Yehova, ‘Dzhavhelo Ḽashu Musi Ro Tsikeledzea’
Yehova, ‘Dzhavhelo Ḽashu Musi Ro Tsikeledzea’
“U tshidzwa ha vhavhuya hu bva ha Yehova, Dzhavhelo ḽavho musi wa mutsiko.”—PSALME YA 37:39.
1, 2. (a) Ndi ngani Yesu o rabelela vhafunziwa vhawe? (b) Ndi zwifhio zwine Mudzimu a zwi funa malugana na vhathu vhawe?
YEHOVA ndi ramaanḓaoṱhe. U na maanḓa a u tsireledza vharabeli vhawe vha fulufhedzeaho nga nḓila iṅwe na iṅwe ine a funa ngayo. A nga bvisela vhathu vhawe thungo ha vhaṅwe vhoṱhe vha re hone shangoni nahone a vha vhea fhethu ho tsireledzeaho na hu re na mulalo. Naho zwo ralo, malugana na vhafunziwa vhawe, Yesu o rabela Khotsi awe wa ṱaḓulu: “A thi ri: vha bvise shangoni ḽino; tshiné nda humbela ndi uri: vha pilele uri vha si dzhene vhuvhini.”—Yohane 17:15.
2 Yehova o khetha u sa ri ‘bvisa shangoni.’ Nṱhani hazwo, ndi zwine a zwi funa uri ri tshile na vhaṅwe fhano shangoni u itela u ḓivhadza mulaedza wawe wa fulufhelo na u khuthadzaho vhaṅwe. (Vha-Roma 10:13-15) Fhedzi samusi Yesu o zwi amba thabeloni yawe, nga u tshila kha ḽino shango, ri vha ri khomboni ya ‘muvhi.’ Vhathu vha sa thetshelesi na maanḓa a mimuya mivhi zwi bveledza maṱhupho na vhuṱungu, nahone Vhakriste vha a tsikeledzea.—1 Petro 5:9.
3. Vharabeli vha Yehova vha fulufhedzeaho vha sedzana na mini, fhedzi ndi khuthadzo ifhio ine ra i wana Ipfini ḽa Mudzimu?
3 Nga fhasi ha yeneyo milingo, ndi zwa nzulele uri muthu a tsikeledzee lwa tshifhinganyana. (Mirero 24:10) Mafhungo a Bivhili a na tsumbo nnzhi dza vhathu vha fulufhedzeaho vhe vha tsikeledzea. Mupsalme u ri: “Maṱhupho a muvhuya ndi manzhi; kha oṱhe-oṱhe Yehova u ḓo mu lamulela.” (Psalme ya 34:19) Ee, zwithu zwivhi zwi a bvelela na kha “muvhuya.” U fana na mupsalme Davida, ri nga ‘tshinyala, na u tou vunḓekana.’ (Psalme ya 38:8) Ee, zwi a khuthadza u ḓivha uri “Yehova u sendela ha vha dzimbilu dzo vunḓekanaho, u tshidza vha mimuya yo huvhalaho.”—Psalme ya 34:18; 94:19.
4, 5. (a) U tendelana na Mirero 18:10, ri fanela u ita mini u itela u tsireledzwa nga Mudzimu? (b) Ndi vhufhio vhuṅwe vhukando ho livhaho vhune ra nga vhu dzhia uri ri thuswe nga Mudzimu?
4 U tendelana na thabelo ya Yesu, Yehova u khou ri linda. Ndi “dzhavhelo ḽashu musi wa [mutsiko, NW].” (Psalme ya 37:39) Bugu ya Mirero i shumisa mubulo u fanaho musi i tshi ri: “Dzina ḽa Yehova ndi thavha vhukuma; muvhuya u shavhela henefho a khuda.” (Mirero 18:10) Lwonolu luṅwalo lu dzumbulula mafhungo-ngoho a ndeme nga ha ṱhogomelo ya Yehova ya lufuno kha zwivhumbwa zwawe. Mudzimu u tsireledza zwihuluhulu vhavhuya vhane vha mu ṱoḓa vho ḓiimisela, zwi tshi tou nga ri khou gidimela dzhavheloni u itela u khuda.
5 Musi ro sedzana na vhuleme vhu tsikeledzaho, ri nga ṱoḓa hani tsireledzo ya Yehova? Kha ri ṱhogomele vhukando vhuraru ha ndeme vhune ra nga vhu dzhia uri ri thuswe nga Yehova. Tsha u thoma, ri fanela u rabela Khotsi ashu wa ṱaḓulu. Tsha vhuvhili, ri fanela u shuma u tendelana na muya wawe mukhethwa. Nahone tsha vhuraru, ri fanela u ḓivhea nga fhasi ha ndugiselelo dza Yehova nga u ṱoḓa u konana na Vhakriste nga riṋe vhane vha nga fhungudza vhuṱungu ha u tsikeledzea hashu.
Maanḓa a Thabelo
6. Vhakriste vha ngoho vha dzhia hani thabelo?
6 Vhaṅwe vhaḓivhi vho themendela thabelo sa dzilafho ḽa mutsiko. Naho zwi ngoho uri u rabela lwa tshifhinganyana zwi nga fhungudza mutsiko, hu nga dovha ha ambiwa zwi fanaho nga ha zwiṅwe zwithu zwa mupo kana u tsiḓululwa kha muṱana. Vhakriste vha ngoho a vha dzhieli fhasi thabelo nga u i dzhia sa dzilafho zwaḽo. Ri dzhia thabelo i u davhidzana na Musiki nga ṱhonifho. Thabelo i katela u ḓikumedza hashu na u vha na fulufhelo kha Mudzimu. Ee, thabelo ndi tshipiḓa tsha vhurabeli hashu.
7. Zwi amba mini u rabela u na fulufhelo, nahone dzenedzo thabelo dzi ri thusa hani u sedzana na mitsiko?
7 Thabelo dzashu dzi fanela u tshimbidzana na u vha na fulufhelo, kana u ḓitika nga Yehova. Muapostola Yohane o ṅwala a ri: “Na fulufhelo asiḽi, ḽiné ra vha naḽo’ ró fulufhela Ene, ri ri: Arali ri tshi humbela tshithu tshiné Ene a funa tshi tshi vha hone, u a ri pfa.” (1 Yohane 5:14) Yehova, ndi Muthu Muhulwanesa, Mudzimu ramaanḓaoṱhe wa ngoho e eṱhe, u livhisa ṱhogomelo yo khetheaho kha thabelo dzi bvaho mbiluni dza vharabeli vhawe. U sokou ḓivha uri Mudzimu washu a re na lufuno u a ri pfa musi ri tshi mu vhudza mbilaelo na vhuleme hashu zwi a khuthadza.—Vha-Filipi 4:6.
8. Ndi ngani Vhakriste vha fulufhedzeaho vha songo fanela u shona kana u ḓipfa vhe si vha ndeme musi vha tshi rabela Yehova?
8 Vhakriste vha fulufhedzeaho a vho ngo fanela u shona, u ḓipfa vhe si vha ndeme, kana u sa vha na fulufhelo musi vha tshi rabela Yehova. Ndi ngoho uri musi ro kulea nungo kana ri tshi khou pfa ro tsikeledzwa nga vhuleme, ri nga si rabele Yehova tshifhinga tshoṱhe. Nga zwenezwo zwifhinga ri fanela u humbula uri Yehova u “fhumudza vhathu vhawe” na “vhaheḓana.” (Yesaya 49:13; 2 Vha-Korinta 7:6) Zwifhingani zwa maṱungu na u tsikeledzea zwihuluhulu ri fanela u rabela Khotsi ashu wa ṱaḓulu ri na fulufhelo samusi e vhukhudo hashu.
9. Lutendo ndi lwa ndeme lungafhani musi ri tshi rabela Mudzimu?
9 U itela u vhuyelwa nga vhuḓalo nga ndugelo ya u rabela, ri fanela u vha na lutendo lwa vhukuma. Bivhili i ri “vha sendelaho Mudzimu tshavho hu vhe u tenda zwauri u hone, na u tenda zwauri vha mu ṱoḓaho u ḓo vha ṋea malamba.” (Vha-Heberu 11:6) U vha na lutendo zwi fhira u sokou tenda uri Mudzimu “u hone.” Lutendo lwa ngoho lu katela u tenda nga ho khwaṱhaho kha vhukoni na lutamo lwa Mudzimu lwa u lambedza buḓo ḽa vhutshilo hashu ha u mu thetshelesa. “Maṱo a Murena a kha vho lugaho, nḓevhe dzawe o isa kha zwiné vha humbela zwone.” (1 Petro 3:12) U ṱhogomelwa nga Yehova nga lufuno tshifhinga tshoṱhe zwi ita uri thabelo dzashu dzi vhe na zwine dza amba zwone nga ho khetheaho.
10. Ri fanela u rabela nga nḓila-ḓe arali ri tshi ṱoḓa u fushwa muyani nga Yehova?
10 Yehova u a thetshelesa thabelo dzashu musi dzi tshi ṋekedzwa nga mbilu yoṱhe. Mupsalme o ṅwala a ri: “Ndi vhidzelela nga mbilu yoṱhe, Yehova, mpfe!” (Psalme ya 119:145) U fhambana na thabelo dza mukhuvha dza vhurereli vhunzhi, thabelo dzashu a dzi sokou vha maitele a ḓuvha ḽiṅwe na ḽiṅwe kana dza u timatima. Musi ri tshi rabela Yehova nga “mbilu yoṱhe,” maipfi ashu a vha na zwine a amba zwone na ndivho. Nga murahu ha dzenedzo thabelo dzi bvaho mbiluni, ri thoma u pfa ro vhofholowa nge ra kumedzela ‘Yehova zwi ri lemelaho.’ Samusi Bivhili i tshi fulufhedzisa uri ‘u ḓo ri ṱhaḓula.’—Psalme ya 55:22; 1 Petro 5:6, 7.
Muya wa Mudzimu ndi Muthusi Washu
11. Ndi ifhio iṅwe nḓila ine Yehova a ri fhindula ngayo musi ri tshi ‘humbela’ thuso yawe?
11 Yehova ha sokou vha Mupfi wa dzi thabelo fhedzi, fhedzi u dovha a vha Mufhinduli. (Psalme ya 65:2) Davida o ṅwala a ri: “Musi ndó [tsikeledzea, NW] ndi vhidzelela Iwe, ngauri ndi Iwe U mpfaho.” (Psalme ya 86:7) Nga ho teaho, Yesu o ṱuṱuwedza vhafunziwa vhawe u ‘humbela’ u thuswa nga Yehova nga ṅwambo wa uri “Khotsi wa ṱaḓulu” ‘u ḓo fha muya-mukhethwa vha mu humbelaho.’ (Luka 11:9-13) Ee, maanḓa a Mudzimu a shumaho a shuma sa muthusi, kana mufhumudzi kha vhathu vhawe.—Yohane 14:16, vhambedzani NW.
12. Muya wa Mudzimu u nga ri thusa hani musi vhuleme vhu tshi vhonala vhu vhuhulwane?
12 Na musi ri tshi sedzana na milingo, muya wa Mudzimu u ri ṋea “u hulesa ha maanḓa.” (2 Vha-Korinta 4:7) Muapostola Paulo we a konḓelela zwiimo zwi tsikeledzaho, o amba e na fulufhelo a ri: “Zwoṱhe ndi zwi kona nga a nkonisaho.” (Vha-Filipi 4:13) Nga hu fanaho, Vhakriste vhanzhi ṋamusi vho pfa vho vusuluswa muyani na kha maanḓa a maḓipfele musi hu tshi fhindulwa zwine vha zwi humbela. Kanzhi, vhuleme vhu tsikeledzaho vhu a vha vhuṱuku nga murahu ha u wana thuso ya muya wa Mudzimu. Nga ṅwambo wa enea maanḓa ane ra ṋewa nga Mudzimu, ri nga amba u fana na muapostola we a ri: “Ri vha pwanyeledzwaho hoṱhe, hone rí sa pwashiwi; ri vha khakhedzwaho, hone rí sa khakhelwi, Ri vha tovholwaho, hone rí sa laṱedzwi; ri vho poswaho fhasi, hone rí sa vhulawi.”—2 Vha-Korinta 4:8, 9.
13, 14. (a) Yehova o sumbedza hani u vha vhukhudo hashu nga u shumisa Ipfi ḽo ṅwaliwaho? (b) Zwo ni thusa hani u shumisa milayo ya Bivhili?
13 Muyamukhethwa wo dovha wa hevhedza na u tsireledza Ipfi ḽa Mudzimu ḽo ṅwalwaho u itela u ri vhuyedza. Yehova o sumbedza hani u vha vhukhudo hashu zwifhingani zwi tsikeledzaho nga u shumisa Ipfi ḽawe? Iṅwe nḓila ndi nga u ri ṋea vhuṱali na vhukoni ha u humbula. (Mirero 3:21-24) Bivhili i gudisa maanḓa a u ṱalukanya hashu na u khwinisa maanḓa ashu a u humbula. (Vha-Roma 12:1, vhambedzani NW.) Nga u vhala na u guda Ipfi ḽa Mudzimu tshifhinga tshoṱhe, u katela na u ḽi shumisa, ri nga vha na “ṱhalukanyo yo ḓowelaho u khethekanya vhuḓi na vhuvhi.” (Vha-Heberu 5:14) Ni nga vha no no ṱhogomela nḓila ye milayo ya Bivhili ya ni thusa ngayo u ita phetho dza vhuṱali musi no sedzana na vhuleme. Bivhili i ri ṋea vhuṱali vhune ha nga ri thusa u wana zwipiringululi kha vhuleme vhu tsikeledzaho.—Mirero 1:4.
14 Ipfi ḽa Mudzimu ḽi dovha ḽa ri ṋea tshiṅwe tshisima tsha maanḓa—fulufhelo ḽa u tshidzwa. (Vha-Roma 15:4) Bivhili i ri vhudza uri zwithu zwivhi zwi nga si bvele phanḓa zwi tshi bvelela nga hu sa fheli. Ngauri maṱhupho oṱhe ane ra a pfa ndi a tshifhinganyana. (2 Vha-Korinta 4:16-18) Ri na ‘fulufhelo ḽa u tshila tshoṱhe ḽe Mudzimu, a sa zwifhi, a hu amba, zwifhinga zwa kale na kale zwi sathu vha hone a ri, hu ḓo vha hone.’ (Tito 1:2) Arali ri tshi takalela ḽeneḽo fulufhelo, ri tshi ṱhogomela tshifhinga tshoṱhe vhumatshelo havhuḓi he Yehova a vhu fulufhedzisa, ri nga konḓelela musi ri vhuṱunguni.—Vha-Roma 12:12; 1 Vha-Thesalonika 1:3.
Tshivhidzo —Ndi Musumbedzo wa Lufuno
15. Vhakriste vha nga thusana nga nḓila-ḓe?
15 Iṅwe ndugiselelo i bvaho ha Yehova ine ya nga ri thusa zwifhingani zwa mutsiko ndi vhukonani vhune ra ḓiphina ngaho tshivhidzoni tsha Vhukriste. Bivhili i ri: “Khonani ndi ṱhama ya maḓuvha oṱhe; ndi mukomana we a bebelwa ḓuvha ḽa [mutsiko, NW].” (Mirero 17:17) Ipfi ḽa Mudzimu ḽi ṱuṱuwedza vhoṱhe tshivhidzoni u hulisana na u funana. (Vha-Roma 12:10) Muapostola Paulo o ṅwala a ri: “Hu so ngo vha na ané a ḓi-ṱoḓela zwawe ene muṋe, muthu nga a vhavhalele muṅwe.” (1 Vha-Korinta 10:24) U vha na eneo mavhonele zwi nga ri thusa u livhisa ṱhogomela kha ṱhoḓea dza vhaṅwe nṱhani ha milingo yashu. Musi ri tshi thusa vhaṅwe, ri vha ri si khou vha thusa fhedzi, fhedzi ri dovha ra ḓiphina nga dakalo na u fushea zwine zwa ita uri ri kone u konḓelela vhuleme hashu.—Mishumo 20:35.
16. Mukriste muṅwe na muṅwe a nga ṱuṱuwedza nga nḓila-ḓe?
16 Vhanna na vhafumakadzi vho vhibvaho muyani vha nga ita mushumo wa ndeme wa u khwaṱhisa vhaṅwe. U itela u ita nga u ralo, vha ita uri vha kone u ambea navho na u swikelelea. (2 Vha-Korinta 6:11-13) Tshivhidzo tshi a vhuyelwa zwa vhukuma musi vhoṱhe vha tshi ḓiṋea tshifhinga tsha u khoḓa vhaswa, u khwaṱhisa vhane vha kha ḓi bva u vha vhatendi. (Vha-Roma 15:7) Lufuno lwa vhurathu na vhukomana lu dovha lwa ri thusa u iledza muya wa u sa fulufhelana. A ro ngo fanela u ṱavhanyedzela u amba uri vhuleme ha muthu ndi luswayo lwa u sa khwaṱha muyani. Paulo o ṱuṱuwedza Vhakriste zwo tea a ri: “Fhembeledzani vha mimuya-tshivhili yo tsikeledzwaho.” (1 Vha-Thesalonika 5:14, NW) Bivhili i amba uri na Vhakriste vha fulufhedzeaho vha a tsikeledzea.—Mishumo 14:15.
17. Ndi zwibuli zwifhio zwine ra vha nazwo zwa u khwaṱhisa mbofho ya vhushaka hashu ha Vhukriste?
17 Miṱangano ya Vhukriste i ṋea tshibuli tshavhuḓi tsha u khuthadzana na u ṱuṱuwedzana. (Vha-Heberu 10:24, 25) Honohu u ṱuṱuwedzana ha lufuno a hu fheleli fhedzi kha miṱangano ya tshivhidzo. Nṱhani hazwo, vhathu vha Mudzimu vha dovha vha ṱoḓa zwibuli zwa u ṱanganela kha vhukonani havhuḓi ha u ḓimvumvusa. Musi hu tshi vha na zwiimo zwi tsikeledzaho, ri ḓo thusana nga ṅwambo wa mbofho ya vhukonani hashu ho khwaṱhaho ho no thomiwaho. Muapostola Paulo o ri: “Hu u ri hu sa ḓo vha na u ṱalula kha muvhili, aiwa, miraḓo i . . . vhavhalelane. Nangoho muraḓo muthihi u tshi ṱhuphea, miraḓo yoṱhe i a ṱhuphea-vho, muraḓo muthihi u tshi huliswa, miraḓo yoṱhe i a takala-vho.”—1 Vha-Korinta 12:25, 26.
18. Ndi nḓowelo ifhio ine ra fanela u i iledza musi ri tshi ḓipfa ro tsikeledzea?
18 Nga zwiṅwe zwifhinga ri nga ḓipfa ro tsikeledzea vhukuma lune ri nga si kone u ḓiphina nga u konana na Vhakriste nga riṋe. Ri fanela u lwisana na eneo maḓipfele uri ri sa xelelwe nga khuthadzo na thuso ine vhatendi nga riṋe vha i ṋekedza. Bivhili i a ri sevha: “Wa tshilendele u tevhela mbilu yawe; na zwa lukuna u lwa nazwo’.” (Mirero 18:1) Vhahashu vha tshinnani na vha tshisadzini ndi musumbedzo wa uri Mudzimu u a ri ṱhogomela. Arali ra dzhiela nṱha yeneyo ndugiselelo ya lufuno, ri ḓo wana dzilafho zwifhingani zwa mutsiko.
Ivhani na Mavhonele Avhuḓi
19, 20. Maṅwalo a ri thusa hani u lwisana na mihumbulo i si yavhuḓi?
19 Musi ro tsikeledzea na u sa takala zwi a leluwa u humbula nga ha zwithu zwi si zwavhuḓi. Sa tsumbo, musi ri na vhuleme, vhaṅwe vha nga thoma u timatima vhumuya havho, nahone vha phetha nga uri vhuleme havho ndi luswayo lwa u sa takalelwa nga Mudzimu. Naho zwo ralo, humbulani uri Yehova ha lingi muthu nga “vhuvhi.” (Yakobo 1:13) Bivhili i ri: “A tshi rwa, a tshi vhaisa vhana vha vhathu, [Mudzimu] ha iti a tshi zwi funa.” (Zwililo 3:33) U fhambana na zwenezwo, Yehova u a pfa vhuṱungu musi vhashumeli vhawe vha tshi shengela.—Yesaya 63:8, 9; Sakaria 2:8.
20 Yehova ndi “Khotsi wa dzikhathutshelo, ene Mudzimu wa u kwengweledza hoṱhe.” (2 Vha-Korinta 1:3) U a ri ṱhogomela, nahone u ḓo ri hulisa nga tshifhinga tsha hone. (1 Petro 5:6, 7) U ṱhogomelwa nga Mudzimu nga lufuno tshifhinga tshoṱhe hu ḓo ri thusa u dzula ri na mavhonele avhuḓi, nahone ro takala. Yakobo o ṅwala a ri: “Ni ri ndi dakalo fhedzi, vharathu vhanga, arali ni tshi welwa nga milingo ya mivhala minzhi.” (Yakobo 1:2) Ndi ngani? U a fhindula: ‘Ngauri, arali ró fulufhedzea, ri ḓo wana dzánga ḽa vhutshilo, ḽe Murena a ri: Ndi ḓo ṋea vha mpfunaho.’—Yakobo 1:12.
21. Hu sa londwi vhuleme vhune ra ṱangana naho, ndi khwaṱhisedzo ifhio ine Mudzimu a i ṋea vhane vha fulufhedzea khae?
21 Samusi Yesu o ri sevha, ri ḓo pfa vhuṱungu shangoni. (Yohane 16:33) Fhedzi Bivhili i fulufhedzisa uri a huna “vhuṱungu, kana nyofho, kana u tovholwa, kana nḓala, kana tsiku, kana muvhango” zwine zwa ḓo ri fhandakanya na lufuno lwa Yehova na lwa Murwa wawe. (Vha-Roma 8:35, 39) Zwi khuthadza lungafhani u ḓivha uri mitsiko yoṱhe ine ra sedzana nayo ndi ya tshifhinganyana. Zwa zwino, musi ro lindela u fheliswa ha tshengelo ya vhathu, Khotsi ashu wa lufuno, Yehova, u a ri linda. Arali ra ya khae u itela u tsireledzwa, u ḓo vha “dzhavhelo ḽa vhaheḓana, dzhavhelo musi vhó [tsikeledzwa, NW].”—Psalme ya 9:9.
Ro Guda Mini?
• Vhakriste vha fanela u lavhelela mini musi vha tshi khou tshila kha ḽino shango ḽivhi?
• Thabelo dzashu dzi bvaho mbiluni dzi nga ri khwaṱhisa hani musi ro sedzana na milingo?
• Muya wa Mudzimu ndi muthusi nga nḓila-ḓe?
• Ri nga ita mini u itela u thusana?
[Mbudziso Dza Pfunzo]
[Tshifanyiso kha siaṱari 18]
Ri fanela u ṱoḓa Yehova u fana na musi ri tshi gidimela fhethu ha u khuda
[Zwifanyiso kha siaṱari 20]
Vho vhibvaho muyani vha shumisa tshibuli u itela u khoḓa na u ṱuṱuwedza vhaṅwe