“Zwi nga vha Zwavhuḓi Vhukuma Arali Vha Ita Ngauralo”

ALEXIS ndi mutukana wa miṅwaha miṱanu a dzulaho ḓoroboni ya Morelia, Mexico, ane vhabebi vhawe vha guda Bivhili na u ya miṱanganoni ya Ṱhanzi dza Yehova. Musi o ya guvhanganoni ḽa ḽiisela na muṱa wa hawe, o vhona musumbedzo wa u huwelela nnḓu nga nnḓu. O mbo ḓi sedza khotsi awe nga u ṱavhanya nahone a vhudzisa a ri: “Baba, Baba, ndi ngani vha sa yi u huwelela?” Khotsi awe vha fhindula vha ri: “Ndi kha ḓi guda u itela uri ndi ite nga u ralo.” Alexis a fhindula nga mafulufulu a ri: “Baba, zwi nga vha zwavhuḓi vhukuma arali vha ita nga u ralo.”

Onoyu ṅwana muṱuku o vhona ṱhoḓea ya u tshila u tendelana na zwine a zwi ḓivha nga ha Yehova. Samusi vhaṅwe vhazwala vhawe vhaṱuku vho vha vha tshi dzula nae nḓuni nthihi, o thoma nga u rabela Yehova nahone nga murahu a amba navho nga ha zwe a zwi guda kha Bugu Yanga ya Mafhungo a Bivhili a tshi thuswa nga vhabebi vhawe. Naho Alexis o vha a sa athu kona u vhala, o vha a tshi ḓivha zwi re kha yeneyo bugu zwavhuḓi vhukuma a tshi shumisa zwifanyiso zwi sumbedzaho eneo mafhungo. O dovha a amba uri u ṱoḓa u dalela vhathu mahayani avho u itela u vha vhudza zwe a vha a tshi khou zwi guda nga ha ndivho dza Mudzimu.

Vhukuma, vhaṱuku na vhahulwane vha nga tshila u tendelana na zwine Yehova, “Mukhethwa,” a zwi lavhelela khavho, nahone nga zwenezwo vha kona u ita mushumo muhulwane wa u ṋea vhuṱanzi nga hae kha vhathu vhoṱhe. (Yesaya 43:3; Mateo 21:16) A zwi timatimisi uri hezwo ndi zwiṅwe zwa zwithu zwavhuḓi zwine muthu a nga zwi ita.