalo
5. Ndi zwifhio zwine zwa vhonala zwi tshi hanedzana malugana na u vha mufunziwa wa Mukriste?
5 I ngoho, u vha Mukriste zwi ṱoḓa vhuḓidini ho engedzeaho. (Luka 13:24) Yesu o ri: “A sá hwaliho [danda ḽawe ḽa tshengedzo, NW] a ntevhela, ha koni u vha mufunziwa wanga.” (Luka 14:27) Enea maipfi a nga vhonala a tshi hanedzana na mafhungo a Yesu a uri muhwalo wawe u a leluwa na u homolosa, fhedzi zwi re zwone ndi uri ha hanedzani.
6, 7. Ndi ngani ri tshi nga amba uri nḓila ine ra rabela ngayo a i netisi?
6 Naho mushumo wa u ḓidina na wa biko u tshi nga netisa, u nga vha u fushaho na u homolosaho musi u tshi itwa hu na tshiitisi tshavhuḓi. (Muhuweleli 3:13, 22) Nahone ndi zwavhuḓi lungafhani u vhudza vhahura vhashu mafhungo-ngoho avhuḓi a Bivhili? Zwiṅwe hafhu, u lwela hashu u tshila nga zwilinganyo zwa Mudzimu zwa nṱha zwa vhuḓifari a hu vhi ha ndeme musi hu tshi vhambedzwa na mbuyelo dza u ḓiphina nga ṅwambo wa zwenezwo. (Mirero 2:10-20) Naho ri tshi tovholwa, ri zwi dzhia i ndugelo u shengela nga ṅwambo wa Muvhuso wa Mudzimu.—1 Petro 4:14.
7 Muhwalo wa Yesu u a homolosa zwa vhukuma, zwihuluhulu musi u tshi vhambedzwa na swiswi ḽa muya ḽa vhane vha dzula vhe kha dzhogo ya vhurereli ha mazwifhi. Mudzimu u a ri funa zwa vhukuma nahone ha ṱoḓi zwithu zwo no konḓa kha riṋe. ‘Milayo ya Yehova a i konḓi.’ (1 Yohane 5:3) Samusi zwo sumbedzwa Maṅwaloni, Vhukriste ha ngoho a si muhwalo. Zwi khagala uri nḓila ine ra rabela ngayo a i iti uri ri nete kana ri kulee nungo.
‘Laṱani Muhwalo Woṱhe’
8. Ndi mini zwine kanzhi zwa ita uri ri nete muyani?
8 Zwi vhonala uri u neta huṅwe na huṅwe ha muya hune ra hu pfa hu anzela u bveledzwa nga muhwalo wo engedzeaho we ra hweswa wone nga ano maitele a zwithu o tshinyalaho. Nga ṅwambo wa uri “shango ḽoṱhe ḽo vhumbulutshela kha Muvhi,” ro tangwa nga mimuya mivhi i pikisaho ine ya nga ita uri ri nete na u fhelisa u linganyisela hashu ha Vhukriste. (1 Yohane 5:19) U ṱoḓa zwithu zwi si zwa ndeme zwi nga ita uri maitele a mishumo yashu ya Vhukriste a konḓe na u thithisea. Mihwalo yo fhiraho mpimo i nga ri lemela na u ri tsikeledza. Bivhili i ri ṱuṱuwedza zwo tea uri ri “laṱe muhwalo woṱhe.”—Vha-Heberu 12:1-3.
9. U ṱoḓesa zwithu zwi vhonalaho zwi nga ri lemedza nga nḓila-ḓe?
9 Sa tsumbo, u farakanea ha shango nga u ṱoḓa u vha na bvumo, tshelede, u ḓimvumvusa, u tshimbila na mashango u itela u ḓiphina, na zwiṅwe zwithu zwi vhonalaho zwi nga kwama mahumbulele ashu. (1 Yohane 2:15-17) Vhaṅwe Vhakriste vha ḓana ḽa u thoma ḽa miṅwaha vhe vha ṱoḓesa lupfumo vho ita uri vhutshilo havho vhu konḓe vhukuma. Muapostola Paulo o ṱalutshedza a ri: “Vha lilaho u pfuma vha wela milingoni na mireoni, vha dzhenwa nga dzinyemulo nzhi dza vhutsilu dzi tshinyaho, dziné dza bwandamedza vhathu kha u tshinyala na u lovha. Ngauri mudzi wa zwoṱhe zwi re zwivhi ndi u tama mali; vhaṅwe vha tshi hovhelela zwenezwo, vho xela-xelana na lutendo, vha ḓi-ṱhavhela dzitshengelo nzhi.” (1 Timotheo 6:9, 10)
10. Ndi mini zwine ra nga zwi guda nga ha lupfumo kha tshifanyiso tsha Yesu tsha muzwali?
10 Musi ri tshi pfa ro neta na u kulea nungo nga u shumela hashu Mudzimu, naa hu nga si vhe hu nga ṅwambo wa uri u ṱoḓesa zwithu zwi vhonalaho zwi khou tsikeledza vhumuya hashu? Yeneyi khonadzeo ndi ya vhukuma, samusi zwo sumbedzwa nga tshifanyiso tsha Yesu tsha muzwali. Yesu o vhambedza “mbilaelo dza zwa shango ḽino, na vhufhura ha lupfumo, na dziṅwe dzinyemulo” na mipfa ine ya “pwanyeledza” mbeu ya ipfi ḽa Mudzimu mbiluni dzashu. (Marko 4:18, 19) Nga zwenezwo, Bivhili i sevha uri: “Laṱani zwiito zwa vhutshivha; ni eḓanwe nga zwi re hone, ngauri o amba a ri: A thi nga U litshi, a thi nga U laṱedzi.”—Vha-Heberu 13:5.
11. Ri nga fhungudza hani zwithu zwine zwa nga ri lemedza?
11 Zwine zwa ita uri vhutshilo hashu vhu konḓe zwiṅwe zwifhinga a si u ṱoḓesa zwithu zwinzhi, fhedzi ndi zwine ra zwi ita nga zwithu ro no vhaho nazwo. Vhaṅwe vha nga neta maḓipfeleni nga ṅwambo wa vhuleme ha mutakalo, na u felwa nga vhane vha vha funa, kana nga vhuṅwe vhuleme vhu tsikeledzaho. Vho vhona ṱhoḓea ya u ita dzitshanduko tshifhinga tshoṱhe. Vhaṅwe vhavhingani vho phetha u fhungudza miṅwe ya mishumo yavho ya u ḓimvumvusa na miṅwe mishumo i si ya ndeme. Vho ṱolisisa zwithu zwavho na u paka zwithu zwoṱhe zwi tshimbidzanaho na zwenezwo nahone vha zwi vhetshela kule. Tshifhinga tshoṱhe, ri nga vhuyelwa roṱhe nga u humbula nga ha matshilele ashu na thundu dzashu, nahone ra laṱa mihwalo yoṱhe i si ya ndeme u itela uri ri sa nete nahone ra kulea nungo.
Vhuhwavho na u Ḓiṱukufhadza ndi zwa Ndeme
12. Ndi mini zwine ra fanela u zwi ṱhogomela nga ha vhukhakhi hashu?
12 U khakha hashu na kha zwithu zwiṱuku, zwi nga ita uri vhutshilo hashu vhu konḓe nga zwiṱuku nga zwiṱuku. Maipfi a Davida ndi a ngoho: “Ngauri milandu yanga yo wela kha ṱhóho yanga, i mvunḓa vhunga muhwalo u lemelaho.” (Psalme ya 38:4) Kanzhi u ita tshanduko dzi si gathi zwi a ri leludzela mihwalo i lemelaho.
13. Vhuhwavho vhu nga ri thusa hani u vha na mavhonele o linganyiselwaho vhuḓinḓani?
13 Bivhili i ri ṱuṱuwedzela u ṱahulela “u ṱalukanya na u elekanya.” (Mirero 3:21, 22) Bivhili i ri: ‘Vhuṱali vhu bvaho ṱaḓulu vhu na . . . vhuhwavho.’ (Yakobo 3:17) Vhaṅwe vha pfa vho tsikeledzea nga u ṱoḓa u ita mushumo u linganaho na une vhaṅwe vha u ita vhuḓinḓani ha Vhukriste. Naho zwo ralo, Bivhili i a ri sevha: “Muthu nga a sedze mushumo wawe, ndi hone thendo a tshi ḓo i wana kha mushumo u ré wawe ene muṋe; ha tsha ḓo i wana nga u ḓi-vhambedza na muṅwe. Ngauri roṱhe nga muthihi ro hwala maputu ashu riṋe vhaṋe.” (Vha-Galata 6:4, 5) Ndi ngoho, tsumbo yavhuḓi ya Vhakriste nga riṋe i nga ri ṱuṱuwedzela u shumela Yehova nga mbilu yoṱhe, fhedzi vhuṱali na vhuhwavho zwi ḓo ri thusa u ḓivhetshela zwipikwa zwi swikeleleaho u ya nga vhuimo hashu.
14, 15. Ri nga sumbedza hani vhuṱali kha u ṱhogomela ṱhoḓea dzashu dza muya na dza maḓipfele?
14 U vha hashu na vhuhwavho na kha masia ane a nga vhonala e si a ndeme zwi nga thusa u thivhela u ḓipfa ro neta. Sa tsumbo, naa ri a ṱahulela matshilele o linganyiselwaho ane a ita uri ri vhe na mutakalo wavhuḓi? Ṱhogomelani tsumbo ya vhavhingani vha shumaho kha iṅwe ya ofisi dza davhi dza Ṱhanzi dza Yehova. Vho vhona ndeme ya u thivhela u neta. Wa mufumakadzi u ri: “Hu sa londwi mushumo munzhi une ra vha nawo, ri anzela u eḓela nga tshifhinga tshi ṱoḓaho u fana madekwana maṅwe na maṅwe. Ri dovha ra ita nyonyoloso tshifhinga tshoṱhe. Zwenezwi zwo ri thusa vhukuma. Ro guda nga vhushayanungo hashu, nahone ri ita zwithu nga nḓila yo teaho. Ri lingedza u sa ḓivhambedza na vhane vha vhonala vhe na maanḓa o kalulaho.” Naa ri a ḽa zwiḽiwa zwi re na pfushi tshifhinga tshoṱhe na u awela ho linganelaho? U livhisa ṱhogomelo kha mutakalo washu nga u angaredza zwi nga fhungudza u ḓipfa ro neta maḓipfeleni na kha vhumuya.
15 Vhaṅwe vhashu vha na ṱhoḓea dzo fhambanaho. Sa tsumbo, muṅwe wahashu wa tshisadzini wa Mukriste o shuma vhuḓinḓani ha tshifhinga tshoṱhe mishumoni i re na vhuleme yo fhambanaho. O vha e na vhuleme vhuhulwane ha mutakalo, u katela na u vha na khentsara. Ndi mini tshe tsha mu thusa u sedzana na zwiimo zwi tsikeledzaho? U ri: “Ndi zwa ndeme kha nṋe u vha na tshifhinga ndi ndoṱhe nahone fhethu hu si na phosho. Musi ndi tshi ḓipfa ndo tsikeledzea na u neta, ndi ṱoḓa fhethu hu si na phosho nga u ṱavhanya hune nda nga vhala na u awela.” Vhuṱali na maanḓa a u humbula zwi ri thusa u ṱhogomela na u fusha ṱhoḓea dzashu nahone nga zwenezwo ra iledza u neta muyani.
Yehova Mudzimu u a Ri Ṋea Maanḓa
16, 17. (a) Ndi ngani u ṱhogomela mutakalo washu wa muya zwi zwa ndeme vhukuma? (b) Ndi mini zwine ra fanela u zwi katela kha maitele ashu a ḓuvha ḽiṅwe na ḽiṅwe?
16 Vhukuma, u ṱhogomela mutakalo washu wa muya ndi zwa ndeme vhukuma. Musi ri na vhushaka ha tsini na Yehova Mudzimu, ri nga neta muvhilini, fhedzi ri songo vhuya ra neta u mu rabela. Yehova ndi ene a ‘ṋeaho maanḓa o netaho na u ṋea a sa koni nungo nnzhi.’ (Yesaya 40:28, 29) Muapostola Paulo, we a vhona vhungoho ha enea maipfi, o ri: “Ndi zwone zwiné ri sa dinalee ngazwo’, ngauri nahó muthu washu wa nnḓa a tshi ṱahala, wa ngomu hashu u ḓi itwa muswa nga maḓuvha na maḓuvha.”—2 Vha-Korinta 4:16.
17 Ṱhogomelani mubulo une wa ri “maḓuvha na maḓuvha.” Hezwi zwi amba u shumisa zwine Yehova a ri ṋea zwone ḓuvha ḽiṅwe na ḽiṅwe. Murumiwa we a shuma nga u fulufhedzea miṅwaha ya 43, o sedzana na zwifhinga zwa u neta muvhilini na u kulea nungo. Fhedzi ho ngo neta. U ri: “Ndo ḓiḓowedza u fhinduwa uri musi ndi sa athu thoma mushumo naho u ufhio ndi fhedze tshifhinga ndi tshi khou rabela Yehova na u vhala Ipfi ḽawe. Enea maitele a ḓuvha ḽiṅwe na ḽiṅwe o nthusa u konḓelela u swika zwino.” Ee, ri nga ḓitika tshoṱhe nga maanḓa a khwaṱhisaho a Yehova arali tshifhinga tshoṱhe, ‘ḓuvha ḽiṅwe na ḽiṅwe,’ ri tshi mu rabela na u elekanya nga pfaneleo dzawe dza nṱha na mafulufhedziso awe.
18. Ndi khuthadzo ifhio ine Bivhili ya i ṋea vhane vha fulufhedzea vho no vhaho vhalala kana vhane vha khou lwala?
18 Hezwi zwi a thusa vhukuma kha vhane vha ḓipfa vho kulea nungo nga vhulala na nga mutakalo u si wavhuḓi. Vhenevho vhathu vha nga tsikeledzea hu si nga ṅwambo wa u ḓivhambedza na vhaṅwe, fhedzi nga u vhambedza na zwe vha vha vha tshi kona u zwi ita mathomoni. Zwi a khuthadza vhukuma u ḓivha uri Yehova u a dzhiela nṱha vhalala! Bivhili i ri: “Mmvi ndi tshiala tsha vhugala; tshi wanwa nga vha nḓila ya zwivhuya.” (Mirero 16:31) Yehova u a ḓivha zwine ra sa kone u zwi swikelela nahone u a dzhiela nṱha u mu rabela hashu nga mbilu yoṱhe hu sa londwi vhushayanungo hashu. Nahone mushumo wavhuḓi ro no u itaho wo no rekhodiwa muhumbuloni wa Mudzimu. Maṅwalo a ri khwaṱhisedza u ri: “Mudzimu ha ṱaluli; ha nga hangwi zwe na shuma na ḓi-netisa lufunoni ni tshi itela dzina ḽawe; no shumela vhakhethwa, na zwino ni khou vha shumela.” (Vha-Heberu 6:10) Ri takala vhukuma u vha na vhathu vhe vha fulufhedzea kha Yehova mahumini manzhi a miṅwaha!
Ni Songo Neta
19. Ri vhuyelwa hani nga u dzula ro farakanea nga u ita zwivhuya?
19 Vhathu vhanzhi vha tenda uri u shuma nga mafulufulu tshifhinga tshoṱhe zwi nga fhungudza maneto. Nga hu fanaho, u ita mishumo ya zwithu zwa muya tshifhinga tshoṱhe zwi nga thusa kha u fhelisa u ḓipfa ro neta maḓipfeleni kana vhu muyani. Bivhili i ri: “Arali ri tshi ita zwivhuya ri songo dinalea, ngauri arali rí sa neti, ri ḓo kaṋa nga tshifhinga tshazwo’. Zwino-ha, vhunga ri tshee na tshifhinga, nga ri ite zwivhuya ri tshi itela vhoṱhe, zwihulu-hulu ri tshi itela vha re vha nnḓu nthihi na riṋe nga lutendo.” (Vha-Galata 6:9, 10) Ṱhogomelani mibulo ine ya ri “ita zwivhuya” na “ite zwivhuya.” Hezwi zwi amba uri ri dzhie vhukando. U itela vhaṅwe zwivhuya zwi nga ri thusa uri ri sa nete kha u shumela hashu Yehova.
20. U itela u lwa na u kulea nungo, ri fanela u iledza vhukonani vhufhio?
20 Zwo fhambanaho na zwenezwo, u konana na u shuma na vhathu vhane vha nyadza milayo ya Mudzimu zwi nga vha muhwalo u netisaho. Bivhili i a ri sevha: “Tombo ḽi a lemela; muṱavha ndi muhwalo; vhuvhili hazwo zwi fhirwa nga vuvu ḽa tsilu.” (Mirero 27:3) U itela u lwa na maḓipfele a u kulea nungo na u neta, ri fanela u iledza u vha na vhukonani na vhane vha vha na mavhonele a si avhuḓi na vhane vha ṱoḓa vhukhakhi na u sasaladza vhaṅwe.
21. Ri nga ṱuṱuwedza hani vhaṅwe miṱanganoni ya Vhukriste?
21 Miṱangano ya Vhukriste ndi ndugiselelo i bvaho ha Yehova u itela u ri khwaṱhisa. Henefho hu na tshibuli tshavhuḓi tsha u ṱuṱuwedzana nga pfunzo na vhukonani zwi homolosaho. (Vha-Heberu 10:25) Vhathu vhoṱhe vha fanela u lwela u vha vha fhaṱaho musi vha tshi fhindula miṱanganoni kana vha tshi ṱanganela kha mbekanyamushumo kha pulatifomo. Vhane vha ranga phanḓa kha u funza vha na vhuḓifhinduleli vhuhulwane ha u ṱuṱuwedza vhaṅwe. (Yesaya 32:1, 2) Na musi hu na ṱhoḓea ya u eletshedza kana u kaidza, nḓila ine vha ṋea ngayo ndayo i fanela u homolosa. (Vha-Galata 6:1, 2) U funa hashu vhaṅwe zwi ḓo ri thusa vhukuma u shumela Yehova ri sa neti.—Psalme ya 133:1; Yohane 13:35.
22. Hu sa londwi u sa fhelela hashu, ndi ngani ri tshi nga vha na fulufhelo ḽavhuḓi?
22 U rabela Yehova kha zwino zwifhinga zwa vhufhelo zwi amba mushumo muhulwane. Nahone Vhakriste vha a neta muhumbuloni, vhuṱungu ha maḓipfele, na zwiimo zwi tsikeledzaho. U sa fhelela hashu zwi ita uri ri sa khwaṱhe, u fana na mudzio. Naho zwo ralo, Bivhili i ri: “Dzánga ḽeneḽo ro ḽi fara nga midzio ya vumba, uri u hulesa ha maanḓa hu vhe ha Mudzimu, hu si vhe hu tshi bva kha riṋe.” (2 Vha-Korinta 4:7) Ee, ri ḓo neta, fhedzi ri songo vhuya ra kulea nungo. Nṱhani hazwo kha ‘ri ambe ro fulufhela uri: [Yehova, NW] ndi mulweli washu.’—Vha-Heberu 13:6.
Mvusuluso Pfufhi
• Ndi ifhio miṅwe mihwalo i lemelaho ine ra nga kona u i laṱa?
• Ri nga ṱanganela hani kha u ‘itela zwivhuya’ Vhakriste nga riṋe?
• Yehova u ri khwaṱhisa hani musi ri tshi ḓipfa ro neta kana u kulea nungo?
[Mbudziso Dza Pfunzo]
[Tshifanyiso kha siaṱari 23]
Yesu o vha a tshi zwi ḓivha uri u ṱungufhala ha tshifhinga tshilapfu hu nga tsikeledza vhaapostola
[Tshifanyiso kha siaṱari 24]
Vhaṅwe vho litsha huṅwe u ḓimvumvusa na mishumo i si ya ndeme
[Tshifanyiso kha siaṱari 26]
Hu sa londwi vhushayanungo hashu, Yehova u dzhiela nṱha u mu rabela hashu zwi tshi bva mbiluni