Mbudziso dzi Bvaho ha Vhavhali

Ndi ngani Ṱhanzi dza Yehova dzi tshi dzhia tshivhalo tsha 144 000 tsho bulwaho kha bugu ya Ndzumbululo tshi tsha vhukuma nṱhani ha u tshi dzhia tshi tsha pfanyisedzo?

Muapostola Yohane o ṅwala a ri: “Nda pfa tshivhalo tsha vho swaiwaho u pfi ndi ḓana na mahumi maṋa a zwigídi na zwigídi zwiṋa.” (Ndzumbululo 7:4) Bivhilini, mubulo une wa ri “vho swaiwaho” u ambela kha tshigwada tsha vhathu vho khethwaho vha tshi bva kha vhathu u itela u vhusa na Kristo ngei ṱaḓulu vha tshi vhusa ḽifhasi ḽa Paradiso ḽine ḽa ḓo vha hone. (2 Vha-Korinta 1:21, 22; Ndzumbululo 5:9, 10; 20:6) Tshivhalo tshavho, tsha 144 000, tshi dzhiiwa tshi tsha vhukuma nga zwiitisi zwo vhalaho. Tshiṅwe tshiitisi tshi wanala kha vhubvo ha mafhungo o livhaho a Ndzumbululo 7:4.

Musi muapostola Yohane o no vhudzwa bononi nga ha tshenetshi tshigwada tsha vhathu vha 144 000, o dovha a vhona tshiṅwe tshigwada. Yohane o ṱalusa tshenetshi tshigwada tsha vhuvhili sa “gogo ḽihulu, ḽi sa koni u vhalwa nga muthu, ḽa tshakha na khoro, na mbeu na ndimi dzoṱhe.” Ḽeneḽi gogo ḽihulu ḽi ambela kha vhane vha ḓo ponyoka “maṱunguni mahulu” ane a khou ḓa, ane a ḓo fhelisa ḽino shango ḽivhi.—Ndzumbululo 7:9, 14.

Naho zwo ralo, ṱhogomelani phambano ye Yohane a i sumbedza vhukati ha ndimana ya 4 na ya 9 ya Ndzumbululo ndima ya 7. O amba uri tshigwada tsha u thoma, “tsha vho swaiwaho,” tshi na mbalo yo livhaho. Naho zwo ralo, tshigwada tsha vhuvhili, “gogo ḽihulu,” a tshi na mbalo yo livhaho. Ri na zwenezwo muhumbuloni, zwi a pfesesea u dzhia mbalo ya 144 000 i ya vhukuma. Arali mbalo ya 144 000 yo vha i ya pfanyisedzo nahone i tshi khou ambela kha tshigwada tshi sa vhalei, mvelelo ya phambano vhukati ha dzenedzo ndimana mbili yo vha i sa ḓo vha hone. Nga zwenezwo, vhubvo ha eneo mafhungo vhu sumbedza uri tshenetsho tshivhalo tsha 144 000 tshi fanela u dzhiiwa tshi tsha vhukuma.

Vhagudi vho fhambanaho vha Bivhili vha tshifhingani tsho fhiraho na zwino, vho tendelana kha muhumbulo muthihi—wa uri yeneyo mbalo ndi ya vhukuma. Sa tsumbo, a tshi amba nga Ndzumbululo 7:4, 9, Dokotela Ethelbert W. Bullinger, muṅwali wa ṱhalusamaipfi wa Britain, o amba miṅwahani ya 100 yo fhiraho a ri: “Ndi mbuno i pfeseseaho vhukuma: mbalo yo livhaho yo fhambana na mbalo i songo livhaho ya yeneyo ndima.” (The Apocalypse or “The Day of the Lord,” siaṱari 282) Zwenezwino, Robert L. Thomas, Muṱuku, ane a vha muphurofesa wa Thestamennde Ntswa wa Tshikoloni tsha Vhufunzi ngei United States, o ṅwala a ri: “U dzhiiwa ha mbalo ya 144 000 sa ya pfanyisedzo a zwi na tshiitisi tshi pfalaho.” O dovha a ri: “Mbalo yo livhaho [i re kha 7:4] yo fhambana na mbalo i songo livhaho i re kha 7:9. Arali ya dzhiiwa i ya pfanyisedzo, a huna mbalo i re kha yeneyo bugu ine ya nga dzhiiwa i ya vhukuma.”—Revelation: An Exegetical Commentary, Volumu 1, siaṱari 474.

Vhaṅwe vha amba uri samusi Ndzumbululo i na luambo lwa pfanyisedzo, mbalo dzoṱhe dzi wanalaho kha yeneyi bugu, u katela na mbalo ya 144 000, dzi fanela u vha dzi dza pfanyisedzo.  (Ndzumbululo 1:1, 4; 2:10) Naho zwo ralo, u phetha nga u ralo zwo khakhea vhukuma. Vhukuma, Ndzumbululo i na mbalo nnzhi dza pfanyisedzo, fhedzi i dovha ya vha na mbalo dza vhukuma. Sa tsumbo, Yohane o amba nga “madzina a fumi-na-mavhili a vhaapostola vha fumi na vhavhili vha Ngwana.” (Ndzumbululo 21:14) Zwi khagala uri mbalo ya 12 yo bulwaho kha yeneyi ndimana ndi ya vhukuma, a si ya pfanyisedzo. Zwiṅwe hafhu, muapostola Yohane o ṅwala nga ha “miṅwaha ya tshigidi” ya u vhusa ha Kristo. Yeneyo mbalo i fanela u dzhiiwa i ya vhukuma samusi u ṱolisiswa zwavhuḓi ha Bivhili hu tshi sumbedza. * (Ndzumbululo 20:3, 5-7, vhambedzani NW.) Nga zwenezwo, zwa uri mbalo i re kha Ndzumbululo i fanela u dzhiiwa i ya vhukuma kana i ya pfanyisedzo zwi ḓitika nga vhubvo hayo ha mafhungo.

Muhumbulo wa uri mbalo ya 144 000 ndi ya vhukuma na uri u ambela kha mbalo yo linganyiselwaho, tshigwada tshiṱuku vhukuma tshi tshi vhambedzwa na “gogo ḽihulu,” u dovha wa tendelana na dziṅwe ndima dza Bivhili. Sa tsumbo, nga murahu kha bono ḽe muapostola Yohane a ḽi vhona, vha 144 000 vha ṱaluswa sa vho “rengululwaho kha vhathu uri vha vhe zwiranzhe.” (Ndzumbululo 14:1, 4) Hafhu, musi Yesu e kha ḽifhasi, o amba nga ha vhane vha ḓo vhusa nae Muvhusoni wawe wa ṱaḓulu nahone a vha vhidza “sambi ḽiṱuku.” (Luka 12:32; 22:29) Vhukuma, vhathu vhane vha ḓo vhusa ṱaḓulu ndi vha si gathi musi vha tshi vhambedzwa na vhathu vhane vha ḓo dzula kha ḽifhasi ḽa Paradiso ine ya khou ḓa.

Nga zwenezwo, vhubvo ha mafhungo a Ndzumbululo 7:4 na zwo ṱaluswaho na maṅwe mafhungo a tshimbidzanaho na zwenezwo a wanalaho huṅwe fhethu Bivhilini a khwaṱhisedza uri mbalo ya 144 000 i fanela u dzhiiwa i ya vhukuma. I ambela kha vhane vha ḓo vhusa ṱaḓulu na Kristo kha ḽifhasi ḽa paradiso, ḽine ḽa ḓo ḓadzwa nga tshivhalo tshihulwane tshi sa vhalei tsha vhathu vho takalaho vhane vha rabela Yehova Mudzimu.—Psalme ya 37:29.

[Ṱhaluso dzi re magumoni a siaṱari]

[Maipfi o ṱumbulwaho kha siaṱari 31]

Tshivhalo tsha maḽaifa a ṱaḓulu ndi 144 000 fhedzi

[Tshifanyiso kha siaṱari 31]

“Gogo ḽihulu” a ḽi vhalei

[Ṱhaluso ya Vhubvo ha Tshifanyiso kha siaṱari 31]

Stars: Courtesy of Anglo-Australian Observatory, photograph by David Malin