U Vhengwa Ri Si Na Mulandu
U Vhengwa Ri Si Na Mulandu
“Vho mbénga ndí si na mulandu.”—YOHANE 15:25.
1, 2. (a) Ndi ngani vhaṅwe vha tshi mangala musi Vhakriste vha tshi ambiwa luvhi, nahone ndi ngani eneo mafhungo a songo fanela u ri mangadza? (b) Ndi ṱhaluso ifhio ya ipfi “vhenga” ine ra ḓo i haseledza kha yeneyi thero? (Sedzani ṱhaluso i re magumoni a siaṱari.)
ṰHANZI DZA YEHOVA dzi lwela u tshila nga milayo i wanalaho Ipfini ḽa Mudzimu. Nga ṅwambo wa zwenezwo, dzi ḓiphina nga u vha na bvumo ḽavhuḓi kha mashango manzhi. Naho zwo ralo, nga zwiṅwe zwifhinga dzi a tshinywa dzina. Sa tsumbo, vhashumeli vha muvhuso ḓoroboni ya St. Petersburg, Russia, vho ri: “Ro vhudzwa uri Ṱhanzi dza Yehova ndi tshigwada tsha vhurereli tsha tshiphiri nahone dzi vhulaha vhana na u ḓivhulaha dzone dziṋe.” Nga murahu ha u shuma na Ṱhanzi dza Yehova kha buthano ḽa tshaka dzoṱhe, onoyo mushumeli o ri: “Zwino ndi dzi vhona dzi vhathu vho ḓoweleaho, nahone dzi a sea . . . Dzi na mulalo na u dzika, nahone dzi a funana nga maanḓa.” O engedza nga uri: “A thi vhuyi nda pfesesa uri ndi ngani vhathu vha tshi amba eneo mazwifhi nga hadzo.”—1 Petro 3:16.
2 Vhashumeli vha Mudzimu a vha takali musi vha tshi pomokwa uri ndi vhaitazwivhi, fhedzi a vha mangali musi vhathu vha tshi vha pomoka. Yesu o sevha vhatevheli vhawe hu tshee nga phanḓa a ri: “Arali shango ḽi tshi ni vhénga, ni ḓivhe zwauri ḽo ranga u vhénga nṋe. . . . Hone ndi uri hu khunyelele murero wo ṅwaliwaho mulayoni wavho wa ri: Vho mbénga ndí si na mulandu.” * (Yohane 15:18-20, 25; Psalme ya 35:19; 69:4) Mathomoni o vhudza vhafunziwa vhawe a ri: “Zwino, muṋe wa nnḓu vha tshi mu ira ḽa Beelsebulu, vha nnḓu yawe a vha nga ḓo vha ita zwo vhifhaho u fhirisa izwo naa?” (Mateo 10:25) Vhakriste vha a zwi pfesesa uri u konḓelela honoho u pomokwa ndi tshipiḓa tsha “danda ḽa tshengedzo” ḽe vha ḽi hwala musi vha tshi vha vhatevheli vha Kristo.—Mateo 16:24, NW.
3. Vharabeli vha ngoho vha tovholwa u swika kha vhuimo vhufhio?
3 U tovholwa ha vharabeli vha ngoho ho thoma kale vhukuma, u bva murahu kha “Abele we a vha a si na mulandu.” (Mateo 23:34, 35) A zwi bveleli kha zwiitea zwi si gathi fhedzi. Yesu o amba uri vhatevheli vhawe vha ḓo ‘vhengiwa nga vhathu vhoṱhe’ mulandu hu dzina ḽawe. (Mateo 10:22) Hafhu, muapostola Paulo o ṅwala uri vhashumeli vhoṱhe vha Mudzimu—u katela muṅwe na muṅwe washu—vha fanela u lavhelela u tovholwa. (2 Timotheo 3:12) Ndi tshiitisi tshifhio tsha zwenezwi?
Mubveledzi wa Vengo ḽi Songo Teaho
4. Bivhili i dzumbulula hani mubveledzi wa vengo ḽi songo teaho?
4 Ipfi ḽa Mudzimu ḽi amba uri u bva mathomoni ho vha hu na mubveledzi wa vengo a sa vhonali. Ṱhogomelani u vhulahwa ha tshiṱuhu ha muthu wa u thoma wa lutendo, Abele. Bivhili i amba uri mukomana wawe wa muvhulahi, Kaini, ‘u bva kha muvhi,’ Sathane Diabolo. (1 Yohane 3:12) Kaini o vha e na mavhonele a Sathane, nahone Diabolo o mu shumisa u itela u ita maano awe a vhuvhi. Bivhili i dovha ya dzumbulula mushumo wa Sathane wa u vutshela Yobo na Yesu Kristo lwa tshiṱuhu. (Yobo 1:12; 2:6, 7; Yohane 8:37, 44; 13:27) Bugu ya Ndzumbululo yo bvisela khagala mubveledzi wa u tovholwa ha vhatevheli vha Yesu, musi i tshi ri: “Ene Diabolo u ḓo posa vhaṅwe vhaṋu khothoni uri ni lingiwe.” (Ndzumbululo 2:10, maḽeḓeretsendama ndi ashu.) Ee, Sathane ndi mubveledzi wa vengo ḽi songo teaho kha vhathu vha Mudzimu.
5. Ndi ngani Sathane a tshi vhenga vharabeli vha ngoho?
5 Ndi mini tshine tsha ita uri Sathane a vhenge vharabeli vha ngoho? Kha tshimbevha tshine tsha sumbedza u ḓikukumusa vhukuma, Sathane o pikisa “Khosi ya kale na kale,” Yehova Mudzimu. (1 Timotheo 1:17; 3:6) O amba uri Mudzimu u vhetshela milayo yo kalulaho zwivhumbwa zwawe na uri a huna na muthihi ane a shumela Yehova nga tshiitisi tshavhuḓi, na uri vhathu vha ita nga u ralo nga ṅwambo wa tseḓa. Sathane o amba uri arali a tendelwa uri a linge vhathu, a nga ita uri muthu muṅwe na muṅwe a litshe u shumela Mudzimu. (Genesi 3:1-6; Yobo 1:6-12; 2:1-7) Musi a tshi pomoka Yehova sa mutsikeledzi, muzwifhi, na o kundwaho, Sathane o vha a tshi khou ṱoḓa u ḓiita muvhusahoṱhe. Nga zwenezwo, u sinyutshela hawe vhashumeli vha Mudzimu zwi khou ṱuṱuwedzwa nga nyemulo yawe ya u ṱoḓa u rabelwa.—Mateo 4:8, 9.
6. (a) Ri kwamea hani nga khani ya vhuvhusahoṱhe ha Yehova? (b) U pfesesa enea mafhungo zwi ri thusa hani u dzula ri tshi fulufhedzea? (Sedzani bogisi kha siaṱari 16.)
6 Naa ni a vhona nḓila ine enea mafhungo a ni kwama ngayo? Samusi ni mushumeli wa Yehova, zwi vhonala uri ni a zwi ṱhogomela uri naho u ita zwine Mudzimu a zwi funa zwi tshi ṱoḓa vhuḓini ho engedzeaho, malamba a u ita nga u ralo ndi manzhi. Naho zwo ralo, ni ḓo ita mini arali zwiimo vhutshiloni haṋu zwi tshi ita uri zwi ni konḓele, na u ni pfisa vhuṱungu uri ni bvele phanḓa ni tshi tendelana na milayo na maitele zwa Yehova? Nahone hu pfi mini arali hu tshi vhonala hu si na mbuyelo? Naa ni ḓo phetha uri a zwi vhuyedzi u bvela phanḓa ni tshi shumela Yehova? Kana naa u funa haṋu Yehova na u dzhiela nṱha pfaneleo dzawe dzi mangadzaho zwi ḓo ni ṱuṱuwedzela u bvela phanḓa ni tshi tshimbila nḓilani dzawe dzoṱhe? (Doiteronomio 10:12, 13) Nga u tendela Sathane a tshi ri ḓisela vhuṅwe vhuleme, Yehova u khou ṋea muṅwe na muṅwe washu tshibuli tsha u ḓifhindulela kha u vutshelwa nga Sathane.—Mirero 27:11.
“Arali Vhathu vha Tshi ni Sema”
7. Ndi maano afhio ane Diabolo a a shumisa u lingedza uri ri litshe u shumela Yehova?
7 Zwino kha ri ṱhogomele nga vhuronwane vhuṅwe ha vhukwila vhune Sathane a vhu shumisa u itela u khwaṱhisedza u pomoka hawe—hune a hu ita a tshi shumisa mazwifhi. Yesu o vhidza Sathane uri ndi “khotsi ya vhadzia-u-zwifha.” (Yohane 8:44) Ṱhaluso ya dzina Diabolo, ine ya amba “Murembi,” i ṱalusa onoyo muthu sa murembi muhulwane wa Mudzimu, zwine a zwi amba zwi vhuyedzaho, na dzina ḽawe ḽikhethwa. Diabolo o shumisa u pomoka ha vhukwila, na mazwifhi madala-dala kha u vutshela vhuvhusahoṱhe ha Yehova, nahone o shumisa honoho vhutsila u itela u tshinya dzina vhashumeli vha Mudzimu. Nga u pomoka dzenedzi Ṱhanzi, a nga ita uri milingo i vhavhaho i vha konḓele vhukuma u i konḓelela.
8. Sathane o pomoka hani Yobo, nahone ha vha na mvelelo dzifhio?
8 Ṱhogomelani zwe zwa bvelela kha Yobo, ane dzina ḽawe ḽa amba “Muvhengiwa.” Nga nnḓa ha u ita uri Yobo a xelelwe nga zwithu zwa u ḓitshidza, vhana vhawe, na mutakalo wawe, Sathane o ita uri zwi vhonale zwa uri Yobo u muitazwivhi we a vha a tshi khou ṱarafiwa nga Mudzimu. Naho o vha a tshi ṱhonifhiwa vhukuma, Yobo o mbo ḓi nyadziwa nga mashaka na nga khonani dzawe dza tsini. (Yobo 19:13-19; 29:1, 2, 7-11) Zwiṅwe hafhu, nga u shumisa vhakhuthadzi vha mazwifhi, Sathane o vha a tshi khou ṱoḓa u ‘shengedza Yobo nga maipfi,’ nga u thoma u mu pomoka uri a nga vha o ita tshiṅwe tshivhi tshihulwane nahone nga zwenezwo a tshi khou mu sasaladza nga ho livhaho sa muitazwivhi. (Yobo 4:6-9; 19:2; 22:5-10) Zwenezwo zwo vha zwi tshi ḓo kula vhukuma Yobo nungo!
9. Zwo itwa nga nḓila-ḓe uri Yesu a vhonale e muitazwivhi?
9 Samusi o vha e mutikedzi muhulwane wa vhuvhusahoṱhe ha Yehova, Murwa wa Mudzimu o vhengiwa vhukuma nga Sathane. Musi Yesu a tshi ḓa kha ḽifhasi, Sathane o vha a tshi khou ṱoḓa u mu pwasha muyani, samusi o zwi ita Yobo, nga u ita uri Yesu a vhonale e muitazwivhi. (Yesaya 53:2-4; Yohane 9:24) Vhathu vho mu vhidza mudzia u nwesa na wa u ḽesa nahone vha amba uri ‘u na muya muvhi.’ (Mateo 11:18, 19; Yohane 7:20; 8:48; 10:20) O pomokwa uri o sema Mudzimu. (Mateo 9:2, 3; 26:63-66; Yohane 10:33-36) Zwenezwi zwo tsikeledza Yesu, nga ṅwambo wa uri o vha a tshi zwi ḓivha uri zwi tshinya dzina ḽa Khotsi awe zwi songo tea. (Luka 22:41-44) Mafheleloni, Yesu o ombelwa sa mutshinyi o semiwaho. (Mateo 27:38-44) A tshi itela u dzula a tshi fulufhedzea, Yesu o konḓelela vhukuma ‘a tshi hanedzwa nga vha-ita-zwivhi.’—Vha-Heberu 12:2, 3.
10. Vha masalela a vho ḓodzwaho vho vutshelwa hani musalauno nga Sathane?
10 Musalauno, vhatevheli vha Kristo vha masalela vho ḓodzwaho na vhone vho vhengiwa nga Diabolo. Sathane u ṱaluswa sa “mufheṱi wa vharathu [vha Kristo] we a vha a tshi . . . vha fheṱa Mudzimuni masiari na vhusiku.” (Ndzumbululo 12:9, 10) U bva tshee a pandelwa ṱaḓulu nahone a poselwa kha ḽifhasi, Sathane o engedza vhuḓidini hawe ha u tshinya dzina vharathu vha Kristo sa vhaitazwivhi vho laṱwaho. (1 Vha-Korinta 4:13) Kha maṅwe mashango, vho pomokwa uri vha tshigwada tsha vhurereli tshi re na khombo, u fana na zwe zwa itwa Vhakriste vha ḓana ḽa u thoma ḽa miṅwaha. (Mishumo 24:5, 14; 28:22) Samusi ro zwi ṱhogomela mathomoni, vho tshinywa dzina nga mazwifhi. Naho zwo ralo, “u rendwani na u solwani, kha phungo mmbi na kha phungo mbuya” vharathu vha Kristo vho ḓodzwaho, vha tshi tikedzwa nga khonani dzavho vha “dziṅwe nngu,” vho lingedza nga u ḓiṱukufhadza u ‘fara milayo ya Mudzimu na u ṱanziela nga ha Kristo.’—2 Vha-Korinta 6:8; Yohane 10:16; Ndzumbululo 12:17.
11, 12. (a) Ndi zwifhio zwiṅwe zwine zwa bveledza u pomokwa hune Vhakriste vha ṱangana naho? (b) Ndi nga nḓila dzifhio hune Mukriste a nga shengedzwa zwi songo tea nga ṅwambo wa lutendo lwawe?
11 Vhukuma, a si u pomokwa hoṱhe hune vhashumeli vha Mudzimu vha ṱangana naho hune ha vha ha “u luga.” (Mateo 5:10) Vhuṅwe vhuleme vhu nga bveledzwa nga u sa fhelela hashu. A huna u khoḓwa ho khetheaho arali ri “tshi konḓelela u rwiwa [ro] ita zwivhi.” Naho zwo ralo, arali Mukriste “nga ṅwambo wa u vha na luvalo lwavhuḓi kha Mudzimu, a konḓelela u ṱhuphiwa a si na mulandu, zwenezwi ndi zwithu zwi takadzaho” maṱoni a Yehova. (1 Petro 2:19, 20) Ndi kha zwiimo zwifhio hune zwenezwo zwa nga bvelela?
12 Vhaṅwe vho farwa luvhi nga ṅwambo wa uri vho hana u ṱanganela kha mikhuvha ya mbulungo i si ya maṅwalo. (Doiteronomio 14:1) Vhaswa vha Dziṱhanzi vho semiwa nga ṅwambo wa u tevhedza havho zwilinganyo zwa Yehova zwa vhuḓifari. (1 Petro 4:4) Vhaṅwe Vhakriste vho pomokwa sa “vha sa londi” kana “vha re na khombo” nga ṅwambo wa uri a vha ṱoḓi ngalafho ya malofha kha vhana vhavho. (Mishumo 15:29) Vhakriste vho laṱwa nga mashaka na vhahura zwihuluhulu nga ṅwambo wa uri ndi vhashumeli vha Yehova. (Mateo 10:34-37) Vhenevho vhathu vhoṱhe vha khou tevhela tsumbo yo vhewaho nga vhaporofita na nga Yesu ya u shengedzwa zwi songo tea.—Mateo 5:11, 12; Yakobo 5:10; 1 Petro 2:21.
U Konḓelela u Pomokwa
13. Ndi mini zwine zwa nga ri thusa u dzula ri tshi linganyisela vhumuya hashu musi ri tshi sedzana na u nyadziwa huhulwane?
13 Musi ri tshi khou nyadziwa nga ṅwambo wa lutendo lwashu, ri nga kulea nungo, samusi zwo itea kha muporofita Yeremia, nahone ra pfa ri nga si bvele phanḓa na u shumela Mudzimu. (Yeremia 20:7-9) Ndi mini zwine zwa nga ri thusa u dzula ri tshi linganyisela kha vhumuya hashu? Lingedzani u dzhia mafhungo u ya nga mavhonele a Yehova. U dzhia vhane vha dzula vha tshi fulufhedzea nga fhasi ha mulingo sa vhakundi, hu si vhane vha kundwa. (Vha-Roma 8:37) Lingedzani u vhona nga maṱo a muhumbulo vhathu vhe vha tikedza vhuvhusahoṱhe ha Yehova hu sa londwi u nyadziwa hoṱhe he Diabolo a vha ḓisela hone—vha fanaho na vhanna na vhafumakadzi vha ngaho Abele, Yobo, Maria mme a Yesu, na vhaṅwe vha fulufhedzeaho, u katela na vhashumeli nga riṋe vha musalauno. (Vha-Heberu 11:35-37; 12:1) Elekanyani nga ha u tshila havho nga u fulufhedzea. Ḽeneḽo gole ḽihulwane ḽa vhavhuya ḽi khou ri ramba uri ri ṱanganele naḽo kha gundo ḽo vhetshelwaho vhane vha kunda shango nga u vha na lutendo.—1 Yohane 5:4.
14. Thabelo i bvaho mbiluni i nga ri khwaṱhisa hani uri ri dzule ri tshi fulufhedzea?
14 Arali ‘mbilaelo dzi tshi khou vha nnzhi kha riṋe,’ ri nga rabela Yehova zwi tshi bva mbiluni, nahone u ḓo ri fhumudza na u ri khwaṱhisa. (Psalme ya 50:15; 94:19) U ḓo ri ṋea vhuṱali vhune ra vhu ṱoḓa uri ri kone u sedzana na milingo na u ri thusa uri ri dzule ro livhisa ṱhogomelo kha khani khulwane, vhuvhusahoṱhe ha Yehova, vhune ha khou ita uri vhashumeli vhawe vha vhengwe zwi songo tea. (Yakobo 1:5) Yehova a nga dovha a ri ṋea “mulalo wa Mudzimu, a fhiraho u ṱalukanya hoṱhe.” (Vha-Filipi 4:6, 7) Wonoyu mulalo une ra ṋewa nga Mudzimu u ita uri ri dzule ro dzika na u khwaṱha musi ro sedzana na mutsiko muhulwane, nahone ri sa timatime kana u ofha. Nga ṅwambo wa muya wawe, Yehova a nga ri tsireledza kha zwiṅwe na zwiṅwe zwine a zwi tendela kha riṋe.—1 Vha-Korinta 10:13.
15. Ndi mini tshine tsha ḓo ri thusa u iledza u sinyuwa musi ri tshi khou shengela?
15 Ndi mini tshine tsha nga ri thusa uri ri sa sinyutshele vhane vha ri vhenga ri si na mulandu? Humbulani uri maswina ashu mahulwane ndi Sathane na madimoni awe. (Vha-Efesa 6:12) Naho vhaṅwe vhathu vha tshi ri tovhola nga khole, vhunzhi ha vhane vha tovhola vhathu vha Mudzimu vha ita nga u ralo nga ṅwambo wa u sa londa kana u shumiswa nga vhaṅwe. (Daniele 6:4-16; 1 Timotheo 1:12, 13) Yehova u funa “vhathu vhoṱhe vha tshi tshidzwa vha swika kha u ṱalukanya mafhungo-ngoho.” (1 Timotheo 2:4) I ngoho, vhaṅwe vhe vha vha vhe vhatovholi zwino ndi vhahashu vha Vhakriste nga ṅwambo wa u vhona vhuḓifari hashu vhu sa solei. (1 Petro 2:12) Zwiṅwe hafhu, ri nga guda kha tsumbo ya Yosefa murwa wa Yakobo. Naho Yosefa o shengela nga ṅwambo wa vhakomana vhawe, ho ngo vha vhenga. Ndi ngani? Nga ṅwambo wa uri o ṱhogomela uri Yehova o vha e kha eneo mafhungo, a tshi khou livhisa zwiitea u itela u ḓadzisa ndivho Yawe. (Genesi 45:4-8) Yehova a nga dovha a ita uri u shengela naho hu hufhio hu songo teaho hune ra nga ṱangana naho hu ḓadzise vhugala ha dzina ḽawe.—1 Petro 4:16.
16, 17. Ndi ngani ri songo fanela u vhilaela nga maanḓa nga ha vhuḓidini ha vhapikisi ha u thithisa mushumo wa u huwelela?
16 A ro ngo fanela u vhilaela nga maanḓa arali vhapikisi vha tshi vhonala vha tshi khou bvelela lwa tshifhinganyana kha u thithisa mvelaphanḓa ya mafhungo maḓifha. Zwino Yehova u khou dzinginyisa dzitshaka a tshi shumisa vhuṱanzi vhune ha khou ṋewa shangoni ḽoṱhe, nahone madzanga a khou ḓa. (Hagai 2:7) Kristo Yesu, Mulisa wa Ndele, u ri: “Nngu dzanga dzi pfa ipfi ḽanga; nṋe ndi a dzi ḓivha, huno dzi a ntevhela. Huno nṋe ndi dzi ṋea vhutshilo vhu sa fheli; . . . a huna ane a ḓo dzi thuba tshanḓani tshanga.” (Yohane 10:27-29, maḽeḓeretsendama ndi ashu.) Vharuṅwa vhakhethwa na vhone vha a ṱanganela kha mushumo muhulwane wa khaṋo ya muya. (Mateo 13:39, 41; Ndzumbululo 14:6, 7) Nga zwenezwo, a huna tshine vhapikisi vha nga tshi amba kana u ita tshine tsha nga thithisa ndivho ya Mudzimu.—Yesaya 54:17; Mishumo 5:38, 39.
17 Kanzhi hu vha na mvelelo dzo fhambanaho na dze vhapikisi vha vha vho dzi lavhelela. Kha vhuṅwe vhupo ha Afurika, ho phaḓaladzwa mazwifhi manzhi nga ha Ṱhanzi dza Yehova, u katela na a uri vho vha vhe vharabeli vha Diabolo. Nga ṅwambo wa zwenezwo, tshifhinga tshoṱhe musi Ṱhanzi dzi tshi mu dalela, Grace o vha a tshi shavhela murahu ha nnḓu nahone a dzumbama u swikela dzi tshi ṱuwa. Ḽiṅwe ḓuvha mufunzi wa kereke ya hawe o imisela nṱha khandiso dzashu nahone a vhudza vhoṱhe vhe vha vha vhe hone uri vha si dzi vhale nga ṅwambo wa uri dzi ḓo ita uri vha ṱutshele zwine vha zwi tenda. Zwenezwo zwa vusa dzangalelo ḽa Grace. Musi Ṱhanzi dzi tshi dala tshiṅwe tshifhinga, nṱhani ha u dzumbama a mbo ḓi fara nyambedzano nadzo nahone a dzhia khandiso. Ha thomiwa pfunzo ya Bivhili nae, nahone nga 1996 a lovhedzwa. Grace zwino u shumisa tshifhinga tshawe u itela u ṱoḓa vhaṅwe vhe vha zwifhelwa nga ha Ṱhanzi dza Yehova.
Khwaṱhisani Lutendo Lwaṋu Zwino
18. Ndi ngani hu na ṱhoḓea ya u khwaṱhisa lutendo lwashu musi hu sa athu vha na milingo i vhavhaho, nahone ri nga zwi itisa hani zwenezwo?
18 Samusi Sathane a tshi nga ri vutshela tshifhinga tshiṅwe na tshiṅwe nga vengo ḽi songo teaho, ndi zwa ndeme uri ri khwaṱhise lutendo lwashu zwino. Ri nga zwi itisa hani zwenezwo? Muvhigo u bvaho shangoni ḽe ha vha hu tshi khou tovholwa vhathu vha Yehova u ri: “Hu na tshithu tshithihi tshine tsha vha khagala: Vhane vha vha na maitele avhuḓi a zwithu zwa muya na u dzhiela nṱha mafhungo-ngoho a Bivhili a vha na vhuleme ha u dzula vho khwaṱha musi hu tshi ḓa milingo. Fhedzi vhane nga “tshifhinga tsho ḓaho” vha ṱahela miṱangano, vha sa ṱanganeli tshumeloni ya tsimu, na u vhuyafhedza kha mafhungo maṱuku kanzhi vha a wa musi vhe mulingoni u ‘vhavhaho’.” (2 Timotheo 4:2) Arali na vhona fhethu hune na ṱoḓa u hu khwinisa, itani vhuḓini ha u ita nga u ralo nga u ṱavhanya.—Psalme ya 119:60.
19. U fulufhedzea ha vhashumeli vha Mudzimu vho sedzana na vengo ḽi songo teaho hu khunyeledza mini?
19 U fulufhedzea ha vharabeli vha ngoho nga fhasi ha vhuṱungu ha vengo ḽa Sathane ndi vhuṱanzi vhu vhonalaho ha ndugelo, u fanelea, na u luga ha vhuvhusahoṱhe ha Yehova. U fulufhedzea havho hu takadza mbilu ya Mudzimu. Naho vhathu vha tshi nga vha nyadza, muthu ane tshirunzi tshawe tsha vha nṱha ha ḽifhasi na ḽiṱaḓulu “ha pfi a tshi vha shona, musi a tshi vhidzwa Mudzimu wavho.” Vhukuma, malugana na vhenevho vhavhuya vhoṱhe, hu nga ambiwa zwo tea uri: “Shango ḽino a ḽongo fanelwa nga vhathu vha u ralo.”—Vha-Heberu 11:16, 38, NW.
[Ṱhaluso dzi re magumoni a siaṱari]
^ phar. 2 Maṅwaloni, ipfi “vhenga” ḽi amba zwithu zwo fhambanahonyana. Kha maṅwe mafhungo, ḽi amba u funa zwiṱuku. (Doiteronomio 21:15, 16) Ipfi “vhenga” ḽi nga dovha ḽa amba u ṋengwa vhukuma fhedzi hu si na tshiitisi naho tshi tshifhio tsha u tshinyadza ane wa khou mu vhenga, u tshi ṱoḓa u mu iledza nga ṅwambo wa u pfa u sa mu funi. Naho zwo ralo, ipfi “vhenga” ḽi nga dovha ḽa amba vhuswina vhuhulwane vhu bvelaho phanḓa, vhune kanzhi ha tshimbidzana na vengo. Ndi ṱhaluso ya ḽeneḽi ipfi ḽine ḽa khou haseledzwa kha yeneyi thero.
Ni Nga Ṱalusa?
• Ndi mini tshine tsha khou ita uri hu vhe na vengo ḽi songo teaho ḽo livhiswaho kha vharabeli vha ngoho?
• Sathane o shumisa hani u nyadza kha vhuḓidini ha u fhelisa u fulufhedzea ha Yobo na Yesu?
• Yehova uri khwaṱhisa hani uri ri ime ro khwaṱha musi ro sedzana na vengo ḽa Sathane?
[Mbudziso Dza Pfunzo]
[Bogisi/Tshifanyiso kha siaṱari 16]
Vho Pfesesa Khani ya Vhukuma
Muṅwe wa Ṱhanzi dza Yehova ngei Ukraine, he ha vha ho thivhelwa mushumo wa u huwelela Muvhuso miṅwaha i fhiraho 50, o ri: “Tshiimo tshe Ṱhanzi dza Yehova dza ḓi wana dzi khatsho a tsho ngo fanela u haṱulwa nga nḓila ine vhaṅwe vhathu vha ri fara ngayo . . . Vhunzhi ha vhashumeli vha muvhuso vho vha vha tshi khou sokou ita mushumo wavho. Musi muvhuso u tshi shanduka, na vhashumeli vha a shandula u fulufhedzea havho, fhedzi riṋe a ri shanduki. Ro zwi ṱhogomela vhukuma uri tshi bveledzi tsha vhukuma tsha vhuleme hashu tsho dzumbululwa Bivhilini.
“A ri ḓidzhii sa vhathu vho kundwaho nga vhatsikeledzi. Tshe tsha ri thusa u konḓelela ho vha hu u pfesesa zwavhuḓi khani ye ya vha hone tsimuni ya Edeni—khani ya ndugelo ya Mudzimu ya u vhusa. . . . A ri tikedzi mafhungo a tshimbidzanaho na madzangalelo a vhathu fhedzi, fhedzi ri dovha ra vha na dzangalelo kha Vhuvhusahoṱhe. Ri a pfesesa nga maanḓa yeneyo khani. Hezwi zwi a ri khwaṱhisa na uri thusa uri ri dzule ri tshi fulufhedzea na nga fhasi ha zwiimo zwi vhavhaho.”
[Tshifanyiso]
Victor Popvych, o farwa nga 1970
[Tshifanyiso kha siaṱari 13]
Ndi nnyi we a vha a tshi khou tikedza u nyadziwa he Yesu a ṱangana naho?
[Zwifanyiso kha siaṱari 15]
Yobo, Maria, na vhashumeli vha Mudzimu vha musalauno, vha fanaho na Stanley Jones, vho tikedza vhuvhusahoṱhe ha Yehova