Hu Ṱoḓea Mini zwa Vhukuma u Itela U Takala

YEHOVA “Mudzimu o takalaho,” na Yesu Kristo, “o takalaho, ane a vha Muvhusi e eṱhe,” vha a ḓivha u fhira muthu naho e ufhio nga ha zwine zwa ṱoḓea u itela u takala. (1 Timotheo 1:11; 6:15, NW.) Nga zwenezwo a zwi mangadzi uri tshiitisi tsha u takala tshi wanala Ipfini ḽa Mudzimu, Bivhili.—Ndzumbululo 1:3; 22:7.

Kha Pfunzo yawe ya Thavhani i re na bvumo, Yesu o ṱalusa zwine zwa ṱoḓea u itela u takala. O ri: “Vho takalaho” ndi (1) ndi vhane vha vhilaelela ṱhoḓea yavho ya muya, (2) vho ṱungufhalaho, (3) vha vhulenda, (4) vhané vha vha na nḓala na ḓora zwa u luga, (5) vhakhathutsheli, (6) vha mbilu dzo kunaho, (7) vhadzia-mulalo, (8) vha tovholelwaho u luga, na (9) vhane vha semiwa na u tovholwa nge vha vha vhawe.—Mateo 5:3-11, vhambedzani NW. *

Naa Maipfi a Yesu ndi a Vhukuma?

Vhungoho ha maṅwe mafhungo a Yesu ha ṱoḓi u ṱalutshedzelwa. Ndi nnyi ane a nga hanedza zwa uri muthu a re na vhulenda, a khathutshelaho, na u vha na mulalo u ṱuṱuwedzwaho nga mbilu yo kunaho u ḓo takala u fhira muthu wa mbiti, a re na khani, na a sa khathutsheli?

Naho zwo ralo, ri nga ḓivhudzisa uri vhathu vhane vha vha na nḓala na ḓora ḽa u luga kana  vho ṱungufhalaho vha nga vhidzwa hani vho takalaho. Vhenevho vhathu vha na mavhonele a vhukuma nga ha zwiimo zwa shango. Vha ‘khou lila vha tshi ṱungufhalela vhuṱudzi vhune ha khou itwa’ misini yashu. (Hesekiele 9:4) Zwenezwo nga zwone zwiṋe a zwi iti uri vha takale. Naho zwo ralo, musi vha tshi guda nga ha ndivho ya Mudzimu ya u ḓisa zwiimo zwavhuḓi kha ḽifhasi na khaṱulokwayo kha vho tsikeledzwaho, vha takala na zwikunwane.—Yesaya 11:4.

U funa zwo lugaho zwi dovha zwa ita uri vha ṱungufhale musi vha tshi kundelwa u ita zwo lugaho. Nga zwenezwo vha vhilaelela ṱhoḓea yavho ya muya. Vhenevho vhathu vho ḓiimisela u ṱoḓa vhulivhisi ha Mudzimu nga ṅwambo wa uri vha a zwi ṱhogomela uri ndi ene e eṱhe ane a nga vha thusa u kunda vhushayanungo havho.—Mirero 16:3, 9; 20:24.

Vhathu vhane vha ṱungufhala, vhane vha vha na nḓala na ḓora zwa u luga, na vhane vha vhilaelela ṱhoḓea yavho ya muya vha a ḓivha ndeme ya u vha na vhushaka havhuḓi na Musiki. U vha na vhushaka havhuḓi na vhathu zwi ḓisa dakalo, fhedzi zwa ndeme vhukuma ndi u vha na vhushaka na Mudzimu. Ee, vhathu vhane vha funa zwa vhukuma zwo lugaho, vho ḓiimiselaho u ṱanganedza vhulivhisi ha Mudzimu, hu nga ambiwa zwo tea uri vho takala.

Naho zwo ralo, ni nga wana zwi tshi konḓa u tenda uri muthu ane a khou tovholwa na u semiwa a nga takala. Fhedzi zwi fanela u vha zwi ngoho, samusi Yesu o amba nga u ralo. Nga zwenezwo, maipfi awe a nga pfeseswa nga nḓila-ḓe?

Zwi nga Konadzea Hani uri Ri Takale Naho Ri Tshi Khou Tovholwa?

Ṱhogomelani uri Yesu ho ngo sokou amba uri u semiwa na u tovholwa zwi nga ḓisa dakalo. O zwi bvisela khagala a ri: “Vho takalaho ndi vha tovholelwaho u luga, . . . musi vhathu vha tshi ni sema na u ni tovhola . . . nge na vha vhangá.” (Mateo 5:10, 11, NW.) Ngauralo dakalo ḽi vha hone fhedzi arali muthu a tshi semiwa nga ṅwambo wa u vha mu tevheli wa Kristo na nga u tshila u tendelana na maitele o lugaho e Yesu a a funza.

Hezwi zwi sumbedzwa nga zwo bvelelaho kha Vhakriste vha u thoma. Miraḓo ya Magota, vhe khothe khulwane ya Vhayuda, vho “vhidza vhaapostola, vha vha rwa, vha vha laya vha ri vha songo tsha funza nga dzina ḽa Yesu; vha kona u vha litsha.” Vhaapostola vho aravha hani? “Vhone vha ṱuwa henefho tshivhidzoni vhó takala, vha takalela zwe vha rwelwa dzina ḽa Yesu, vha wana hú hone u huliswa. Huno a vho ngo litsha u funza nḓuni khethwa na nḓuni dza vhathu maḓuvha oṱhe, vha ḓivhadza mafhungo-maḓifha a Yesu Kristo.”—Mishumo 5:40-42; 13:50-52.

Muapostola Petro o ri ṋea maṅwe mafhungo o engedzeaho malugana na u tshimbidzana vhukati ha u semiwa na u takala. O ṅwala a ri: “Arali ni tshi semelwa dzina ḽa Kristo, [takalani, NW]! Ngauri Muya wa vhurena, Muya wa Mudzimu, ndi hone wó thikha kha inwi.” (1 Petro 4:14) Ee, u shengela ni Mukriste nga ṅwambo wa u ita zwo lugaho, naho yeneyo tshengelo i si yavhuḓi, i ḓisa dakalo ḽine ḽa vha hone nga u ḓivha uri no wana muyamukhethwa wa Mudzimu. Ndi ngani muya wa Mudzimu u tshi tshimbidzana na u takala?

Kha Mishumo ya Ṋama Kana kha Zwiaṋwiwa zwa Muya?

Muya wa Mudzimu u waniwa fhedzi nga vhane vha thetshelesa Mudzimu samusi e muvhusi. (Mishumo 5:32) Yehova ha ṋei muya wawe vhane vha ita “mishumo ya ṋama.” Yeneyo mishumo ya ṋama ndi “vhupombwe, vhuyaḓa, u ṱambela zwithu, U shumela midzimu i sili, vhuṅanga huvhi, vhuswina, khani, vhuhali, dzimbiti, dzinndwa, dziphambano, u vhangisana, Vivho, u ponda, u kambiwa, vhupangwa na zwine zwa nga zwenezwo.” (Vha-Galata 5:19-21) I ngoho, “mishumo ya ṋama” yo ḓala shangoni ḽa ṋamusi. Naho zwo ralo, vhane vha i ita a vha ḓiphini nga dakalo ḽa vhukuma na ḽa tshoṱhe. Nṱhani hazwo, u ita zwenezwo zwithu zwi tshinya vhushaka havhuḓi na mashaka, dzikhonani, na vhe ra vha ḓowela.  Zwiṅwe hafhu, Ipfi ḽa Mudzimu ḽi amba uri vhane “vha ita zwauralo a vha nga ḽi vhufa ha vhuhosini ha Mudzimu.”

U fhambana na zwenezwo, Mudzimu u ṋea muya wawe vhane vha ṱahulela “zwiaṋwiwa nga muya.” Pfaneleo dzine dza katelwa kha zwenezwi zwiaṋwiwa ndi “lufuno, dakalo, mulalo, u sa fhela mbilu, vhulenda, vhuthu, lutendo, u vuḓa, u [ḓifara, NW].” (Vha-Galata 5:22, 23) Musi ri tshi sumbedza dzenedzi pfaneleo, ri ita uri hu vhe na zwiimo zwine zwa ita uri ri vhe na vhushaka havhuḓi na vhaṅwe na Mudzimu, zwine zwa bveledza dakalo ḽa vhukuma. (Sedzani bogisi.) Zwa ndeme vhukuma, nga u sumbedza lufuno, vhulenda, vhuthu na dziṅwe pfaneleo dza Mudzimu, ri takadza Yehova nahone ra vha na fulufhelo ḽavhuḓi ḽa vhutshilo vhu sa fheli shangoni ḽiswa ḽa Mudzimu ḽo lugaho.

Ni tou Khetha u Takala

Musi Wolfgang na Brigitte, vhavhingani vha dzulaho Dzheremane, vha tshi thoma u guda Bivhili nga mafulufulu, vho vha vhe na zwithu zwinzhi zwi vhonalaho zwine vhathu vha vhona uri zwi a ṱoḓea u itela u takala. Vho vha vhe vhaswa nahone vhe na mutakalo wavhuḓi. Vho vha vha tshi ambara zwiambaro zwi no ḓura, vha tshi dzula muḓini wo nakaho, nahone vhe na bindu ḽine ḽa tshimbila zwavhuḓi. Vho vha vha tshi fhedza tshifhinga tshinzhi vha tshi khou ṱoḓesa zwithu zwi vhonalaho, fhedzi zwenezwo a zwo ngo vha ṋea dakalo ḽa vhukuma. Naho zwo ralo, nga u ya ha tshifhinga, Wolfgang na Brigitte vho ita khetho ya ndeme. Vha thoma u fhedza tshifhinga na vhuḓidini ho engedzeaho vho farakanea nga zwithu zwa muya na u ṱoḓa nḓila dza u sendela tsini-tsini na Yehova. U ita havho khetho zwo shandula mavhonele avho, zwe zwa vha sudzulusela u leludza vhutshilo havho na u vha vhavulanḓila, kana vhahuweleli vha Muvhuso. Ṋamusi, vha khou shuma nga u ḓifunela ofisini ya davhi ya Ṱhanzi dza Yehova ngei Dzheremane. Nga nnḓa ha zwenezwo, vha khou guda luambo lwa Asia u itela u thusa vha bva nnḓa u guda mafhungo-ngoho a wanalaho Ipfini ḽa Mudzimu, Bivhili.

Naa vhenevha vhavhingani vho wana dakalo ḽa vhukuma? Wolfgang o ri: “U bva tshee ra thoma u farakanea nga zwithu zwa muya, ro takala nahone ro fushea. U shumela Yehova nga mbilu yoṱhe zwo dovha zwa khwaṱhisa mbingano yashu. Ro vha ri na mbingano yavhuḓi  mathomoni, fhedzi ro vha ri na vhuḓifhinduleli na madzangalelo o fhambanaho. Zwino ro farakanea kha tshipikwa tshi fanaho.”

Ndi Mini Zwine zwa Ṱoḓea u Itela u Takala?

Nga u tou pfufhifhadza: Iledzani “mishumo ya ṋama,” nahone ni ṱahulele “zwiaṋwiwa zwa muya [wa Mudzimu].” U itela u takala, muthu u fanela u ṱulutshelwa u vha na vhushaka ha tsini na Mudzimu. Muthu ane a lingedza u swikelela zwenezwi u ḓo tea ṱhaluso ya Yesu ya muthu o takalaho.

Nga zwenezwo, ni songo phetha nga ho khakheaho na ri dakalo a ḽi swikelelei. Vhukuma, zwa zwino ni nga vha na mutakalo u si wavhuḓi kana na vha na vhuleme mbinganoni yaṋu. Khamusi a ni tsha beba kana ni nga vha ni tshi lingedza u wana mushumo wavhuḓi. Khamusi a ni tsheena tshelede nnzhi u fana na u thomani. Naho zwo ralo, ivhani na tshivhindi, a ni na tshiitisi tsha u fulufhuwa! Vhuvhusi ha Muvhuso wa Mudzimu vhu ḓo piringulula honoho vhuleme na vhuṅwe vhunzhi. I ngoho, nga u ṱavhanya Yehova Mudzimu u ḓo ḓadzisa fulufhedziso ḽawe ḽo ambiwaho nga mupsalme we a ri: “Vhuhosi hau ndi ha kale na kale na lini na lini; . . . U putulula tshanḓa tshau, huno zwoṱhe zwi tshilaho U zwi fusha dakalo.” (Psalme ya 145:13, 16) Samusi vhashumeli vha Yehova shangoni ḽoṱhe vha tshi nga zwi khwaṱhisedza, u dzula ri tshi humbula ḽeneḽi fulufhedziso ḽa Yehova ḽi khwaṱhisaho zwi ḓo ni thusa vhukuma uri ni takale ṋamusi.—Ndzumbululo 21:3.

[Ṱhaluso dzi re magumoni a siaṱari]

[Bogisi/Tshifanyiso kha siaṱari 6]

Zwithu Zwine zwa Ita uri ni Takale

Lufuno lu sudzulusela vhaṅwe uri vha ni fune.

Dakalo ḽi ni ṋea maanḓa a u sedzana na vhuleme.

Mulalo u ni thusa uri vhushaka ha vhoiwe vhu sa vhe na dzikhakhathi.

U sa fhela mbilu hu ita uri ni kone u dzula no takala na musi ni mulingoni.

Vhulenda vhu ita uri vhaṅwe vha sendele tsini haṋu.

Vhuthu vhu ḓo ita uri vhaṅwe vha ni thuse musi ni tshi ṱoḓa thuso.

Lutendo lu ḓo ita uri ni vhe na vhungoho nga ha vhulivhisi ha Mudzimu ha lufuno.

U vuḓa hu ḓo ita uri mbilu yaṋu, muhumbulo, na muvhili zwi dzike.

U ḓifara zwi ḓo ita uri vhukhakhi haṋu vhu fhungudzee.

[Zwifanyiso kha siaṱari 7]

U itela u wana dakalo, ni fanela u fusha ṱhoḓea yaṋu ya muya