Nḓila Ine Ra Nga Sedzana Ngayo Na u Kulea Nungo

NAA no kulea nungo? Kha tshino tshifhinga tshi re na vhuleme na khakhathi, zwo tou ralo kha vhathu vhanzhi. Vhaṅwe vho kulea nungo nga ṅwambo wa uri a vha shumi. Vhaṅwe vha khou sedzana na mvelelo dza khombo. Nahone vhaṅwe vha khou lwisana na vhuleme ha muṱa, vhulwadze vhuhulwane, kana u ḓipfa vhe na vhumvumvu.

Arali no kulea nungo, ndi ngafhi hune na nga ṱoḓa hone thuso? Vha dzimilioni shangoni ḽoṱhe vho khuthadzwa nga u vhala Ipfi ḽa Mudzimu, Bivhili. Vha a khwaṱhisedzwa nga maipfi a muapostola Paulo, we a ri: “Nga hu rendwe Mudzimu, a re Khotsi-a Murena washu Yesu Kristo, ene Khotsi wa dzikhathutshelo, ene Mudzimu wa u kwengweledza hoṱhe. Ané a ri kwengweledza maṱhuphoni ashu oṱhe.” (2 Vha-Korinta 1:3, 4) Ndi ngani ni sa vhali zwenezwi na dziṅwe ndimana Bivhilini yaṋu. U ita nga u ralo zwi ḓo ‘fhumudza mbilu yaṋu nahone zwa ni khwaṱhisa.’—2 Vha-Thesalonika 2:17.

Thuso ya u sedzana na u kulea nungo i nga dovha ya waniwa nga u ita vhukonani na vhane vha shumela Yehova. Mirero 12:25 i ri: “Ma-ḽa-mbilu ma-tsika-muthu; i takadzwa nga ḽa vhuthu.” Musi ri tshi ya miṱanganoni ya Vhukriste, ri pfa ‘fhungo ḽa u naka,’ ḽine ḽa ‘ḓifhela mbilu na u ilafha miraḓo.’ (Mirero 16:24) Ndi ngani ni sa yi miṱanganoni Holoni ya Muvhuso ya Ṱhanzi dza Yehova u itela u ḓivhonela nga aṋu maṱo mvelelo dzi khwaṱhisaho dzine yeneyo miṱangano ya nga vha nadzo?

Ni nga dovha na vhuyelwa nga maanḓa a thabelo. Arali ni tshi ḓipfa no tsikeledzea nga mbilaelo dza vhutshilo, vhudzani “Mupfi wa dzithabelo” maḓipfele aṋu a vhukuma. (Psalme ya 65:2) Musiki washu, Yehova Mudzimu, u ri pfesesa khwine u fhira nḓila ine ra ḓipfesesa ngayo. Ri nga ḓitika nga thuso yawe. Ipfi ḽawe ḽi ri fulufhedzisa uri: “Kumedzela Yehova zwi U lemelaho, u ḓo U ṱhaḓula; ha nga litshi muvhuya a tshi dzula ó khakhelwa.” (Psalme ya 55:22) Ee, “vho fulufhedzaho Yehova vha wana maanḓa maswa.”—Yesaya 40:31.

Yehova Mudzimu o ri ṋea zwoṱhe zwine ra zwi ṱoḓa u itela u sedzana na u kulea nungo nga hu bvelelaho. Naa ni ḓo zwi shumisa?