Mbudziso dzi Bvaho ha Vhavhali

Ndi ngani vhanna vha Vhaisiraele vho vha vho tendelwa u vhinga vhasadzi vha vhannḓa vhe vha thubiwa ngeno Mulayo wa Mushe wo vha u tshi laya nga ho livhaho uri vha songo vhinga kha vhaṅwe vhannḓa?—Doiteronomio 7:1-3; 21:10, 11.

Tshiitisi tsha u tendela zwenezwi tshi katela zwiimo zwo khetheaho. Yehova o laedza Vhaisiraele u fhelisa miḓi ya tshaka dza sumbe dza shangoni ḽa Vhakanana na u vhulaha vhadzulapo vhayo vhoṱhe. (Doiteronomio 20:15-18) Malugana na dziṅwe tshaka, zwi vhonala uri vhaaluwa vhe vha vha vha tshi ponyoka vho vha vhe vhasadzi vho thubwaho vha sa athu ḓivha munna. (Numeri 31:17, 18; Doiteronomio 20:14) Munna wa Muisiraele o vha a tshi nga vhinga onoyo musadzi, fhedzi zwenezwo o vha a tshi nga zwi ita arali onoyo musadzi a dzhia vhuṅwe vhukando.

Malugana na vhukando vhune onoyo musadzi a tea u vhu dzhia, Bivhili yo ri: “A palule ṱhoho, a tumulele dziṋala, a bvule zwiambaro zwe a vha ó fuka misi a tshi thubiwa, a dzule nḓuni yau a fhedze ṅwedzi a tshi lilela khotsi-awe na mme-awe; U kone u mu dzea, wa vha munna wawe, ene a vha musadzi wau.”—Doiteronomio 21:12, 13.

Musadzi a sa ḓivhi munna o thubiwaho ane Muisiraele a khou ṱoḓa u mu vhinga o vha a tshi tea uri a palule ṱhoho. U vheula mavhudzi zwo vha zwi tshi sumbedza u pfa vhuṱungu kana u tsikeledzea. (Yesaya 3:24) Sa tsumbo, musi musimulalushaka Yobo a tshi felwa nga vhana vhawe vhoṱhe na u xelelwa nga thundu yawe, o vheula mavhudzi a ṱhohoni yawe sa tshiga tsha u pfa vhuṱungu. (Yobo 1:20) Musadzi wa vhannḓa o vha a tshi tea u dovha a tumulela ṋala dzawe u itela uri naho arali dzo penndwa, zwanḓa zwawe zwi songo vhonala zwi zwi kungaho. (Doiteronomio 21:12) “Zwiambaro zwe [musadzi] a vha ó fuka misi a tshi thubiwa” zwe a vha a tshi tea u zwi bvula ndi mini? Zwo vha zwo ḓowelea uri musadzi wa miḓini ya vhahedeni we a vha a tsini na u thubiwa a ambare zwiambaro zwawe zwavhuḓi. Vho vha vha tshi ita zwenezwo u itela u kunga vhane vha khou vha thuba. Onoyo musadzi o thubiwaho o vha a tshi tea u bvula zwenezwo zwiambaro musi a tshi kha ḓi lila.

Musadzi o thubwaho we a vha a tshi ḓo vha musadzi wa munna wa Muisiraele o vha a tshi fanela u lilela vhahawe a vha funaho vho faho ṅwedzi muthihi. Miḓi yo kundwaho yo vha i tshi tea u fheliswa lwa tshoṱhe nga vhuronwane lune ha si ponyoke na muthihi wa muṱa wa hawe woṱhe na mashaka. Samusi maswole a Vhaisiraele o fhelisa midzimu ya hawe, zwi amba uri vhurereli hawe na hone vhu ḓo vha ho fheliswa. Ṅwedzi wa u lila u dovha wa shuma sa wa u kunakiswa hune musadzi o thubwaho a ḓo ṱutshela maitele oṱhe a vhurereli hawe ha kale.

Naho zwo ralo, honoho vhuimo ho vha ho fhambana kha vhaṅwe vhasadzi vha vhannḓa. Malugana na zwenezwi, Yehova o laedza a ri: “Ni songo dzeana navho’; ṅwananyana wa hau a songo dzewa nga munna wa havho; na murwa wau U songo mu dzekisa ṅwananyana wa havho.” (Doiteronomio 7:3) Ndi ngani ho itwa yeneyi thivhelo? Doiteronomio 7:4 i ri: “Ngauri vha nga ḓo ungelela vhana vhau vha ndaṱa vha shumela midzimu i sili.” Nga zwenezwo, yeneyo thivhelo yo vha i ya u tsireledza Vhaisiraele uri vha sa tshikafhadze vhurereli havho. Naho zwo ralo, vhasadzi vha vhannḓa vho ṱaluswaho kha Doiteronomio 21:10-13 vho vha vhe si na khombo yo raloho. Mashaka awe oṱhe a vha o fa, nahone zwifanyiso zwi imelaho midzimu ya hawe zwo fheliswa. Ha na vhukwamani na vhatevheli vha vhurereli ha mazwifhi. Vhaisiraele vho vha vho tendelwa u vhinga wa nnḓa nga fhasi ha zwiimo zwo raloho.